.jpg)
កម្មករ-កម្មការិនី រងគ្រោះថ្នាក់ចរាចរណ៍ក្រឡាប់រថយន្តនៅស្វាយរៀង ម្សិលមិញ។ សហការី
ស្វាយរៀងៈ យ៉ាងហោចណាស់កម្មករកម្មការិនី ២ នាក់បានស្លាប់ និងចំនួនជាង ៣០ នាក់ផ្សេងទៀតរងរបួសធ្ងន់ និងស្រាលពីម្សិលមិញ ក្នុងឧបទ្ទវហេតុគ្រោះថ្នាក់ចរាចរណ៍មួយកើតឡើង ដោយសារក្រឡាប់រថយន្ត នៅភូមិកំពង់រទេះ ឃុំពពែត ស្រុកស្វាយទាប ខេត្តស្វាយរៀង ដោយអ្នកបើកបរបានរត់គេចខ្លួន ខណៈដែលអាជ្ញាធរបានបញ្ជូនអ្នករងរបួសទាំងនោះទៅមន្ទីរពេទ្យ ដើម្បីសង្គ្រោះបន្ទាន់។
លោក ហាស់ ប៊ុនធី ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តស្វាយរៀង បានប្រាប់ភ្នំពេញប៉ុស្ដិ៍ពីម្សិលមិញថា កម្មករកម្មការិនីរោងចក្រយូលី ចំនួន ២ នាក់បានស្លាប់ ក្នុងឧបទ្ទវហេតុគ្រោះថ្នាក់ចរាចរណ៍នៅទីតាំងខាងលើ នៅម៉ោងប្រហែល ៧:១០ នាទីព្រឹកថ្ងៃទី ៣០ ខែ កក្កដា នេះ។ ទី១ ឈ្មោះ រ៉ន ស្រីអូន ភេទស្រី បម្រើការងារនៅរោងចក្រ យូលី និងទី២ ឈ្មោះ គង់ ចន្ធី ភេទប្រុស បម្រើការងារនៅរោងចក្រ យូលីជាមួយគ្នា។ ចំណែកកម្មករកម្មការិនីចំនួន ៣១ នាក់ផ្សេងទៀត បានរងរបួសធ្ងន់ និងស្រាល។
លោកប្រាប់ថា គ្រោះថ្នាក់ចរាចរណ៍នេះ កើតឡើងដោយសាររថយន្តកូរ៉េ ១ គ្រឿង ដឹកកម្មករនិយោជិតបើកបរក្នុងល្បឿនលឿន ហើយជាន់ ហ្រ្វាំងខ្លាំងពេក មិនបានប្រយ័ត្នក៏បោកក្រឡាប់ទៅម្ខាងថ្នល់ទៀត។ ជនរងគ្រោះរបួសធ្ងន់ចំនួន ១៥ នាក់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកជីភូ និង ១៦ នាក់ផ្សេងទៀត កំពុងសម្រាកព្យាបាលនៅមន្ទីរពេទ្យបង្អែកខេត្តស្វាយរៀង។
លោក ប៊ុនធី បញ្ជាក់ថា៖ «ឥឡូវនេះ យើងមានភ្នាក់ងារប្រចាំការនៅមន្ទីរពេទ្យបង្អែកទាំង ២ និងមន្ត្រីបុគ្គលិក ប.ស.ស. ខេត្តស្វាយរៀងយើងកំពុងជួយសម្របសម្រួលបន្ត ដើម្បីឲ្យពួកគាត់សម្រាកព្យាបាលនៅមន្ទីរពេទ្យបង្អែកទាំង ២ ហ្នឹង។ ចំណែកអ្នកបើកបរបានរត់ គេចខ្លួន ហើយសមត្ថកិច្ចក៏កំពុងតាមចាប់ខ្លួនដែរ»។
លោក កែវ សុភ័ណ្ឌ អធិការនគរបាលស្រុកស្វាយទាប និងលោក ឡឹក នាង អធិការរងនគរបាលស្រុកស្វាយទាបទទួលបន្ទុកផ្នែកចរាចរណ៍ ខេត្តស្វាយរៀង កាលពីម្សិលមិញមិនទាន់អាចទាក់ទងសុំការបញ្ជាក់ជុំវិញករណីនេះបាននៅឡើយទេ។
លោក ពុំ សុគន្ធី តំណាងកម្មករនៃសម្ព័ន្ធសហជីពចលនាកម្មករប្រចាំនៅរោងចក្រ យូលី នៅខេត្តស្វាយរៀង បានថ្លែងថា មុនពេលកើតហេតុ ក្រុមកម្មករកម្មការិនីធ្វើដំណើរទៅធ្វើការនៅតំបន់សេដ្ឋកិច្ចពិសេស សាន តុង ដោយជិះរថយន្តដូចសព្វមួយដង។ ពេលមកដល់ចំណុចកើតហេតុ អ្នកបើកបររថយន្តបានបើកវ៉ាម៉ូតូ ១ គ្រឿង ក្នុងល្បឿនលឿន ហើយគ្រប់គ្រងល្បឿនមិនបានក៏រេចង្កូតទៅផ្លូវម្ខាងបណ្ដាលឲ្យក្រឡាប់តែម្ដង។
លោកថា៖ «អ្នកបើកបររថយន្តកូរ៉េខាងលើហ្នឹង គាត់ទើបតែចេះបើកបរបាន ១ ថ្ងៃ គឺមិនទាន់ស្ទាត់ជំនាញនៅឡើយ ប៉ុន្ដែកន្លងមកគាត់ធ្លាប់បានបើកបរត្រាក់ទ័រ ហើយគាត់ក៏មកដឹកជញ្ជូនកម្មករកម្មការិនីនៅព្រឹកថ្ងៃនេះ (ម្សិលមិញ)។ អ៊ីចឹង គឺទើបតែជាលើកដំបូងប៉ុណ្ណោះ។ ពេលគ្រោះថ្នាក់នោះ គាត់បានរត់គេចខ្លួនបាត់ ប៉ុន្ដែគាត់ក៏មានរបួសតិចតួចដែរ គ្រាន់តែអាចរត់គេចបាន»។
លោក ចាន់ ដារ៉ា ប្រធានមន្ទីរពេទ្យបង្អែកខេត្តស្វាយរៀង កាលពីម្សិលមិញ មិនទាន់អាចស្វែងរកប្រភពទាក់ទងសុំការបញ្ជាក់ពីស្ថានភាពជំងឺរបស់កម្មករទាំងនោះបានទេ។
សេចក្ដីប្រកាសព័ត៌មានស្ដីពីឧបទ្ទវហេតុគ្រោះថ្នាក់ចរាចរណ៍របស់ក្រសួងការងារ និងបណ្ដុះបណ្ដាលវិជ្ជាជីវៈ ម្សិលមិញបង្ហាញថា ក្រសួងបានទទួលដំណឹងថា មានឧបទ្ទវហេតុគ្រោះថ្នាក់ចរាចរណ៍ដោយរថយន្តដឹកកម្មករនិយោជិតបើកបរជាន់ ហ្រ្វាំងខ្លាំងពេក បណ្ដាលឲ្យក្រឡាប់ទៅម្ខាងថ្នល់នៅទីតាំង និងពេលវេលាខាងលើ បណ្ដាលឲ្យកម្មករកម្មការិនីនិយោជិតរងរបួសសរុបចំនួន ៣៣ នាក់ ក្នុងនោះមានអ្នកស្លាប់ ២ នាក់។
ក្រសួងបន្តថា ជនរងគ្រោះទាំងអស់ បានទទួលការជួយសង្គ្រោះយ៉ាងយកចិត្តទុកដាក់ពីសំណាក់អាជ្ញាធរ និងមន្ត្រីបេឡាជាតិរបបសន្ដិសុខសង្គម (ប.ស.ស)។
ក្រសួងការងារបញ្ជាក់ថា៖ «ក្រសួងការងារ និងបណ្ដុះបណ្ដាលវិជ្ជាជីវៈ នឹងបន្តជួយដោះស្រាយទុក្ខលំបាករបស់បងប្អូនកម្មការិនី និងក្រុមគ្រួសារទៅតាមគោលរបបសន្ដិសុខសង្គមរបស់បេឡាជាតិរបបសន្ដិសុខសង្គម»។
លោក ហ៊ឹម យ៉ាន អគ្គស្នងការរងនគរបាលជាតិ បានថ្លែងក្រោយចប់កម្មវិធីផ្សព្វផ្សាយច្បាប់ស្តីពីចរាចរណ៍ផ្លូវគោក សុវត្ថិភាពចរាចរណ៍លើមធ្យោបាយដឹកជញ្ជូនប្រាប់អ្នកបើកបររថយន្តដឹកកម្មករនៅខេត្តកំពង់ឆ្នាំង នាថ្ងៃទី ២៦ កក្កដា ថា ក្នុងឆមាសទី១ នេះ ចំនួនកម្មករគ្រោះថ្នាក់កើនឡើងដល់ ៣១ ភាគរយ នៃចំនួនគ្រោះថ្នាក់សរុបដែលឆ្នាំមុនៗមានតែ ១៧ ភាគរយប៉ុណ្ណោះ។
លោកបន្តថា កត្តាគ្រោះថ្នាក់របស់កម្មករ គឺជាគោលដៅសំខាន់មួយ ត្រូវតែយកចិត្តទុកដាក់ខ្លាំងបំផុត ព្រោះពួកគាត់ភាគច្រើនបានងាកមកប្រើប្រាស់មធ្យោបាយផ្ទាល់ខ្លួន។ មួយចំនួននៅបន្តជិះរថយន្ត ដែលធ្វើឲ្យមានការកកស្ទះចរាចរណ៍ ឬធ្វើឲ្យផ្លូវមានភាពមមាញឹក ហើយក៏ធ្វើឲ្យមានការប្រឈមនឹងគ្រោះថ្នាក់ច្រើនដែរ។
លោក ហ៊ឹម យ៉ាន បានបញ្ជាក់ថា៖ «យើងចាប់ផ្ដើមផ្សព្វផ្សាយពីច្បាប់ចរាចរណ៍ទៅកាន់កម្មករ និងអ្នកបើកបររថយន្តដឹកកម្មករ ឲ្យបានយល់ពីច្បាប់ និងការបើកបរបានត្រឹមត្រូវ។ អ៊ីចឹង យើងចង់ឲ្យគាត់យល់ថា ការបើកបរ គឺជាការទទួលខុសត្រូវខ្ពស់បំផុត គឺទទួលខុសត្រូវលើជីវិតមនុស្ស ទទួលខុសត្រូវខ្លួនឯង និងចំពោះមុខច្បាប់។ ក្រៅពីនេះ យើងបន្តរឹតបន្ដឹងច្បាប់ និងបើកយុទ្ធនាការរឹតបន្ដឹងច្បាប់នានាបន្ថែម»៕
