The Phnom Penh Post Search

Search form




Logo of Phnom Penh Post newspaper Phnom Penh Post - កម្មករ Juhui ចូល​ធ្វើការ​វិញ​បន្ទាប់​ថៅកែ​សន្យា​ចរចា​គ្នា

កម្មករ Juhui ចូល​ធ្វើការ​វិញ​បន្ទាប់​ថៅកែ​សន្យា​ចរចា​គ្នា

កម្មករ Juhui ចូល​ធ្វើការ​វិញ​បន្ទាប់​ថៅកែ​សន្យា​ចរចា​គ្នា

កំពង់ចាមៈ កម្មករ​នៅ​ក្រុមហ៊ុន Juhui Footwear នៅ​ក្នុង​ខេត្ត កំពង់ចាម បាន​ត្រឡប់​ចូល​ធ្វើ​ការ​វិញ​កាល​ពី​ថ្ងៃ​ពុធ​ម្សិលមិញ​បន្ទាប់​ពី​ខាង​រោងចក្រ​បាន​សន្យា​ចរចា​លើ​ការ​ទាមទារ​របស់​កម្មករ​ក្នុង​រយៈ​ពេល​បី​ខែ​ម្ដង។

តំណាង កម្មករ កម្មការិនី សួង លីហ្សា បាន​ឲ្យ​ដឹង​កាល​ពី​ម្សិលមិញ​ថា អ្នក​តវ៉ា​ទាំង​អស់​បាន​យល់​ព្រម​ត្រឡប់​ចូល​ធ្វើ​ការ​របស់​ខ្លួន​វិញ បើ​ទោះ​ជា​ការ​ទាមទារ​របស់​ពួកគេ​មិន​ទាន់​បាន​សម្រេច​បាន​ទាំង​ស្រុង​ក្ដី។

លីហ្សា បាន​បន្ថែម​ទៀត​ថា៖ «នៅ​មាន​ចំណុច​តាម​ទាមទារ​បី​ចំណុច​ទៀត​ដែល​រោងចក្រ​មិន​ទាន់​យល់​ព្រម​នៅ​ឡើយ​ប៉ុន្តែ យើង​ត្រឡប់​ចូល​ធ្វើ​ការ​វិញ​ព្រោះ​តំណាង​រោងចក្រ​បាន​សន្យា​ជាមួយ​កម្មករ​ថា នឹង​យក​សំណើ​របស់​កម្មករ​ទៅ​ពិភាក្សា​គ្នា​នៅ​រៀង​រាល់​បី​ខែ​ម្ដង»។

កម្មការិនី សួង លីហ្សា លើក​ឡើង​ថា មន្ត្រី​ក្រុមហ៊ុន​នេះ​ក៏​បាន​ស្នើ​ឲ្យ​កម្មករ​សន្យា​ថា នឹង​មិន​ធ្វើ​ការ​តវ៉ា​នៅ​ពេល​ពួកគេ​ទាមទារ​អ្វី​មួយ ពី​ក្រុមហ៊ុន​នេះ​ផង​ដែរ។

សួង លីហ្សា បាន​អះអាង​បន្ថែម​ទៀត​ថា៖ «កម្មករ​ត្រូវ​ឈប់​ធ្វើ​ការ​តវ៉ា​ប្រឆាំង​នឹង​ក្រុមហ៊ុន នៅ​ពេល​ពួកគេ​ចង់​បាន​លក្ខខណ្ឌ​អ្វី​មួយ​តែ​ពួកគេ​អាច​ធ្វើ​សំណើ​ផ្ញើ​ទៅ​ឲ្យ​ថៅកែ​រោងចក្រ​រៀបរាប់​អំពី​អ្វី ដែល​ពួកគេ​ទាមទារ​ឲ្យ​ប្រសើរ​ជាង​ការ​លើក​គ្នា​ធ្វើ​ការ​តវ៉ា​។ យើង​បាន​យល់​ព្រម​នឹង​ការ​ស្នើ​សុំ​របស់​ថៅកែ»។

សូម​បញ្ជាក់​ថា កម្មករ​ក្រុមហ៊ុន​នេះ​ជាង ៤ ពាន់​នាក់ បាន​នាំ​គ្នា​ធ្វើ​កូដកម្ម​តវ៉ា​នៅ​ខាង​មុខ​រោងចក្រ​នេះ​តាំង​ពី​ល្ងាច ថ្ងៃ​សុក្រ​សប្តាហ៍​មុន រហូត​ដល់​ពួកគេ​បាន​បិទ​ផ្លូវ​កាល​ពី​ថ្ងៃ​អង្គារ​អស់​រយៈ​ពេល​ប្រហែល ១០ នាទី​បន្ទាប់​ពី​តំណាង​កម្មករ​ត្រូវ​គេ​ដេញ​ចេញ​ពី​កិច្ច​ប្រជុំ៕ PN​

អត្ថបទគួរចាប់អារម្មណ៍