The Phnom Penh Post Search

Search form

Logo of Phnom Penh Post newspaper Phnom Penh Post - កម្មករ ២០% មិន​ទាន់​ហ៊ាន​ចូល​ធ្វើ​ការ​ខ្លាច​មាន​ចលាចល




កម្មករ ២០% មិន​ទាន់​ហ៊ាន​ចូល​ធ្វើ​ការ​ខ្លាច​មាន​ចលាចល

កម្មករ ២០% មិន​ទាន់​ហ៊ាន​ចូល​ធ្វើ​ការ​ខ្លាច​មាន​ចលាចល

130809_07b
អ្នករង់ចាំបោះឆ្នោតនៅការិយាល័យមួយនៅខេត្ត ព្រៃវែង ម៉ៃ វីរៈ

ភ្នំពេញៈ គ្រប់​ផ្នែក​ក្នុង​ឧស្សាហកម្ម​កាត់ដេរ កំពុង​ព្រួយ​បារម្ភ​ថា កម្មករ​ដែល​ភ័យ​ខ្លាច​ជម្លោះ​ហិង្សា​នយោបាយ​ទាក់​ទង​នឹង​ការ​បោះឆ្នោត អាច​ចាក​ចេញ​ពី​ការងារ និង​វិល​ត្រឡប់​ទៅ​ខេត្ត​កំណើត​របស់​ពួក​គេ​វិញ បន្ទាប់​ពី​បើក​ប្រាក់​ខែ​នៅ​ប៉ុន្មាន​ថ្ងៃ​ទៀត​នេះ ខណៈ​ដែល​កម្មករ ២០ ភាគរយ​ផ្សេង​ទៀត មិន​ទាន់​ហ៊ាន​វិល​ត្រឡប់​មក​ធ្វើ​ការ​វិញ​នៅ​ឡើយ​ចាប់​តាំង​ពី​ថ្ងៃ​បោះឆ្នោត​មក។

ក្នុង​សេចក្តី​ថ្លែង​ការណ៍​ដែល​ចេញ​ផ្សាយ​កាល​ពី​ថ្ងៃ​អង្គារ សហជីព ស៊ីខៅឌូ បាន​ចូល​រួម​ជាមួយ​នឹង​រដ្ឋាភិបាល​ដោយ​ស្នើ​សុំ​កម្មករ ដែល​ទៅ​ផ្ទះ​តាំង​ពីថ្ងៃ​ទី២៨ ខែ កក្កដា ឲ្យ​វិល​ត្រឡប់​មក​ធ្វើ​ការ​វិញ ហើយ​ស្នើ​កម្មករ​ឲ្យ​បន្ត​រស់​នៅ​ភ្នំពេញ​វិញ។

លោក គង់ អាទិត្យ អនុ​ប្រធាន​សហជីព ស៊ីខៅឌូ បាន​ថ្លែង​ថា៖ «កម្មករ​អាច​ចាក​ចេញ ក្នុង​រយៈ​ពេល​ប៉ុន្មាន​ថ្ងៃ​ទៀត បន្ទាប់​ពី​ពួក​គេ​បើក​ប្រាក់​ខែ​។ យោង​តាម​ស្ថានការណ៍ គ្មាន​អ្នក​ណា​ម្នាក់​អាច​និយាយ​បាន​ទេ ថា​តើ នឹង​មាន​អ្វី​កើត​ឡើង ទាក់​ទង​នឹង​រឿង​នយោបាយ ប៉ុន្តែ​យើង​ប៉ាន់​ប្រមាណ​ថា វា​នឹង​មិន​ធ្ងន់​ធ្ងរ​ទេ»។

នៅ​រោងចក្រ​កាត់​ដេរ​នៅ​ភ្នំពេញ​ដែល​តម្រូវ​ដោយ​ក្រសួង​ការងារ​ឲ្យ​អនុញ្ញាត​ឲ្យ​កម្មករ​ឈប់​សម្រាក​បី​ថ្ងៃ ដើម្បី​វិល​ត្រឡប់ ទៅ​ខេត្ត​ដើម្បី​បោះឆ្នោត នៅ​ពេល​ដល់​ថ្ងៃ​កំណត់​ចូល​ធ្វើ​ការ​វិញ នៅ​ថ្ងៃ​ទី ២៩ ខែ កក្កដា រោងចក្រ​កាត់​ដេរ​ជា​ច្រើន បាន​រាយការណ៍​ថា កម្មករ​មិន​បាន​វិល​ត្រឡប់​មក​ធ្វើ​ការ​វិញ​ទេ។ កម្មករ​មួយ​ចំនួន បាន​ប្រាប់​ភ្នំពេញ ប៉ុស្តិ៍ ថា ពួកគេ​បាន​សម្រេច​ចិត្ត ឬ​ក្រុម​គ្រួសារ ប្រាប់​ពួកគេ​ឲ្យ​នៅ​ផ្ទះ បន្ទាប់​ពី​បាន​ឮ​ពាក្យ​ចចាម​អារ៉ាម​ថា មាន​កង​កម្លាំង​ប្រដាប់​អាវុធ​ត្រៀម​បង្ក្រាប​មហា​បាតុកម្ម។

ម្ចាស់​រោងចក្រ​កាត់ដេរ បាន​ថ្លែង​ថា ចំនួន​កម្មករ​ដែល​អវត្តមាន​ពី​ការងារ​កាល​ពី​ម្សិលមិញ ស្មើ​នឹង​ចំនួន​កម្មករ​ដែល​មិន​បាន​មក​ធ្វើ​ការ បន្ទាប់​ពី​ថ្ងៃ​បុណ្យ​ចូល​ឆ្នាំ​ខ្មែរ​។ ដោយ​លើក​មូលហេតុ​ក្នុង​របាយ​ការណ៍​ប្រព័ន្ធ​ផ្សព្វ​ផ្សាយ និង​កិច្ច​ពិភាក្សា​ជាមួយ​នឹង​កម្មករ​និង​ថ្នាក់​គ្រប់​គ្រង​ក្នុង​រោងចក្រ ៥ កន្លែង​អង្គការ ស៊ីខៅឌូ និង​លោក ចម ប្រសិទ្ធ រដ្ឋ​មន្រ្តី​ក្រសួង​ពាណិជ្ជកម្ម​បាន​ប៉ាន់​ប្រមាណ​ជា​សាធារណៈ ថា កម្មករ​កាត់​ដេរ ២០ ភាគរយ មិន​បាន​វិល​ត្រឡប់​មក​ធ្វើ​ការ​វិញ​ទេ ចាប់​តាំង​ពី​ការ​បោះឆ្នោត​ថ្ងៃ​ទី២៨ ខែ​កក្កដា​មក។ អ្នក​ដែល​ខ្លាច​នឹង​ចាក​ចេញ​នៅ​ក្នុង​ពេល​ឆាប់ៗ​នេះ ខណៈ​មាន​បរិយាកាស​នយោបាយ​តាន​តឹង​ដែល​លោក សម រង្ស៊ី ប្រធាន​គណបក្ស​សង្គ្រោះ​ជាតិ បាន​ព្រមាន​ធ្វើ​មហា​បាតុកម្ម ប្រសិន​បើ​គណបក្ស​ប្រឆាំង​មួយ​នេះ មិន​ត្រូវ​បាន​ប្រកាស​ជា​គណបក្ស​ឈ្នះ​ឆ្នោត​ទេ​នោះ។

លោក ខេន លូ អគ្គ​លេខាធិការ​សមាគម​រោងចក្រ​កាត់​ដេរ​នៅ​កម្ពុជា បាន​ច្រាន​ចោល​តួលេខ​នោះ កាល​ពី​ម្សិលមិញ ដោយ​ថា ភាគ​ច្រើន​នៃ​កម្មករ​បាន​វិល​ត្រឡប់​មក​ធ្វើ​ការ​វិញ​ហើយ។ ប៉ុន្តែ លោក​នៅ​តែ​ព្រួយ​បារម្ភ។ លោក លូ បន្ត​ថា៖ «ឥឡូវ​នេះ អ្វី​ដែល​យើង​បារម្ភ​គឺ​កម្មករ​ចាក​ចេញ​ដោយ​សារ​ភ័យ​ខ្លាច​ការ​ចលាចល។ នោះ​ជា​គ្រោះថ្នាក់ នោះ​ជា​អ្វី​ដែល​យើង​ព្រួយ​បារម្ភ»។

អ្នក​ស្រី គឹម ស្រីកា អាយុ ២៤ បាន​ថ្លែង​ថា កម្មករ​នៅ​រោងចក្រ SL 2 ខក​ចិត្ត នៅ​ពេល​ថ្នាក់​គ្រប់​គ្រង បាន​បដិសេធ​មិន​បង់​ប្រាក់​ឲ្យ​ពួកគេ​ជា​មុន នៅ​ថ្ងៃ​កំណត់​បង់​ប្រាក់។ អ្នក​ស្រី ថ្លែង​កាល​ពី​ម្សិលមិញ​ថា ឪពុក​ម្តាយ​របស់​អ្នក​ស្រី បាន​ទូរស័ព្ទ​មក​អ្នក​ស្រី​ជា​ច្រើន​លើក​រាល់​ថ្ងៃ សុំ​ឲ្យ​អ្នក​ស្រី​វិល​ត្រឡប់​ទៅ​ផ្ទះ​នៅ​ខេត្ត ព្រៃវែង​វិញ។

អ្នក​ស្រី ស្រីកា បាន​ថ្លែង​ថា៖ «កម្មករ​បាន​ផ្ញើ​លិខិត​ទៅ​ក្រុមហ៊ុន ដោយ​ស្នើ​សុំ​បើក​ប្រាក់​ខែ​ថ្ងៃ​នេះ ព្រោះ​កម្មករ​ត្រូវ​ការ​ប្រាក់ ដើម្បី​ធ្វើ​ដំណើរ​ទៅ​ស្រុក​កំណើត ហើយ​ខ្លះ​ត្រូវ​ការ​ប្រាក់​ទិញ​ម្ហូប​អាហារ​នៅ​ផ្ទះ​ក្នុង​ករណី​មាន​បញ្ហា។ ឪពុក​ម្តាយ​ខ្ញុំ​ចង់​ឲ្យ​ខ្ញុំ​នៅ​ផ្ទះ ពីរ​បី​ថ្ងៃ​រង់​ចាំ​ស្ថានការណ៍​ល្អ​ប្រសើរ​ឡើង»។

លោក ឈិន សៅ អ្នក​គ្រប់​គ្រង​រដ្ឋបាល នៅ​រោងចក្រ​មួយ បាន​ថ្លែង​ថា ការ​ភិត​ភ័យ​ក្នុង​ចំណោម​កម្មករ អំពី​ចលាចល​បាន​ធ្វើ​ឲ្យ​លោក​បារម្ភ​។ លោក សៅ បាន​ថ្លែង​ថា៖ «ខ្ញុំ​បាន​ផ្សព្វ​ផ្សាយ​ព័ត៌មាន​ពី​រដ្ឋាភិបាល​ស្នើ​ឲ្យ​ពួកគេ​ស្ងប់​ស្ងាត់ ប៉ុន្តែ​អ្នក​ខ្លះ​នៅ​តែ​ភ័យ​ខ្លាច​»៕ TK

រាយការណ៍​បន្ថែម​ដោយ SEAN TEEHAN

អត្ថបទគួរចាប់អារម្មណ៍