ភ្នំពេញៈ បុរស ២ នាក់ បានស្លាប់ក្នុងគ្រោះអគ្គិភ័យឆាបឆេះឃ្លាំងស្ដុកទំនិញមួយកន្លែងរបស់ក្រុមហ៊ុន ឡុង ភឿង ដែលមានទីតាំងស្ថិតក្នុងសង្កាត់ទួលស្វាយព្រៃ ១ ខណ្ឌបឹងកេងកងកាលពីព្រឹកថ្ងៃទី ២៩ ខែ មករា ឆ្នាំ ២០២១។ នេះបើតាមសម្ដីមន្ត្រីកងពន្លត់អគ្គិភ័យរាជធានីភ្នំពេញកាលពីម្សិលមិញ។
លោក ព្រំ យ៉ត ប្រធានការិយាល័យនគរបាលបង្ការ ពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញបានប្រាប់ ភ្នំពេញ ប៉ុស្តិ៍ថា ក្រុមមន្ត្រីជំនាញបានប្រទះឃើញបុរសជាកម្មករ ២ នាក់ ដែលម្នាក់ឈ្មោះ សយ ដារ៉ា អាយុ ២៧ ឆ្នាំ និងម្នាក់ទៀតឈ្មោះ វ័ន្ត អាយុ ៣២ ឆ្នាំ បានស្លាប់នៅក្រោមគំនរភ្នក់ភ្លើង។
លោក យ៉ន ថ្លែងថា៖ «តាមការសន្និដ្ឋានក្នុងជំហានបឋម ការស្លាប់របស់ជនរងគ្រោះទាំង ២ អាចបណ្ដាលមកពីដេកលង់លក់ក្នុងដំណេក ហើយពុល ឬឈ្លក់ផ្សែងភ្លើងក្រោយពេលមានអគ្គិភ័យកើតឡើងនាយប់នោះ ព្រោះទំនិញទាំងអស់ផលិតចេញពីជ័រប្លាស្ទិក»។
ប្រភពពីប្រជាពលរដ្ឋនៅក្បែរកន្លែងកើតហេតុបានអះអាងថា មុនពេលមានអណ្ដាតភ្លើងឆាបឆេះចេញមកក្រៅ ពួកគេបានធំក្លិនឈ្ងៀមខ្លាំង បន្ទាប់មកក៏មានអណ្ដាតភ្លើងឆេះចេញពីក្នុងឃ្លាំងស្តុកទំនិញនោះ ហើយក៏មានសំឡេងផ្ទុះកើតឡើង។ ទោះជាយ៉ាងណាក៏ដោយ រហូតមកទល់ពេលនេះ ក្រុមមន្ត្រីជំនាញនៅពុំទាន់បញ្ជាក់ពីមូលហេតុពិតប្រាកដដែលនាំឱ្យកើតមានគ្រោះអគ្គិភ័យនេះនៅឡើយទេ។
លោក យ៉ន ថ្លែងថា៖ «នៅពេលនេះ មន្ត្រីជំនាញយើងកំពុងពិនិត្យ អង្កេតបន្ថែមទៀតលើករណីនេះ»។ យោងតាមរបាយការណ៍ពីមន្ត្រីនគរបាលអគ្គិភ័យបានឱ្យដឹងថា ទំនិញប្រមាណ ៩០ ភាគរយនៅក្នុងឃ្លាំងបានខូចខាត និងប៉ះពាល់ផ្ទះប្រជាពលរដ្ឋនៅក្បែរនោះចំនួន ៣ ល្វែង។ សមត្ថកិច្ចបានប្រើរថយន្តពន្លត់អគ្គិភ័យ ៤៥ គ្រឿងក្នុងការជួយសង្គ្រោះ៕