.jpg)
មន្ត្រីឧទ្យានុរក្សម្នាក់ដែលរងរបួស។ សហការី
មណ្ឌលគិរីៈ ក្រុមកម្លាំងឧទ្យានុរក្ស នៃមន្ទីរបរិស្ថានខេត្តមណ្ឌលគិរី សហការជាមួយកម្លាំងសមត្ថកិច្ចប្រដាប់អាវុធខេត្តមណ្ឌលគិរី កំពុងបន្តចុះប្រតិបត្តិការស្វែងរកចាប់ខ្លួន ជនប្រមាញ់សត្វព្រៃមួយក្រុម ដែលបានផ្ទុះអាវុធជាមួយក្រុមមន្ត្រីឧទ្យានុរក្សនៃដែនជម្រកសត្វព្រៃស្រែពក បង្កឲ្យមន្ត្រីឧទ្យានុរក្សម្នាក់រងរបួស។ នេះបើតាមការអះអាងរបស់លោក កែវ សុភ័ក្រ្ត ប្រធានមន្ទីរបរិស្ថានខេត្តមណ្ឌលគិរីកាលពីម្សិលមិញ។
លោក សុភ័ក្ត្រ បានថ្លែងកាលពីថ្ងៃទី ២៩ ខែមករា ថា ក្រុមមន្ត្រីឧទ្យានុរក្សនៃដែនជម្រកសត្វព្រៃស្រែពក ចំនួន៦នាក់ មានអាវុធ AK ២ ដើម បានចុះល្បាតព្រៃដោយជិះម៉ូតូចំនួន ៣ គ្រឿងបានពើបប្រទះក្រុមជនប្រមាញ់សត្វព្រៃមួយក្រុមមានគ្នាប្រមាណ ៦ នាក់ ប្រដាប់ដោយអាវុធ AK ៣ ដើម នៅពេលនោះ ក្រុមមន្ត្រីឧទ្យានុរក្សបានស្រែកហាមឃាត់ក្រុមជនល្មើសឲ្យបញ្ឈប់សកម្មភាពបរបាញ់សត្វព្រៃ ប៉ុន្តែក្រុមជនល្មើសបានផ្ទុះអាវុធសំដៅមករកក្រុមមន្ត្រីឧទ្យានុរក្សតែម្ដង។
លោក សុភ័ក្រ្ត ថ្លែងថា៖ «ក្រោយពីមានការផ្ទុះអាវុធដាក់គ្នាប្រមាណ ១៥ នាទី ក្រុមមន្ត្រីឧទ្យានុរក្សយើងម្នាក់បានត្រូវរបួសចំគល់ភ្លៅខាងឆ្វេងធ្លាយមកកំប៉េះគូទ។ ពេលនោះក្រុមមន្ត្រីយើងបានសម្រេចដកថយពី ការវាយប្រហាររបស់ក្រុមប្រមាញ់សត្វព្រៃខុសច្បាប់ទាំងនោះ ដើម្បីនាំជនរងគ្រោះទៅកាន់មន្ទីរពេទ្យដើម្បីព្យាបាលរបួស»។
លោក សុភ័ក្ត្រ ថ្លែងថា មន្ត្រីឧទ្យានុរក្សដែលរងរបួសនោះ ឈ្មោះ ចេង ចន្ធី អាយុ ៣៧ ឆ្នាំ។ ជនរងគ្រោះត្រូវបានបញ្ជូនទៅកាន់មន្ទីរពេទ្យកាល់ម៉ែត កំពុងស្ថិតក្រោមការព្យាបាលយ៉ាងយកចិតទុកដាក់ពីក្រុមគ្រូពេទ្យជំនាញ។
លោក សុភ័ក្ត្រ ថា ក្រុមឧទ្យានុរក្សបានចុះទៅកាន់កន្លែងកើតហេតុជាថ្មីម្ដងទៀតដើម្បីប្រមូលវត្ថុតាងមួយចំនួនក៏បានផ្ទុះអាវុធម្ដងទៀត ប៉ុន្តែមិនមានមន្ត្រីឧទ្យានុរក្សណាម្នាក់រងរបួសឡើយ ឯក្រុមជនប្រមាញ់សត្វព្រៃ បានរត់គេចខ្លួនបាត់។
ក្រុមកម្លាំងមន្ត្រីឧទ្យានុរក្ស រួមទាំងកម្លាំងសមត្ថកិច្ចប្រដាប់អាវុធចម្រុះ ទាំងថ្នាក់ខេត្ត និងមូលដ្ឋាន កំពុងបន្តកិច្ចសហការគ្នាតាមស្វែងរកចាប់ពួកគេ៕
