កំពង់ធំ៖ សមត្ថកិច្ចកងរាជអាវុធហត្ថខេត្តកំពង់ធំ កំពុងស្វែងចាប់ខ្លួនមន្ត្រីអាវុធហត្ថម្នាក់ ដែលជាជំនួយការបញ្ជាការដ្ឋានកងរាជអាវុធហត្ថស្រុកសណ្តាន់ ដែលបានប្រើហិង្សាចាក់ប្រពន្ធខ្លួនឯងរបួសធ្ងន់ប្រព្រឹត្តនៅភូមិត្បូងទឹក ឃុំមានរិទ្ធ នៅថ្ងៃទី ២៣ ឧសភា។
លោក ផុន សុផល នាយការិយាល័យព្រហ្មទណ្ឌនៃបញ្ជាការដ្ឋានកងរាជអាវុធហត្ថខេត្តកំពង់ធំប្រាប់ ភ្នំពេញ ប៉ុស្តិ៍ នៅរសៀលថ្ងៃទី ២៣ ឧសភាថា ជនសង្ស័យឈ្មោះ ស្រ៊ន ពេជ្ររស្មី អាយុ ៣៦ ឆ្នាំ និងស្ត្រីរងគ្រោះជាប្រពន្ធឈ្មោះ គួច មួយហៀក អាយុ ៣០ ឆ្នាំ។ ពួកគេរស់នៅក្នុងភូមិត្បូងទឹក ឃុំមានរិទ្ធ ស្រុកសណ្តាន់ ខេត្តកំពង់ធំ។ ជនសង្ស័យរូបនេះជាមន្ត្រីអាវុធហត្ថនៅបញ្ជាការដ្ឋានកងរាជអាវុធហត្ថស្រុកសណ្តាន់ មានតួនាទីជាជំនួយការ។
លោកប្រាប់ថា៖ «ករណីនេះយើងកំពុងរាយកម្លាំងដាក់កម្លាំងនៅតាមភូមិឃុំ និងស្រុកកើតហេតុ ដើម្បីស្វែងរកជនសង្ស័យហើយ។ យើងខ្លាចជនសង្ស័យពួននៅគុម្ពោតព្រៃណាមួយហើយយើងកំពុងរុករកជននោះហើយ»។
លោកប្រាប់តាមសម្តីសាច់ញាតិស្ត្រីរងគ្រោះថា ជនសង្ស័យឈ្មោះ ស្រ៊ន ពេជ្ររស្មី និងនារីឈ្មោះ គួច មួយហៀកបានរៀបការជាមួយគ្នាត្រឹមត្រូវតាមច្បាប់មិនមែនជាគូស្នេហ៍លួចលាក់អ្វីទេ។ ប៉ុន្តែមួយរយៈពេលកន្លងមក អ្នកទាំង ២ នាក់ចេះតែមានទំនាស់រកាំរកូសនឹងគ្នា រហូតមានទំនាស់ពាក្យសម្តីគ្នាផង។ លុះនៅព្រឹកថ្ងៃទី ២៣ ឧសភា ពួកគេបានឈ្លោះគ្នាម្តងទៀត ហើយសាច់ញាតិខាងស្រី ក៏ចេះតែហាមឃាត់កុំឱ្យឈ្លោះគ្នា ព្រោះខ្លាចខ្មាសញាតិជិតខាង។
លោកបន្តថា ការហាមឃាត់ពីសំណាក់សាច់ញាតិខាងនារីរងគ្រោះនោះ គឺជនសង្ស័យហាក់មិនស្តាប់តាមទេ។ ប៉ុន្តែផ្ទុយទៅវិញ ជនសង្ស័យកាន់តែកញ្ជ្រោលខ្លាំងឡើងៗហើយបានយកកាំបិតបន្ទោះចាក់ទៅលើនារីជាប្រពន្ធបណ្តាលឱ្យត្រូវចំដៃឆ្វេងចំនួន ២ កាំបិត ដៃស្តាំចំនួន ២ កាំបិត និងកញ្ចឹងកពីខាងក្រោយចំនួន ១ កាំបិត។ ពេលនោះសាច់ញាតិខាងនារីរងគ្រោះបានចូលទៅជួយហើយជនសង្ស័យក៏គេចខ្លួននៅពេលនោះទៅ។
បើតាមលោក ផុន សុផល ករណីនេះ ក្រុមគ្រួសារខាងនារីរងគ្រោះ មិនបានរាយការណ៍ប្រាប់សមត្ថកិច្ចកងរាជអាវុធហត្ថស្រុកសណ្តាន់ឱ្យបានទាន់ពេលទេ។ ព្រោះពេលនោះពួកគាត់រវល់តែភ័យនឹងនារីរងគ្រោះដោយសារមានរបួសធ្ងន់ពេក និងចាត់ចែងដឹកជនរងគ្រោះទៅសង្គ្រោះនៅមន្ទីរពេទ្យបង្អែកស្រុកសិន។ ក្រោយមកសមត្ថកិច្ចអាវុធហត្ថស្រុកសណ្តាន់បានរាយការណ៍មកបញ្ជាការដ្ឋានកងរាជអាវុធហត្ថខេត្ត ហើយលោកបានចាត់កម្លាំងចុះទៅអន្តរាគមន៍ភ្លាមៗតែម្តង។
លោកបញ្ជាក់ថា ក្រោយពីកើតហេតុកម្លាំងកងរាជអាវុធហត្ថស្រុកសណ្តាន់ និងកម្លាំងសមត្ថកិច្ចនៃបញ្ជាការដ្ឋានអាវុធហត្ថខេត្តកំពង់ធំ កំពុងស្វែងរកចាប់ខ្លួនជនសង្ស័យហើយ ដើម្បីយកមកផ្តន្ទាទោសតាមច្បាប់៕