.jpg)
លោក ហ៊ុន សែន នៅក្នុងពិធី នៃទិវាកាកបាទក្រហមកម្ពុជា កាលពីម្សិលមិញ។ កាកបាទក្រហមកម្ពុជា
ភ្នំពេញៈ កាកបាទក្រហមកម្ពុជា ក្នុងឆ្នាំនេះទទួលបានថវិកាឧបត្ថម្ភពីសប្បុរសជននានាជាង ២០ លានដុល្លារ ដែលកើនលើសឆ្នាំមុនជាង ២ លានដុល្លារ ខណៈដែលលោកនាយករដ្ឋមន្ត្រី ហ៊ុន សែន ចាត់ទុកការជួយឧបត្ថម្ភគាំទ្រដល់កាកបាទក្រហមកម្ពុជានេះថា ផ្តើមចេញពីការស្រឡាញ់។
ថ្ងៃទី ៨ ខែ ឧសភា ម្សិលមិញ គឺជាថ្ងៃនៃការប្រារព្ធទិវាកាកបាទក្រហមកម្ពុជា អឌ្ឍចន្ទក្រហម ហើយឆ្នាំនេះ គឺជាខួបលើកទី១៥៦ ដែលធ្វើឡើងក្រោមអធិបតីភាព លោកនាយករដ្ឋមន្ត្រី ហ៊ុន សែន និងលោកស្រី ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។
ស្របជាមួយនឹងការរំឭកខួបនេះក៏មានសប្បុរសជនយ៉ាងច្រើនកុះករបានរួមគ្នាបរិច្ចាគថវិកាផ្ទាល់ខ្លួនរបស់ពួកគេដើម្បីជួយទ្រទ្រង់សកម្មភាពមនុស្សធម៌ ដែលកាកបាទក្រហមកម្ពុជា តែងតែបានធ្វើជារៀងរាល់ឆ្នាំ។
ក្រោយចប់ពិធីប្រកាសទទួលថវិកាពីសប្បុរសជន កាកបាទក្រហមកម្ពុជា បានប្រកាសថា ថវិកាដែលខ្លួនទទួលបានក្នុងឆ្នាំនេះ គឺមានចំនួនសរុប ២០,៧៥៧,៥១០ ដុល្លារអាមេរិក (២០ លាន ៧ សែន ៥ ម៉ឺន ៧ ពាន់ ៥១០ ដុល្លារ) ដើម្បីទ្រទ្រង់សកម្មភាពមនុស្សធម៌ នៅ ខណៈក្នុងឆ្នាំ ២០១៨ ក្នុងពិធីប្រារព្ធខួបលើកទី១៥៥ ស្ថាប័ននេះទទួលបានថវិកាសប្បុរសធម៌ចំនួន ១៨,០២៨,៦៦៨ ដុល្លារ (ដប់ប្រាំបីលាន ពីរម៉ឺន ប្រាំបីពាន់ ប្រាំមួយរយ ហុកសិបប្រាំបីដុល្លារ)។
តាមការផ្សព្វផ្សាយនៅលើបណ្តាញគេហទំព័ររបស់នាយករដ្ឋមន្ត្រីកម្ពុជាកាលពីម្សិលមិញ សប្បុរសជនដែលបានបរិច្ចាគថវិកាមានតាំងពីព្រះមហាក្សត្រ ព្រះមហាក្សត្រី មន្ត្រីជាន់ខ្ពស់រាជរដ្ឋាភិបាល អ្នកជំនួញជាម្ចាស់ក្រុមហ៊ុននានា រួមទាំងសិល្បករ សិល្បការិនី រហូតដល់ពលរដ្ឋធម្មតារាប់ពាន់នាក់។
ក្នុងនោះ ព្រះមហាក្សត្រព្រះបាទសម្តេចព្រះ នរោត្តម សីហមុនី និងព្រះវររាជមាតាជាតិខ្មែរ សម្តេចព្រះមុនិនាថបានព្រះរាជទានថវិកាសរុប ៤ ម៉ឺនដុល្លារ ស្របពេលដែលលោក ហេង សំរិន ប្រធានរដ្ឋសភា បានចូលថវិកាប្រមាណ ២០ លានរៀល រីឯលោក ឃួង ស្រេង អភិបាលរាជធានីភ្នំពេញចូលរួមបរិច្ចាគប្រមាណ ៨ ម៉ឺនដុល្លារ ហើយក៏មានរដ្ឋមន្ត្រីនៃក្រសួងមួយចំនួនបានបរិច្ចាគថវិកាចន្លោះពី ១ ម៉ឺនទៅ ២ ម៉ឺនដុល្លារផងដែរ។
បើទោះជាយ៉ាងណា ក្នុងការបរិច្ចាគថវិកាចូលកាកបាទក្រហមក្នុងឆ្នាំនេះលោកឧកញ៉ា ហុង ពីវ ដែលស្គាល់ថា ជាម្ចាស់បុរីពិភពថ្មី បានបរិច្ចាគថវិកាផ្ទាល់ខ្លួនដល់ ១,២៩៩,៩៩៩ ដុល្លារ ដែលការបរិច្ចាគនេះ នៅតែបន្តឈរលំដាប់លេខ ១ ដដែល ខណៈគេមើលឃើញថា លោក ទ្រី ភាព ដែលគេស្គាល់ថា ជាអ្នកជំនួញល្បី ឈ្មោះម្នាក់នៅកម្ពុជាផងដែរនោះបានឧបត្ថម្ភថវិកាដល់កាកបាទក្រហមកម្ពុជាប្រមាណ ៣០ ម៉ឺនដុល្លារ។
លោកនាយករដ្ឋមន្ត្រី ហ៊ុន សែន បានថ្លែងក្នុងឱកាសនោះថា ប្រសិនបើគ្មានការស្រឡាញ់នោះទេ ក៏នឹងគ្មានការជួយឧបត្ថម្ភគាំទ្រ ដល់កាកបាទក្រហមកម្ពុជានោះឡើយហើយការចូលរួមជាថវិកានេះក៏តែងតែកើនឡើងពី ១ ឆ្នាំទៅ ១ ឆ្នាំ។
លោកសង្កត់ធ្ងន់ថា៖ «ឆ្នាំនេះប្រធានបទ ខ្ញុំស្រឡាញ់កាកបាទក្រហមកម្ពុជា ហើយខ្ញុំចាត់ទុកថា ប្រធានបទមួយនេះ ចាត់ទុកថា ជាប្រធានបទជាអចិន្រៃ្តយ៍ សម្រាប់កាកបាទក្រហមកម្ពុជារបស់យើង ព្រោះថា ប្រសិន បើគ្មានការស្រឡាញ់នោះទេ ប្រហែលជាយើងមិនមានឱកាសជួបជុំគ្នាប្រចាំឆ្នាំ និងប្រជាពលរដ្ឋរបស់យើងក៏មិនបានទទួលបានប្រយោជន៍ណាមួយនោះដែរ»។
លោកក៏ថ្លែងដែរថា ជាមួយនឹងការបរិចា្ចគថវិកាពីគ្រប់ទិសទីនេះ បាននាំឲ្យកាកបាទក្រហមកម្ពុជា អាចចូលរួមជួយដល់ប្រជាពលរដ្ឋខ្មែរជាជនរងគ្រោះជិត ១៤ ម៉ឺនគ្រួសារ ដែលលោកអះអាងថា ការជួយសង្គ្រោះនេះមិនមែនគ្រាន់តែឆ្នាំ ២០១៨ និងពីនេះតទៅទេ ក៏ប៉ុន្តែកាកបាទក្រហមបានចាប់ផ្តើមនូវសកម្មភាពសង្គ្រោះនេះឡើងវិញ តាំងពីក្រោយថ្ងៃ ៧ មករា ឆ្នាំ ១៩៧៩។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជា បានលើកឡើងពីម្សិលមិញថា ការកើនឡើងនូវជំនួយបន្ថែមរបស់កាកបាទក្រហម គឺជាសំណាងមួយបន្ថែមទៀត សម្រាប់ក្រុមគោលដៅ ជាពិសេសក្រុមមនុស្សដែលងាយរងគ្រោះ ជុំវិញបញ្ហានានា ដូចជាគ្រោះធម្មជាតិ និងបញ្ហាសង្គមជាដើម។ តែលោកមិនអាចវាយតម្លៃ បាននោះទេ ចំពោះសកម្មភាពរបស់កាកបាទក្រហមដែលបានធ្វើកន្លងមក។
លោកបញ្ជាក់ថា៖ «វាពិបាកនឹងមានការវាស់វែងណាស់ ចំពោះភាពគ្រប់គ្រាន់ ដែលកាកបាទក្រហមបានធ្វើកន្លងមកព្រោះមិនអាចថា គ្រប់គ្រាន់ល្អ ១០០% ដែរ។ ប៉ុន្តែ គេមើលទៅលើជ្រុងនៃប្រសិទ្ធភាពស្របទៅតាមគោលការណ៍ដែលមានអត់? នៅពេលដែលយើងមើលទៅលើប្រសិទ្ធភាព យើងអាចយល់ថា ក្រុមគោលដៅរបស់កាកបាទក្រហមគួរតែមានការសម្រួលឲ្យស្របទៅតាមតម្រូវការ និងស្ថានភាពនៃបញ្ហារបស់មនុស្ស ជាពិសេសក្រុមមនុស្សដែលទទួលផល»។
តែយ៉ាងណាលោក ជ័យ យល់ថា ការវាយតម្លៃចំពោះការកើនឡើងតែមួយមុខ ជុំវិញជំនួយមនុស្សធម៌ដែលកាកបាទក្រហមបានទទួលក្នុងពេលនេះ មិនអាចបញ្ជាក់ថា សកម្ម-ភាពរបស់កាកបាទក្រហម បានធ្វើជោគជ័យទាំងស្រុងនោះទេ វាគ្រាន់តែអាចនិយាយបានថា នេះជាមុខមាត់របស់ស្ថាប័នមនុស្សធម៌នេះ តែគួរតែមានការវាយតម្លៃឯករាជ្យណាមួយជុំវិញសកម្មភាពរបស់ស្ថាប័ននេះទើបជាការប្រសើរ៕
