តាកែវៈ ពលរដ្ឋរស់នៅឃុំសូភី ស្រុកបាទី ខេត្តតាកែវ ប្រមាណជាង ១០០ នាក់ រួមគ្នាផ្ដិតមេដៃស្នើឲ្យអាជ្ញាធរមានវិធានការទៅលើរោងកសិដ្ឋានចិញ្ចឹមជ្រូក ១ កន្លែងនៅក្បែរភូមិរបស់ពួកគាត់ ដែលបង្កក្លិនស្អុយសាយភាយប៉ះពាល់ដល់អ្នកភូមិរស់នៅតំបន់នោះ។ ជាការឆ្លើយតប មន្ត្រីអះអាងថា នឹងបញ្ជូនមន្ត្រីជំនាញចុះទៅស៊ើបអង្កេតកសិដ្ឋានចិញ្ចឹមជ្រូកនេះ។
តាមពាក្យបណ្ដឹងរបស់ពលរដ្ឋរស់នៅភូមិត្រពាំងឫស្សី ភូមិសំរោង និងភូមិត្រាំខ្នារ ក្នុងឃុំសូភី ស្រុកបាទី ខេត្តតាកែវដែលមានស្នាមផ្ដិតមេដៃចំនួន ១០០ នាក់ ចុះថ្ងៃទី ២៣ ខែសីហា ដែលភ្នំពេញប៉ុស្ដិ៍ទទួលបានពីម្សិលមិញគឺពលរដ្ឋទាំងនោះដាក់សំណើសុំប្ដឹងម្ចាស់កសិដ្ឋានចិញ្ចឹមជ្រូកស្ថិតនៅក្បែរភូមិត្រពាំងឫស្សី ឃុំសូភី ស្រុកបាទី ខេត្តតាកែវ។
ពាក្យបណ្ដឹងបញ្ជាក់ថា៖ «យើងខ្ញុំធ្លាប់បានប្ដឹងម្ចាស់រោងចិញ្ចឹមជ្រូកនេះម្ដងរួចមកហើយទៅលោកអភិបាល ស្រុកបាទី និងមានការចុះមកដោះស្រាយបញ្ហាក្លិនស្អុយ ក្លិនឆ្អេះ ដែលសាយភាយចេញពីកសិដ្ឋានមកដល់ភូមិលំនៅឋានរបស់ប្រជាពលរដ្ឋដែលរស់នៅតំបន់នោះម្ដងរួចហើយ ប៉ុន្ដែគ្មានផលជាវិជ្ជមានទេ»។
ពាក្យបណ្តឹងបន្តថា៖ «បច្ចុប្បន្នក្លិនស្អុយនេះបាននិងកំពុងជះឥទ្ធិពលខ្លាំងមកលើអ្នកភូមិ ជាពិសេសក្លិនស្អុយនេះមានរយៈពេលជាច្រើនឆ្នាំហើយ តែអាជ្ញាធរមូលដ្ឋានគ្មានអើពើដោះស្រាយបញ្ហានេះទេ។ ដូច្នេះសូមលោកអភិបាលស្រុកបាទីជួយដោះស្រាយបញ្ហានេះបន្ទាន់»។
ពលរដ្ឋម្នាក់រស់នៅឃុំសូភីសុំមិនបញ្ចេញឈ្មោះពីម្សិលមិញថ្លែងថា កសិដ្ឋានចិញ្ចឹមជ្រូកនេះបង្កក្លិនស្អុយរយៈពេលជាច្រើនឆ្នាំមកហើយ។ ប៉ុន្ដែអាជ្ញាធរមូលដ្ឋានគ្មានសមត្ថភាពដោះស្រាយបំបាត់ក្លិននេះទេ ដោយលើកហេតុផលរុញទៅថ្នាក់លើ។ លោកមិនបានដឹងថា មន្ត្រីថ្នាក់ស្រុកបាទី ឬខេត្តតាកែវបានដឹងពីបញ្ហានេះដែរ ឬអត់ទេ ទើបបានជាគ្មានដំណោះស្រាយរហូតមកដល់ពេលនេះ។
លោកប្រាប់ថា៖ «ពួកខ្ញុំមិនទាមទារឲ្យមានការរុះរើរោងកសិដ្ឋានចិញ្ចឹមជ្រូកហ្នឹងចេញទេ ប៉ុន្ដែពួកខ្ញុំចង់ឲ្យម្ចាស់កសិដ្ឋាន និងអាជ្ញាធរធ្វើយ៉ាងណាកុំឲ្យមានក្លិនស្អុយសាយភាយប៉ះពាល់ដល់ប្រជាពលរដ្ឋ ហើយធ្វើយ៉ាងណា ត្រូវតែរៀបចំឲ្យមានទីតាំងស្តុកទឹកស្អុយ ឬទឹកសំណល់ចេញពីកសិដ្ឋានឲ្យបានត្រឹមត្រូវ ព្រោះទឹកស្អុយហ្នឹងវាហូរពាសវាលពាសកាល បង្កឲ្យខូចស្រូវអ្នកភូមិផង និងបង្កក្លិនស្អុយផង»។
លោក ភួង ឡេង ស្មៀនឃុំសូភីពីម្សិលមិញទទួលស្គាល់ថា ពិតជាមានក្លិនស្អុយរំខានដល់ការរស់នៅរបស់ពលរដ្ឋមែន។ ប៉ុន្ដែថា មិនមានទឹកស្អុយហូរចេញពីរោងកសិដ្ឋានចិញ្ចឹមជ្រូកនេះទេ ដោយម្ចាស់កសិដ្ឋានធ្វើប្រឡាយមួយដើម្បីបង្ហូរទឹកស្អុយនេះចេញពីកសិដ្ឋានដែលមិនធ្វើឲ្យមានការប៉ះពាល់ដល់ពលរដ្ឋទេ។
លោកថា រោងកសិដ្ឋានចិញ្ចឹមជ្រូកនេះមានចម្ងាយ ៧០០ ម៉ែត្រ ពីភូមិត្រពាំងឫស្សីដោយធ្លាប់ត្រូវបានអាជ្ញាធរ និងមន្ត្រីជំនាញធ្វើការអប់រំណែនាំ និងតម្រូវឲ្យធ្វើតាមបច្ចេកទេសដែរ ហើយម្ចាស់កសិដ្ឋានក៏បានអនុវត្តតាមសេចក្ដីណែនាំនេះ។ ប៉ុន្ដែនៅមានចំណុច ខ្វះចន្លោះខ្លះដែលធ្វើឲ្យមានក្លិនស្អុយម្ដងម្កាលប៉ុណ្ណោះ។ ដូច្នេះប្រជាពលរដ្ឋគួរតែមានការយោគយល់ជាមួយម្ចាស់កសិដ្ឋាន។
លោក ភួង ឡេង បញ្ជាក់ថា៖ «ខ្ញុំបានតាមដានក្លិនស្អុយហ្នឹងដែរ គឺក្នុង ១ ថ្ងៃ មានក្លិនស្អុយតែ ១ ម៉ោង ឬ ២ ម៉ោងទេ ព្រោះមានស្អុយនៅពេលកម្មករចាប់ផ្ដើមលាងជ្រូក ឬបាញ់ទឹកដាក់ជ្រូកប៉ុណ្ណោះ។ អ៊ីចឹងម៉ោងក្រៅពីនេះមិនមានក្លិនស្អុយទេ។ នៅក្នុងកសិដ្ឋានគេមានឡផ្ទុកឧស្ម័នលាមកជ្រូកដែរ ដើម្បីកាត់បន្ថយក្លិនសាយភាយចេញមកក្រៅ ប៉ុន្ដែក៏នៅមានក្លិនតិចតួចចៀសមិនផុតទេ»។
លោក ភួន ឈឹម អភិបាលស្រុកបាទីពីម្សិលមិញបដិសេធធ្វើអត្ថាធិប្បាយករណីនេះ ដោយអះអាងថាមិនចង់និយាយជាមួយអ្នកសារព័ត៌មានតាមទូរស័ព្ទទេ។ លោកតម្រូវឲ្យអ្នកសារព័ត៌មានទៅជួបនៅសាលាស្រុកបាទីផ្ទាល់។
លោក ញិប ស្រ៊ន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តតាកែវប្រាប់ពីម្សិលមិញថា លោកមិនទាន់បានទទួលពាក្យបណ្ដឹងពីពលរដ្ឋឃុំសូភីនៅឡើយទេ។ ប៉ុន្ដែថាលោកនឹងចាត់មន្ត្រីនៃមន្ទីរកសិកម្មចុះទៅត្រួតពិនិត្យ និងស៊ើបអង្កេតករណីនេះ។
លោកថា៖ «ប៉ុន្ដែខ្ញុំនឹងបញ្ជូនមន្ត្រីជំនាញខ្ញុំចុះទៅត្រួតពិនិត្យមើលលើទីតាំងកសិដ្ឋានចិញ្ចឹមជ្រូកនេះ ព្រោះយើងមិនអាចធ្វើអាជីវកម្មបង្កការរំខានដល់ការរស់នៅរបស់អ្នកភូមិបានទេ។ មន្ត្រីខ្ញុំនឹងចុះទៅឆាប់ៗនេះ»។
លោក អ៊ុំ ទូច និងលោក ស៊ិន ពុំ ដែលគេស្គាល់ថា ជាអ្នកគ្រប់គ្រងកសិដ្ឋានចិញ្ចឹមជ្រូកនោះពីម្សិលមិញមិនទាន់អាចទាក់ទងបានទេ៕