The Phnom Penh Post Search

Search form

Logo of Phnom Penh Post newspaper Phnom Penh Post - កម្មករ Angkor ព្រម​ចូល​ធ្វើ​ការ​វិញ​ថ្ងៃ​នេះ




កម្មករ Angkor ព្រម​ចូល​ធ្វើ​ការ​វិញ​ថ្ងៃ​នេះ

កម្មករ Angkor ព្រម​ចូល​ធ្វើ​ការ​វិញ​ថ្ងៃ​នេះ

កំពង់ចាមៈ កម្មករ​នៅ​រោង​ចក្រ Angkor Flywood ​ក្នុង​ស្រុក​កំពង់សៀម នឹង​វិល​ចូល​ធ្វើ​ការ​វិញ​នៅ​ថ្ងៃ​ចន្ទ​នេះ បន្ទាប់​ពី​និយោជក​របស់​ពួក​គេ​ព្រម​ទទួល​យក​លក្ខខណ្ឌ ៨ ចំណុច ក្នុង​ចំណោម​៩​ចំណុច​ដែល​ពួក​គេ​បាន​ទាមទារ។

លោក សុខ គីន អនុ​ប្រធាន​សហព័ន្ធ​សហជីព​កម្មករ​សំណង់ និង​ព្រៃឈើ​កម្ពុជា បាន​ថ្លែង​កាល​ពី​ម្សិលមិញ​ថា កម្មករ​ជាង ៣០០ នាក់​បាន​ធ្វើ​ការ​តវ៉ា​ទាមទារ ៩ ចំណុច​ពី​និយោជក តាំង​ពី​ថ្ងៃ​ពុធ​សប្តាហ៍​មុន​មក ហើយ​ការ​ចរចា​រវាង​សហជីព តំណាង​កម្មករ និង​តំណាង​រោងចក្រ បាន​ឈាន​ដល់​ការ​ព្រមព្រៀង​លើ ៨ ចំណុច​កាល​ពី​ម្សិលមិញ​។ លោក​បន្ត​ថា៖«កម្មករ​នឹង​វិល​ត្រឡប់​ចូល​ធ្វើ​ការ​វិញ នៅ​ថ្ងៃ​ស្អែក ប៉ុន្តែ​យើង​នឹង​ចរចា​បន្ត​លើ​ចំណុច​ដែល​នៅ​សល់​ដែល​ផ្តោត​លើ​ការ​ដំឡើង ប្រាក់​ឈ្នួល។

ចំណុច​ទាមទារ ដែល​កម្មករ​ទទួល​បាន គឺ​កម្មករ​មាន​ផ្ទៃ​ពោះ​អាច​ចេញ​មុន ១០​នាទី ឈប់​សម្រាក ២ ថ្ងៃ ដោយ​មិន​កាត់​ប្រាក់​ឈ្នួល និង​ប្រាក់​ធ្វើ​ការ​ទៀង​ទាត់ មិន​កាត់​ប្រាក់​ឈ្នួល និង​អត្ថប្រយោជន៍​ចំពោះ​កម្មករ ដែល​ឈឺ ឬ​សាច់​ញាតិ​ឈឺ ឬ​ស្លាប់។

លោក​បន្ត​ថា៖«​ចំណុច​ដែល​នៅ​សល់ គឺ​ការ​ដំឡើង​ប្រាក់​ឈ្នួល ហើយ​យើង​នឹង​ចរចា​នៅ​ថ្ងៃ​ទី ២៩ ខែ​កញ្ញា។ កម្មករ​ត្រូវ​ការ​ ១០០០ រៀល​ទៀត សម្រាប់​ប្រាក់​ឈ្នួល ដែល​មួយ​ថ្ងៃ​គឺ ៨៥០០ រៀល»។

លោក​ឆាយ អៅ តំណាង​កម្មករ បាន​ថ្លែង​កាល​ពី​ម្សិលមិញ​ថា នេះ​ជា​កូដកម្ម​លើក​ទី ២ ចាប់​តាំង​ពី​ឆ្នាំ​២០០៩ មក​ ព្រោះ​កម្មករ​មិន​អាច​ទ្រាំទ្រ​នឹង​ការ​រំលោភ​សិទិ្ធ​ដោយ​រោង​ចក្រ ដូចជា បង្ខំ​កម្ម​ករ​ឲ្យ​ធ្វើ​ការ​ធ្ងន់ៗ​និង​បន្ថែម​ម៉ោង​បាន​ទេ​។ លោក​បន្ត​ថា៖ «​ការងារ​របស់​យើង​ពី​ម៉ោង ៧ ព្រឹក ដល់​ម៉ោង ៤ រសៀល ប៉ុន្តែ​កម្មករ​ត្រូវ​ធ្វើ​ការ​ថែម​ម៉ោង ​រហូត​ដល់​ម៉ោង ៧ យប់ លើក​លែង​តែ​កម្មករ​ឈឺ​ខ្លាំង ឬ​មាន​បញ្ហា​សំខាន់​ត្រូវ​ធ្វើ ទើប​ពួក​គេ​អាច​សុំ​ចេញ​បាន​»។

លោក ឆាយ អៅ បាន​បន្ថែម​ថា រោងចក្រ​បាន​ដំឡើង​ប្រាក់​ឈ្នួល​កម្មករ​ថ្មី​ដែល​ធ្វើ​ការ​បាន ៣ ខែ នោះ​ពួក​គេ​នឹង​ទទួល​បាន​ប្រាក់ ៥០០ រៀល​បន្ថែម​ទៀត។

លោក​បាន​បន្ត​ឲ្យ ដឹង​បន្ថែម​ទៀត​ថា៖ «យើង​ចង់​ឲ្យ​និយោជក​ដំឡើង​ប្រាក់​ឈ្នួល​ដល់​កម្មករ​ទាំង​អស់​ក្នុង ចំនួន​ស្មើ​គ្នា។ យើង​នឹង​ដឹង​លទ្ធផល​នៅ​ថ្ងៃ​ទី ២៩ កញ្ញា​»។

លោក ឈីវ កេង អ្នក​គ្រប់គ្រង​រដ្ឋបាល​នៅ​រោង​ចក្រ Angkor Flywood ​មិន​អាច​ទាក់​ទង​សុំ​ការ​អត្ថាធិប្បាយ​បាន​ទេ កាល​ពី​ម្សិលមិញ៕ TK

អត្ថបទគួរចាប់អារម្មណ៍