តាកែវ: កសិដ្ឋានចិញ្ចឹមជ្រូក និងមាន់ចំនួន ១០ ទីតាំង បានកំពុងបំភាយក្លិនស្អុយ និងបង្កជារុយធ្វើឲ្យប៉ះពាល់ដល់ផ្លូវដង្ហើមរបស់ប្រជាពលរដ្ឋមួយចំនួននៅក្នុងឃុំលំពង់ ស្រុកបាទី ខេត្តតាកែវ ដោយអាជ្ញាធរមូលដ្ឋានមិនមានវិធានការបន្ទាន់ក្នុងការរកដំណោះស្រាយដោយគ្រាន់តែអះអាងថាចុះទៅស៊ើបអង្កេតជុំវិញករណីនេះ។
លោក ង៉ែត ណុប អាយុ ៤៤ ឆ្នាំ ប្រជាពលរដ្ឋម្នាក់ក្នុងចំណោមអ្នកផ្សេងទៀតដែលរស់នៅឃុំលំពង់បានឲ្យដឹងថា រោងកសិដ្ឋានប្រមាណជាង ១០ កសិដ្ឋាន ដែលក្រុមឈ្មួញប្រកបអាជីវកម្មជាច្រើនឆ្នាំមកហើយ ប៉ុន្ដែកន្លងមកមានការប៉ះពាល់តិចតួចទេ ប៉ុន្តែមួយរយៈចុងក្រោយនេះស្រាប់តែមានក្លិនស្អុយលាយឡំជាមួយសត្វរុយចេញពីកសិដ្ឋានចិញ្ចឹមមាន់ និងចិញ្ចឹមជ្រូកទាំងនោះ។
លោក ណុប បានឲ្យដឹងថា ក្លិនស្អុយទាំងនេះបានសាយភាយចេញពីកសិដ្ឋានទាំងថ្ងៃ និងទាំងយប់ ដោយពេលខ្លះពិបាកដកដង្ហើម ហើយបង្កទៅជាក្អក និងឈានដល់មានជំងឺប្រចាំកាយទៀតផង។ ចំណែកសត្វរុយដែលចេញពីកសិដ្ឋានដែរ នៅពេលម៉ោងហូបបាយ គឺតែងតែមានរុយច្រើនខុសពីធម្មតាដែលនាំឲ្យពិបាកក្នុងការហូបចុក។
លោកបញ្ជាក់ថា៖ «ខ្ញុំធ្លាប់រាយការណ៍ទៅអាជ្ញាធរមូលដ្ឋានដែរ ប៉ុន្ដែគាត់ចេះតែឆ្លើយថា មិនអីទេ មិនអីទេ ប៉ុណ្ណឹងមានទៅប៉ះពាល់អី ចាំប៉ះពាល់ច្រើនជាងនេះ ចាំគាត់ទៅប្រាប់ម្ចាស់កសិដ្ឋាន។ រីឯអ្នកភូមិផ្សេងទៀត គាត់អត់ហ៊ានរាយការណ៍អ្វីទេ គាត់ខ្លាចម្ចាស់កសិដ្ឋានខឹងគាត់ អ៊ីចឹងគាត់អត់ហ៊ាននិយាយទេ គ្រាន់តែម្នាក់ៗរអ៊ូតែពីរឿងនេះ»។
លោក ហែម រ៉េត ពលរដ្ឋម្នាក់ទៀតដែលរស់នៅឃុំលំពង់នោះដែរបានថ្លែងដោយស្នើសុំឲ្យមន្ត្រីជំនាញចុះមកអប់រំ ណែនាំម្ចាស់កសិដ្ឋានទាំងនោះឲ្យមានវិធានការទប់ស្កាត់ក្លិនស្អុយ និងរុយ ដើម្បីកុំឲ្យមានការរំខានដល់ការរស់នៅរបស់អ្នកភូមិ។
លោក រ៉េត ថ្លែងថា៖ «យើងមិនទៅហាមឃាត់អ្វីដល់អ្នករកស៊ីចិញ្ចឹមមាន់ ទា ឬជ្រូកទាំងអស់នោះទេ ប៉ុន្ដែធ្វើយ៉ាងណាកុំឲ្យមានបង្កផលប៉ះពាល់ដល់អ្នករស់នៅតំបន់ជិតនោះ។ ខ្ញុំសូមអំពាវនាវឲ្យមានវិធានការបន្ទាន់មក ព្រោះពេលនេះកំពុងមានក្លិនស្អុយខ្លាំងផង មានទាំងសត្វរុយច្រើនផងដែរ»។
លោក ឆេ សយ មេឃុំលំពង់បានប្រាប់ភ្នំពេញប៉ុស្ដិ៍ពីម្សិលមិញថា ពិតជាមានកសិដ្ឋានចិញ្ចឹមមាន់ និងកសិដ្ឋានចិញ្ចឹមជ្រូកមែន ប៉ុន្ដែមិនសូវមានផលប៉ះពាល់ធ្ងន់ធ្ងរពេកទេ គឺគ្រាន់តែមានក្លិនបន្ដិចបន្ដួចសាយភាយចេញពីកសិដ្ឋានក្នុងអំឡុងពេលដែលម្ចាស់កសិដ្ឋានចាប់មាន់ ឬជ្រូកលក់ប៉ុណ្ណោះ។
លោកបន្តថា កន្លងមកអាជ្ញាធរធ្លាប់ធ្វើការអប់រំណែនាំពីវិធានការទប់ស្កាត់កុំឲ្យមានក្លិនមិនល្អប៉ះពាល់ដល់អ្នកភូមិរស់នៅក្បែរនោះ។ ចំណែកមន្ត្រីជំនាញខេត្តក៏ធ្លាប់មកណែនាំច្រើនលើកដែរ ប៉ុន្ដែក្នុងអំឡុងពេលនេះប្រហែលជាពួកគាត់មានការអនុវត្តខ្វះចន្លោះបច្ចេកទេសបន្ដិចបន្តួចទើបបណ្ដាលឲ្យមានក្លិនមិនល្អបែបនេះ។
លោកបញ្ជាក់ថា៖ «ក្លិនវាមានតិចតួចដែរ ហើយសត្វរុយ កន្លែងណាក៏មានដែរ វាជារឿងធម្មតាទេ ព្រោះយើងបានអប់រំណែនាំម្ចាស់កសិដ្ឋានដែរ។ ចំពោះកសិដ្ឋាននៅឃុំលំពង់សព្វថ្ងៃនេះគឺកសិដ្ឋានចិញ្ចឹមមាន់ចំនួន ៨ កសិដ្ឋាន ហើយកសិដ្ឋានចិញ្ចឹមជ្រូកមានចំនួន ៧ កសិដ្ឋានដែរ ប៉ុន្ដែកសិដ្ឋានទាំងនោះ វានៅឆ្ងាយៗពីផ្ទះអ្នកភូមិដែរ»។
ចំពោះម្ចាស់កសិដ្ឋាននៅក្នុងឃុំលំពង់ ស្រុកបាទីពីម្សិលមិញមិនអាចស្វែងរកប្រភពទាក់ទងបានទេ។
លោក ភួន ឈឹម អភិបាលស្រុកបាទីបានថ្លែងពីម្សិលមិញថា លោកមិនទាន់បានទទួលព័ត៌មាននេះពីមូលដ្ឋានឃុំលំពង់ទេ ចំពោះផលប៉ះពាល់អាជ្ញាធរធ្លាប់បានអប់រំ ណែនាំម្ចាស់កសិដ្ឋានជាច្រើនលើកមកហើយ ប៉ុន្ដែការអនុវត្តបានកម្រិតណានោះអាជ្ញាធរនៅបន្តតាមដានថែមទៀត។
លោកបន្តថា ប្រសិនមានករណីនេះប្រជាពលរដ្ឋគួរតែរាយការណ៍ទៅអាជ្ញាធរមូលដ្ឋានផ្ទាល់ ដើម្បីរកវិធានការដោះស្រាយឲ្យទាន់ពេលវេលា។
លោកថ្លែងថា៖ «យើងគ្រោងបញ្ជូនមន្ត្រីជំនាញចុះទៅស៊ើបអង្កេតជុំវិញករណីនេះ។ យើងមិនអាចបិទកសិដ្ឋានទាំងអស់បានទេ ព្រោះវាអាចធ្វើឲ្យប៉ះពាល់ដល់សន្ដិសុខស្បៀងយើង ប៉ុន្ដែយើងនឹងធ្វើការកែតម្រូវរាល់កន្លែងណា ឬចំណុចណាដែលបង្កផលប៉ះពាល់ប្រជាពលរដ្ឋ។ បន្ទាប់មកទៀតដាក់ឲ្យគាត់អនុវត្តដើម្បីកុំមានផលប៉ះពាល់ដល់ប្រជាពលរដ្ឋយើងទៀត ហើយប្រសិនគាត់ធ្វើមិនបាន យើងព្រមានគាត់ និងផាកពិន័យតាមច្បាប់»។
លោក ញឹប ស្រ៊ន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តតាកែវបានអះអាងថានឹងបញ្ជូនមន្ត្រីជំនាញចុះទៅដល់ទីតាំងនោះផ្ទាល់ ដើម្បីស៊ើបអង្កេត និងធ្វើការអប់រំណែនាំដល់ម្ចាស់កសិដ្ឋានទាំងនោះ។ លោកបន្តថា មន្ត្រីជំនាញបានណែនាំឲ្យម្ចាស់កសិដ្ឋានអនុវត្តវិធានការមួយចំនួន ដូចជាវិធានការងាយៗគឺគេគ្រាន់តែយកអង្កាមមករាយដាក់នៅខាងក្រោមរោងមាន់ ដើម្បីឲ្យវាស្រូបយកជាតិសំណើមពីលាមកមាន់ដើម្បីបន្ថយក្លិន៕