.jpg)
កម្លាំងនគរបាលនៅខេត្តមណ្ឌលគិរីពេលហ្វឹកហ្វឺនពីជំនាញបង្ក្រាបបាតុកម្ម។ រូបថត ប៉ូលិស
មណ្ឌលគិរី/បាត់ដំបងៈ ស្នងការដ្ឋាននគរបាលខេត្តមណ្ឌលគិរី និងខេត្តបាត់ដំបង់បានបើកវគ្គហ្វឹកហ្វឺនដល់កងកម្លាំងនគរបាលពីជំនាញក្នុងការបង្ក្រាបបាតុកម្មដែលអគ្គស្នងការនគរបាលជាតិបានថ្លែងថា ការហ្វឹកហ្វឺននេះគឺធ្វើឡើងដើម្បីពង្រឹងសមត្ថភាពកងកម្លាំង និងក៏ជាផ្នែកមួយដើម្បីត្រៀមបង្ក្រាបទៅលើក្រុមទាំងឡាយណាដែលបង្កឲ្យមានភាពអសន្តិសុខ និងមានបំណងធ្វើរដ្ឋប្រហារផ្តួលរំលំរដ្ឋាភិបាលផងដែរ។
បើយោងតាមគេហទំព័រ អគ្គស្នងការនគរបាលជាតិកាលពីព្រឹកថ្ងៃអង្គារលោកឧត្តមសេនីយ៍ទោ ឡោ សុខា ស្នងការខេត្តមណ្ឌលគិរីបានចាត់ឲ្យលោកស្នងការរងទទួលផែនធនធានមនុស្សរៀបចំបើកវគ្គហ្វឹកហ្វឺនពីលំហាត់របៀប និងជំនាញយុទ្ធវិធីប្រឆាំងនឹងបាតុកម្មដល់មន្ត្រីនគរបាលចំនួន ១៣៣ នាក់។
លោក ឡោ សុខា ថ្លែងថា៖ «ដើម្បីចូលរួមហ្វឹកហ្វឺនមេរៀន លំហាត់របៀប និងជំនាញយុទ្ធវិធីប្រឆាំងបាតុកម្ម។ វគ្គហ្វឹកហ្វឺនខាងលើនេះត្រូវបានបើកជាបន្តបន្ទាប់ ដើម្បីក្រើនរំឭកដល់កងកម្លាំងកុំឲ្យភ្លាំងភ្លេច។ ដូច្នេះកងកម្លាំងដែលត្រូវហ្វឹកហ្វឺនទាំងអស់ត្រូវយកចិត្តទុកដាក់ត្រងត្រាប់ស្តាប់ ដើម្បីយកមេរៀនទាំងនេះទៅអនុវត្តជាក់ស្តែង»។
លោក ឌុន សុខា ស្នងការរងខេត្តមណ្ឌលគិរីថ្លែងថា ស្នងការដ្ឋានខេត្តមណ្ឌលគិរីតែងតែបើកវគ្គហ្វឹកហ្វឺនពីលំហាត់របៀប និងជំនាញយុទ្ធវិធីប្រឆាំងបាតុកម្មដល់មន្ត្រីនគរបាល ដើម្បីជួយពង្រឹងសមត្ថភាព និងរក្សាសន្តិសុខសណ្តាប់ធ្នាប់សង្គម។ លោកបញ្ជាក់ថា៖ «យើងធ្វើការហ្វឹកហាត់រហូតដោយមិនមានគិតថ្ងៃ។ កម្លាំងយើងត្រូវតែធ្វើការហ្វឹកហាត់ជំនាញរហូត ដើម្បីឲ្យការពារក្នុងពិធីបុណ្យផ្សេងៗ»។
ជាមួយគ្នានេះដែរស្នងការដ្ឋាននគរបាលខេត្តបាត់ដំបងក៏បានបើកវគ្គហ្វឹកហ្វឺនដល់កងកម្លាំងនគរបាលដូចគ្នាផងដែរ។
លោក អ៊ុច សុខុន ស្នងការខេត្តបាត់ដំបងមិនអាចទាក់ទងសុំអធិប្បាយពីបញ្ហានេះបានទេកាលពីម្សិលមិញ ប៉ុន្តែស្នងការរងខេត្តបាត់ដំបងម្នាក់ដែលសុំមិនបញ្ចេញឈ្មោះបានថ្លែងថា ការរៀបចំបើកវគ្គហ្វឹកហ្វឺនពីលំហាត់របៀប និងជំនាញយុទ្ធវិធីប្រឆាំងបាតុកម្មដល់មន្ត្រីនគរបាលនេះគឺអនុវត្តតាមបទបញ្ជារបស់អគ្គស្នងការនគរបាលជាតិ និងក្រសួងមហាផ្ទៃ ដើម្បីជួយពង្រឹងសមត្ថភាពក្នុងពេលចេញប្រតិបត្តិការថែរក្សាសន្តិសុខ និងសណ្តាប់ធ្នាប់។
លោកបញ្ជាក់ថា៖ «យើងបានហ្វឹកហ្វឺនពីលំហាត់របៀប និងជំនាញយុទ្ធវិធី ប្រឆាំងបាតុកម្មដល់មន្ត្រីនគរបាលជាច្រើននាក់»។
លោក ឆាយ គឹមខឿន អ្នកនាំពាក្យអគ្គស្នងការនគរបាលជាតិមិនអាចទាក់ទងសុំការអត្ថាធិប្បាយបានទេពាក់ព័ន្ធនឹងការហ្វឹកហ្វឺនដល់កម្លាំងនគរបាលនេះ។
ប៉ុន្តែនាយឧត្តមសេនីយ៍ នេត សាវឿន អគ្គស្នងការនគរបាលជាតិថ្លែងប្រាប់ភ្នំពេញប៉ុស្តិ៍ពីថ្ងៃម្សិលមិញថា ស្នងការដ្ឋាននគរបាលខេត្តនីមួយៗត្រូវតែធ្វើការហ្វឹកហ្វឺនពីលំហាត់របៀប និងជំនាញយុទ្ធវិធីប្រឆាំងបាតុកម្មដល់មន្ត្រីនគរបាល ដើម្បីជួយពង្រឹងសមត្ថភាព និងថែរក្សាសន្តិសុខ សណ្តាប់ធ្នាប់សង្គម។
លោកបន្ថែមថា ការហ្វឹកហ្វឺននេះក៏ជាផ្នែកមួយដើម្បីត្រៀមទប់ស្កាត់ និងបង្ក្រាបទៅលើក្រុមទាំងឡាយណាដែលបង្កឲ្យមានភាពអសន្តិសុខ និងមានបំណងធ្វើរដ្ឋប្រហារផ្តួលរំលំរដ្ឋាភិបាល។
លោកបញ្ជាក់ថា៖ «យើងមិនដែលបង្គ្រាបគណបក្សប្រឆាំងទេតែយើងបង្ក្រាបអ្នកណាដែលធ្វើឲ្យបាត់សន្តិសុខ និងសណ្តាប់ធ្នាប់សង្គមហើយអ្នកណាដែលរៀបគម្រោងចូលមកវិញ ធ្វើសកម្មភាពរដ្ឋប្រហារផ្តួលរំលំរដ្ឋាភិបាលដូច្នេះសមត្ថកិច្ច និងកម្លាំងគ្រប់បែបយ៉ាងត្រៀមទប់ស្កាត់ពួកហ្នឹងឲ្យបាន ដើម្បីរក្សាសន្តិសុខជូនសង្គមជាតិ»។
លោក អ៊ូ ច័ន្ទរ័ត្ន អតីតតំណាងរាស្ត្រអតីតគណបក្សសង្គ្រោះជាតិថ្លែងថា ការហ្វឹកហ្វឺនកងកម្លាំងនគរបាលនេះគឺសំដៅទប់ស្កាត់ និងបង្ក្រាបទៅលើអ្នកគាំទ្រផែនការវិលត្រឡប់របស់លោក សម រង្ស៊ី នៅថ្ងៃទី ៩ ខែវិច្ឆិកា ដែលនេះ គឺជាការគំរាមកំហែងដល់សិទ្ធិសេរីភាពរបស់ប្រជាពលរដ្ឋហើយនឹងធ្វើឲ្យស្ថានភាពនយោបាយកាន់តែធ្ងន់ធ្ងរ។
លោកបញ្ជាក់ដូច្នេះថា៖ «វាធ្វើឲ្យប្រជាពលរដ្ឋមានការភ័យខ្លាច និងធ្វើឲ្យប្រទេសយើងមានស្ថានភាពកាន់តែធ្ងន់ធ្ងរ ដោយសារតែការចាប់មនុស្ស ការចោទប្រកាន់ដែលធ្វើឲ្យអន្តរជាតិមើលឃើញថាប្រទេសកម្ពុជាបាននិងកំពុងតែធ្វើយុទ្ធនាការបង្ក្រាបយ៉ាងខ្លាំងទៅលើអ្នកប្រឆាំងដែលវាប៉ះពាល់សិទ្ធិមនុស្ស និងប្រជាធិបតេយ្យ»៕
