The Phnom Penh Post Search

Search form




Logo of Phnom Penh Post newspaper Phnom Penh Post - ករណី​បង្ក្រាប​គ្រឿង​ញៀន​កក្រើក​ខណៈ​ឈ្មួញ​នៅ​តែ​ឆ្លង​មក​កម្ពុជា




ករណី​បង្ក្រាប​គ្រឿង​ញៀន​កក្រើក​ខណៈ​ឈ្មួញ​នៅ​តែ​ឆ្លង​មក​កម្ពុជា

ករណី​បង្ក្រាប​គ្រឿង​ញៀន​កក្រើក​ខណៈ​ឈ្មួញ​នៅ​តែ​ឆ្លង​មក​កម្ពុជា

121010_09
ជនជាប់សង្ស័យជួញដូរថ្នាំញៀន ឃាត់ខ្លួននៅសណ្ឋាគារផ្កាឈូកទិព្វ ក្នុងរាជធានីភ្នំពេញ ន.ប.ជ.ក

បាត់ដំបង/សៀមរាបៈ ករណី​បង្ក្រាប​គ្រឿង​ញៀន​របស់​សមត្ថកិច្ច​បាន​ធ្វើ​ឡើង​ផ្ទួនៗ​គ្នា ក្នុង​រយៈពេល​ពីរ​ថ្ងៃ​នេះ នៅ​ខេត្ត​ធំៗ​ពីរ​និង​រាជធានី រហូត​មាន​ការ​ប៉ះទង្គិច​គ្នា​ដោយ​អាវុធ​ផង នៅ​កណ្តាល​ក្រុង​បាត់ដំបង​កាលពី​ម្សិលមិញ ហើយ​កាលពី​ថ្ងៃ​ចន្ទ​ថ្នាំ​ញៀន​កូកាអ៊ីន ១១ គីឡូក្រាម ត្រូវ​បាន​រឹបអូស​ពី​ស្ត្រី​ជាតិ​ថៃ​ពីរ​នាក់ នៅ​ក្នុង​ព្រលាន​យន្ត​ហោះ​សៀមរាប ចំណែក​នៅ​ភ្នំពេញ​មេ​ឈ្មួញ​ថ្នាំញៀន​ជាតិ​ឡាវ​ម្នាក់​សមត្ថកិច្ច​កំពុង​តែ​តាម​ប្រមាញ់ ខណៈ​គូកន ៤ នាក់ ត្រូវ​បាន​ឃាត់ខ្លួន​។

ប្រតិបត្តិការ​បង្ក្រាប​គ្រឿង​ញៀន​ផ្ទួនៗ​គ្នា​នេះ​ចាប់​ផ្តើម​តាំងពី​ល្ងាច​ថ្ងៃ​អាទិត្យ​នៅ​រាជធានី​ភ្នំពេញ ក្រុង​សៀមរាប និង​នៅ​បាត់ដំបង​កាលពី​ព្រឹក​ម្សិលមិញ បន្ទាប់​ពី​មាន​ការ​ប៉ះទង្គិច​គ្នា​រវាង​ក្រុម​ឈ្មួញ​ថ្នាំញៀន និង​សមត្ថកិច្ច​ប៉េអឹម​ក្រុង​ផ្អើល​អស់អ្នក​ក្រុង​បាត់ដំបង នៅ​ក្នុង​ប្រតិបត្តិការ​បង្ក្រាប​មួយ មុន​នឹង​ចាប់​បាន​ប្តី​ប្រពន្ធ​ពីរ​នាក់ ជា​ជនជាតិ​ថៃ​និង​ខ្មែរ ជាមួយ​នឹង​គ្រឿង​ញៀន​បី​ប្រភេទ។

លោក ហេង សេងហុង នាយការិយាល័យ​ស្រាវជ្រាវ​ប្រឆាំង​គ្រឿង​ញៀន​នៃ​កងរាជ​អាវុធហត្ថ​ខេត្ត​បាត់ដំបង​បាន​ប្រាប់​ឲ្យ​ដឹង​ថា ក្នុង​ប្រតិបត្តិការ​ចុះ​បង្ក្រាប​មុខ​សញ្ញា​ចែកចាយ​គ្រឿង ញៀន នៅ​ម៉ោង៩​ព្រឹក ថ្ងៃ​ទី៩ ខែ​តុលា​នោះ គឺ​បាន​ធ្វើ​ឡើង​នៅ​ចំណុច​ផ្ទះ​ជួល​មួយ​នៅ​ទល់​មុខ​វត្ត​សំពៅ ក្នុង​ភូមិ​កម្មករ សង្កាត់​ស្វាយប៉ោ ក្រុង-ខេត្ត​បាត់ដំបង។

លោក​បន្ត​ឲ្យ​ដឹង​ថា៖ «ក្នុង​ការ​បង្ក្រាប​នោះ​ជន​សង្ស័យ​ប្រើ​កាំភ្លើង​បាញ់​សំដៅ​មក​លើ​សមត្ថកិច្ច​ប្រមាណ​ជាង​១០​គ្រាប់ ដែល​ជា​ហេតុ​ធ្វើ​ឲ្យ​សមត្ថកិច្ច​ប្រើ​សិទ្ធិ​ការពារ​ខ្លួន ធ្វើ​ការ​បាញ់​តបត​វិញ បណ្តាល​ឲ្យ​ជនសង្ស័យ​ម្នាក់​ជា​ប្តី​ត្រូវ​គ្រាប់​ត្រង់​ត្រគាក។ ឯខាង​សមត្ថកិច្ច ពុំមាន​រងរបួស​ទេ»។

លោក​ថា ដោយ​ជនសង្ស័យ​បាន​ជួល​ផ្ទះ​ច្រើន​កន្លែង​ស្នាក់ សមត្ថកិច្ច​នៅ​ត្រូវ​ការ​ប្រើ​ពេល​ស្រាវជ្រាវ​បន្ត​ទៀត មិន​ទាន់​អាច​អត្ថាធិប្បាយ​លម្អិត​បាន​ទេ។ ប៉ុន្តែ​ថា ជន​សង្ស័យ​ទាំង​ពីរ​នាក់ ប្តី​ជា​ជនជាតិ​ថៃ​និង​ប្រពន្ធ​ខ្មែរ ត្រូវ​ចាប់​ខ្លួន​ជាមួយ​ថ្នាំ​ញៀន​មួយ​ចំនួន​និង​កាំភ្លើង​ខ្លី​មួយ​ដើម​ផង ជា​វត្ថុតាង។

សមត្ថកិច្ច​ប៉េអឹម​ក្រុង​បាត់ដំបង​ដែល​ចុះ​បង្ក្រាប​ផ្ទាល់​ប្រាប់​ថា«បុរស​ជាតិ​ថៃ​ឈ្មោះ វី ធូ អាយុ ៣៣​ឆ្នាំ នោះ​សមត្ថកិច្ច​បាន​បញ្ជូន​ទៅ​មន្ទីរពេទ្យ​ខេត្ត​ព្យាបាល ឯ​ប្រពន្ធ​ឈ្មោះ ឆេះ យ៉ា អាយុ​២៨​ឆ្នាំ ដែល​នៅ​ភូមិ​មហាទេព ក្នុង​ស្រុក​ស្វាយប៉ោ ត្រូវ​ឃាត់​ខ្លួន​ជាមួយ​នឹង​វត្ថុតាង​មាន​ថ្នាំ​ញៀន​ប្រភេទ ម៉ា​ទឹកកក​៧០ ក្រាម ប្រភេទ​អំហ្វេតាមីន​៦៤​គ្រាប់ និង​ប្រភេទ​ម្សៅ​ម៉ា​១​កញ្ចប់​ជិត​មួយ​ខាំ​ផង»។ មន្ត្រី​នោះ​ថា បុរស​ថៃ​រងរបួស​ដេក​ពេទ្យ ក្រោយ​ជា​របួស​នឹង​ត្រូវ​បញ្ជូន​ទៅ​តុលាការ​ភ្លាម។

ដោយ​ឡែក​នៅ​ខេត្ត​សៀមរាប ស្ត្រី​ថៃ​ពីរ​នាក់​ដែល​ត្រូវ​កម្លាំង​សមត្ថកិច្ច​ចាប់​ខ្លួន​កាលពី​ថ្ងៃ​ចន្ទ ជាមួយ​នឹង​គ្រឿង​ញៀន​កូកាអ៊ីន ទម្ងន់​ជាង​១១​គីឡូក្រាម នៅ​ព្រលាន​យន្តហោះ​អន្តរជាតិ​សៀមរាប ក្នុង​ខេត្ត​សៀមរាប នឹង​ត្រូវ​បញ្ជូន​ទៅ​តុលាការ​ធ្វើ​ការ​ចោទប្រកាន់​នៅ​ថ្ងៃ​ពុធ​នេះ។

លោក នន់ សុផាន្នី ប្រធាន​ការិយាល័យ​នគរបាល​ប្រឆាំង​គ្រឿង​ញៀន​ខេត្ត បាន​ឲ្យ​ដឹង​ថា ស្ត្រី​ថៃ​ឈ្មោះ Yawa Nophat Wara porn អាយុ​២០​ឆ្នាំ និង​ឈ្មោះ Chaithong Orrapun អាយុ​២៦​ឆ្នាំ ត្រូវ​កម្លាំង​នគរបាល​ប្រឆាំង​គ្រឿង​ញៀន​សហការ​នឹង​កម្លាំង​ចម្រុះ​ចាប់​ខ្លួន​នៅ​ព្រលាន​យន្ត​ហោះ​ខេត្ត​សៀមរាប កាលពី​ម៉ោង​៤កន្លះ​រសៀល​ថ្ងៃ​ទី៨​តុលា។ ពួក​គេ​នឹង​ត្រូវ​បញ្ជូន​ទៅ​កាន់​តុលាការ​ខេត្ត​សៀមរាប ដើម្បី​ធ្វើការ​ចោទ​ប្រកាន់​នៅ​ថ្ងៃ​ពុធ​នេះ។

លោក នន់ សុផាន្នី ប្រាប់​ភ្នំពេញ​ប៉ុស្តិ៍​ថា ៖ «ស្ត្រី​ថៃ​ទាំង​ពីរ​នាក់​នេះ បាន​ជួញដូរ​គ្រឿង​ញៀន​កូកាអ៊ីន ពី​ប្រទេស​ប្រេស៊ីល​មក​កាន់​កម្ពុជា តាម​ការ​ផ្ទេរ​នៅ​ព្រលាន​យន្តហោះ​សិង្ហបុរី ចូល​មក​ព្រលាន​យន្ត​ហោះ​ខេត្ត​សៀមរាប ហើយ​ត្រូវ​កម្លាំង​សមត្ថកិច្ច​ចម្រុះ​កម្ពុជា​ចាប់​ខ្លួន ពេល​ព្យាយាម​នាំ​គ្រឿង​ញៀន​ដែល​លាក់​ទុក​ក្នុង​វ៉ាលិស​ចេញ​ពី​ព្រលាន»។

លោក​បញ្ជាក់​ថា ប្រតិបត្តិការ​នោះ​សមត្ថកិច្ច​ចម្រុះ​រឹបអូស​បាន​ថ្នាំ​ញៀន​កូកាអ៊ីន​ទម្ងន់​៦,៤៥​គីឡូក្រាម​ពី​ក្នុង​អីវ៉ាន់​របស់ Yawa Nophat Wara porn និង​ចំនួន ៥ គីឡូក្រាម នៅ​ក្នុង​វ៉ាលិស Chaithong Orrapun។

លោក​បន្ត​ថា តាម​ចម្លើយ​ស្ត្រី​ថៃ​ទាំងពីរ​នាក់ គ្រឿង​ញៀន​ដែល​រឹបអូស​នេះ​នាំ​ពី​ប្រទេស​ប្រេស៊ីល ក្នុង​ទិសដៅ​នាំ​ចូល​ក្នុង​ប្រទេស​ថៃ ហើយ​ត្រូវ​ផ្ទេរ​ពី​កម្ពុជា​ចូល​ទៅ​តាម ច្រក​ព្រំដែន​កម្ពុជា​និង​ថៃ។

លោក​អះអាង​ថា​៖«នេះ​គឺ​លើក​ទី​បី​ហើយ​ដែល​កម្លាំង​សមត្ថកិច្ច​យើង​ចុះ​បង្ក្រាប​សកម្មភាព​ជួញ​ដូរ​គ្រឿង​ញៀន និង​ចាប់​បាន​អ្នក​ចែក​គ្រឿង​ញៀន​បរទេស នៅ​ក្នុង​ខេត្ត​សៀមរាប​នៅ​​ឆ្នាំ​នេះ។ លោក​ថា លើក​នេះ​ចំនួន​គ្រឿង​ញៀន​រឹបអូស​បាន​មាន​ចំនួន​ច្រើន​បំផុត បើ​ធៀប​នឹង​ការ​រឹបអូស​ពី​លើក​មុន។

កាលពី​ថ្ងៃទី​២៦​កញ្ញា ស្ត្រី​ថៃ​វ័យ​៤២​ឆ្នាំ​ម្នាក់ ត្រូវ​បាន​ចាប់​ខ្លួន​នៅ​ឯ​ព្រលាន​យន្តហោះ​សៀមរាប ជាមួយ​នឹង​គ្រឿង​ញៀន​មេតំហ្វេតាមីន ប្រភេទ​ម្សៅ​ទម្ងន់ ៥,៥​គីឡូក្រាម។ នៅ​ពាក់​កណ្ដាល​ខែ​សីហា ស្ត្រី​ថៃ​ពីរ​នាក់​និង​បុរស​ហ្វីលីពីន​ម្នាក់ ក៏​ត្រូវ​ចាប់​ខ្លួន​ពាក់ព័ន្ធ​នឹង​ការ​ជួញដូរ​គ្រឿង​ញៀន​អន្តរជាតិ ជាមួយ​នឹង​គ្រឿង​ញៀន​មេតំហ្វេតាមីន​ទម្ងន់ ៣.៤២៥ ក្រាម ផង​ដែរ។ ពួក​គេ​ត្រូវ​បាន​តុលាការ​ខេត្ត​សៀមរាប​ចោទ​ប្រកាន់ ពី​បទ​រក្សា​ទុក ដឹក​ជញ្ជួន និង​ជួញ​ដូរ​ខុស​ច្បាប់​នូវ​សារធាតុ​ញៀន។

នៅ​ភ្នំពេញៈ មុខ​សញ្ញា​មេខ្លោង​ជួញ​ដូរ​គ្រឿង​ញៀន​ជា​ជនជាតិ​ឡាវ​ម្នាក់ សមត្ថកិច្ច​កំពុង​បន្ត​ការ​ស៊ើប​និង​តាម​ចាប់​ខ្លួន បន្ទាប់​ពី​បាន​ឃាត់ខ្លួន​ជន​សង្ស័យ​៤​នាក់ និង​រឹបអូស​ម្សៅ​សារធាតុ​ញៀន​ទម្ងន់ ៥៣៥ ក្រាម ក្នុង​សណ្ឋាគារ​ផ្កាឈូក​ទិព្វ ផ្លូវ​មុនី​រ៉េត​នៅ​កណ្តាល​រាជធានី កាលពី​ល្ងាច​ថ្ងៃ​ចន្ទ។

លោក ខៀវ សាម៉ន ប្រធាន​មន្ទីរ​ប្រឆាំង​គ្រឿងញៀន​ក្រសួង​មហាផ្ទៃ ពី​ម្សិលមិញ​បាន​ប្រាប់​ថា សមត្ថកិច្ច​ជំនាញ​កំពុងតែ​សួរ​ចម្លើយ​ជនសង្ស័យ​ទាំង​បួន​នាក់ ដើម្បី​ប្រមូល​ភស្ដុតាង​បន្ថែម​ទៀត​សម្រាប់​ការ​ស្រាវជ្រាវ​ស្វែងរក​ចាប់​ខ្លួន​ជន​ដែល​ពាក់ព័ន្ធ​នឹង​សំណុំ​រឿង​នេះ​មក​ផ្តន្ទាទោស។

លោក​ថ្លែងថា ៖ «នៅ​ពេល​នេះ ជន​សង្ស័យ​ទាំង​បួន កំពុង​ស្ថិតក្រោម​ការ​សួរ​ចម្លើយ​នៅ​ឡើយ។ យោង​តាម​វត្ថុតាង​ជាក់ស្ដែង ពួក​គេ​នឹង​ត្រូវ​ចោទ​ប្រកាន់​ពីបទ​ជួញដូរ​គ្រឿង​ញៀន»។

លោក សាន សុទ្ធី ប្រធាន​ការិយាល័យ​នៃ​មន្ទីរ​ប្រឆាំង​គ្រឿងញៀន​អះអាង​ក្នុង​របាយការណ៍​ព័ត៌មាន​របស់​អគ្គស្នងការ​នគរបាល​ជាតិ​ថា ពាក់ព័ន្ធ​ករណី​នេះ សមត្ថកិច្ច​កំពុង​បន្ត​ចាត់​ការ​ស៊ើបអង្កេត​ជា​បន្ត​ទៀត ខណៈ​ជនសង្ស័យ​ឆ្លើយ​ថា មាន​មេ​ខ្លោង​ធំ គឺជា​ជនជាតិ​ឡាវ។ លោក​បន្ត​ថា៖«មេខ្លោង​ធំ ដែល​ត្រូវ​ចាប់​ខ្លួន​ជា​បន្ត អាច​ជា​ជនជាតិ​ឡាវ»។

យោង​តាម​របាយការណ៍​ព័ត៌មាន​របស់​អគ្គស្នងការ​នគរបាលជាតិ​ដដែល ក្នុង​ប្រតិបត្តិ​ការចុះ​ឆែកឆេរ​និង​បង្ក្រាប​ករណី​ជួញដូរ​គ្រឿង​ញៀន នៅ​សណ្ឋាគារ​ផ្កាឈូក​ទិព្វ ផ្លូវ​មុនីរ៉េត សង្កាត់​ផ្សារ​ដើម​គ ខណ្ឌ​ទួលគោក កាលពី​ល្ងាច​ថ្ងៃ​ចន្ទ សមត្ថកិច្ច​រឹបអូស​បាន​ម្សៅ​សារធាតុ​ញៀន ប្រភេទ អាយ​ស៊ី មេតំហ្វេតាមីន ទម្ងន់​៥៣៥​ក្រាម និង​ឃាត់​ខ្លួន​ជនសង្ស័យ​បាន​បី​នាក់ ក្នុង​នោះ​មាន​ឈ្មោះ ឈិន ឡុង​ឡាំ ភេទ​ប្រុស អាយុ​២៧​ឆ្នាំ មាន​ស្រុក​កំណើត​នៅ​ស្រុក​ព្រែក​ប្រសព្វ ខេត្ដ​ក្រចេះ ទី២ ឈ្មោះ​ហង្ស វុទ្ធី ភេទ​ប្រុស អាយុ​៣០​ឆ្នាំ មាន​ស្រុក​កំណើត​នៅ​ក្រុង​ប៉ោយប៉ែត ខេត្ដ​បន្ទាយមានជ័យ និង​ទី៣ ឈួន ដាហ្វុង ភេទ​ប្រុស អាយុ​៣២​ឆ្នាំ ខណៈ​ដែល​ជនសង្ស័យ​ទី៤ ជា​មេ​ខ្លោង មិន​ត្រូវ​បាន​បង្ហាញ​ឲ្យ​ដឹង​ពី​អត្តសញ្ញាណ ត្រូវ​ចាប់​ឃាត់​ខ្លួន​បាន​នៅ​គល់ស្ពាន​ជ្រោយចង្វារ​សង្កាត់​វត្តភ្នំ ខណ្ឌដូនពេញ។

លោក មាស វិរិទ្ធ ប្រធាន​មន្ទីរ​ពិសោធន៍​សារធាតុ​ញៀន​នៃ​ក្រសួង​មហាផ្ទៃ​បាន​ឲ្យ​ដឹង​ថា អង្គភាព​មន្ទីរ​ពិសោធន៍​របស់​លោក​នៅ​មិន​ទាន់​ទទួល​បាន​នូវ​សំណាក​សារធាតុ​ញៀន​ទាំង​នោះ មក​ធ្វើ​ការ​ពិសោធ​នៅ​ឡើយ​ទេ។

លោក​បាន​បន្ថែម​ថា៖ «តាម​ធម្មតា​យើង​ទទួល​ធ្វើ​ការ​ពិសោធ នៅ​ពេល​ដែល​សំណុំ​រឿង​បញ្ជូន​ទៅ​ដល់​តុលាការ ហើយ​តុលាការ​ជា​អ្នក​បញ្ជូន​សំណាក​សង្ស័យ មក​ខាង​មន្ទីរ​យើង​ខ្ញុំ​ពិសោធ»។

ទាក់ទង​នឹង​បញ្ហា​គ្រឿង​ញៀន​នេះ លោក នី ចរិយា ប្រធាន​ផ្នែក​ស៊ើបអង្កេត​សមាគម​សិទ្ធិ​មនុស្ស​អាដហុក​យល់​ឃើញ​ថា បញ្ហា​គ្រឿង​ញៀន​នេះ វា​ទាក់ទង​ចូល​មក​កាលពី​១០​ឆ្នាំ​មុន ដោយ​សារ តែ​អ្នក​ប្រព្រឹត្ត​បទល្មើស​ច្រើន​តែ​មិន​ទទួល​បាន​ការ​កាត់​ទោស​ឲ្យ​បាន​ត្រឹមត្រូវ ហើយ​ច្រើន​តែ​រួច​ខ្លួន​ពីបទ​ឧក្រិដ្ឋ​នេះ​ផង។

លោក​បាន​បន្ត​ថា៖ «អ្នក​មាន​អំណាច​បុណ្យស័ក្តិ​ច្រើន​តែ​ជា​អ្នក​ប្រព្រឹត្ត​បទល្មើស​ធំៗ ដូច្នេះ ចង់​មិន​ចង់ ពួក​គេ​មិន​រង​ការ​ដាក់​ទោស​ទណ្ឌ​អ្វី​ទេ អ៊ីចឹង​ហើយ​បាន​ជា​ជះ​ឥទ្ធិពល​រហូត​មក​ដល់​សព្វ​ថ្ងៃ ហើយ​ធ្វើ​ឲ្យ​អ្នក​ដទៃ​គិតថា ឲ្យ​តែ​គេ​មាន​លុយ មាន​បុណ្យ​ស័ក្តិ​និង​មាន​អំណាច​ទៅ គឺ​អាច​ជួយ​ឲ្យ​ពួក​គេ​គេច​ផុតពី​ការ​ដាក់​ទោស​ទណ្ឌ​បាន​ហើយ»។

លោក​បន្ត​ថា៖« ដោយ​គេ​មើល​ឃើញ​ថា កម្ពុជា​មាន​ភាព​ធូរ​រលុង​ផ្នែក​ប្រព័ន្ធ​យុត្តិធ៌ម​បែប​នេះ ទើប​ធ្វើ​ឲ្យ​ឈ្មួញ​ឬ​ឧក្រិដ្ឋជន​គ្រឿង​ញៀន​ទាំង​ជនជាតិ​ខ្មែរ ទាំង​ជន​បរទេស​ក្តី គេ​មើល​ឃើញ​ភាព​ចន្លោះ​ប្រហោង​ក្នុងការ​ជ្រកកោន និង​ងាយ​លួច​លាក់​បំពួន​ហើយ​និង​បង្ក​បញ្ហា​គ្រឿង​ញៀន​បន្ត​បន្ទាប់​ពេញ​ប្រទេស»៕ PN

រាយការណ៍​បន្ថែមៈ ឃុត សុភចរិយា

អត្ថបទគួរចាប់អារម្មណ៍