ភ្នំពេញៈ កម្មករ-កម្មការិនីកាត់ដេរដែលកំពុងបម្រើការនៅក្នុងរោងចក្រ Green Meadow Development ដែលមានទីតាំងក្នុងសង្កាត់ពងទឹក ខណ្ឌដង្កោ រាជធានីភ្នំពេញប្រមាណ ៣៩ នាក់ក្នុងនោះមានប្រុស ២ នាក់បានដួលសន្លប់ជាបន្តបន្ទាប់កាលពីម្សិលមិញ ខណៈពួកគេកំពុងបំពេញការងារដែលមូលហេតុសង្ស័យបណ្ដាលមកពីការភ័យខ្លាំងពេកនៅពេលជនរងគ្រោះបានឮសម្រែកសំឡេងខ្លាំងៗរបស់បុគ្គលិកអ្នកបកប្រែភាសាចិនម្នាក់។
លោក វ៉ន សារឿន នាយប៉ុស្តិ៍នគរបាលសង្កាត់ពងទឹកបានថ្លែងកាលពីម្សិលមិញថា កម្មករត្រូវបានដឹកយកទៅសម្រាកព្យាបាលនៅមន្ទីរពេទ្យបង្អែកពោធិ៍ចិនតុង និងមណ្ឌលសុខភាពពងទឹក។
បើតាមលោក វ៉ន សារឿន កម្មករ-កម្មការិនី មានការភ័យខ្លាចខ្លាំងដោយសារតែបុគ្គលិកអ្នកបកប្រែភាសាចិនម្នាក់ស្រែកឡូឡានៅក្នុងរោងចក្រដែលមានកម្មករ-កម្មការិនីធ្វើការចំនួន ១ ២២៨ នាក់។
លោកបានបញ្ជាក់ថា៖ «អ្នកបកប្រែត្រូវបានគេហៅសួរដោយសារគាត់បកប្រែលើសពាក្យ ហើយគាត់បានយកដៃទៅកៀកក និងដាក់លើស្មាកម្មការិនីម្នាក់...ដល់ពេលអ៊ីចឹងទៅគេក៏បានប្រាប់ទៅកាន់ខាងរដ្ឋបាលហើយក៏មានការហៅអ្នកស្រែកនោះទៅណែនាំ។ ប៉ុន្តែបុគ្គលហ្នឹងអត់ព្រមចូលខ្លួនទេ ផ្ទុយទៅវិញបែរជាដើរអុកឡុក និងស្រែកឡូឡាក្នុងរោងចក្របង្កឱ្យក្រុមកម្មករ-កម្មការិនីភ័យក៏សន្លប់បន្ដបន្ទាប់តែម្ដង។ គាត់ភ័យតគ្នាសូម្បីតែអ្នកនៅក្រៅក៏ដួលសន្លប់ដែរ»។
លោក អ៊ុក ណារិទ្ធ ប្រធានមន្ទីរពេទ្យបង្អែកពោធិ៍ចិនតុងបានថ្លែងថាកម្មករ-កម្មការិនី ត្រូវបានបញ្ជូនមកមន្ទីរពេទ្យលោកចំនួន ១៣ នាក់ ហើយនៅពេលគ្រូពេទ្យសួរព័ត៌មាន ពួកគេប្រាប់ថាការសន្លប់នេះដោយសារភ័យនឹងសំឡេងស្រែក។
លោកបានបញ្ជាក់ថា៖ «ពួកគាត់ប្រាប់យើងថា គាត់ឮសំឡេងស្រែកអ៊ីចឹងទើបធ្វើឱ្យគាត់ភ័យ ហើយគាត់ក៏មានការភ័យតគ្នាអ៊ីចឹងទៅ»។
លោកបានបន្ថែមថា៖ «ពួកគាត់មានអាការប្រហាក់ប្រហែលគ្នាដោយភ័យថប់ដង្ហើម ណែនទ្រូង ហើយយើងបានផ្តល់សេរ៉ូមឱ្យគាត់។ គាត់អាចត្រឡប់ទៅធ្វើការថ្ងៃស្អែកបាន ប៉ុន្តែបើមានអាការប្រែប្រួលយ៉ាងដូចម្តេច ខ្ញុំអត់ដឹងទេ»៕