រតនគិរីៈ កម្មករអណ្តូងរ៉ែមាស ២ នាក់បងប្អូនបានស្លាប់ក្នុងអណ្តូងរ៉ែមាសរបស់ក្រុមហ៊ុនឥណ្ឌាក្នុងខេត្តរតនគិរីដោយសារដាច់ប្រដាប់យោងពេលជិះឡើងមកលើពេលជិតដល់ម៉ោងសម្រាកថ្ងៃត្រង់កាលពីថ្ងៃសុក្រ។
លោក សេន វឿន នាយប៉ុស្តិ៍យ៉ាទុង ស្រុកអូរយ៉ាដាវ បានឲ្យដឹងថាហេតុការណ៍គ្រោះថ្នាក់នេះបានកើតឡើងនៅក្នុងទឹកដីភូមិពាក់ដែលមានអណ្តូងរ៉ែមាសមួយរបស់ក្រុមហ៊ុនឥណ្ឌាឈ្មោះ នេស្តូហ្គោល (Nesco Gold) កាលពីថ្ងៃសុក្រនៅពេលដែលកម្មករសម្រាកហូបបាយថ្ងៃត្រង់។
លោកថ្លែងថា កម្មករដែលស្លាប់គឺជាបងប្អូនបង្កើតមានឈ្មោះ ឆក សារុំ អាយុ ២០ ឆ្នាំ និងឈ្មោះ ឆក សារិទ្ធ អាយុ ១៧ ឆ្នាំជាអ្នកភូមិកប្បា ឃុំមេមង ស្រុកមេមត់ ខេត្តត្បូងឃ្មុំហើយពួកគេទើបតែមកធ្វើការបានប្រហែលមួយសប្តាហ៍។
លោកថ្លែងថា៖ «ជិតដល់ម៉ោងសម្រាកហ្នឹងគាត់ឡើងមកលើ។ អារ៉តហ្នឹងខាឡើងគាត់នៅក្នុងកន្ត្រករ៉តហើយពេលនោះវាដាច់ធ្លាក់ចុះប្រហែលជាង ១០ ម៉ែត្រ។ គាត់ជិះលើរ៉តហ្នឹងតែ ២ នាក់ទេ។ វាដាច់កាបដាច់កន្លែងទឹកបន្សារ។ បន្ទាប់មកខាងក្រុមហ៊ុនបានតេឲ្យសមត្ថកិច្ចចុះទៅជាមួយមេឃុំ។ មានកម្មករនៅក្នុងហ្នឹងផង និងឥណ្ឌា ២ នាក់។ យើងចាប់ចងអាកាបហ្នឹងឡើងវិញ ហើយយោងសាកសពឡើងមក»។
លោកបញ្ជាក់ថា ក្រុមហ៊ុនរបស់ឥណ្ឌានេះមានកម្មករឥណ្ឌា ២ នាក់ និងខ្មែរ ៤ នាក់បូករួមទាំងអ្នកស្លាប់ ២ នាក់។ ចំពោះជនរងគ្រោះ ឆក សារិទ្ធ អាយុ ១៧ ឆ្នាំលោក សេន វឿន ថ្លែងថាតាមច្បាប់ការជួលកម្មករក្រោមអាយុមកធ្វើការបែបនេះជារឿងខុសច្បាប់។
លោក ហ៊ុន ប៊ុនថាន ប្រធានមន្ទីររ៉ែ និងថាមពលខេត្តរតនគិរីបានថ្លែងថា ក្រុមហ៊ុនឥណ្ឌា Nesco Gold នេះមានច្បាប់អនុញ្ញាតត្រឹមត្រូវហើយបានដំណើរការរុករករ៉ែក្នុងទីតាំងខាងលើក្នុងឆ្នាំ ២០១៧ នេះ។
លោកថ្លែងថា៖ «ហើយបន្តទៅទៀតយើងតាមដាននឹងស៊ើបអង្កេតពីសុវត្ថិភាពការងារតែប៉ុណ្ណឹងទេ»។
លោកបន្តថា មានការទទួលខុសត្រូវ ២ ផ្នែកគឺទីមួយបេឡាជាតិសន្តិសុខសង្គម (ប.ស.ស) ទទួលខុសត្រូវធ្វើបុណ្យ និងចិញ្ចឹមម្តាយជនរងគ្រោះអស់មួយជីវិតដោយជំហានដំបូងខាង ប.ស.ស បានចំណាយ ១ ពាន់ដុល្លារដើម្បីដឹកជញ្ជូនសព។ «ជាគោលការណ៍របស់ក្រុមហ៊ុនឯកភាពឧត្ថម្ភសពមួយប្រាំពាន់ដុល្លារ ដូច្នេះសពពីរគឺមួយម៉ឺនដុល្លារ។ តែយើងអត់ទាន់ចាប់ការងារទេ ថ្ងៃចន្ទយើងធ្វើការងារបន្ត»។
លោក ម៉េង សក្តិធារ៉ា រដ្ឋលេខាធិការក្រសួងរ៉ែនិងថាមពលបានថ្លែងថា តាមរបាយការណ៍ដែលលោកទទួលបាន ឧប្បត្តិហេតុនេះកើតឡើងដោយសារតែកម្មករជិះលើកន្ត្រកសម្រាប់ដាក់ថ្ម។ លោកថ្លែងថា បើសិនជាព័ត៌មាននេះជាការពិត ការធ្វើដូច្នេះ គឺខុសពីគោលការណ៍សុវត្ថិភាពរបស់ក្រុមហ៊ុន។
តំណាងក្រុមហ៊ុន Nesco Gold លោក Rajeev Moudgil បានប្រាប់ភ្នំពេញប៉ុស្តិ៍ថា ក្រុមហ៊ុនលោកមានគោលការណ៍សុវត្ថិភាពត្រឹមត្រូវ ប៉ុន្តែកម្មករទាំងពីរមិនបានគោរពតាមដែលធ្វើឲ្យមានគ្រោះថ្នាក់។ ចំពោះអាយុ ១៧ ឆ្នាំរបស់កម្មករវិញលោកបានថ្លែងថាជនរងគ្រោះបានប្រាប់ក្រុមហ៊ុនថាគេមានអាយុ ១៩ ឆ្នាំ៕
