The Phnom Penh Post Search

Search form




Logo of Phnom Penh Post newspaper Phnom Penh Post - កម្មករ W&D ១០០០ នាក់​មិន​ចូល​ធ្វើការ​វិញ​ដោយ​បារម្ភ​ខ្លាច​មាន​ការ​គាប​សង្កត់

កម្មករ W&D ១០០០ នាក់​មិន​ចូល​ធ្វើការ​វិញ​ដោយ​បារម្ភ​ខ្លាច​មាន​ការ​គាប​សង្កត់

Content image - Phnom Penh Post
កម្មករ​រោងចក្រ W&D ប្រមាណ ១ ០០០ នាក់ នៅ​មិន​ទាន់​ចូល​ធ្វើការ​វិញ ដោយ​បារម្ភ​ខ្លាច​មាន​ការ​គាប​សង្កត់ និង​ខ្លាច​មាន​ការ​បញ្ឈប់​ពួកគេ។ ផា លីណា

កម្មករ W&D ១០០០ នាក់​មិន​ចូល​ធ្វើការ​វិញ​ដោយ​បារម្ភ​ខ្លាច​មាន​ការ​គាប​សង្កត់

ភ្នំពេញៈ កម្មករ​រោងចក្រ W&D ប្រមាណ ១ ០០០ នាក់ នៅ​មិន​ទាន់​ចូល​ធ្វើការ​វិញ​នៅ​ឡើយ​ទេ ដោយ​បារម្ភ​ខ្លាច​មាន​ការ​គាប​សង្កត់ និង​ខ្លាច​មាន​ការ​បញ្ឈប់​ពួកគេ​វិញ តាម​តែ​អំពើ​ចិត្ត ដូច​ដែល​ធ្លាប់​បាន​ធ្វើ​កន្លង​មក​ខ​ណៈ​ដែល​ភាគី​រោងចក្រ ក៏​នៅ​តែ​មិន​ព្រម​ទទួល​យក​កម្មករ​មួយ​ចំនួន​តូច​ទៀត ឲ្យ​ចូល​ធ្វើការ​វិញ​ផង​ដែរ។

កាលពី​ថ្ងៃទី​ ៤ ខែមករា ឆ្នាំ ២០១៩ កម្មករនិយោជិត​ប្រមាណ ១ ២០០ នាក់​ក្នុង​ចំណោម ១ ៦០០ នាក់ ត្រូវ​បាន​ក្រុមហ៊ុន W&D សម្រេច​បញ្ឈប់​ពី​ការងារ ទៅ​តាម​សាល​ក្រម​សម្រេច​បណ្តោះ​អាសន្ន​របស់​តុលាការ ក្រោយ​ពី​ពួកគេ​ប្រមូល​ផ្តុំ​ធ្វើ​បាតុកម្ម ដើម្បី​ទាមទារ​ឲ្យ​ទូទាត់​ប្រាក់​អតីត​ភាព​ការងារ តាំងពី​ថ្ងៃទី ២៤ ខែ​ធ្នូ ឆ្នាំ ២០១៨ មុន​នឹង​អនុវត្ត​ច្បាប់​ថ្មី ដែល​នឹង​ត្រូវ​ទូទាត់​រាល់ ៦ ខែ​ម្ដង។ ប៉ុន្តែ​បន្ទាប់​ពី​មាន​ការ​សម្រប​សម្រួល​ពី​ក្រសួង​ការងារ នៅ​ថ្ងៃទី ១២ ខែ​មករា រោងចក្រ​បាន​ព្រម​ទទួល​យក​កម្មករ​ស្ទើរ​តែ​ទាំង​អស់​ឲ្យ​ចូល​ធ្វើការ​វិញ លើក​លែង​តែ​កម្មករ​មួយ​ចំនួន​តូច​ប៉ុណ្ណោះ​ដែល​រោងចក្រ​មិន​ព្រម​ទទួល​យក​ធ្វើការ​វិញ។

លោក ប៊ុន សំ​ណា​ល់ ជា​កម្មករ​ម្នាក់ ដែល​ត្រូវបាន​ក្រុមហ៊ុន​បញ្ឃប់ និង​មិន​ព្រម​ឲ្យ​ចូល​ធ្វើការ​វិញ អះអាង​ថា ក្រោយ​ពី​មាន​កម្មករ​មួយ​ចំនួន បាន​ផ្តិត​មេដៃ​ចូល​ធ្វើការ​វិញ តែ​ត្រូវ​បាន​ភាគី​រោងចក្រ​មិន​ទទួល​ពួកគេ។ លោក​សំ​ណាល់ បាន​ប្រាប់​ភ្នំពេញ​ប៉ុស្តិ៍​ម្សិលមិញ​ថា ខ្លួន​បាន​ចូល​ប្រជុំ​ជាមួយ​ភាគី​រោងចក្រ និង​ក្រសួង​ជា​ច្រើន​ដង​ដើម្បី​ទាមទារ​ប្រាក់​អតីត​ភាព​ការងារ​តែ​ចុង​ក្រោយ ខ្លួន និង​កម្មករ​មួយ​ចំនួន​ទៀត មាន​ឈ្មោះ​ក្នុង​បញ្ជី​ត្រូវ​បញ្ឈប់​ពី​ការងារ ក្រោម​ហេតុផល​ថា បាន​ញុះញង់​កម្មករ ខណៈ​ក្រុមហ៊ុន​បាន​យល់​ព្រម​ទទួល​យក​កម្មករ​ទាំង​អស់​ចូល​ធ្វើការ​វិញ។

លោក​បញ្ជាក់​ថា៖ «កាល​ពី​មុន​គេ​ឲ្យ​ពួក​ខ្ញុំ​ចូល​ផ្តិត​មេដៃ តែ​គេ​ចម្រាញ់​ចេញ គេ​យក​តែ​អ្នក​ណា​ក្មេងៗ ក្រៅ​ពី​ហ្នឹង​ដូច​ខ្ញុំ​ប្រុសៗ ហើយ​អ្នកណា​ស្រីៗ ដែល​មាន​ពោះធំ ឬ​គាត់​មាន​អាយុ​ច្រើន គេ​អត់​យក​ទេ។ ថ្ងៃ​នេះ (១៥ មករា) គេ​ចេញ​ឈ្មោះ បញ្ឈប់​ពួក​ខ្ញុំ​ប្រហែល​ជា​ជិត ១០០ នាក់ មាន​ឈ្មោះ​ខ្ញុំ​ដែរ ឥឡូវ​ខ្ញុំ​អត់​ព្រម​ទេ គេ​ឲ្យ​កម្មករ​ចូល​ធ្វើការ​ទាំង​អស់ គេ​ទុក​តែ​ពួក​ខ្ញុំ ប៉ុន្មាន​នាក់​ហ្នឹង​ទេ សុំ​ឲ្យ​សម្តេច​ជួយ​ផង»។

អ្នកស្រី សំ ស្រីមុំ កម្មករ​ម្នាក់ ក្នុងចំណោម​កម្មករ​ផ្សេងទៀត ដែល​មិន​ព្រម​ចូល​ធ្វើការ បាន​លើក​ឡើង​ដែរ​ថា បើ​ខាង​ក្រុមហ៊ុន មិន​ព្រម​ទទួល​យក​កម្មករ​ទាំង​អស់​ឲ្យ​ចូល​ធ្វើ​វិញ​ទេ​នោះ ពួកគេ​ក៏​នឹង​មិន​ព្រម​ចូល​ធ្វើការ​ដែរ ហើយ​នឹង​បន្ត​ការតវ៉ា​បន្តទៀត។ កម្មករ​រូបនេះ​បន្ថែម​ថា ការ​បញ្ឈប់​កម្មករ​នេះ​ហាក់​មាន​ការ​រើស​អើង​និង​មាន​លក្ខណៈ​គំរាម​កំហែង​បំបែក​បំបាក់​កម្មករ​ដោយសារ​តែ​កម្មករ​បាន​ធ្វើ​ការ​តវ៉ា​ទាំង​អស់​គ្នា ប៉ុន្តែ​ក្រុមហ៊ុន​បែរ​ជា​បដិសេធ​ទទួល​យក​កម្មករ​មួយ​ចំនួន​ឲ្យ​ចូល​ធ្វើការ​វិញ។

ប្រធាន​រដ្ឋបាល​នៃ​រោងចក្រ W&D លោកស្រី មាស សារ៉េត បាន​ប្រាប់​ភ្នំពេញ​ប៉ុស្តិ៍​ថា រហូត​មក​ដល់​ពេល​នេះ មាន​កម្មករ​ប្រមាណ ៦០០ នាក់ ក្នុង​ចំណោម​កម្មករ ១​ ៦០០ នាក់​បាន​ចូល​ធ្វើការ​វិញ​ចំណែក​កម្មករ​ដទៃ​ទៀត ដែល​មិន​ព្រម​ចូល​ធ្វើការ លោកស្រី​ថ្លែង​ថា គឺជា​សិទ្ធិ​របស់​ពួកគេ។

លោកស្រី​បញ្ជាក់​ថា៖ «ខ្ញុំ​អត់​ដឹង​ថា កម្មករ​ផ្តិត​មេដៃ​នៅ​ណា​ផង ព្រោះ​ពួក​ខ្ញុំ​អត់​មាន​ទទួល​បាន​ផង វា​គឺជា​ពាក្យ​មិន​ពិត​ដែល​ចោទ​ថា រោងចក្រ​គាប​សង្កត់​កម្មករ»។

អ្នកនាំពាក្យ​ក្រសួង​ការងារ និង​បណ្តុះបណ្តាល​វិជ្ជាជីវៈ លោក ហេង សួរ បាន​ប្រាប់​ភ្នំពេញ​ប៉ុស្តិ៍​ម្សិលមិញ​ដែរ​ថា តាមរយៈ​ការ​សម្រប​សម្រួល​របស់​មន្ត្រី​ផ្សះផ្សា​វិវាទ របស់​ក្រសួង​និង​តំណាង​កម្មករ​ក្នុង​រោងចក្រ​នោះ គឺជា​គោល​ការណ៍ រោងចក្រ​បាន​ទទួល​យក​កម្មករ​ចូល​ធ្វើការ​វិញ តាំង​ពី​ថ្ងៃ​សៅរ៍​សប្តាហ៍​មុន។ លោក​បន្ត​ថា លើក​លែង​តែ​បុគ្គល​ប្រហែល​ជា ១០ រូប ដែល​មាន​ភ័ស្តុតាង​ច្បាស់ ក្នុង​ការ​ញុះញង់​កម្មករ ដែល​ក្រុមហ៊ុន មិន​ទាន់​ទទួល​យក​វិញ។ តែ​យ៉ាង​ណា លោក​ថា ក្រសួង​នឹង​បន្ត​សម្រប​សម្រួល​បន្ត​ទៀត។

លោក​បញ្ជាក់​ថា៖ «បុគ្គល​ដែល​គោរព​ច្បាប់​គឺមាន​ច្បាប់​ការពារ បុគ្គល​ដែល​មាន​ចេតនា​បំពាន​ច្បាប់ គឺ​អាច​មាន​ការ​បារម្ភ។ ប៉ុន្តែ​តាម​ភ័ស្តុតាង​រូបភាព វីដេអូ គឺមាន​អ្នក​ដែល​ប្រព្រឹត្ត​ដោយ​ចេតនា​តិចតួច​បំផុត។ អ្វី​ដែល​ខុស​កន្លង​ហួស គឺ​ក្រសួង​បាន​សុំ​ឲ្យ​ក្រុមហ៊ុន​កុំ​ចាត់​ទុក​ជា​កំហុស ហើយ​សុំ​ឲ្យ​មាន​ការ​ទទួល​យក​វិញ​ជា​អតិបរមា​បំផុត ក្នុង​ចំណោម​កម្មករ​និយោជិត ដែល​នៅ​សល់​ជាង ១០ នាក់​នេះ»។

លោក​ កាំ​ង ម៉ូ​នី​កា អគ្គលេខាធិ​កា​រង​នៃ​សមាគម​រោងចក្រ​កាត់ដេរ​នៅ​កម្ពុជា ហៅ​កាត់ GMAC បាន​ថ្លែង​កាល​ពី​ម្សិលមិញ​ថា ការ​តវ៉ា​របស់​កម្មករ​រោងចក្រ W&D រឿង​អតីត​ភាព​ការងារ​នេះ​គឺ​ដោយសារ​មាន​ការ​ញុះ​ញង់​ពី​ក្រុម​សហជីព​មួយ​ចំនួន។ លោក​បន្ថែម​ថា មិន​មែន​ដោយសារ​កម្មករ មិន​យល់​ពី​ការ​អនុវត្ត​ច្បាប់​ថ្មី របស់​ក្រសួង​នោះ​ទេ ព្រោះ​ភាគី​ពាក់ព័ន្ធ បាន​ផ្សព្វផ្សាយ​ច្បាស់​លាស់​អស់​ហើយ ដល់​កម្មករ​នៅ​តាម​រោងចក្រ អំពី​ប្រាក់​អតីត​ភាព​ការងារ​នេះ។

លោក​បញ្ជាក់៖ «ការ​ពិត​ទៅ​ភាគី​ពាក់ព័ន្ធ​ទាំង​អស់ រោងចក្រ ក្រសួង និង​មាន​មេធាវី​ផង បាន​ពន្យល់​ក្បោះ​ក្បាយ​លម្អិត​ជម្រាប​ជូន​បងប្អូន​កម្មករ​ហើយ ហើយ​មុន​ហ្នឹង​ក្រសួង​ការងារ ក៏បាន​ចេញ​សេចក្តី​ជូន​ដំណឹង មាន​ការ​អនុវត្ត​ប្រាក់​អតីត​ភាព​ការងារ ដោយ​ធានា​ថា ប្រាក់​ហ្នឹង នឹង​មិន​ត្រូវ​បាន​បាត់បង់ តែ​ក្រុម​មួយ​ចំនួន​តូច ក្រុម​សហជីព​មួយ​ចំនួន ដែល​ញុះញង់​បង្ក​ឲ្យ​រឿង​ហ្នឹង ជា​រឿង​ច្របូក​ច្របល់ នៅ​ក្នុង​វិស័យ​របស់​យើង»។

កាលពី​ថ្ងៃទី​ ៩ មករា កម្មករ​ទាំងនោះ បាន​ស្វែងរក​ការជួយ​អន្តរាគមន៍​ពី​សម្ព័ន្ធ​សហជីព​ប្រជាធិប​តេយ្យ​កម្មករ​កាត់​ដេរ​កម្ពុជា (CCAWDU) ដើម្បី​តស៊ូ​មតិ​ផ្នែក​ផ្លូវ​ច្បាប់ និង​ស្វែងរក​ដំណោះ​ស្រាយ​ដើម្បី​ធ្វើ​ឲ្យ​ពួកគេ​បាន​ចូល​ធ្វើការ​វិញ។

លោក អាត់ ធន់ ប្រធាន CCAWDU បាន​លើកឡើងថា ការដែល​កម្មករ​ទាំង​នោះ​មិន​ព្រម​ចូល​ធ្វើការ​វិញ​ព្រោះ​តែ​ពួកគេ មិន​ទុក​ចិត្ត និង​បារម្ភ​ចំពោះ​រដ្ឋបាល​ក្រុមហ៊ុន​ដែល​មាន​ការ​គាប​សង្កត់​មក​លើ​កម្មករ។លោក​ថា ក្នុង​នាម​តំណាង​កម្មករ​ទាំង​នោះ លោក​នឹង​ព្យាយាម​ចរចា​ជាមួយ​ភាគី​ពាក់ព័ន្ធ​ដើម្បី​ស្វែងរក​ដំណោះ​ស្រាយ ដែល​កម្មករ​អាច​ទទួល​យក​បាន។

លោក​បាន​បញ្ជាក់ថា៖ «អ្វីដែល​កម្មករ​រង់ចាំ​នេះ គឺ​ទី១ ចូលធ្វើការ គឺមាន​លក្ខណ​សម្បត្តិ ឬ​ការងារ​របស់​ពួកគេ​ដូច​ដើម​វិញ​និង​ចំណុច​ទាមទារ​ផ្សេងៗ​ទៀត​ឲ្យ​ច្បាស់​លាស់​កុំ​ឲ្យ​ក្រុមហ៊ុន​រក​រឿង និង​បញ្ឈប់​ស្រេច​តែ​ចិត្ត​អ៊ីចឹង។ នេះ​ជា​អ្វី​ដែល​កម្មករ​ចង់​បាន»។

លោក​ព្រមាន​ថា៖ «បើ​ពុំ​ដោះស្រាយ​ឲ្យ​បានច្បាស់លាស់​ទេ​កម្មករ​អាច​នឹង​រង​គ្រោះ ហើយ​បើ​មិន​បាន​ដោះ​ស្រាយ​ទេ ជម្រើស​ចុង​ក្រោយ​នឹង​ដាក់​ទៅ​អ្នក​បញ្ជា​ទិញ ដែល​យើង​បាន​ស្រាវជ្រាវ​រួច​ហើយ ដើម្បី​ឲ្យ​មាន​ការ​ជួយ​អន្តរាគមន៍»៕

អត្ថបទគួរចាប់អារម្មណ៍