.jpg)
សិស្សានុសិស្សកំពុងរើសសៀវភៅក្នុងហាង។ ហេង ជីវ័ន
ភ្នំពេញៈ កម្មវិធីលក់សៀវភៅធំបំផុត Big Bad Wolf Book Sale បានបញ្ចប់កាលពីយប់ថ្ងៃចន្ទ ដោយបានទាក់ទាញមនុស្សប្រមាណ ១០ ម៉ឺននាក់ មកចូលរួមទិញសៀវភៅក្នុងកម្មវិធីលក់រយៈពេល ១៣ ថ្ងៃ នៅផ្សារបុរីរុងរឿងក្នុងខណ្ឌជ្រោយចង្វារ។ កម្មវិធីនេះបាននាំយកសៀវភៅភាសាអង់គ្លេសប្រមាណ ១ លានក្បាល ដោយលក់បញ្ចុះតម្លៃពី ៥០ ទៅ ៩០ ភាគរយ។ កម្មវិធីដែលបង្កើតឡើងនៅប្រទេស ម៉ាឡេស៊ី មួយនេះធ្វើឡើងក្នុងគោលបំណងឲ្យមនុស្សគ្រប់មជ្ឈដ្ឋានអាចមានលទ្ធភាពទិញសៀវភៅបាន មិនថាមាន ឬក្រ។ កម្មវិធីនេះក៏ផ្ដល់សៀវភៅដល់ដៃគូរួមមានក្រសួងអប់រំ និងបណ្ណាល័យបញ្ញវន្ត។
លោក Andrew Yap សហស្ថាបនិកកម្មវិធី Big Bad Wolf Book Sale បាននិយាយថា អ្នកចូលរួមទិញសៀវភៅក៏ដូចជាកម្មវិធីនេះប្រគល់សៀវភៅសរុប ១ ៤៤៣ ក្បាលទៅក្រសួងអប់រំ និងទៅបណ្ណាល័យបញ្ញវន្ត។ លោកបញ្ជាក់ថា សៀវភៅដែលលក់ដាច់ជាងគេគឺសៀវភៅស្ដីអំពីរឿងពិត និងរឿងប្រឌិត សៀវភៅសម្រាប់ក្មេងៗ ក្រៅពីនេះសៀវភៅអំពីការអភិវឌ្ឍខ្លួន ធុរកិច្ច និងជីវប្រវត្តិរបស់បុគ្គលក៏ជាសៀវភៅពេញនិយមផងដែរ។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាបានថ្លែងថា ក្រសួងតែងលើកទឹកចិត្តដល់កម្មវិធីទាំងឡាយណាដែលលើកកម្ពស់ការអាន។ ចំពោះសៀវភៅដែលនឹងទទួលបានពី Big Bad Wolf Book Sale ក្រសួងនឹងចែកទៅតាមបណ្ណាល័យនានារបស់ក្រសួងនៅទូទាំងប្រទេសតាមតម្រូវការជាក់ស្ដែង។
លោក ច័ន្ទ សុផល នាយកមជ្ឈមណ្ឌលសិក្សាគោលនយោបាយថ្លែងថា លោកបានទៅទិញសៀវភៅនៅក្នុងកម្មវិធីនេះដែរ ហើយមើលឃើញថា ពលរដ្ឋកម្ពុជានៅចាប់អារម្មណ៍ការអានសៀវភៅ បើទោះបីជាពួកគេមានកម្មវិធីឌីជីលផ្សេងៗក៏ដោយ។ លោកថា ការលក់សៀវភៅក្នុងកម្មវិធី Big Bad Wolf Book Sale ធ្វើឲ្យយុវជនអាចរកទិញសៀវភៅដែលមិនមាននៅលើទីផ្សារកម្ពុជា ហើយអាចទិញបានក្នុងចំនួនច្រើន គឺចំណេញថវិកា។
លោក ប៉ា ច័ន្ទរឿន ប្រធានវិទ្យាស្ថានកម្ពុជាសម្រាប់លទ្ធិប្រជាធិបតេយ្យបាននិយាយថា ការលក់សៀវភៅរបស់កម្មវិធីនេះបានទាក់ទាញយុវជនយ៉ាងច្រើន ហើយលោកមើលឃើញថា យុវជនកម្ពុជាក្នុងប៉ុន្មានឆ្នាំចុងក្រោយនេះចូលចិត្តអានសៀវភៅ។
លោកនិយាយថា៖ «នេះជាសញ្ញាល្អសម្រាប់សង្គមយើង។ សង្គមយើងនឹងអភិវឌ្ឍនៅពេលយុវជនចាប់អារម្មណ៍អានសៀវភៅ ពីព្រោះការអានសៀវភៅធ្វើឲ្យគេអភិវឌ្ឍខ្លួនគេ»។
លោកថ្លែងថា ប៉ុន្តែពួកគេក៏គួរតែបន្ថែមការអានសៀវភៅអភិវឌ្ឍខ្លួនទាំងនោះដោយអភិវឌ្ឍលើផ្នែកសីលធម៌ និងគុណធម៌ទៅជាមួយគ្នា៕
