.jpg)
កម្មការិនីដែលសន្លប់ពេលនាំមកមណ្ឌលសុខភាពកាលពីព្រឹកមិញ ។ រូប សហការី
ភ្នំពេញៈ កម្មករ-កម្មការិនី ប្រមាណ ២៧៣ នាក់នៃរោងចក្រកាត់ដេរស្បែកជើង ប៊ុនតើស ដែល ស្ថិតក្នុងភូមិខ្លាគ្រហឹមឃុំតាភេម ស្រុក ត្រាំកក់ ខេត្តតាកែវ បានដួលសន្លប់ជាបន្តបន្ទាប់ នៅព្រឹកថ្ងៃទី ៩ កក្កដានេះ ក្រោយពីមានករណីកម្មការិនីម្នាក់ បានវាយឡេវកិប ស្បែកជើង ត្រូវចំម្រាមដៃខ្លួនឯងបណ្ដាលឲ្យរងរបួសហូរឈាម។ នេះបើតាម លោក ហេង ប៉េងឃាង តំណាងរោងចក្រកាត់ដេរស្បែកជើងប៊ុនតើស។
លោកបានថ្លែងថា៖ «ពេលនេះបុគ្គលិករដ្ឋបាលនៃរោងចក្ររបស់យើងកំពុងរួមសហការជាមួយសមត្ថកិច្ចនគរបាលស្រុកត្រាំកក់ជួយអន្តរាគមន៍បញ្ជូនពួកគេទៅពិនិត្យព្យាបាល នៅឯមណ្ឌលសុខភាពស្រុក ត្រាំកក់»។
លោក ឌុក ធីយ៉ា អធិការស្រុកត្រាំកក់បានប្រាប់ ភ្នំពេញ ប៉ុស្តិ៍ ខណៈលោកកំពុងចុះជួយអន្តរាគមន៍ដឹកនាំ កម្មករ-កម្មការិនីដួលសន្លប់ទាំងនោះទៅមណ្ឌលសុខភាពនិងបានស៊ើបសួរដោយផ្ទាល់ទៅលើជនរងគ្រោះថាមូលហេតុមកពីពួកគេឃើញឈាមមិត្តភ័ក្ដិដែលត្រូវរបួសពីដំបូង។
លោកថា៖«ករណីកម្មការិនីដួលសន្លប់ខាងលើនេះ បណ្ដាលមកពីពួកគេមានការភ័យតក់ស្លុតនៅពេលឃើញមិត្តរួមការងាររបស់ពួកគេរងរបួសហូរឈាមច្រើនពេក»៕
