ភ្នំពេញៈ បេឡាជាតិរបបសន្តិសុខសង្គម (បសស) ឲ្យដឹងថា ក្នុងឆ្នាំ ២០១៩ ករណីគ្រោះថ្នាក់ចរាចរណ៍លើកម្មករ-កម្មការិនីតាមដងផ្លូវមានការថយចុះប្រមាណ ១០ ភាគរយ បើប្រៀបធៀបរយៈពេលដូចគ្នាក្នុងឆ្នាំ ២០១៨ ប៉ុន្តែចំនួនជនរងគ្រោះបែរជាមានការកើនឡើង ៧ ភាគរយទៅវិញ ខណៈដែលសហជីពនៅតែបង្ហាញក្តីព្រួយបារម្ភពីបញ្ហានេះ។
កាលពីថ្ងៃសុក្រសប្តាហ៍មុន ក្រុមការងារទប់ស្កាត់ករណីសន្លប់ និងបង្ការគ្រោះថ្នាក់ការងាររបស់កម្មករនិយោជិត (ទ.ស.ប.ក.) និងក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត (ស.ផ.ក.) នៃបេឡាជាតិសន្តិសុខសង្គម (ប.ស.ស.) ដែលមានតំណាងក្រសួង ស្ថាប័ន អង្គភាព សហជីព តំណាងរោងចក្រ និងអង្គការពាក់ព័ន្ធនានាសរុបប្រមាណជាង ១៥០ នាក់បានជួបជុំគ្នាក្នុងពិធីប្រជុំបូកសរុបលទ្ធផលការងារសម្រេចបានកាលពីឆ្នាំ ២០១៩។
របាយការណ៍របស់ (ប.ស.ស.)បានឲ្យដឹងថា បើប្រៀបធៀបរយៈពេលដូចគ្នានៅក្នុងឆ្នាំ ២០១៨ លទ្ធផលក្នុងឆ្នាំ ២០១៩ ករណីគ្រោះថ្នាក់ចរាចរណ៍មានការថយចុះចំនួន ១៥៦ ករណីស្មើនឹង ១០ ភាគរយ។ ក៏ប៉ុន្តែចំពោះជនរងគ្រោះជាកម្មករ-កម្មការិនីមានការកើនឡើងចំនួន ១៤៣ នាក់ស្មើនឹង ៧ ភាគរយ។
របាយការណ៍ដដែលបានឲ្យដឹងដែរថា៖ «មូលហេតុដែលបង្កឱ្យករណីគ្រោះថ្នាក់ចរាចរណ៍កើតឡើងនេះ គឺបណ្តាលមកពីមូលហេតុចម្បងៗមួយចំនួនដូចជា បើកបរលើសល្បឿនកំណត់ ៣៧ ភាគរយ និងកត្តាមិនគោរពសិទ្ធិអាទិភាព ២៣ ភាគរយ បើកបរជែងក្នុងស្ថានភាពគ្រោះថ្នាក់ ១៨ ភាគរយ បត់ខ្វះការប្រុងប្រយ័ត្ន ៩,២ ភាគរយ មិនប្រកាន់ស្ដាំ ៨ ភាគរយ លក្ខណៈបច្ចេកទេសយានយន្ត ៤ ភាគរយ និងកត្តាផ្លូវ ០,៨ ភាគរយ»។
លោក ហេង សុផាន់ណារិទ្ធ ប្រធានការិយាល័យគោលនយោបាយនៃ (ប.ស.ស.) បានថ្លែងថា ករណីគ្រោះថ្នាក់ចរាចរណ៍ផ្លូវគោកចំពោះកម្មករនិយោជិតក្នុងឆ្នាំ ២០១៩ កន្លងទៅនេះបានកើតឡើងចំនួន ១ ៥៥៤ ករណី (គ្រោះថ្នាក់ដោយរថយន្តចំនួន ៤៣ ករណី ដោយសារម៉ូតូចំនួន ១ ៤៣៧ ករណីរ៉ឺម៉កចំនួន ៩ ករណី កង់ចំនួន ១២ ករណី និងអ្នកថ្មើរជើងចំនួន ៥៣ ករណី)។ លោកបន្តថា គ្រោះថ្នាក់នេះមានជនរងគ្រោះចំនួន ២ ០០៦ នាក់ ក្នុងនោះអ្នកស្លាប់មានចំនួន ៥០ នាក់ របួសធ្ងន់មានចំនួន ៣៤១ នាក់ និងរបួសស្រាលមានចំនួន ១ ៦១៥ នាក់។
លោក អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជានាយក (ប.ស.ស.) និងជាប្រធានក្រុម ស.ផ.ក. ក្នុងឱកាសនោះបានថ្លែងជំរុញឱ្យក្រុមការងារ ទ.ស.ប.ក. និងក្រុមការងារ ស.ផ.ក. បន្តបង្កើនការផ្សព្វផ្សាយអប់រំបន្ថែមទៀតដល់កម្មករនិយោជិតនៅតាមបណ្តាសហគ្រាស គ្រឹះស្ថាននានាឱ្យមានការយល់ដឹងខ្ពស់បន្ថែមទៀតពាក់ព័ន្ធនឹងស្ថានភាពប្រឈមនេះ។
លោកបន្តថា៖ «ធ្វើយ៉ាងណា ដើម្បីកម្មករនិយោជិតទទួលបាននូវសុខភាពដ៏ល្អប្រសើរគ្រប់ពេលវេលាក្នុងការជំរុញដល់ការលើកកម្ពស់ជីវភាពរស់នៅដោយផ្ទាល់ក៏ដូចជា រួមចំណែកលើកកម្ពស់វិស័យសេដ្ឋកិច្ចកម្ពុជាឱ្យមានការរីកចម្រើនឥតឈប់ឈរ»។
លោក កាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរនៅកម្ពុជា (GMAC) មិនអាចទាក់ទងសុំការអត្ថាធិប្បាយជុំវិញការចូលរួមរបស់និយោជក ក្នុងការទប់ស្កាត់គ្រោះថ្នាក់ចរាចរណ៍ចំពោះកម្មករនេះបានទេកាលពីម្សិលមិញ ដោយសារទូរស័ព្ទរបស់លោកពុំមានអ្នកទទួល។
លោក ប៉ាវ ស៊ីណា ប្រធានសហជីពចលនាកម្មករបានលើកឡើងថា ក្រសួងការងារពិតជាមានការប្រឹងប្រែងខ្លាំងចូលរួមទប់ស្កាត់បញ្ហាគ្រោះថ្នាក់ចរាចរណ៍ដែលតែងតែកើតមកលើកម្មករ ដោយការចុះបណ្តុះបណ្តាលដល់អ្នកបើកបរ ដឹកកម្មករ និងកម្មករនិយោជិតផ្ទាល់ឲ្យមានការយល់ដឹងពីការពារខ្លួន កត្តាសុវត្ថិភាព។ ក៏ប៉ុន្តែលោកនៅតែបារម្ភពីបញ្ហានេះនៅឡើយ ខណៈគ្រោះថ្នាក់ចរាចរណ៍នៅតែមានចំពោះកម្មករ។
លោកបញ្ជាក់ថា៖ «បញ្ហានេះនៅតែបន្តកើតមាន ហើយភាគីខាងយើងដែលជាសហជីពពិតជាមានកង្វល់មែនទែន ចំពោះបញ្ហានេះដែលនៅតែបន្តកើតមានជាបន្តបន្ទាប់។ ខ្ញុំគិតថាគួរតែបង្កើតការពិគ្រោះយោបល់បន្ថែមទៀតដើម្បីស្វែងរកវិធានការថ្មីៗបន្ថែមទៀតក្នុងការទប់ស្កាត់»។
បើតាមលោក ស៊ីណា ដើម្បីចូលរួមកាត់បន្ថយគ្រោះថ្នាក់ចរាចរណ៍ដែលកើតឡើងមិនថាចំពោះកម្មករនោះទេ គឺអាជ្ញាធរមានសមត្ថកិច្ចត្រូវពង្រឹងការអនុវត្តច្បាប់ចរាចរណ៍ បង្កើនការដាក់កម្លាំងត្រួតពិនិត្យនៅតាមផ្លូវដែលមានរោងចក្រកាត់ដេរ ឆ្លងកាត់ ហើយម្ចាស់រោងចក្រកាត់ដេរខ្លួនឯងផ្ទាល់ត្រូវតែផ្តល់ឱកាសដល់ផ្នែកពាក់ព័ន្ធឲ្យចូលរួមផ្សព្វផ្សាយចំណេះដឹងជុំវិញបញ្ហាគ្រោះថ្នាក់ចរាចរណ៍នេះទៅដល់កម្មករនៅតាមរោងចក្រឲ្យបានទៀងទាត់៕