.jpg)
ស្ត្រីម្នាក់កំពុងដើរមុខរោងចក្រ W&D កាលពីម្សិលមិញ។ ផា លីណា
ភ្នំពេញៈ កម្មកររោងចក្រកាត់ដេរ W&D នឹងប្រមូលផ្តុំគ្នាតវ៉ានៅមុខរោងចក្របន្តទៀតនៅថ្ងៃទី ៨ ខែមករានេះ បន្ទាប់ពីថៅកែក្រុមហ៊ុនបានសម្រេចបញ្ឈប់ពួកគេជាង ១០០០ នាក់ពីការងារ ក្រោយពីពួកគេបានធ្វើកូដកម្មទាមទារប្រាក់អត្ថប្រយោជន៍ផ្សេងៗអស់រយៈពេលជិត ២ សប្តាហ៍។
យោងសេចក្តីប្រកាសព័ត៌មានដែលចេញដោយក្រុមហ៊ុន W&D ចុះថ្ងៃទី ៤ ខែមករាបានសម្រេចលុបឈ្មោះកម្មករនិយោជិតជាង ១០០០ នាក់។ ការបញ្ឈប់នេះក្រុមហ៊ុនសំអាងតាមកំណត់ហេតុអនុវត្តន៍របស់សាលាដំបូងរាជធានីភ្នំពេញដែលតម្រូវឲ្យកម្មករបញ្ឈប់ការធ្វើកូដកម្ម និងចូលធ្វើការវិញក្នុងរយៈពេល ៤៨ ម៉ោង។
ខណៈកម្មករមិនព្រមចូលធ្វើការតាមការកំណត់ភាគីក្រុមហ៊ុនក៏បានសម្រេចបញ្ឈប់កម្មករ និងតម្រូវឲ្យកម្មករទាំងអស់ដែលខ្លួនបានបញ្ឈប់នោះមកបើកប្រាក់ចុងក្រោយរបស់ខ្លួននៅម៉ោង ៣ រសៀលថ្ងៃទី ៨ ខែមករានេះ។
ការឈានដល់មានការចេញដីកាសម្រេចពីតុលាការបានធ្វើឡើង បន្ទាប់ពីភាគីក្រុមហ៊ុន និងភាគីកម្មករក្រោមការសម្របសម្រួលពីក្រសួងការងារ និងក្រុមប្រឹក្សាអាជ្ញាកណ្តាលមិនអាចស្វែងរកដំណោះស្រាយបានទើបខាងក្រុមហ៊ុន W&D បានស្នើសុំសេចក្តីសម្រេចពីតុលាការ ហើយតុលាការក៏បានចេញសេចក្តីសម្រេចមួយកាលពីថ្ងៃទី ៣១ ខែធ្នូ ឆ្នាំ ២០១៨ ដោយតម្រូវឲ្យកម្មករចូលធ្វើការវិញក្នុងរយៈពេល ៤៨ ម៉ោង។
លោក ប៊ុន គីមសាន តំណាងកម្មករក្រុមហ៊ុន W&D បានប្រាប់ភ្នំពេញប៉ុស្តិ៍ពីម្សិលមិញថាការបញ្ឈប់ពួកគាត់ពីការងារ គឺជារឿងអយុត្តិធម៌បំផុត ហើយលោកអះអាងថា កម្មករនឹងមិនបញ្ឈប់ការតវ៉ារបស់ខ្លួនក្នុងការស្វែងរកដំណោះស្រាយនោះទេ។ លោកថា កម្មករទាំងអស់នឹងបន្តការប្រមូលផ្តុំគ្នាបន្តទៀតស្របពេលថៅកែរោងចក្រតម្រូវឱ្យកម្មករមកទទួលប្រាក់ចុងក្រោយនៅថ្ងៃនេះ។
លោកបន្តថា៖ «ស្អែកហ្នឹង (ថ្ងៃទី ៨ មករា) ខ្ញុំត្រូវតែតវ៉ាទាមទារចំណុចរបស់ខ្ញុំរឿងអីដែលត្រូវបញ្ឈប់ពួកខ្ញុំ ដោយមិនបានជូនដំណឹងតាមច្បាប់ដែលតម្រូវជូនដំណឹងឲ្យដឹង ៤៨ ម៉ោងជាមុន បើទោះជាតុលាការបានចេញប្រកាសមកក៏ដោយ។ ខ្ញុំសូមស្នើដល់សម្តេច ហ៊ុន សែន ឲ្យគាត់ជួយហើយសង្ឃឹមថាគាត់នឹងឮ និងជួយពួកខ្ញុំដែលកំពុងជួបការលំបាកខាងជីវភាពយ៉ាងខ្លាំង»។
ភ្នំពេញប៉ុស្តិ៍មិនអាចទាក់ទងសុំការអត្ថាធិប្បាយបន្ថែមពីថៅកែក្រុមហ៊ុន W&D បានទេកាលពីម្សិលមិញ។
ប៉ុន្តែលោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈថ្លែងថាទាំងនេះគឺជាការអនុវត្តនីតិវិធីដោះស្រាយវិវាទការងាររួម ហើយកម្មករដែលត្រូវបានក្រុមហ៊ុនបញ្ឈប់ពីការងារនេះ ជាទូទៅក្រុមហ៊ុនអាចនឹងទទួលចូលធ្វើការវិញ ប្រសិនបុគ្គលនោះមិនជាប់ពាក់ព័ន្ធនឹងបទល្មើសផ្សេងៗ ក្នុងអំឡុងពេលកូដកម្ម។ លោកសួរថ្លែងថាក្រសួងនឹងរួមជាមួយនិយោជកនឹងពិនិត្យសម្របសម្រួលករណីនេះបន្តទៀត។
លោកបន្តថា៖ «បន្ថែមពីលើនេះរាជរដ្ឋាភិបាលបានធានារួចហើយថានឹងមិនឲ្យបងប្អូនកម្មករនិយោជិតបាត់បង់ផលប្រយោជន៍នៅពេលរោងចក្រក្ស័យធននោះទេ គឺរដ្ឋាភិបាលនឹងបញ្ចេញសាច់ប្រាក់ ដើម្បីទូទាត់អត្ថប្រយោជន៍ឲ្យបងប្អូនប្រសិនជាមានរោងចក្រណាមួយក្ស័យធន ឬបិទទ្វារដោយម្ចាស់រត់ចោល។ ដូច្នេះមិនមានចំណុចដែលបងប្អូនកម្មករនិយោជិតព្រួយបារម្ភរឿងបាត់បង់អតីតភាពនោះទេ»។
បើតាមលោកសួរយោងតាមច្បាប់ និងប្រកាសរបស់ក្រសួងគឺនិយោជកត្រូវទូទាត់អតីតភាពការងារ ១ ឆ្នាំ ២ ដង ដល់កម្មករនិយោជិតដែលប្រើប្រាស់កិច្ចសន្យារយៈពេលវែង គឺនៅក្នុងខែមិថុនា និងខែធ្នូហើយចំពោះការទាមទារស្នើសុំឲ្យនិយោជកផ្តាច់កិច្ចសន្យារួចទូទាត់អតីតភាពការងារ ១០០ ភាគរយក្នុងពេលតែមួយរបស់កម្មករនោះគឺមិនមានចែងក្នុងច្បាប់នោះទេ។
ការតវ៉ាទាមទារប្រាក់អត្ថប្រយោជន៍របស់កម្មករនេះបានកើតមានឡើងជិត ២ សប្តាហ៍មកហើយដោយក្នុងនោះកម្មករ កម្មការិនី បានប្រមូលផ្តុំគ្នាតវ៉ា នៅមុខរោងចក្ររបស់ខ្លួនស្ថិតក្នុងសង្កាត់ស្ទឹងមានជ័យទី ៣ ខណ្ឌមានជ័យរហូតឈានដល់បិទផ្លូវ ២១៧ កាលពីថ្ងៃទី ៥ មករា ឆ្នាំ ២០១៩ ដោយសារតែគ្មានដំណោះស្រាយ។
លោក ប៉ាវ ស៊ីណា ប្រធានសហជីពចលនាកម្មករកម្ពុជាថ្លែងថាករណីនេះមិនមែនជារឿងថ្មីទេ ដែលក្រុមហ៊ុនតែងតែប្រើប្រព័ន្ធតុលាការមកគាបសង្កត់ និងបញ្ឈប់កម្មករពីការងារនៅពេលពួកគាត់ព្យាយាមតវ៉ា និងទាមទារលក្ខខណ្ឌការងារផ្សេងៗ។
លោកថា បើសិនជានិយោជកនៅតែបន្តប្រើប្រាស់មធ្យោបាយតុលាការបែបនេះនឹងធ្វើឲ្យបាត់បង់សិទ្ធិរបស់កម្មករ ហើយចរន្តនៃការតវ៉ារបស់កម្មករនឹងមានសម្ទុះកើនឡើង ព្រោះតែបញ្ហាកម្មករមិនត្រូវបានដោះស្រាយ។ ដូច្នេះលោកស្នើឱ្យភាគីពាក់ព័ន្ធ ជាពិសេសក្រសួងការងារគួរមានវិធានការ និងស្វែងរកដំណោះស្រាយសមរម្យសម្រាប់កម្មករ។
«យើងឃើញហើយកម្មករទាមទារឲ្យក្រុមហ៊ុនហ្នឹងផ្តល់ប្រាក់បំណាច់ឲ្យគាត់ហើយនៅពេលដែលគាត់ទាមទារមិនទាន់ទាំងទទួលបានដំណោះស្រាយផង បែរជាគាត់រងបន្ទុកក្នុងការបញ្ឈប់ពីការងារទៀត។ អ៊ីចឹងមានន័យថាទុក្ខលើទុក្ខ ដែលខ្ញុំគិតថាជម្រើសមានតែគូភាគីទាំងអស់អាចចូលក្នុងតុចរចាដើម្បីស្វែងរកចំណុចរួមមួយដោយមិនចាំបាច់ប្រើប្រាស់ប្រព័ន្ធតុលាការនៅក្នុងការបញ្ចប់ការងារកម្មករអ៊ីចឹងទេ»។
បើតាមកំណត់ហេតុអនុវត្តន៍ដីកាសម្រេចចាត់ចែងបណ្តោះអាសន្នចុះថ្ងៃទី ២ ខែមករា ឆ្នាំ ២០១៩ ដែលឃើញបិទនៅមុខទ្វាររោងចក្រ W&D កាលពីម្សិលមិញដែលមាន ២ ចំណុចត្រង់ចំណុចទី ១ បានសរសេរថាបង្គាប់ឲ្យបុគ្គលិកកម្មករនិយោជិតដែលកំពុងចូលរួមធ្វើកូដកម្មនៅក្រុមហ៊ុន W&D ឲ្យចូលធ្វើការងារដូចដើមវិញជាធម្មតាដោយទៀងទាត់តាមវេនតាមក្រុម ស្របតាមតួនាទី និងភារកិច្ចរៀងៗខ្លួនក្នុងរយៈពេល ៤៨ ម៉ោងគិតចាប់ពីថ្ងៃចេញដីកាសម្រេចនេះដោយអនុវត្តឲ្យបានត្រឹមត្រូវតាមមាត្រា ៣៣៧ នៃច្បាប់ស្តីពីការងារជាបណ្តោះអាសន្នរហូតដល់រឿងអង្គសេចក្តីត្រូវបានតុលាការដោះស្រាយចប់ជាស្ថាពរ៕
