កំពង់ចាមៈ កម្មករកាត់ដេរម្នាក់ធ្វើការនៅរោងចក្រមួយក្នុងខេត្តកំពង់ចាមដែលបានចោទប្រកាន់និយោជកថា បានបញ្ឈប់គាត់ពីការងារបន្ទាប់ពីគាត់បានចូលរួមរៀបចំសហជីពនោះបានឲ្យដឹងថា គាត់ប្រហែលជាលើកយករឿងក្ដីនេះឡើងទៅតុលាការ បន្ទាប់ពីការចរចាកាលពីសប្តាហ៍មុនបរាជ័យ។
អ្នកស្រី ម៉នឌី ដែលជាកម្មករធ្វើការនៅរោងចក្រកាត់ដេរ Sun Hsu Co Ltd គឺជាកម្មករម្នាក់ក្នុងចំណោមកម្មករ៤នាក់ ដែលបានចោទប្រកាន់អ្នកគ្រប់គ្រងរោងចក្រជាជនជាតិចិនថា បានយាយីនិងបំភិតបំភ័យបុគ្គលិកដែលព្យាយាមបង្កើតសហជីពហើយបានបញ្ជូនមេប៉ុស្តិ៍ទៅផ្ទះពួកគេទៀតផង។
បន្ទាប់ពីការចរចានៅមន្ទីរការងារខេត្តកាលពីថ្ងៃព្រហស្បតិ៍ អ្នកស្រី ឌី បានឲ្យដឹងថា តំណាងរោងចក្របានផ្តល់ការងារឲ្យគាត់ធ្វើនៅផ្នែកផ្សេងដែលត្រូវចាប់ផ្តើមសាជាថ្មីធ្វើបាត់បង់អតីតភាពការងារ។
អ្នកស្រីឌីបន្តថា៖«ពួកគេអះអាងថាម្ចាស់រោងចក្រមិនសប្បាយចិត្ត ដោយសារតែខ្ញុំបានផ្តល់បទសម្ភាសទៅឲ្យប្រព័ន្ធផ្សព្វផ្សាយហើយអាចរារាំងរោងចក្រមិនឱ្យទទួលបានការបញ្ជាទិញថ្មីដូច្នេះហើយពួកគេព្យាយាមជួយលាក់បាំងពីម្ចាស់រោងចក្រដោយដាក់ខ្ញុំឲ្យទៅធ្វើការនៅផ្នែកថ្មី»។
ទោះជាយ៉ាងណាអ្នកស្រី Jing Li ប្រធានគ្រប់គ្រងរោងចក្របានបដិសេធរឿងដែលថា បានបញ្ឈប់កម្មករដោយសារព្យាយាមបង្កើតសហជីព តែបាន បញ្ជាក់ថាតាមពិតកម្មករទាំងនោះមានបញ្ហាផ្សេងរួមទាំងការមកយឺតយ៉ាវនិងអវត្តមានជាដើម។
អ្នកស្រី Li បានថ្លែងថា៖« បច្ចុប្បន្ននេះមានមនុស្ស៣នាក់ដែលគិតថាពួកគេត្រូវបានបញ្ឈប់ពីការងារដោយសារពួកគេព្យាយាមបង្កើតសហជីព។ ប៉ុន្តែតាមពិតទៅគឺដោយសារកិច្ចសន្យាការងាររបស់ពួកគេចប់ ដូច្នេះហើយយើងមិនជូលពួកគេតទៅទៀត»។
អ្នកស្រី Li បានបញ្ជាក់ថា រោងចក្រ បានផ្តល់ការងារថ្មីឱ្យអ្នកស្រីឌីនៅផ្នែកផ្សេងប៉ុន្តែអ្នកស្រី បានថ្លែងថា គឺមានតែផ្នែកនោះឯងដែលគេមានការងារបន្ទាន់។ គាត់ក៏បានបដិសេធផងដែរថាអ្នកគ្រប់គ្រងបានព្យាយាមដកហូតអតីតភាពការងាររបស់អ្នកស្រី ឌី ឬថាពួកគេបានបញ្ជូនប៉ូលិសប៉ុស្តិ៍ទៅជួបសមាជិកគ្រួសាររបស់សហជីព។
អ្នកស្រី Li បញ្ជាក់ថា៖«យើងពិតជាមិនបានដឹងអំពីរឿងនេះទេ។ យើងពិតជាមិនបានដឹងអំពីរឿងនេះពិតមែន។ តើយើងអាចធ្វើរឿងបែបនេះបានយ៉ាងម៉េចកើត?» ។
ប្រធានមន្ទីរការងារខេត្តកំពង់ចាមលោក ឆេង ហ៊ាង បានថ្លែងថា អ្នកស្រី ឌី និងរោងចក្រមិនទាន់អាចដោះស្រាយបញ្ហាខ្វែងគំនិតគ្នាបាននៅឡើយទេ ។
ជំហានបន្ទាប់ លោកបានបញ្ជាក់ថា អាចនឹងត្រូវចរចាឡើងវិញ ក្នុងរយៈពេល២០ថ្ងៃឬត្រូវបញ្ជូនករណីនេះទៅតុលាការ។
នៅពេលសួរអំពីការចោទប្រកាន់ដែលថា រោងចក្ របានបញ្ជូនមន្ត្រីប៉ូលិសប៉ុស្តិ៍ទៅបំភិតបំភ័យកម្មករនោះ លោក ហ៊ាង ថ្លែងថា គាត់មិនបានស៊ើបពីរឿងនេះទេ។
លោកបញ្ជាក់ថា៖« ប៉ុន្តែទោះជាយ៉ាងណាក៏ដោយប្រសិនបើពួកគេធ្វើដូច្នេះ នោះវាមានន័យថាពួកគេបានរំលោភច្បាប់សហជីព…ពួកគេគ្មានសិទ្ធិរារាំងនរណាម្នាក់មិនឱ្យបង្កើតសហជីពនោះទេ»។
ផលិតផលម៉ាក Carter''s របស់អាមេរិកដែលផលិតនៅរោងចក្រ Sun Hsu នេះមិនបានឆ្លើយតបទៅនឹងសំណើសុំការបំភ្លឺទេ។ ចំណែកឯអ្នកនាំពាក្យ សមាគមសម្លៀកបំពាក់ និងស្បែកជើងអាមេរិក American Apparel & Footwear Association ដែលតំណាងឱ្យផលិតផលម៉ាក Carter''s ក៏បានបដិសេធមិនធ្វើអត្ថាធិប្បាយដែរ ប៉ុន្តែបានចង្អុលបង្ហាញទៅលិខិតមួយដែលចេញកាលពីសប្តាហ៍មុននឹងបានផ្ញើទៅលោកនាយករដ្ឋមន្ត្រី ហ៊ុន សែន ថា ពួកគេបានបង្ហាញការបារម្ភកាន់តែខ្លាំងឡើងជុំវិញស្ថានភាពសិទ្ធិកម្មករនៅកម្ពុជា។
អ្នកស្រី ឌី បានថ្លែងថា គាត់កំពុងពិចារណាលើកយកករណីនេះឡើងទៅតុលាការទោះបីជាគាត់ ត្រូវបានព្រមានថា ដំណើរការនីតិវិធីនេះអាចចំណាយពេលរាប់ខែក្តី។
អ្នកស្រីបន្ថែមថា៖«ខ្ញុំ មិនដឹងទេ រង់ចាំមើលសិន ប៉ុន្តែខ្ញុំមិនអាចទទួលយកការផ្តល់ជូនរបស់ពួកគេបានទេ»៕ NS