ព្រះសីហនុៈ ក្រសួងទំនាក់ទំនងជាមួយរដ្ឋសភាព្រឹទ្ធសភា និងអធិការកិច្ចអះអាងថា ករណីវិវាទដីសាលានៃក្តីសង្ឃឹមទំហំជាង ១ ហិកតា នៅសង្កាត់លេខ ៤ ក្រុង-ខេត្តព្រះសីហនុជាមួយក្រសួងសង្គមកិច្ចត្រូវបានដោះស្រាយបញ្ចប់ហើយ ដោយភាគីក្រសួងសម្រេចផ្តល់ជាកញ្ចប់ថវិកាប្រមាណ ៧៨ ម៉ឺនដុល្លារ ឲ្យទៅសាលាដើម្បីរកទីតាំងថ្មី។
ការសម្របសម្រួលគ្នានេះបានធ្វើឡើងកាលពីថ្ងៃទី ៥ ខែមករា អំឡុងពេលលោកស្រី ម៉ែន សំអន រដ្ឋមន្ត្រីក្រសួងទំនាក់ទំនងជាមួយរដ្ឋសភាព្រឹទ្ធសភា និងអធិការកិច្ចបានចុះទៅដោយផ្ទាល់នៅខេត្តព្រះសីហនុ ក្រោយពីទទួលបញ្ជាពីលោកនាយករដ្ឋមន្ត្រី ហ៊ុន សែន។
កាលពីពាក់កណ្តាលខែធ្នូលោក ហ៊ុន សែន បានសម្រេចចេញ សជណ ប្រគល់ជូនក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ចឲ្យចុះធ្វើការស្រាវជ្រាវ និងរាយការណ៍ជូនរដ្ឋាភិបាលពាក់ព័ន្ធភាពមិនប្រក្រតីចោទប្រកាន់គ្នាទៅវិញទៅមកជុំវិញដីសាលានៃក្តីសង្ឃឹមដែលក្រសួងសង្គមកិច្ចដាក់ឱសានវាទ ៣ ខែឲ្យសាលានេះរើចេញ។
លោក ណុប ចាន់ណារិន្ទ រដ្ឋលេខាធិការក្រសួងទំនាក់ទំនងជាមួយរដ្ឋសភា ព្រឹទ្ធសភាប្រាប់ភ្នំពេញប៉ុស្តិ៍ថ្ងៃទី ៦ មករា ថាការចុះដោះស្រាយវិវាទរវាងសាលានៃក្តីសង្ឃឹមជាមួយក្រសួងសង្គមកិច្ចលើដីជាង ១ ហិកតានេះបានដោះស្រាយបញ្ចប់ដោយជោគជ័យ ដោយទទួលបានលទ្ធផលឈ្នះៗទាំងអស់គ្នា។ លោកបញ្ជាក់ថាការស្រុះស្រួលគ្នានេះ គឺភាគីក្រសួងសង្គមកិច្ចសម្រេចផ្តល់កញ្ចប់ថវិកា ៧៨ ម៉ឺនដុល្លារទៅដល់ភាគីសាលា ដើម្បីធ្វើការផ្លាស់ប្តូរទីតាំងថ្មី។
លោកបន្ថែមថា៖ «ការសម្រេចបែបនេះ ដោយយោងតាមសំណើរបស់ក្រសួងសង្គមកិច្ច ព្រោះដីនេះជាកម្មសិទ្ធិរបស់ខាងក្រសួងសង្គមកិច្ច។ រីឯខាងអង្គការ ត្រូវសម្រេចទៅកន្លែងថ្មីតាមការជជែកគ្នារួចហើយ ដោយសុំពន្យារពេលរើចេញពីទីតាំងចាស់ដល់ថ្ងៃទី ២០ ខែសីហា»។
លោក តូច ចាន់នី អ្នកនាំពាក្យក្រសួងសង្គមកិច្ច អតីតយុទ្ធជន និងយុវនីតិសម្បទាប្រាប់ភ្នំពេញប៉ុស្តិ៍កាលពីថ្ងៃទី ៦ មករាថា ករណីនេះពិតជាបានដោះស្រាយបញ្ចប់ហើយ។ ភាគីទាំងអស់បានឯកភាពតាមការសម្របសម្រួល ដូច្នេះមិនមានបញ្ហាអ្វីបន្ថែមទៀតនោះទេ។ បន្ទាប់ពីសាលាបានទទួលកញ្ចប់ថវិកានេះហើយគឺសាលាត្រូវស្វែងរកទីតាំងថ្មីដោយខ្លួនឯង។
លោកបញ្ជាក់ថា៖ «ដីនេះជាដីរបស់ក្រសួង ហើយក្រសួងត្រូវការដីនៅទីតាំងនេះដើម្បីធ្វើការអភិវឌ្ឍ ដូច្នេះក្រសួងត្រូវតែឲ្យសាលារើចេញ ហើយបានផ្តល់ជាគោលនយោបាយមួយចំនួនផងដែរដល់សាលានេះ ដើម្បីបន្តដំណើរទៅមុខទៀត។ ប៉ុន្តែបែបណាទៀតនោះក្រសួងមិនដឹងទេ»។
លោក ភុំ ណារិទ្ធ នាយកសាលានៃក្តីសង្ឃឹមមិនអាចសុំអត្ថាធិប្បាយបានទេពីម្សិលមិញ ព្រោះតែលោកមិនលើកទូរស័ព្ទ។ ប៉ុន្តែបើតាមការអះអាងកន្លងមករបស់នាយកសាលារូបនេះផ្ទៃដីជាង ១ ហិកតាដែលសាងសង់សាលានេះ អង្គការបានដោះដូរជាទឹកប្រាក់ពីពលរដ្ឋក្នុងតំបន់នោះ និងបន្តកាន់កាប់តាំងពីឆ្នាំ ២០០២ មក។
កាលពីខែសីហាកន្លងទៅលោក សុខសុវណ្ណ វឌ្ឍនាសាប៊ុង ប្រធានគណបក្សខ្មែរក្រោកដែលជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ បានដាក់របាយការណ៍ស្រាវជ្រាវទៅលោកនាយករដ្ឋមន្ត្រី ហ៊ុន សែន សុំអន្តរាគមន៍ករណីក្រសួងសង្គមកិច្ចដាក់ឱសានវាទ ៣ ខែ ឲ្យសាលានៃក្តីសង្ឃឹមរើចេញពីទីតាំងនេះ ដោយអះអាងថា ក្រសួងត្រូវការដី ដើម្បីធ្វើការអភិវឌ្ឍ។
លោក វឌ្ឍនាសាប៊ុង ប្រាប់ភ្នំពេញប៉ុស្តិ៍ថ្ងៃទី ៦ មករា ថា លោកមិនជំទាស់នោះទេចំពោះការឯកភាពគ្នាទទួលនូវដំណោះស្រាយ។ ប៉ុន្តែលោកមានការសោកស្តាយ ចំពោះវិធានការទាំងនេះដែលមិនបានស្វែងរកអ្នកទទួលខុសត្រូវលើករណីភាពមិនប្រក្រតីនៃការរំលោភយកដីសាលាជាង ១ ហិកតា យកមកដាក់ទោសតាមច្បាប់។
លោកបញ្ជាក់ថា៖ «យើងនៅតែបន្តការតាមដាន ព្រោះនេះគ្រាន់តែជាការសម្របសម្រួល។ ប៉ុន្តែយើងមានការសោកស្តាយ ដោយសារតែគ្មានការដាក់ទណ្ឌកម្ម ឬពិន័យអ្វីសោះ ហើយមិនបានរកឃើញអ្នកត្រូវ អ្នកខុស អ្នកឈ្នះ អ្នកចាញ់ ដែលអ្នកណា រំលោភ អ្នកណាបំភ្លៃអង្គហេតុ អង្គច្បាប់លើដីសាលានេះ គឺត្រូវតែមានវិធានការ»។
តាមការអះអាងរបស់នាយកសាលាគឺ សាលានៃក្តីសង្ឃឹមរបស់អង្គការ Assemblies of God សាខាខេត្តព្រះសីហនុបានបើកដំណើរការដោយបំពេញតាមគោលនយោបាយរាជរដ្ឋាភិបាលជិត ២០ ឆ្នាំមកហើយមកទល់បច្ចុប្បន្ន ដោយបានបណ្ដុះបណ្ដាលសិស្សក្រីក្រ និងចិញ្ចឹមកុមារកំព្រាប្រមាណ ៧ ម៉ឺននាក់ និងមានគ្រូបង្រៀនជិត ៥០ នាក់៕