.jpg)
មន្ត្រីនគរបាលដែលត្រូវផ្អាកពីការងារបណ្តោះអាសន្ន។ រូបថត ហ្វ្រេសញូវ
ភ្នំពេញៈ មន្ត្រីនាំពាក្យអគ្គស្នងការដ្ឋាននគរបាលជាតិបញ្ជាក់ថា ករណីសំណុំរឿងមន្ត្រីនគរបាលជាតិនៃស្នងការដ្ឋាននគរបាលខេត្តព្រៃវែងធ្វើទារុណកម្ម និងជំរិតទារប្រាក់ពីជនសង្ស័យពាក់ព័ន្ធគ្រឿងញៀន មិនទាន់បញ្ចប់ត្រឹមដាក់វិន័យប៉ុណ្ណោះទេ ត្រូវបន្តស្រាវជ្រាវបន្ថែមទៀត។
លោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិប្រាប់ពីម្សិលមិញថា សំណុំរឿងមន្ត្រីនគរបាលនៃស្នងការដ្ឋាននគរបាលខេត្តព្រៃវែងចំនួន ៧ នាក់នេះនឹងមិនទាន់ត្រូវបញ្ចប់ត្រឹមដាក់វិន័យត្រឹមនេះទេ ពោលគឺនៅបន្តធ្វើការស្រាវជ្រាវបន្ថែមទៀត ដើម្បីឲ្យដឹងច្បាស់ពីប្រភពបញ្ហា ជាពិសេសត្រូវដាក់វិន័យតាមច្បាប់យ៉ាងតឹងរ៉ឹង។
លោកបញ្ជាក់ថា៖ «ខ្ញុំអត់ទាន់អាចបកស្រាយអ្វីច្រើនទេគឺយើងកំពុងធ្វើការស្រាវជ្រាវបន្ថែមទៀតថាតើនរណាខ្លះត្រូវដកហូតស័ក្តិ នរណាខ្លះត្រូវបណ្ដេញចេញពីក្របខ័ណ្ឌមន្ត្រីនគរបាលជាតិ និងនរណាខ្លះត្រូវបញ្ជូនសំណុំរឿងទៅតុលាការ ហើយនរណាខ្លះនឹងត្រូវព្យួរការងារបណ្តោះអាសន្នសិន។ អ៊ីចឹងរឿងនេះមិនទាន់បញ្ចប់ត្រឹមហ្នឹងទេ»។
ជាមួយគ្នានេះស្នងការដ្ឋាននគរបាលខេត្តព្រៃវែងក៏បានបំភ្លឺពាក់ព័ន្ធនឹងការដាក់វិន័យមន្ដ្រីនៃស្នងការដ្ឋាននគរបាលខេត្តនោះដែលបានអនុវត្តភារកិច្ចលើសព្រំដែននៃក្រមសីលធម៌វិជ្ជាជីវៈ និងវិន័យរបស់កងកម្លាំងនគរបាលជាតិ ដែលបានធ្វើទារុណកម្មលើជនសង្ស័យគ្រឿងញៀនចំនួន ២ នាក់កាលពីថ្ងៃទី ២០ ខែកក្កដា។ ក្នុងនោះមន្ត្រីនគរបាលម្នាក់ត្រូវបានបញ្ជូនទៅតុលាការខេត្ត។
សេចក្ដីបំភ្លឺព័ត៌មានរបស់ស្នងការដ្ឋាននគរបាលខេត្តព្រៃវែងចុះថ្ងៃទី ២ ខែសីហា ដែលភ្នំពេញប៉ុស្ដិ៍ទទួលបានពីម្សិលមិញ ឲ្យដឹងថា លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិបានចេញសេចក្ដីសម្រេចលេខ ៤៩០ ស.ស.រ ចុះថ្ងៃទី ២៧ ខែកក្កដា ឆ្នាំ ២០២០ សម្រេចដាក់វិន័យដោយរូបភាពផ្អាកការងារបណ្ដោះអាសន្នចំពោះមន្ត្រីនគរបាលនៃស្នងការដ្ឋាននគរបាលខេត្តព្រៃវែងចំនួន ៧ នាក់ដោយរង់ចាំការសម្រេចជាថ្មី។
សេចក្ដីបំភ្លឺព័ត៌មានបន្តថា យោងតាមពាក្យបណ្ដឹងរបស់ជនរងគ្រោះ មន្ត្រីជំនាញនៃស្នងការដ្ឋាននគរបាលខេត្តព្រៃវែងបានកសាងសំណុំរឿងចំពោះករណីលោកអនុសេនីយ៍ឯក ទូច ធារ៉ា នាយរងការិយាល័យប្រឆាំងគ្រឿងញៀនបញ្ជូនទៅសាលាដំបូងខេត្តព្រៃវែងកាលពីថ្ងៃទី ៣០ ខែ កក្កដា ឆ្នាំ ២០២០ ដើម្បីចាត់ការតាមនីតិវិធីច្បាប់។
សេចក្ដីបំភ្លឺព័ត៌មានបន្ថែមថា អំឡុងឆ្នាំ ២០១៩ លោកឧត្តមសេនីយ៍ត្រី ថោង វណ្ណឌី ស្នងការរងទទួលការងារគ្រឿងញៀនធ្លាប់បានជាប់ចោទពីបទជួញដូរអាវុធដោយគ្មានការអនុញ្ញាត។ ប៉ុន្តែចៅក្រមស៊ើបសួរនៃសាលាដំបូងរាជធានីភ្នំពេញពុំបានរកឃើញភ័ស្តុតាងដាក់បន្ទុកឡើយ និងបានសម្រេចលើកលែងការចោទប្រកាន់តាមដីកាដំណោះស្រាយលេខ ៣១៦២ ស.ដ.ដ ចុះ ថ្ងៃទី ២១ ឧសភា ឆ្នាំ ២០២០ របស់សាលាដំបូងរាជធានីភ្នំពេញ។
លោក ព្រុំ សន្ធរ ស្នងការនគរបាលខេត្តព្រៃវែងពីម្សិលមិញមិនអាចទាក់ទងសុំការបញ្ជាក់ជុំវិញករណីនេះបានទេ ដោយទូរស័ព្ទលោកគ្មានអ្នកទទួល។
លោក ទេព ផល្លា អ្នកនាំពាក្យសាលាដំបូងខេត្តព្រៃវែងថ្លែងពីម្សិលមិញថា សំណុំរឿងលោកអនុសេនីយ៍ឯក ទូច ធារ៉ា នាយរង ការិយាល័យប្រឆាំងគ្រឿងញៀនដែលបានបញ្ជូនមកតុលាការ លោកមិនទាន់ដឹងទេ។
លោកបញ្ជាក់ថា៖ «អត់អីទេ ចាំខ្ញុំជួយស្វែងរកមើលសំណុំរឿងហ្នឹងថា តើលោកចៅក្រមគាត់សម្រេចបែបណា។ ឃុំខ្លួន ឬមិនឃុំខ្លួន ខ្ញុំឆែករកមើលយកមកជម្រាបជូន»។
លោក នេត សាវឿន អគ្គស្នងការនគរបាលជាតិកាលពីថ្ងៃទី ២៧ ខែកក្កដា បានសម្រេចផ្អាកការងារបណ្តោះអាសន្នរបស់ស្នងការរង និងមន្ត្រីនគរបាលខេត្តព្រៃវែងទទួលបន្ទុកការងារគ្រឿងញៀនចំនួន ៧ រូប បន្ទាប់ពីពួកគេប្រើហិង្សា និងយកលុយប្រមាណ ៤ លានរៀលពីជនសង្ស័យពេលចុះបង្ក្រាបករណីគ្រឿងញៀន។
មន្ត្រីនគរបាលដែលត្រូវបានផ្អាកការងារ រួមមាន ឧត្តមសេនីយ៍ត្រី ថោង វណ្ណឌី ស្នងការរងទទួលបន្ទុកការងារប្រឆាំងគ្រឿងញៀន វរសេនីយ៍ឯក ពៅ ជីវ័ន នាយការិយាល័យប្រឆាំងគ្រឿងញៀន អនុសេនីយ៍ឯក ទូច ធារ៉ា នាយរងការិយាល័យប្រឆាំងគ្រឿងញៀន អនុសេនីយ៍ឯក ស៊ី បូ នាយផ្នែកការិយាល័យប្រឆាំងគ្រឿងញៀន អនុសេនីយ៍ឯក ហេង ចាន់រតនា មន្ត្រីការិយាល័យប្រឆាំងគ្រឿងញៀន អនុសេនីយ៍ឯក សៀក ចាន់ធឿន មន្ត្រីការិយាល័យប្រឆាំងគ្រឿងញៀន និងអនុសេនីយ៍ទោ យុន តារាស័ក្ត មន្ត្រីការិយាល័យប្រឆាំងគ្រឿងញៀន។
គួររំឭកថា កម្លាំងជំនាញនគរបាលខេត្តព្រៃវែងកាលពីថ្ងៃទី ២០ ខែកក្កដា បានចុះបង្ក្រាបបទល្មើស ជួញដូរគ្រឿងញៀននៅភូមិ ៦ សង្កាត់កំពង់លាវ ក្រុង-ខេត្តព្រៃវែង។ ក្នុងប្រតិបត្តិការនោះសមត្ថកិច្ចបានចាប់ជនសង្ស័យឈ្មោះ ថៃ សាមាឌ ភេទប្រុស អាយុ ២៦ ឆ្នាំ និងឈ្មោះ ហឿន រ័ត្ន ភេទប្រុស អាយុ ២៨ ឆ្នាំ។ ជនសង្ស័យអះអាងថា មន្ត្រីនគរបាលបានដកកាំភ្លើងខ្លីពីចង្កេះរួចវាយក្បាលពួកគេ និងចាប់វាយក្រៀកយកទៅការិយាល័យធ្វើទារុណកម្ម ហើយជំរិតទារលុយបានសម្រេច ៤ លានរៀលជាថ្នូរនឹងការដោះលែងវិញ៕
