សៀមរាប: ឈើប្រណីតប្រភេទសុក្រំ និងធ្នង់សរុបជាង ២០ ម៉ែត្រគុបក្នុងនោះមាន ៦ ម៉ែត្រគុបគ្មានច្បាប់អនុញ្ញាតត្រូវបានសមត្ថកិច្ចខេត្តសៀមរាបចុះបង្ក្រាប និងឆែកឆេរនៅទីតាំងរោងសន្និធិផល អនុផលព្រៃឈើចំនួន ២ កន្លែងផ្សេងគ្នា កាលពីថ្ងៃទី ៤ និង ៥ តុលានៅភូមិទ្រាំង សង្កាត់ស្លក្រាម ដោយម្ចាស់ទីតាំងចំនួន ២ នាក់ ត្រូវសមត្ថកិច្ចហៅទៅសាកសួរ ប៉ុន្ដែមិនបានឃាត់ខ្លួននោះទេ។
លោក ម៉ក់ ធារ៉ា ស្នងការរងខេត្តសៀមរាបទទួលបន្ទុកប្រឆាំងបទល្មើសសេដ្ឋកិច្ចបានប្រាប់ភ្នំពេញប៉ុស្ដិ៍ពីម្សិលមិញថា បន្ទាប់ពីទទួលបានបណ្ដឹងពីប្រជាពលរដ្ឋ សមត្ថកិច្ចបានចុះទៅត្រួតពិនិត្យរកឃើញឈើជាង ២០ ម៉ែត្រគុបដោយមានឯកសារត្រឹមត្រូវចំនួន ១៤ ម៉ែត្រគុប និងគ្មានឯកសារបញ្ជាក់ចំនួន ៦ ម៉ែត្រគុបដែលកំពុងលួចលាក់ទុកក្នុងរោងមួយនៅកសិដ្ឋានចិញ្ចឹមជ្រូកដែលលាក់ ២ កន្លែងផ្សេងគ្នា។
លោកបន្តថា ដោយឈើចំនួន ៦ ម៉ែត្រគុប ត្រូវបានសមត្ថកិច្ចរឹបអូសប្រគល់ជូនរដ្ឋបាលព្រៃឈើចាត់ចែងតាមច្បាប់។ ចំណែកម្ចាស់ទីតាំងចំនួន ២ នាក់ ត្រូវសមត្ថកិច្ចកោះហៅទៅសាកសួរ ប៉ុន្ដែមិនបានឃាត់ខ្លួនទេដោយគ្រាន់តែធ្វើការផាកពិន័យជាអន្តរកាលតាមច្បាប់ស្ដីពីព្រៃឈើ។
លោក ធារ៉ា បញ្ជាក់ថា៖ «ឈើទាំងនេះត្រូវបានម្ចាស់រៀបរាប់ប្រាប់ពួកខ្ញុំជាសមត្ថកិច្ចថា គាត់បានទិញពីគេយកមកបម្រុងធ្វើផ្ទះ ប៉ុន្ដែមិនទាន់បានធ្វើទេ ដោយកំពុងរៀបចំទិញសម្ភារបន្ថែម ព្រោះនៅខ្វះសម្ភារច្រើនទៀតហើយពួកគាត់ថា ពួកគាត់មិនមែនជាអ្នកធ្វើអាជីវកម្មឈើទេ»។
លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាបបានថ្លែងថា លោកមិនទាន់ទទួលបានរបាយការណ៍លម្អិតជុំវិញករណីនេះនៅឡើយ ដោយគ្រាន់តែដឹងថា សមត្ថកិច្ចពិតជាបានចុះទៅពិនិត្យទីតាំងកសិដ្ឋានចិញ្ចឹមជ្រូកមួយកន្លែងនៅទីតាំងខាងលើ ប៉ុន្ដែសមត្ថកិច្ចរកឃើញឈើប្រណីតប៉ុន្មាននោះ លោកមិនទាន់ដឹងច្បាស់ទេ។
លោកបញ្ជាក់ថា៖ «ខ្ញុំដឹងរឿងហ្នឹង តែមិនទាន់បានទទួលរបាយការណ៍លម្អិតនៅឡើយ ព្រោះមន្ត្រីយើងកំពុងធ្វើការជាបន្តបន្ទាប់។ ក្នុងនោះដែរសមត្ថកិច្ចមិនបានឃាត់ខ្លួនម្ចាស់ទីតាំងខាងលើនេះទេ ដោយគ្រាន់តែសាកសួរធម្មតា»។
លោក ម៉ុង ប៊ុនលីម នាយខណ្ឌរដ្ឋបាលព្រៃឈើខេត្តសៀមរាបកាលពីម្សិលមិញមិនទាន់អាចទាក់ទងសុំការបញ្ជាក់ជុំវិញករណីនេះបានទេ ដោយលោកបានបិទទូរស័ព្ទ។
តាមរបាយការណ៍របស់អគ្គស្នងការនគរបាលជាតិបានឲ្យដឹងពីម្សិលមិញថា កម្លាំងចម្រុះរួមមាន មន្ត្រីនគរបាលប្រឆាំងបទល្មើសសេដ្ឋកិច្ច ខេត្តសៀមរាប រដ្ឋបាលព្រៃឈើ និងអាជ្ញាធរមូលដ្ឋានក្រោមការដឹកនាំដោយលោក ជួន សុបញ្ញា ព្រះរាជអាជ្ញារង អមសាលាដំបូងខេត្តបានចុះបង្ក្រាប និងធ្វើការឆែកឆេរទីតាំងសន្និធិផល អនុផលព្រៃឈើ ២ កន្លែង។
របាយការណ៍បន្តថាក្នុងនោះមានម្ចាស់ទីតាំងឈ្មោះ លៀម មុំ ភេទស្រី អាយុ ៤៤ ឆ្នាំ និង ១ កន្លែងទៀតជារបស់ឈ្មោះ អេង សុម៉ាលីន ភេទស្រី អាយុ ៣៨ ឆ្នាំ ដែលបានស្នាក់នៅបណ្តោះអាសន្នលើដីឈ្មោះ លៀម មុំ ដោយពួកគាត់បច្ចុប្បន្នស្នាក់នៅក្នុងភូមិទ្រាំង សង្កាត់ស្លក្រាម ក្រុង/ខេត្តសៀមរាប។ សមត្ថកិច្ចបានរកឃើញឈើប្រភេទលេខ ១ សុក្រំចំនួន ៣២២ ដុំ ស្មើនឹង ១៩,៦៧០ ម៉ែត្រគុប និងឈើប្រភេទធ្នង់ចំនួន ១២០ ដុំស្មើនឹង ១២,០០ ម៉ែត្រគុបដោយសរុបឈើទាំងអស់ស្មើនឹង ២០,៨៧០ ម៉ែត្រគុប។
អគ្គស្នងការនគរបាលជាតិបញ្ជាក់ថា៖ «ក្រោយពីសមត្ថកិច្ចចម្រុះធ្វើការវាស់វែង និងផ្ទៀងផ្ទាត់វិក្កយបត្រទិញឈើពីដេប៉ូលក់រួចមកឃើញថា មានឈើចំនួន ៦,២៣០ ម៉ែត្រគុប គ្មានច្បាប់អនុញ្ញាត។ ចំពោះចំនួនឈើដែលគ្មានច្បាប់នោះជាវត្ថុតាងនៃបទល្មើស ព្រោះគ្មានលិខិតពីមន្ត្រីជំនាញត្រូវបានធ្វើកំណត់ហេតុដកហូត និងដឹកជញ្ជូនទៅរក្សាទុកនៅស្នាក់ការផ្នែករដ្ឋបាលព្រៃឈើបន្ទាយស្រី ដើម្បីអនុវត្តទៅតាមនីតិវិធីនៃច្បាប់ស្តីពីព្រៃឈើ»៕