ភ្នំពេញៈ ការយកធុងឧស្ម័នអ៊ីដ្រូហ្ស៊ែនចាស់ៗដែលលេចធ្លាយមកផ្សារភ្ជិតឡើងវិញ គឺជាដើមហេតុដែលធ្វើឲ្យផ្ទុះឆេះយ៉ាងសន្ធោសន្ធៅ ផ្ទះលក់ហ្គាស ១ កន្លែង ស្ថិតនៅតាមបណ្ដោយផ្លូវលេខ ៦៣ ក្នុងសង្កាត់បឹងរាំង ខណ្ឌដូនពេញ កាលពីល្ងាចថ្ងៃទី ១៨ ខែកក្កដា ឆ្នាំ ២០២០ ដែលបានបណ្តាលឲ្យមនុស្សចំនួន ៤ នាក់ស្លាប់ និង ៥ នាក់ទៀតបានរងរបួស។
លោក ព្រំ យ៉ន ប្រធានការិយាល័យបង្ការ និងពន្លត់អគ្គិភ័យរាជធានីភ្នំពេញ បានប្រាប់ភ្នំពេញប៉ុស្តិ៍ពីម្សិលមិញថា ជនរងគ្រោះ ៤ នាក់ ដែលបានស្លាប់ក្នុងគ្រោះអគ្គិភ័យដ៏អាក្រក់នេះ រួមមានកម្មករ ២ នាក់ម្នាក់ឈ្មោះ ម៉ៅ ស៊ីណាត អាយុ ២២ ឆ្នាំ, មុន មករា អាយុ ១៨ ឆ្នាំ ខណៈ ២ នាក់ទៀតជាកូនប្រុស ស្រីរបស់ម្ចាស់ផ្ទះលក់ហ្គាសតែម្ដងក្នុងនោះកូនប្រុសច្បងឈ្មោះ ឡាំ សេងហាវ អាយុ ២៧ ឆ្នាំ និងកូនស្រី ពៅ ឈ្មោះ ឡាំ គីមឡាង អាយុ ៨ ឆ្នាំ។
ចំណែក ៥ នាក់ដែលរងរបួសធ្ងន់ និងស្រាលនៅក្នុងហេតុការណ៍ភ្លើងឆេះនេះគឺសុទ្ធសឹងជាសមាជិកក្រុមគ្រួសារម្ចាស់ផ្ទះ និងសាច់ញាតិក្នុងនោះរួមមានឈ្មោះ ប្រាក់ ឡាំហុង អាយុ ៦៩ ឆ្នាំជាម្ចាស់ផ្ទះរងរបួសស្រាល ចំណែកប្រពន្ធរបស់គាត់ឈ្មោះ លី សឿង អាយុ ៤៩ ឆ្នាំរងរបួសធ្ងន់។ កូនប្រុស-ស្រីរបស់គាត់ ២ នាក់រួមមានឈ្មោះ ឡាំ សេងតាយ អាយុ ១៩ ឆ្នាំ និងឈ្មោះ ឡាំ គីមជូ អាយុ ១៣ ឆ្នាំព្រមទាំងប្អូនប្រុសរបស់គាត់ម្នាក់ទៀតឈ្មោះ ប្រាក់ សេងគា អាយុ ៣២ ឆ្នាំរងរបួសស្រាល។
លោក យ៉ន បាននិយាយថា បើតាមការបំភ្លឺពីបុរសម្ចាស់ផ្ទះឈ្មោះ ប្រាក់ ឡាំហុង អគ្គិភ័យនេះផ្ដើមចេញពីកម្មកររងគ្រោះម្នាក់ឈ្មោះ ម៉ៅ ស៊ីណាត បានយកធុងផ្សារឧស្ម័នអ៊ីដ្រូហ្ស៊ែនចាស់ៗដែលលេចធ្លាយមកផ្សារភ្ជិតឡើងវិញ ប៉ុន្តែជាអកុសលនៅពេលចុចផ្សារអេឡិចត្រូនិកទៅលើធុងនោះមិនបានប៉ុន្មានផង ស្រាប់តែធុងនោះក៏បានផ្ទុះឡើងបង្កឲ្យមានអណ្ដាតភ្លើងឆាបឆេះ រីករាលដាលដល់ធុងហ្គាសធំតូចមួយចំនួនទៀតនៅក្បែរនោះ បណ្ដាលឲ្យផ្ទុះឆេះសន្ធោសន្ធៅឡើង។
លោកបញ្ជាក់ថា៖ «សពជនរងគ្រោះទាំង ៤ ត្រូវភ្លើងឆេះខ្លោច និងត្រូវបានកម្លាំងនគរបាល កងពន្លត់អគ្គិភ័យយើងរកឃើញនៅក្រោមគំនរកម្ទេចកម្ទីថ្ម និងគ្រឿងដែកនៃអគារដែលឆេះខូចខាតនោះ»។ លោក យ៉ន បន្ថែមថា៖ «សពជនរងគ្រោះត្រូវបានបញ្ជូនទៅតម្កល់នៅវត្តស្ទឹងមានជ័យ ខណៈអ្នករបួសទាំង ៥ នាក់ត្រូវបានបញ្ជូនទៅសង្គ្រោះនៅមន្ទីរពេទ្យ»។
បើតាមលោក យ៉ន គ្រោះអគ្គិភ័យនេះបានបង្កការខូចខាតផ្ទះ ២ ខ្នងទាំងស្រុង និង ១ ខ្នងទៀតរងការខូចខាតអស់ប្រមាណ ៣០ ទៅ ៤០ ភាគរយព្រមទាំងបណ្ដាលឲ្យឆេះខ្សែភ្លើងរបស់ក្រុមហ៊ុនអគ្គិសនីកម្ពុជាក្នុងតំបន់នោះមួយចំនួនទៀតផងដែរ។
ទោះយ៉ាងណាមកទល់ថ្ងៃអាទិត្យម្សិលមិញនេះ ទាំងក្រុមហ៊ុនអគ្គិសនីកម្ពុជា និងម្ចាស់ផ្ទះចំនួន ២ ខ្នងដែលរងការឆេះខូចខាត ដោយសារតែអណ្ដាតភ្លើងឆេះចេញពីផ្ទះលក់ហ្គាសនោះនៅមិនទាន់មានការដាក់ពាក្យបណ្ដឹងទាមទារសំណងណាមួយពីម្ចាស់ផ្ទះលក់ហ្គាសនោះនៅឡើយទេ។
កាលពីព្រឹកម្សិលសពជនរងគ្រោះទាំង ៤ នាក់ត្រូវបានក្រុមគ្រួសារសាច់ញាតិរៀបចំពិធីបុណ្យសពរួមគ្នានៅវត្តស្ទឹងមានជ័យ។ ក្នុងខណៈនោះលោក ឃួង ស្រេង អភិបាលរាជធានីភ្នំពេញតាមរយៈអាជ្ញាធរដែនដីបានផ្ដល់ថវិកាមួយចំនួនចូលរួមរំលែកទុក្ខជាមួយក្រុមគ្រួសារជនរងគ្រោះ។
កាលពីថ្ងៃទី ១៦ ខែកក្កដា ឆ្នាំ ២០២០ មានបុរសស្ត្រីជនជាតិចិន ២ នាក់ប្ដីប្រពន្ធបានរងរបួសក្នុងគ្រោះអគ្គិភ័យឆាបឆេះហាងលក់គ្រឿងសង្ហារិមរ៉ូយ៉ាល់ ដែលមានទីតាំងស្ថិតនៅតាមបណ្ដោយមហាវិថីព្រះមុនីវង្ស ស្ថិតក្នុងសង្កាត់បឹងកេងកងទី ១ ខណ្ឌបឹងកេងកងរាជធានីភ្នំពេញ។
គួរបញ្ជាក់ថា ក្នុងឆមាសទី ១ ឆ្នាំ ២០២០ នេះគ្រោះអគ្គិភ័យបានបណ្ដាលឲ្យមានជនរងគ្រោះ ១១ នាក់ស្លាប់ និង ២៨ នាក់ទៀតរងរបួសធ្ងន់ និងស្រាល ព្រមទាំងបានបង្កការឆេះខូចខាតផ្ទះអស់ចំនួន ៥១៩ ខ្នង តូបលក់ដូរចំនួន ២២៥ តូប និងឧបករណ៍ប្រើប្រាស់មួយចំនួនធំ។ នេះបើយោងរបាយការណ៍របស់នាយកដ្ឋានបង្ការ និងពន្លត់អគ្គិភ័យនៃក្រសួងមហាផ្ទៃ។
របាយការណ៍បញ្ជាក់ថា មានកត្តា ៣ យ៉ាងដែលបង្ក និងជំរុញឲ្យកើតមានគ្រោះអគ្គិភ័យកើតឡើង។ ក្នុងនោះបង្កឡើងពីកត្តាផ្ទុះឆ្លងចរន្តអគ្គិសនី ៤១% កត្តាប្រើប្រាស់ភ្លើងដោយខ្វះការប្រុងប្រយ័ត្ន ៣៩% និង ២០% កំពុងស្ថិតក្នុងការស៊ើបអង្កេតស្រាវជ្រាវនៅឡើយ៕