The Phnom Penh Post Search

Search form




Logo of Phnom Penh Post newspaper Phnom Penh Post - កម្លាំង​ការងារ​កម្ពុជា​តែ ១០% ទទួល​បាន​ការ​ឈប់​ប្រចាំ​ឆ្នាំ

កម្លាំង​ការងារ​កម្ពុជា​តែ ១០% ទទួល​បាន​ការ​ឈប់​ប្រចាំ​ឆ្នាំ

កម្លាំង​ការងារ​កម្ពុជា​តែ ១០% ទទួល​បាន​ការ​ឈប់​ប្រចាំ​ឆ្នាំ

131202_05a
កម្មកររោងចក្រ B N ធ្វើការតវ៉ាកាលពីសប្តាហ៍មុន ប្រឆាំងនឹងការរំលោភបំពានសិទ្ធិការងារ ផា លីណា

ភ្នំពេញៈ របាយ​ការណ៍​មួយ ដែល​គេ​ចេញ​ផ្សាយ​កាល​ពី​សប្តាហ៍​មុន​បាន​ឲ្យ​ដឹង​ថា​កម្លាំង​ពលកម្ម​នៅ​ក្នុង​ប្រទេស​កម្ពុជា​ប្រមាណ​តែ ១០ ភាគរយ​ប៉ុណ្ណោះ ដែល​ទទួល​បាន​ការ​ឈប់​សម្រាក​ប្រចាំ​ឆ្នាំ​ដោយ​ទទួល​បាន​ប្រាក់​ខែ​តាម​ច្បាប់។

ក្រោម​ច្បាប់​ការងារ​កម្ពុជា​ឆ្នាំ ១៩៩៧ បុគ្គលិក​ដែល​ធ្វើ​ការ​តាម​ស្តង់ដារ មាន​ន័យ​ថា ធ្វើ​ការ ៤៨ ម៉ោង​ក្នុង​មួយ​សប្តាហ៍ ត្រូវ​មាន​សិទ្ធិ​ទទួល​បាន​ការ​ឈប់​សម្រាក​ប្រចាំ​ឆ្នាំ ១៨ថ្ងៃ ដោយ​ទទួល​បាន​ប្រាក់​ឈ្នួល​បន្ថែម​លើ​ការ​ឈប់​សម្រាក​មួយ​ថ្ងៃ​ក្នុង​មួយ​សប្តាហ៍។ ប៉ុន្តែ​យោង​តាម​របាយ​ការណ៍​មួយ​ដែល​មាន​ចំណង​ជើង​ថា «កម្លាំង​ការងារ​កម្ពុជា​ឆ្នាំ ២០១២» ដែល​បាន​ចេញ​ផ្សាយ​កាល​ពី​ថ្ងៃ​ព្រហស្បតិ៍​សប្តាហ៍​មុន ដោយ​អង្គការ​ពលកម្ម​អន្តរជាតិ និង​វិទ្យាស្ថាន​ជាតិ​ស្ថិតិ​របស់​ក្រសួង ផែនការ បាន​ឲ្យ​ដឹង​ថា បុគ្គលិក​ដែល​ធ្វើ​ការ​មាន​ស្តង់ដារ ៩០ ភាគរយ មិន​ត្រូវ​បាន​គេ​ឲ្យ​ឈប់​សម្រាក​ប្រចាំ​ឆ្នាំ​ដោយ​ទទួល​បាន​ប្រាក់​ឈ្នួល​ទេ ជា​តួលេខ​មួយ​ដែល​ស្រដៀង​គ្នា​នៅ​ពេល​គេ​និយាយ​អំពី​ការ​ឈប់​សម្រាក​ក្នុង​ពេល​មាន​ជំងឺ​ដោយ​ទទួល​បាន​ប្រាក់​ឈ្នួល។

របាយ​ការណ៍​នេះ បាន​បន្ត​ថា៖ «យោង​តាម​អ្នក​ឆ្លើយ​សំណួរ ៩,៥ ភាគរយ​ក្នុង​ចំណោម​ពួក​គេ ត្រូវ​បាន​គេ​អនុញ្ញាត​ឲ្យ​ឈប់​សម្រាក​ប្រចាំ​ឆ្នាំ​ដោយ​ទទួល​បាន​ប្រាក់​ឈ្នួល និង ១០,៤ ភាគរយ​គត់ ទទួល​បាន​ការ​ឈប់​សម្រាក​ពេល​មាន​ជំងឺ​ដោយ​ទទួល​បាន​ប្រាក់​ឈ្នួល»។ តួលេខ​ទាំង​នេះ មាន​ពាក់​ព័ន្ធ​នឹង​កម្លាំង​ពលកម្ម ៤៦ ភាគរយ​ដែល​គេ​ចាត់​ថា ជា «បុគ្គលិក» មិន​មែន​អ្នក​ដែល​ធ្វើ​ការ​បម្រើ​ខ្លួន​ឯង (៣៣ ភាគរយ) ឬ​ហៅ​ថា អ្នក​ចូល​រួម​ចំណែក​ក្នុង​អាជីវកម្ម​គ្រួសារ (២០ ភាគរយ)។

លោក​ស្រី អ៊ូ ទេពផល្លីន អនុ​ប្រធាន​នៃ​សហព័ន្ធ​កម្មករ​ចំណី​អាហារ និង​សេវាកម្ម​កម្ពុជា បាន​ថ្លែង​ថា វិស័យ​ឡង់សេ​ស្រាបៀរ គឺជា​វិស័យ​មួយ​ដែល​ក្នុង​នោះ​បុគ្គលិក​នៅ​តាម​ក្រុមហ៊ុន​មួយ​ចំនួន​តូច​ទទួល​បាន​ការ​ឈប់​សម្រាក​ប្រចាំ​ឆ្នាំ​ដោយ​ទទួល​បាន​ប្រាក់​ឈ្នួល។

លោក​ស្រី​បាន​អះអាង​បន្ត​ថា៖ «បុគ្គលិក​ភាគ​ច្រើន មិន​ត្រឹម​តែ​មិន​ទទួល​បាន​ការ​ឈប់​សម្រាក​ប្រចាំ​ថ្ងៃ​ប៉ុណ្ណោះ​ទេ ប៉ុន្តែ​ពួក​គេ ថែម​ទាំង​ត្រូវ​ធ្វើ​ការ ៧ ថ្ងៃ​ក្នុង​មួយ​សប្តាហ៍​ដោយ​គ្មាន​ការ​ឈប់​សម្រាក​ទៀត​ផង។ ប្រសិន​បើ​ពួក​គេ​ចង់​ឈប់​សម្រាក ពួក​គេ​នឹង​ត្រូវ​កាត់​ប្រាក់​ខែ»។

លោក​ស្រី បាន​បញ្ជាក់​ថា បុគ្គលិក​ខ្លះ មិន​ដឹង​ថា អ្វី​ទៅ​ជា​ច្បាប់​ការងារ​នោះ​ទេ ហើយ​ពួក​គេ គួរ​តែ​ទទួល​បាន​ប្រយោជន៍​ពី​ការ​ធ្វើ​អធិការកិច្ច​ឲ្យ​បាន​ទៀង​ទាត់​ជាង​នេះ។

លោក សាត សាមុត រដ្ឋ​លេខាធិការ​នៃ​ក្រសួង ការងារ និង​លោក អ៊ិន ខេមរា ប្រធាន​នាយកដ្ឋាន​អធិការកិច្ច​របស់​ក្រសួង​នេះ​មិន​អាច​ទាក់​ទង​បាន​ទេ កាល​ពី​ម្សិលមិញ។

លោក Dave Welsh ប្រធាន​នៃ​ក្រុម​សិទ្ធិ​ការងារ បាន​ថ្លែង​ថា សម្រាប់​ឧស្សាហកម្ម លើក​លែង​តែ​វិស័យ​កាត់ដេរ​ដែល​ទទួល​ខុស​ត្រូវ​លើ​ការ​នាំ​ចេញ​ជាង ៨៥ ភាគរយ ដែល​ជា​ស្ថិតិ​របស់​របាយ​ការណ៍​នេះ «គឺ​មិន​មាន​អ្វី​គួរ​ឲ្យ​ភ្ញាក់​ផ្អើល​ទេ»។

លោក បាន​ថ្លែង​បន្ត​ថា៖ «ក្រៅ​ពី​វិស័យ​កាត់​ដេរ ប្រសិន​បើ​អ្នក​មិន​ធ្វើ​ការ​ក្នុង​សណ្ឋាគារ​ដែល​មាន​ស្តង់ដារ​អន្តរជាតិ​ទេ​នោះ បុគ្គលិក និង​ថៅកែ​របស់​ពួក​គេ ប្រហែល​ជា​មិន​បាន​ដឹង​ពី​តម្រូវ​ការ​នៃ​ច្បាប់​ការងារ​ទេ។ ប៉ុន្តែ​វា​ជា​ការ​រំលោភ​ច្បាប់»។ លោក Welsh បាន​ថ្លែង​ថា ក្នុង​វិស័យ​កាត់ដេរ ការ​អនុវត្ត គឺ​មាន​ច្រើន​ជាង​នេះ​ឆ្ងាយ​ណាស់។

របាយ​ការណ៍​ដដែល បាន​ស្ទង់​មតិ​មនុស្ស ៩៦០០ គ្រួសារ​ទូទាំង​ប្រទេស​។ របាយ​ការណ៍​បាន​បន្ត​ថា៖ «បើ​គិត​ពី​ឧស្សាហកម្ម​វិញ សមាមាត្រ​ច្រើន​បំផុត​នៃ​ពលរដ្ឋ ដែល​មាន​ការងារ​ធ្វើ​ចំនួន ៣៣,៣ ភាគរយ​ក្នុង​វិស័យ​កសិកម្ម ១៧,៥ ភាគរយ​ក្នុង​ពាណិជ្ជកម្ម​លក់​ដុំ និង​រាយ និង ១៧,៤ ភាគរយ​ទៀត​នៅ​ក្នុង​វិស័យ​កាត់ដេរ»៕ NR

អត្ថបទគួរចាប់អារម្មណ៍