ពោធិ៍សាត់: ក្នុងអំឡុងពេលប្រមាណ ១ សប្ដាហ៍ ក្រុមមន្ត្រីឧទ្យានុរក្សស្នាក់ការរវៀង និងអង្គការសម្ព័ន្ធមិត្តសត្វព្រៃ (Wildlife Alliance) បានដើរល្បាតក្នុងតំបន់ការពារសត្វព្រៃរវៀងបានរឹបអូសសាច់សត្វព្រៃ សម្ភារ និងសំណង់ខុសច្បាប់ជាច្រើនដែលជាការគំរាមកំហែងដល់ជីវិតសត្វព្រៃកំពុងរស់នៅក្នុងតំបន់ការពាររវៀងក្នុងខេត្តពោធិ៍សាត់។
តាមរបាយការណ៍ដែលដាក់បង្ហោះនៅលើបណ្ដាញសង្គមហ្វេសប៊ុកផ្លូវការរបស់អង្គការសម្ព័ន្ធភាពសត្វព្រៃ (Wildlife Alliance) បានឲ្យដឹងនៅថ្ងៃទី ១៧ ខែមីនា នេះថា ក្នុងអំឡុងសប្ដាហ៍នេះ មន្ត្រីឧទ្យានុរក្សស្នាក់ការរវៀងបានចុះល្បាតរឹបអូសសាច់ឈ្លូសទម្ងន់ ៤០ គីឡូក្រាម ផ្ទះខុសច្បាប់ចំនួន ៣ កន្លែង ជំរំខុសច្បាប់ចំនួន ៣ កន្លែង កាំភ្លើងច្នៃចំនួន ៥ ដើម គោយន្តចំនួន ១ គ្រឿង រទេះគោចំនួន ៨ គ្រឿង ឧបករណ៍ឆក់ត្រីចំនួន ២ គ្រឿង អន្ទាក់ចំនួន ៣១៤ អន្ទាក់ សំណាញ់ចាប់សត្វបក្សីចំនួន ១ និងឈើចំនួន ៥ ម៉ែត្រគុប។
អង្គការ Wildlife Alliance បានឲ្យដឹងថា វត្ថុតាងទាំងអស់ត្រូវបានរកឃើញដោយមន្ត្រីឧទ្យានុរក្សស្នាក់ការរវៀងនេះគឺក្នុងអំឡុងពេលចុះល្បាតក្នុងរយៈពេលវែង ប៉ុន្ដែមនុស្សដែលជាជនសង្ស័យបានរត់គេចខ្លួនចេញពីកន្លែងប្រព្រឹត្តបទល្មើស។ ក្រៅពីការចុះបង្ក្រាបការចុះល្បាត អង្គការធ្លាប់ចុះអប់រំណែនាំពីការបរិភោគសាច់សត្វព្រៃដែលជាការគំរាមកំហែងដល់សុខភាពសាធារណៈ។
Wildlife Alliance បញ្ជាក់ថា៖ «ដូចដែលយើងកំពុងមើលឃើញហើយនៃការរីករាលដាលរបស់កូរ៉ូណាវីរុសមួយនេះ ប៉ុន្តែជារឿយៗសត្វព្រៃតែងតែត្រូវបានរឹបអូសហើយសាច់ដែលនៅសល់ត្រូវបានយកទៅក្លាស្សេទុកក្នុងរយៈពេលយូរមុននឹងបញ្ជូនទៅលក់ឲ្យអ្នកបរិភោគ ដែលជាហេតុធ្វើឲ្យប៉ះពាល់ដល់អ្នកបរិភោគសាច់សត្វព្រៃ។ ការបរិភោគសាច់សត្វព្រៃនេះជាការបង្កើតឱកាសបង្កឲ្យមានគ្រោះថ្នាក់ដោយសារជំងឺឆ្លង។ អង្គការសម្ព័ន្ធមិត្តសត្វព្រៃកំពុងជំរុញឲ្យប្រជាជនបញ្ឈប់ការបរិភោគសាច់សត្វព្រៃ ដើម្បីជាប្រយោជន៍ដល់សុខភាពរបស់អ្នក និងប្រជាជនកម្ពុជា»។
លោក ខឹម ពុទ្ធីរាវង្ស ប្រធានក្រុមការងារបង្ក្រាប និងសង្គ្រោះសត្វព្រៃបន្ទាន់នៃអង្គការសម្ព័ន្ធមិត្តសត្វព្រៃ Wildlife Alliance ពីម្សិលមិញបានបដិសេធធ្វើអត្ថាធិប្បាយជុំវិញករណីនេះ ដោយលោកកំពុងជាប់រវល់ប្រជុំ។
លោក ចាន់ សុខា មេបញ្ជាការកងរាជអាវុធហត្ថស្រុកភ្នំក្រវាញ ខេត្តពោធិ៍សាត់ពីថ្ងៃម្សិលមិញថា កម្លាំងលោកមិនបានចូលរួមសហការជាមួយមន្ត្រីឧទ្យានុរក្សស្នាក់ការរវៀង និងអង្គការ Wildlife Alliance ក្នុងសកម្មភាពចុះល្បាតនេះទេ ព្រោះអង្គការមិនបានស្នើសុំកម្លាំង។
លោកបញ្ជាក់ថា៖ «កម្លាំងខ្ញុំអត់បានចូលរួមជាមួយមន្ត្រីឧទ្យានុរក្សស្នាក់ការរវៀង និងអង្គការ Wildlife Alliance ទេ ព្រោះអង្គការមិនបានស្នើសុំឲ្យជួយគាត់ទេ។ ខ្ញុំគិតថា ប្រហែលជាកម្លាំងអង្គការគាត់គ្រប់គ្រាន់ហើយទើបបានជាគាត់មិនចង់ស្នើកម្លាំងបន្ថែមទៀតបែបនេះ»។
លោក ប៉ាន់ មរកត ប្រធានមន្ទីរបរិស្ថានខេត្តពោធិ៍សាត់ពីម្សិលមិញមិនទាន់អាចទាក់ទងសុំការបញ្ជាក់បន្ថែមជុំវិញករណីនេះបានទេ ដោយទូរស័ព្ទលោកគ្មានអ្នកទទួល៕