កំពង់ឆ្នាំងៈ យ៉ាងហោចណាស់កម្មករ ១៧ នាក់បានរងរបួសធ្ងន់ និងស្រាល ក្នុងគ្រោះថ្នាក់ចរាចរណ៍មួយលើកំណាត់ផ្លូវជាតិលេខ ៥ នៅចន្លោះគីឡូម៉ែត្រលេខ ៤៦ និង ៤៧ ស្ថិតក្នុងឃុំសេដ្ឋី ស្រុកសាមគ្គីមានជ័យកាលពីល្ងាចថ្ងៃពុធ។
លោក សេង ចិន្តា អធិការស្រុកសាមគ្គីមានជ័យថ្លែងពីម្សិលមិញថា កម្មករដែលរងរបួសនៅក្នុងហេតុការណ៍គ្រោះថ្នាក់ចរាចរណ៍នេះចំនួន ១៧ នាក់គឺធ្វើការនៅរោងចក្រកាត់ដេរសម្លៀកបំពាក់ចំនួន ៤ ផ្សេងគ្នានៅក្នុងស្រុកកំពង់ត្រឡាច។
លោកបានបញ្ជាក់ថា៖ «ក្នុងចំណោមកម្មករដែលរងរបួសទាំង ១៧ នាក់នោះ មាន ៣ នាក់រងរបួសធ្ងន់ត្រូវបានបញ្ជូនទៅព្យាបាលបន្តនៅមន្ទីរពេទ្យកាល់ម៉ែតរាជធានីភ្នំពេញ។ ចំណែក ១៤ នាក់ទៀតសម្រាកព្យាបាលនៅមន្ទីរពេទ្យបង្អែកស្រុកកំពង់ត្រឡាច និងគ្លីនិក តែ វណ្ណា ក្នុងស្រុកកំពង់ត្រឡាច»។
លោកបន្ថែមថា៖ «តាមការបញ្ជាក់ពីកម្មករគ្រោះថ្នាក់ចរាចរណ៍នេះកើតឡើងដោយសារតែអ្នកបើកបរបានបួងចង្កូតរថយន្ត ដើម្បីគេចពីម៉ូតូ ១ គ្រឿងដែលបើកបញ្ច្រាសទិសគ្នា ហើយបានរអិលធ្លាក់ពីចំណោតផ្លូវបណ្ដាលឲ្យកម្មករ ១៧ នាក់ក្នុងចំណោម ៦០ នាក់នៅលើរថយន្តនោះ រអិលធ្លាក់រងរបួសធ្ងន់ និងស្រាល»។
អ្នកស្រី ធី គន្ធា នាយករដ្ឋបាលរោងចក្រ Horizon Out-door (Cambodia) Co., Ltd បានប្រាប់ភ្នំពេញប៉ុស្តិ៍ថា ក្រោយពីចុះសាកសួរសុខទុក្ខកម្មកររងគ្រោះដល់មន្ទីរពេទ្យរួចមកខាងរោងចក្របានអនុញ្ញាតឲ្យកម្មករទាំងនោះ ឈប់សម្រាក ១ ថ្ងៃ ដើម្បីព្យាបាលរបួសដោយមិនកាត់ប្រាក់ឈ្នួល និងប្រាក់អត្ថប្រយោជន៍ផ្សេងៗ។
អ្នកស្រីបានបញ្ជាក់ថា៖ «ពួកគាត់មានរបួសស្រាលទេ ប៉ុន្តែពួកគាត់នៅមានភាពតក់ស្លុតក្នុងអារម្មណ៍នៅឡើយ ដូច្នេះខាងភាគីរោងចក្រយើង បានសម្រេចអនុញ្ញាតឲ្យពួកគាត់បានឈប់សម្រាក ១ ថ្ងៃទៀតដោយមិនកាត់ប្រាក់ឈ្នួល និងប្រាក់អត្ថប្រយោជន៍ផ្សេងៗពីពួកគាត់ឡើយ»៕