កំពង់ស្ពឺ៖ អភិបាលខេត្តកំពង់ស្ពឺ លោក វ៉ី សំណាង បានឲ្យដឹងនៅថ្ងៃទី ៨ ឧសភានេះថា មានកម្មការិនីរោងចក្រម្នាក់បានទទួលមរណភាពទាំងកំពុងមានផ្ទៃពោះ ៧ ខែ ដោយសារជំងឺកូវីដ ១៩ កាលពីយប់ថ្ងៃទី ៧ ខែឧសភា ក្រោយពីបញ្ចូនទៅមន្ទីរពេទ្យបង្អែកខេត្តបានប្រហែល ៣០ នាទី ដែលធ្វើឱ្យចំនួនអ្នកស្លាប់ដោយសារជំងឺកូវីដ ១៩ ក្នុងខេត្ដនេះ កើនដល់ ៥ នាក់គិតត្រឹមថ្ងៃនេះ។
លោក វ៉ី សំណាង បានប្រាប់ ភ្នំពេញ ប៉ុស្ដិ៍ នៅល្ងាចថ្ងៃនេះថា កម្មការិនីរោងចក្រដែលវិជ្ជមានជំងឺកូវីដ ១៩ ហើយទទួលមរណភាពនេះ ឈ្មោះ សុត ម៉ៃ អាយុ ៣០ ឆ្នាំ រស់នៅភូមិគោកដង្កោ ឃុំពេជ្រមុនី ស្រុកគងពិសី ខេត្តកំពង់ស្ពឺ។ គាត់ធ្វើការនៅរោងចក្រឈ្មោះ Master ស្ថិតនៅស្រុកអង្គស្នួល ខេត្តកណ្ដាល។ កម្មការិនីរូបនេះ បានចូលសម្រាកព្យាបាលនៅមន្ទីរពេទ្យបង្អែកខេត្ត មុនពេលទទួលមរណភាពប្រហែល ៣០ នាទី។
លោកអភិបាលខេត្ដបញ្ជាក់ថា៖ «មូលហេតុនៃការស្លាប់ ភាគច្រើនបងប្អូនយើងគាត់ធ្វេសប្រហែសនៅពេលមានអាការសង្ស័យជំងឺកូវីដ ១៩ គឺពួកគាត់មិនប្រញាប់មករកសេវាព្យាបាលរបស់រដ្ឋទេ តែនៅពេលគាត់ឈឺធ្ងន់ទើបមករកសេវារដ្ឋ។ ដូច្នេះភាគច្រើនក្រោយពេលឈឺធ្ងន់ពួកគាត់មករកសេវាព្យាបាលនៅមន្ទីរពេទ្យរដ្ឋ ១ ម៉ោង ឬកន្លះម៉ោងមុនពេលស្លាប់ ដែលករណីនេះធ្វើឱ្យមានការលំបាកក្នុងការស្ទាបស្ទង់ព្យាបាលរបស់ក្រុមគ្រូពេទ្យរបស់យើង»។
រដ្ឋបាលខេត្តកំពង់ស្ពឺនៅថ្ងៃទី ៨ ខែ ឧសភា ឆ្នាំ ២០២១ នេះ បានចេញសេចក្ដីជូនដំណឹងប្រកាសពីការរកឃើញ និងបង្ហាញអត្តសញ្ញាណមនុស្សចំនួន ១១ នាក់បន្ថែមទៀត ដែលទើបរកឃើញឆ្លងជំងឺកូវីដ ១៩។ ពលរដ្ឋដែលទើបរកឃើញឆ្លងជំងឺកូវីដ ១៩ នេះ គឺនៅស្រុកឧដុង្គ ស្រុកសំរោងទង និងស្រុកភ្នំស្រួច។
ជាមួយគ្នានេះ រដ្ឋបាលខេត្តកំពង់ស្ពឺបានអំពាវនាវដល់ពលរដ្ឋដែលធ្លាប់ប្រាស្រ័យទាក់ទងជាមួយអ្នកជំងឺកូវីដ ១៩ ត្រូវរួសរាន់់ទៅយកសំណាក ឬទៅពិនិត្យសុខភាពនៅមន្ទីរពេទ្យបង្អែកដែលនៅជិតផ្ទះ ព្រមទាំងត្រូវដាក់ខ្លួនឲ្យនៅដាច់ដោយឡែកក្នុងរយៈពេល ១៤ ថ្ងៃ។
បើតាមលោក វ៉ី សំណាង គិតត្រឹមថ្ងៃទី ៨ ខែឧសភានេះ ខេត្តកំពង់ស្ពឺមានអ្នកវិជ្ជមានកូវីដ ១៩ សរុបចំនួន ១១៥ នាក់ ក្នុងនោះមានអ្នកស្លាប់ចំនួន ៥ នាក់។ រីឯអ្នកផ្សេងទៀតមិនទាន់ជាសះស្បើយនៅឡើយទេ ដោយបច្ចុប្បន្នកំពុងស្ថិតក្នុងការព្យាបាលនៅមន្ទីរពេទ្យ។
ជុំវិញករណីនេះ លោកអភិបាលខេត្ដបានអំពាវនាវដល់ពលរដ្ឋពិសេសកម្មករ-កម្មការិនីដែលបម្រើការងារនៅរោងចក្រដែលមានជាប់ពាក់ព័ន្ធជាមួយអ្នកជំងឺកូវីដ ១៩ ត្រូវផ្ដល់ព័ត៌មានជូនអាជ្ញាធរមានសមត្ថកិច្ច ឬមន្ដ្រីសុខាភិបាល ដើម្បីយកសំណាកទៅវិភាគដោយមិនត្រូវទុកឱ្យខ្លួនឯងធ្លាក់ក្នុងស្ថានភាពធ្ងន់ធ្ងរនោះទេ៕