ភ្នំពេញៈ ក្រសួងសាធារណការ និងដឹកជញ្ជូន គ្រោងបំពាក់កាមេរ៉ាចាប់ល្បឿនយានយន្ត និងកាមេរ៉ាសុវត្ថិភាព នៅលើកំណាត់ផ្លូវជាតិសំខាន់ៗចំនួន ៤ និងផ្លូវមួយចំនួនផ្សេងទៀត ដើម្បីចូលរួមចំណែកកាត់បន្ថយគ្រោះថ្នាក់ចរាចរណ៍ ដែលបង្កឡើងពីការបើកបរយានយន្តលើសល្បឿនកំណត់។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន បានថ្លែងកាលពីថ្ងៃអង្គារថា ក្រសួងនឹងបំពាក់កាមេរ៉ា ចាប់ល្បឿនយានយន្ត នៅលើកំណាត់ផ្លូវជាតិលេខ ៣, ៤១, ៣១, និង ៣៣ ព្រមទាំងផ្លូវមួយចំនួនផ្សេងទៀត ដើម្បីងាយស្រួលក្នុងការត្រួតពិនិត្យ និងផាកពិន័យទៅលើម្ចាស់យានយន្តទាំងឡាយណា ដែលបើកបរលើសល្បឿនកំណត់។
លោកបានបញ្ជាក់ថា៖ «កាមេរ៉ាចាប់ល្បឿននេះ នឹងជួយកាត់បន្ថយអត្រាគ្រោះថ្នាក់ចរាចរណ៍នៅលើដងផ្លូវ ដែលបង្កឡើងពីការបើកបរលើសល្បឿនកំណត់។ មន្ត្រីយើងនឹងចុះផាកពិន័យទៅដល់ផ្ទះតែម្ដង ក្នុងករណីរកឃើញថាម្ចាស់យានយន្តណាមួយបានបើកបរលើសល្បឿនដែលបានកំណត់ដោយច្បាប់»។
ទោះជាបែបណាក្ដី លោកទេសរដ្ឋមន្ត្រីមិនបានបញ្ជាក់អំពីចំនួនទីតាំង ដែលនឹងត្រូវបំពាក់ កាមេរ៉ាចាប់ល្បឿន នៅលើកំណាត់ផ្លូវទាំងនោះទេ ខណៈបច្ចុប្បន្ន ការបង្ក្រាបចាប់បទល្មើសបើកបរយានយន្តលើសល្បឿនកំណត់ត្រូវបានគេកត់សម្គាល់ឃើញធ្វើឡើងដោយក្រុមមន្ត្រីជំនាញចុះចល័តនៅតាមដងផ្លូវមួយចំនួន។
លោក គង់ រតនៈ នាយកស្ដីទី វិទ្យាស្ថានសុវត្ថិភាពផ្លូវគោក បានប្រាប់ភ្នំពេញប៉ុស្តិ៍ ពីម្សិលមិញថា ការបំពាក់កាមេរ៉ាសុវត្ថិភាព និងកាមេរ៉ាចាប់ល្បឿនយានយន្ត គឺជាផ្នែកមួយនៃការកាត់បន្ថយបទល្មើសនិងគ្រោះថ្នាក់ចរាចរណ៍នៅលើដងផ្លូវ ប៉ុន្តែការពង្រឹងការអនុវត្តច្បាប់ គឺជាកត្តាសំខាន់ ក្នុងការធ្វើឲ្យប្រសើរឡើងនូវសុវត្ថិភាព សន្តិសុខ និងរបៀបរៀបរយសាធារណៈ។
លោក រតនៈ បានថ្លែងថា៖ «បើតាមទិន្នន័យដែលវិទ្យាស្ថានយើងខ្ញុំប្រមូលបាន កាមេរ៉ាសុវត្ថិភាព ត្រូវបានបំពាក់តាមបង្គោលភ្លើងស្តុបនានានៅតាមដងផ្លូវ និងទីមណ្ឌលសំខាន់ៗមួយចំនួន សរុបជាង ១ ០០០ គ្រឿង។ ប៉ុន្តែ បទល្មើសចរាចរណ៍ដូចជា មិនគោរពភ្លើងសញ្ញា ស្លាកសញ្ញា និងគំនូសសញ្ញាចរាចរណ៍នៅតែកើតមាន ហើយការផាកពិន័យនៅតែមិនទាន់មានប្រសិទ្ធភាព»។
លោកបន្តថា៖ «អ្វីដែលសំខាន់គឺយើងត្រូវគោរពច្បាប់និងពង្រឹងការអនុវត្តច្បាប់ឲ្យបានល្អទាំងអស់គ្នា ដោយត្រូវផ្លាស់ប្ដូរឥរិយាបថអាក្រក់ៗចោល និងត្រូវធ្វើការកែលម្អទាំងអស់គ្នា»។
គ្រោះថ្នាក់ចរាចរណ៍ជាទូទៅត្រូវបានគេកត់សម្គាល់ថា ភាគច្រើនបង្កឡើងដោយកត្តាមនុស្ស គឺអ្នកបើកបរនិងអ្នកប្រើប្រាស់ផ្លូវសាធារណៈផ្សេងទៀតមិនគោរពច្បាប់ (ស្លាកសញ្ញា ភ្លើងសញ្ញា និង គំនូសសញ្ញា) ចរាចរណ៍ ខណៈគ្រោះថ្នាក់ដែលបង្កឡើងពីកត្តាយានយន្តខុសលក្ខណៈបច្ចេកទេស ដូចជាសម្បកកង់រថយន្ត ឬម៉ូតូមានការសឹករេចរឹលខូចគុណភាព ហ្រ្វាំងមិនស៊ី និងខូចប្រព័ន្ធបញ្ជាគ្រឿងម៉ាស៊ីន និងការកែច្នៃយានយន្តខុសលក្ខណៈបច្ចេកទេស ក៏មានចំនួនច្រើនផងដែរ។ ដោយឡែកគ្រោះថ្នាក់ដែលបង្កឡើងពីកត្តាផ្លូវមានតិចតួច។
ករណីនេះ លោក ស៊ុន ចាន់ថុល ថ្លែងថា៖ «គ្រោះថា្នក់ចរាចរណ៍បានសម្លាប់ប្រជាពលរដ្ឋខ្មែរប្រមាណ ៦ នាក់ ក្នុងមួយថ្ងៃ និងបានបំផ្លាញទ្រព្យសម្បត្តិជាង ៤០០ លានដុល្លារ ក្នុងមួយឆ្នាំ។ ដូច្នេះសូមបងប្អូនគោរពច្បាប់ចរាចរណ៍ និងត្រូវធ្វើការត្រួតពិនិត្យយានយន្តរបស់យើងឲ្យបានសមស្របតាមបទដ្ឋានបច្ចេកទេសជាប្រចាំ »។
បើតាមលោក ចាន់ថុល ក្រុមហ៊ុន Michelin ROH Co., Ltd និង Wold Bridge International (Cambodia) Ltd បានចូលរួមគាំទ្រយុទ្ធនាការសុវត្ថិភាពចរាចរណ៍ផ្លូវគោកជាតិកម្ពុជា តាមរយៈគម្រោង «សុវត្ថិភាពចរាចរណ៍ផ្លូវគោករបស់ក្រុមហ៊ុន Michelin» ដែលគម្រោងនេះមានរយៈពេល ២ ឆ្នាំ (២០១៩-២០២១) និងត្រូវបានចុះកិច្ចព្រមព្រៀងលើអនុស្សរណៈយោគយល់រវាងក្រុមហ៊ុនទាំង ២ និងក្រសួងសាធារណការ និងដឹកជញ្ជូន កាលពីថ្ងៃអង្គារ។
គម្រោងនេះគឺជាផ្នែកមួយនៃការចូលរួមលើកកម្ពស់សុវត្ថិភាពចរាចរណ៍ផ្លូវគោក និងកាត់បន្ថយគ្រោះថ្នាក់ចរាចរណ៍នៅលើដងផ្លូវ ក្នុងព្រះរាជាណាចក្រកម្ពុជា ខណៈក្រុមជំនាញ ចុះត្រួតពិនិត្យ ស្ថានភាពផ្លូវមួយចំនួន ដើម្បីជួសជុលនិងកែលម្អ។
លោកបានសម្ដែងក្ដីសង្ឃឹមយ៉ាងមុតមាំថា គម្រោងនេះនឹងជួយជំរុញឲ្យយុទ្ធនាការសុវត្ថិភាពចរាចរណ៍ផ្លូវគោកជាតិកម្ពុជា ទទួលបានជោគជ័យខ្ពស់៕