កំពង់ធំៈ កសិករជិត ៤០០ គ្រួសារ នៅសង្កាត់អូរកន្ធរ ក្រុងស្ទឹងសែន ខេត្តកំពង់ធំ បានស្នើអាជ្ញាធរ-ខេត្តកុំបន្តអាជ្ញាប័ណ្ណដល់ក្រុមហ៊ុនកំពង់ធំ អ៊ិនវេសមេន និងឌីវេឡុបមិនគ្រុបឱ្យបូមទឹកពីស្ទឹងសែន ដើម្បីស្រោចស្រពស្រូវប្រាំងពួកគាត់ទៀត ក៏ប៉ុន្តែបានស្នើឱ្យរកក្រុមហ៊ុនផ្សេងដែលមានសមត្ថភាពបន្តអាណត្តិថ្មីនេះតាមរយៈការបោះឆ្នោត។
លោក ស៊ិន សំអាត តំណាងឱ្យកសិករទាំងនោះបានប្រាប់ ភ្នំពេញ ប៉ុស្តិ៍ ពីថ្ងៃទី ១៧ កុម្ភៈថា ក្រុមហ៊ុននេះមិនបានរៀបចំម៉ាស៊ីនបូមទឹកឱ្យបានមុនកសិករផ្តើមធ្វើស្រែប្រាំងទេ ជាហេតុធ្វើឱ្យខ្វះទឹកស្រោចស្រព។
លោកថា៖ «ស្រូវប្រាំងត្រូវការទឹកជាចាំបាច់ ព្រោះមានពេលកំណត់ថ្ងៃ និងកំណត់ខែរបស់វា ហើយនៅពេលខ្វះទឹកបានធ្វើឱ្យកសិករត្រូវចំណាយលុយច្រើន។ ឧទាហរណ៍ថា បាញ់ទឹកអស់ ១០ ម៉ឺនរៀល ហើយបើអត់ទឹក គឺបាញ់អស់ ២០ ម៉ឺនរៀល និងខូចស្រូវទៀត»។
បើតាមលោក ស៊ិន សំអាត ចំពោះទឹកវិញគឺមិនគ្រប់គ្រាន់ទេ ដូច្នេះហើយបានជាពលរដ្ឋមិនពេញចិត្តហើយតវ៉ា ប៉ុន្តែគេ (ក្រុមហ៊ុន) ថា គេធ្វើតែ ១០ ឆ្នាំទៀតទេនឹងប្រគល់ឱ្យវិញហើយ។
លោកបញ្ជាក់ថា៖ «ប៉ុន្តែឥឡូវគេអត់មានស្នើសុំត្រឹមសង្កាត់ទេគឺគាត់ធ្វើពីលើមកក្រោមវិញ គាត់ដាក់ ១ អាណត្តិ ១០ ឆ្នាំ ពីលើទៀត អ៊ីចឹងកសិករគាត់អត់ពេញចិត្ត។ កសិករឱ្យរៀបចំអាណត្តិត្រឹម ៥ ឆ្នាំបានហើយ និងអនុញ្ញាតឱ្យមានឈរឈ្មោះទៅហើយបើគាត់ស្រឡាញ់ពីណាបោះឆ្នោតឱ្យពីហ្នឹងទៅ»។
លោក ជីវ គីមអុន ចៅសង្កាត់អូរកន្ធរ បានឱ្យដឹងដែរថា បញ្ហានេះក្រុមហ៊ុនបានចុះកិច្ចសន្យាធ្វើអាជីវកម្មជាមួយកសិកររយៈពេល ១០ ឆ្នាំហើយ តែបើចង់បន្តក្រុមហ៊ុនត្រូវសុំពីកសិករដែលប្រើទឹកឱ្យបានមុន ១ ឆ្នាំ។
លោកបន្តថា ពេលនេះគ្រប់ ១០ ឆ្នាំហើយ តែក្រុមហ៊ុនមិនបានសុំពីកសិករទេ តែបែរជាមានការអនុញ្ញាតឱ្យបន្តអាជីវកម្មធ្វើឱ្យពលរដ្ឋរឹតតែមិនពេញចិត្ត។
លោកថា៖ «កន្លងមកពលរដ្ឋតែងតែថ្នាំងថ្នាក់ជាមួយក្រុមហ៊ុននេះ ដោយសារគាត់ប្រើប្រាស់ទឹកមិនគ្រប់គ្រាន់ ហើយមួយទៀតក៏មានបញ្ហាជាច្រើនផ្សេងមកដោះស្រាយនៅសង្កាត់ និងនៅក្រុងជាច្រើនលើក ប៉ុន្តែគ្មានដំណោះស្រាយសមស្រប»។
លោកបានឱ្យដឹងដែរថា ដីស្រែសម្រាប់ធ្វើស្រូវប្រាំងរបស់កសិករដែលប្រើទឹកនេះគឺមានជិត ២ ០០០ ហិកតា។
លោកបន្តថា៖ «អ៊ីចឹងទេពលរដ្ឋស្នើសុំក្នុងអាណត្តិថ្មីនេះគាត់ឱ្យរកក្រុមហ៊ុនណាដែលល្អ ហើយនិងមានសមត្ថភាពមកឈរឈ្មោះបោះឆ្នោត ក្នុងអាណត្តិ ៥ ឆ្នាំ ហើយក្រុមហ៊ុនចាស់ហ្នឹងក៏អាចឈរឈ្មោះបានដែរ បើពលរដ្ឋពេញចិត្ត គាត់អាចបន្តទៀតទៅ ប៉ុន្តែអាក្រោយនេះគាត់ចេញអាជ្ញាប័ណ្ណបន្ត ១០ ឆ្នាំទៀត គិតពីឆ្នាំ ២០២១ នេះទៅ ដោយមានការស៊ីញ៉េពីមន្ទីរធនធានទឹក និងមន្ទីរកសិកម្ម ខេត្តកំពង់ធំ»។
លោក សុខលូ អភិបាលខេត្តកំពង់ធំបានឱ្យដឹងពីថ្ងៃទី ១៧ កុម្ភៈថា ព័ត៌មាននេះលោកបានទទួលរួចហើយ ប៉ុន្តែតាមរយៈមន្ទីរធនធានទឹក និងឧតុនិយមនិងមន្ទីរកសិកម្ម រុក្ខាប្រមាញ់ និងនេសាទបានរាយការណ៍ថា ក្រុមហ៊ុននេះបានផ្គត់ផ្គង់ទឹកជូនពលរដ្ឋបានល្អ និងមិនធ្លាប់មានទំនាស់ លោកក៏បានឯកភាព។
លោកថា៖ «មកទល់ពេលនេះខ្ញុំមិនទាន់បានទទួលពាក្យបណ្តឹងពីពលរដ្ឋទេ ប៉ុន្តែនៅពេលដែលពលរដ្ឋមិនសប្បាយចិត្ត និងពេញចិត្តចំពោះក្រុមហ៊ុនមួយនេះ ខ្ញុំនឹងរៀបចំក្រុមការងារមួយចុះទៅដោះស្រាយជូន»។
លោក យូ ឡា ប្រធានមន្ទីរធនធានទឹក និងឧតុនិយមខេត្តកំពង់ធំបានឱ្យដឹងពីម្សិលមិញថា ករណីនេះក៏មានកសិករជាច្រើនបានផ្តិតមេដៃគាំទ្រឱ្យក្រុមហ៊ុននេះបន្តអាជីវកម្មដែរ។ ខាងក្រុមហ៊ុនក៏មានសមិទ្ធផលល្អៗដែរចាប់ពីធ្វើអាជីវកម្មនៅឆ្នាំ ២០១០ មក ដូចជា ជីកប្រឡាយ ដាក់ម៉ាស៊ីនបូមទឹក និងធ្វើអ្វីជាច្រើនទៀត ម្យ៉ាងបើដកក្រុមហ៊ុននេះ ហើយរកក្រុមហ៊ុនថ្មីមកជំនួស វារឹតតែខាតពេលធ្វើឱ្យស្រូវរបស់កសិករខូចខាតកាន់តែច្រើន។
លោកថា៖ «គ្រាន់តែខ្វះទឹក ហើយដកគេចេញ គឺមិនសមទេយើងអាចកែគ្នាសិន ហើយចុះកិច្ចសន្យាមួយឱ្យច្បាស់លាស់ ឬដាក់លក្ខន្តិកៈ បើមិនគោរពតាមទេ យើងប្តឹងទៅតុលាការ ដកសិទ្ធិធ្វើអាជីវកម្ម»៕