ភ្នំពេញៈ ស្របពេលក្រសួងធនធានទឹក និងឧតុនិយមប្រកាសពីការឆាប់មកដល់នៃរដូវវស្សាឆ្នាំនេះជាមួយនឹងការព្យាករថា ភ្លៀងនឹងធ្លាក់ជាបន្តបន្ទាប់នៅទូទាំងប្រទេសនោះ ប្រជាកសិករមួយចំនួនបានចាប់ផ្ដើមភ្ជួររាស់ដីស្រែចម្ការ សម្រាប់បង្កបង្កើនផលស្រូវ និងដំណាំរួមផ្សំដើម្បីទ្រទ្រង់ជីវភាពគ្រួសារ ខណៈសេដ្ឋកិច្ចពលរដ្ឋខ្លះ រងឥទ្ធិពលមិនល្អពីជំងឺកូវីដ១៩។
ប្រជាកសិករនៅភូមិត្រពាំងក្រឹម ឃុំក្រាំងចេក ស្រុកឧដុង្គ ខេត្តកំពង់ស្ពឺលោក ហេង ឌឹម អាយុ ៦៧ ឆ្នាំបានប្រាប់ភ្នំពេញប៉ុស្តិ៍កាលពីថ្ងៃពុធថា ពេលនេះដីស្រែមួយចំនួនមានទឹកដក់ជាបណ្ដើរៗហើយ បន្ទាប់ពីមានភ្លៀងធំ ៣-៤ មេ នាប៉ុន្មានថ្ងៃជាប់គ្នាមកនេះ។
លោកថា ពេលនេះក្រុមគ្រួសាររបស់លោកក៏ដូចអ្នកភូមិបាននាំគ្នាភ្ជួររាស់ដី និងសាបព្រោះស្រូវ ស្រាល និងគ្រាប់ពូជដំណាំរួមផ្សំផ្សេងទៀតរួមមាន ពោត សណ្ដែក និងល្ង ដោយរំពឹងថានឹងប្រមូលផលពី ២ ទៅ ៣ ខែទៀត។
លោក ឌឹម បានបញ្ជាក់ថា៖ «រាល់ឆ្នាំទាល់តែដល់ពាក់កណ្ដាលខែឧសភា ទើបមានភ្លៀងធំតែនៅឆ្នាំនេះអាកាសធាតុដូចជាអំណោយផលល្អដល់កសិករយើងដោយមានភ្លៀងធ្លាក់ច្រើន និងមានទឹកដក់ពេញស្រែចាប់ពីឥឡូវនេះ [១៥មេសា] ទៅហើយ។ សម្រាប់គ្រួសារខ្ញុំ ពេលនេះគឺព្រោះស្រូវស្រាលបាន ២ ហិកតាហើយ»។
លោក ឌឹម ដែលជាអតីតប្រធានការិយាល័យកសិកម្មស្រុកឧដុង្គបានឲ្យដឹងទៀតថា តាមរយៈសេចក្ដីជូនដំណឹងលើកទី ២ របស់ក្រសួងធនធានទឹក និងឧតុនិយមកាលពីថ្ងៃទី ១៤ ខែមេសាឆ្នាំនេះក្នុងខែឧសភា និងខែមិថុនាខាងមុខ ភ្លៀងនឹងបន្តធ្លាក់នៅទូទាំងប្រទេសពីមធ្យមទៅច្រើន។
លោកថា៖ «តាមការព្យាករនេះស្រូវពង្រោះដើមរដូវវស្សារបស់ខ្ញុំអាចនឹងប្រមូលផលនៅពាក់កណ្ដាលខែកក្កដាហើយខ្ញុំនឹងអាចបន្តធ្វើស្រូវវស្សា ១ លើកទៀតដោយចាប់ផ្ដើមពីខែសីហា»។
បើតាមការព្យាកររបស់ក្រសួងធនធានទឹក និងឧតុនិយម រដូវវស្សាឆ្នាំនេះចូលមកដល់លឿនជាងឆ្នាំមុន ដែលតាមធម្មតាតែងចាប់ផ្តើមនៅពាក់កណ្តាលខែឧសភាជាមួយនឹងទឹកភ្លៀងពីមធ្យមទៅបង្គួរ។ ក្នុងខែសីហា និងខែកញ្ញាភ្លៀងអាចធ្លាក់រាយប៉ាយល្អលើផ្ទៃប្រទេសជាមួយនឹងបរិមាណទឹកភ្លៀងពីមធ្យមទៅច្រើនហើយនៅតាមខេត្តមួយចំនួនដែលនៅទំនាបជាប់តំបន់ជួរភ្នំ និងខ្ពង់រាប និងតំបន់ជាប់ផ្លូវទឹកអាចប្រឈមខ្ពស់នឹងជំនន់ទឹកភ្លៀង។
បើតាមការព្យាកររបស់ក្រសួងធនធានទឹកខេត្តនៅតំបន់ខ្ពង់រាបគឺរដូវវស្សាអាចនឹងបញ្ចប់នៅសប្តាហ៍ទី ២ នៃខែវិច្ឆិកាជាមួយនឹងបរិមាណទឹកភ្លៀងពីតិចទៅមធ្យម ខណៈខេត្តនៅតំបន់ទំនាបកណ្តាល និងតំបន់មាត់សមុទ្ររដូវវស្សាអាចនឹងបញ្ចប់នៅសប្តាហ៍ទី ៣ នៃខែវិច្ឆិកាជាមួយនឹងបរិមាណទឹកភ្លៀងពីតិចទៅបង្គួរ។ រីឯកូនរដូវប្រាំងអាចនឹងកើតមាននៅសប្តាហ៍ទី ២ នៃខែកក្កដា រហូតដល់ដំណាច់ខែ។
ដោយឡែកនៅស្រុកកំពង់លែងខេត្តកំពង់ឆ្នាំងឯណោះវិញ ប្រជាកសិករ ដែលមានដីស្រែជាប់នៅតំបន់ ២ ក៏បានចាប់ផ្ដើមភ្ជួររាស់ដីផងដែរ ដើម្បីដាំដុះបន្លែបង្ការ និងស្រូវស្រាលនៅដើមរដូវវស្សានេះ។
លោក ស៊ុត សើញ តំណាងប្រជាកសិករនៅភូមិតាឡាត់ ឃុំស្វាយរំពារ ស្រុកកំពង់លែងបានប្រាប់ភ្នំពេញប៉ុស្តិ៍កាលពីថ្ងៃពុធដែរថា ពេលនេះអ្នកភូមិមួយចំនួនបានចាប់ផ្ដើមភ្ជួររាស់ដី និងធ្វើថ្នាលសាបព្រោះស្រូវ ដើម្បីត្រៀមដកស្ទូងនៅដំណាច់ខែឧសភា។
លោកថ្លែងថា៖ «យើងមានតែមុខរបរធ្វើស្រែចម្ការ ក្រៅពីនេះមិនដឹងថានឹងធ្វើអ្វីនោះទេ ពិសេសនៅពេលប្រទេសជាតិយើងកំពុងប្រឈមនឹងជំងឺរាតត្បាតកូវីដ១៩»។
កាលពីពេលថ្មីៗនេះលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានលើកទឹកចិត្តប្រជាកសិករឲ្យយកចិត្តទុកដាក់លើការបង្កបង្កើនផលស្រូវ និងដំណាំរួមផ្សំព្រមទាំងពង្រឹងការងារចិញ្ចឹមសត្វ និងវារីវប្បកម្ម ដើម្បីចូលរួមធានានូវតុល្យភាពស្បៀងអាហារក្នុងគ្រាមានវិបត្តិជំងឺកូវីដ១៩។
លោកបានថ្លែងថា៖ «បើទោះជានៅពេលនេះ សន្តិសុខស្បៀងរបស់យើងនៅមិនទាន់មានបញ្ហាចោទក្ដី តែយើងមិនត្រូវធ្វេសប្រហែសឡើយ គឺត្រូវបង្កើនការងារបង្កបង្កើនផល និងចិញ្ចឹមសត្វរបស់យើងថែមទៀត ដើម្បីរក្សាឲ្យបាននូវតុល្យភាពស្បៀង និងសេដ្ឋកិច្ចក្នុងសង្គមគ្រួសារ និងប្រទេសជាតិរបស់យើង»៕