.jpg)
ជនរងគ្រោះដែលស្លាប់ក្នុងអំពើឃាតកម្មយ៉ាងឃោរឃៅ នៅស្រុកបរិបូរណ៍ ខេត្តកំពង់ឆ្នាំង កាលពីយប់ថ្ងៃទី ០៩ ខែ ឧសភា។ រូបថត ប៉ូលីស & CPU
កំពង់ឆ្នាំង៖ ករណីភ្លើងឆេះផ្ទះស្លាប់ទាំងម្តាយទាំងកូនសរុប ៥ នាក់ នៅឃុំខុនរ៉ង ស្រុកបរិបូរណ៍ ខេត្តកំពង់ឆ្នាំង កាលពីយប់ថ្ងៃទី ០៩ ខែ ឧសភា ឆ្នាំ ២០២១ ជាអំពើឃាតកម្ម ប្ដីសម្លាប់ប្រពន្ធ ហើយដុតផ្ទះសម្លាប់ទាំងកូន ដើម្បីបំបិទភ័ស្ដុតាង។
លោក ប៉ុល វុទ្ធី ស្នងការរងទទួលបន្ទុកផ្នែកព្រហ្មទណ្ឌនៃស្នងការដ្ឋាននគរបាលខេត្តកំពង់ឆ្នាំងបានប្រាប់ ភ្នំពេញ ប៉ុស្តិ៍ នៅព្រឹកថ្ងៃទី ១២ ខែឧសភា នេះថា ក្រោយពីបានចុះអង្កេតស្រាវជ្រាវដល់ទីតាំងកើតហេតុ ការសាកសួរពីសាវតារបស់ស្ត្រីរងគ្រោះ និងការប្រើវិធីចិត្តសាស្ត្រក្នុងការស៊ើបសួរចម្លើយពីបុរសជាប្ដីឈ្មោះ នន់ សារ៉េត អាយុ ៣៨ ឆ្នាំ ដែលជាមនុស្សតែម្នាក់គត់ ដែលរួចជីវិតពីករណីភ្លើងឆេះផ្ទះនាយប់នោះ អស់រយៈពេល ៣ ថ្ងៃរួចមក ទីបំផុតបុរសជាប្ដីបានសារភាពថា គ្រោះអគ្គិភ័យនោះខ្លួនជាអ្នកប្រព្រឹត្ត។
លោក វុទ្ធី បញ្ជាក់ថា៖ «តាមចម្លើយរបស់បុរសជាប្ដី ករណីគ្រោះអគ្គិភ័យនេះ មិនមែនបណ្ដាលមកពីការផ្ទុះឆ្លងចរន្តអគ្គិសនី ឬផ្ទុះកំប៉ុងហ្គាសពេលដាំស្លរនោះទេ តែវាជាអំពើឃាតកម្ម ដែលបង្កឡើងដោយបុរសជាប្ដីខឹងប្រចណ្ឌស្ត្រីជាប្រពន្ធរហូតឈានប្រើអំពើហិង្សា ដុតផ្ទះសម្លាប់ប្រពន្ធ និងកូនតូចៗ ៤ នាក់ ដែលមានអាយុចន្លោះពី ៣ ឆ្នាំដល់ ៩ ឆ្នាំ»។
លោកបានបន្តថា បច្ចុប្បន្នបុរសជាប្ដីដែលជាប់សង្ស័យក្នុងអំពើឃាតកម្មដ៏ឃោរឃៅនេះ កំពុងត្រូវបានមន្ត្រីនគរបាលជំនាញរៀបចំកសាងសំណុំរឿងបញ្ជូនទៅតុលាការ ដើម្បីចំណាត់ការបន្តតាមនីតិវិធីច្បាប់។
នៅព្រឹកនេះផងដែរ អង្គភាពការពារកុមារ (Child Protection Unit) បានចេញផ្សាយព័ត៌មានថា ក្រុមការងារស៊ើបអង្កេតបទល្មើសមនុស្សឃាត (HIT) និងក្រុមការងារបច្ចេកទេស និងវិទ្យាសាស្រ្ត (FST) ក្នុងកិច្ចសហប្រតិបត្តិការជាមួយនាយកដ្ឋាននគរបាលបច្ចេកទេស និងវិទ្យាសាស្រ្ត នៃក្រសួងមហាផ្ទៃ នាយកដ្ឋាននគរបាលព្រហ្មទណ្ឌ និងនាយកដ្ឋាននគរបាលបច្ចេកទេស និងវិទ្យាសាស្រ្ត នៃស្នងការដ្ឋាននគរបាលខេត្តកំពង់ឆ្នាំង បានចោទបុគ្គលឈ្មោះ «នន់ សារ៉េត ពីបទឃាតកម្ម» ទៅលើជនរងគ្រោះ ៥ នាក់ ពាក់ព័ន្ធនឹងករណីអគ្គិភ័យដែលបានកើតឡើងនៅខេត្តកំពង់ឆ្នាំង កាលពីថ្ងៃទី ០៩ ខែ ឧសភា ឆ្នាំ ២០២១។
របាយការណ៍ព័ត៌មានរបស់អង្គភាពនេះ បានបន្តថា សមាជិកនៃក្រុមការងារបានធ្វើការយ៉ាងមមាញឹកអស់រយៈពេល ៣ ថ្ងៃកន្លងមកនេះ ដើម្បីប្រមូលគ្រប់ភ័ស្តុតាងដែលមាន និងប្រឹក្សាយោបល់ជាមួយអ្នកជំនាញផ្នែកកោសល្យវិច័យសាកសព និងអ្នកជំនាញស៊ើបអង្កេតករណីអគ្គិភ័យ នៅប្រទេសអូស្រ្តាលី ដើម្បីប្រមូលផ្តុំនូវភ័ស្តុតាងល្អបំផុតដាក់ចូលសំណុំរឿង។
លោក James McCABE នាយកប្រតិបត្តិអង្គភាពការពារកុមារ (CPU) ត្រូវបានដកស្រង់សម្ដីមកចុះផ្សាយនៅក្នុងរបាយការណ៍ព័ត៌មាននោះថា៖ «បន្ទាប់ពីយើងបានត្រួតពិនិត្យកន្លែងកើតហេតុ និងសាកសពទាំង ៥ យើងបានចាប់អារម្មណ៍ថា មានភាពមិនប្រក្រតីយ៉ាងខ្លាំងជាច្រើន ដែលបានកើតឡើងនៅក្នុងបរិវេណកន្លែងកើតហេតុ ហើយសេចក្តីបំភ្លឺរបស់ជនសង្ស័យ ក៏មិនស៊ីសង្វាក់ជាមួយអ្វីៗដែលយើងបានឃើញ»។
លោកបានបន្តថា យ៉ាងណាក៏ដោយ ការប្តេជ្ញា និងការខិតខំប្រឹងប្រែងរបស់មន្ត្រីស៊ើបអង្កេត និងមន្ត្រីកោសល្យវិច័យ ដែលបានព្យាយាមប្រមូលភ័ស្តុតាងគ្រប់គ្រាន់ ដើម្បីដាក់បន្ទុកទៅលើបុគ្គលនេះ ព្រោះវាជាអំពើឃោរឃៅមួយ។
លោកបញ្ជាក់ទៀតថា៖ «នេះ គឺជាការស៊ើបអង្កេតដ៏ល្អ ដែលបានធ្វើឡើងដោយមន្រ្តីនគរបាលខេត្តកំពង់ឆ្នាំង និងក្រសួងមហាផ្ទៃ ដើម្បីធ្វើឲ្យប្រាកដថាកុមាររងគ្រោះ និងម្តាយរបស់ពួកគេបានទទួលនូវយុត្តិធម៌»។
ទន្ទឹមនឹងនេះ លោកក៏បានសម្ដែងការសោកស្តាយទៅដល់សាច់ញាតិរបស់ជនរងគ្រោះ និងបានបួងសួងសូមឲ្យវិញ្ញាណក្ខន្ធរបស់ពួកគេទៅកាន់សុគតិភព។
កាលពីថ្ងៃទី ១១ ខែឧសភា ឆ្នាំ ២០២១ ព្រះមហាក្សត្រ និងសម្តេចម៉ែ តាមរយៈ លោក គង់ សំអុល ឧបនាយករដ្ឋមន្ត្រី និងជារដ្ឋមន្ដ្រីក្រសួងព្រះបរមរាជវាំងបានប្រោសព្រះរាជទានព្រះរាជអំណោយជាអង្ករ ៥០ គីឡូក្រាម តង់ ១ មុង ១ ភួយ ១ ក្រមា ១ សារុង ១ អាវយឺត ១ មី ១ កេស ត្រីខ ១០ កំប៉ុង និងថវិកា ៤ លានរៀល ជូនដល់ក្រុមគ្រួសាររងគ្រោះដោយអគ្គិភ័យដ៏គួរឲ្យរន្ធត់នេះ ដើម្បីសម្រួលដល់ការរៀបចំពិធីបុណ្យសពស្ត្រីជាម្ដាយមានផ្ទៃពោះ ៣ ខែ និងកូនប្រុសតូចៗ ៤ នាក់នោះតាមប្រពៃណី។ នេះបើយោងតាម Facebook ឈ្មោះ Royal du Cambodge៕
វីដេអូ៖
