.jpg)
ក្មេងក្រីក្រកំពុងរៀនក្នុងសាលារយីករយាកនៅខេត្តព្រះវិហារកន្លងមក។ ហុង មិនា
ភ្នំពេញៈ ប្រទេស កាតា បានចុះអនុស្សរណៈជាមួយក្រសួងអប់រំ យុវជន និងកីឡាលើគម្រោងអភិវឌ្ឍន៍ដើម្បីកុមារដំណាក់កាលទី២ ដោយផ្ដល់មូលនិធិជាថវិកាជាង ១៣ លានដុល្លារអាមេរិក ដើម្បីរួមចំណែកពង្រឹងវិស័យអប់រំកម្ពុជាដោយផ្ដោតលើកុមារងាយរងគ្រោះក្នុងការសិក្សានៅកម្រិតបឋមសិក្សា ស្របតាមគោលដៅអភិវឌ្ឍន៍ប្រកបដោយចីរភាពឆ្នាំ ២០៣០។
ការចុះអនុស្សរណៈនេះធ្វើឡើងតាមវីដេអូ Conference កាលពីថ្ងៃទី ១៩ ខែវិច្ឆិកា ក្រោមអធិបតីភាពលោក ហង់ជួន ណារ៉ុន រដ្ឋមន្ត្រីក្រសួងអប់រំ និងលោក Khalifa Bin Jassim AL-Kuwari អគ្គនាយកមូលនិធិសម្រាប់ការអភិវឌ្ឍនៃប្រទេសកាតា។
លោក រស់ សុវាចា អ្នកនាំពាក្យក្រសួងអប់រំថ្លែងកាលពីថ្ងៃទី ២២ វិច្ឆិកាថា អនុស្សរណៈលើគម្រោងអភិវឌ្ឍន៍ដើម្បីគាំទ្រដល់កុមារដែលនៅក្រៅសាលា ឬងាយបោះបង់ការសិក្សា និងមិនអាចបញ្ចប់ការសិក្សានៅកម្រិតបឋមសិក្សា បានឈានដល់ការប្រតិបត្តិដំណាក់កាលទី២។
លោកថា៖ «មូលនិធិនេះបានផ្ដល់ជាថវិកាចំនួន ១៣ ៨២៣ ៣៨៣ ដុល្លារ សម្រាប់រួមចំណែកក្នុងការពង្រឹងវិស័យអប់រំ កម្រិតបឋមសិក្សា ដោយផ្តោតការយកចិត្តទុកដាក់លើកុមារងាយរងគ្រោះលើការសិក្សា និងស្របតាមគោលដៅអភិវឌ្ឍន៍ប្រកបដោយចីរភាពឆ្នាំ ២០៣០ ដោយមិនទុកនរណាម្នាក់ចោលឡើយ»។
លោកបន្ថែមថា គោលបំណងនៃគម្រោងគឺបន្តជួយកុមារងាយបោះបង់ការសិក្សា ចូលរួមធានាឱ្យបាននូវការអប់រំប្រកបដោយសមធម៌គ្រប់ជ្រុងជ្រោយ ហើយចូលរួមលើកកម្ពស់ឱកាសការសិក្សារៀនសូត្រពេញ ១ ជីវិតសម្រាប់មនុស្សគ្រប់រូប។
លោក ណារ៉ុន បានអរគុណចំពោះប្រទេសកាតាដែលបានផ្តល់មូលនិធិចូលរួមចំណែកជួយកុមារកម្ពុជានៅកម្រិតបឋមសិក្សានឹងជួយកុមារងាយបោះបង់ការសិក្សាដើម្បីធានាឱ្យបាននូវការអប់រំប្រកបដោយសមធម៌គ្រប់ជ្រុងជ្រោយ ហើយលើកកម្ពស់ឱកាសការសិក្សារៀនសូត្រពេញ ១ ជីវិត សម្រាប់មនុស្សគ្រប់រូប។ កិច្ចព្រមព្រៀងអនុស្សរណៈនៃការយោគយល់នេះ ជាការឆ្លុះបញ្ចាំងពីកិច្ចសហប្រតិបត្តិការរវាងក្រសួងអប់រំ និងមូលនិធិកាតាសម្រាប់ការអភិវឌ្ឍនៃប្រទេសកាតា។
យោងតាមជំរឿនស្ថិតិ និងសូចនាករអប់រំឆ្នាំសិក្សា ២០១៨-២០១៩ របស់ក្រសួងអប់រំបង្ហាញថា សិស្សសរុបនៅកម្រិតបឋមសិក្សាមានចំនួន ២ ១៦៣ ១៤៣ នាក់ ក្នុងនោះមានសិស្សស្រី ៤៨ ភាគរយស្មើនឹង ១ ០៣៩ ៩៣៦ នាក់។ តាមទិន្នន័យដដែលសិស្សជាង ៨២ ភាគរយ បានបញ្ចប់ការសិក្សា និង ៤,៤ ភាគរយ បានបោះបង់ការសិក្សា។
ដោយឡែកដើម្បីគាំទ្រដល់យុវជនដែលបោះបង់ការសិក្សានៅថ្នាក់អនុវិទ្យាល័យក្រសួងការងារ និងបណ្តុះបណ្តាលវិជ្ជាជីវៈក្រសួងអប់រំ និងអង្គការយូណេស្កូបានប្រកាសដាក់ឱ្យដំណើរការនូវមជ្ឈមណ្ឌលសិក្សាកម្មវិធីសមមូលអប់រំមូលដ្ឋានថ្មី (BEEP) តាមបណ្ដាខេត្ដគោលដៅចំនួន ១៥។
តាមសេចក្តីប្រកាសព័ត៌មានកាលពីថ្ងៃទី ២ វិច្ឆិកា របស់ក្រសួង និងអង្គការទាំងនេះ មជ្ឈមណ្ឌលសិក្សា BEEP ចំនួន ៣៥ នឹងត្រូវបង្កើតឡើងក្នុងខេត្តចំនួន ១៥ ដើម្បីគាំទ្រដល់យុវជនក្នុងប្រទេសកម្ពុជា ឱ្យទទួលយកនូវកំណើននៃឱកាសការងារសមរម្យ និងផលិតភាពដោយធានាបានថា ពួកគេអាចឆ្លើយតបទៅនឹងតម្រូវការទីផ្សារពលកម្ម និងត្រូវបានត្រៀមខ្លួនសម្រាប់ការងារដ៏មានគុណភាព៕
