.jpg)
កិច្ចប្រជុំរបស់ក្រសួងការងារតំណាងនិយោជក និងកម្មករថ្ងៃទី ៣ កញ្ញា។ រូប ហ៊ាន រង្សី
ភ្នំពេញៈ ក្រសួងការងារអះអាងថា ការចរចាកំណត់ប្រាក់ឈ្នួលអប្បបរមាសម្រាប់ឆ្នាំ ២០២០ កំពុងស្ថិតក្នុងបរិយាកាសល្អ ខណៈភាគីទាំង ២ កំពុងបង្ខិតតួលេខរកគ្នាដែលម្ខាងដាក់តួលេខ ១៩៧ ដុល្លារ និងម្ខាងដាក់តួលេខ ១៨៤,៥ ដុល្លារ ស្របពេលអង្គការពលកម្មអន្តរជាតិ ILO ថា បើគណនាផ្នែកបច្ចេកទេសប្រាក់ឈ្នួលអប្បបរមានេះអាចឡើងចន្លោះពី ៤ ទៅជិត ៥ ភាគរយ នៃប្រាក់ឈ្នួលឆ្នាំមុន។
ក្រោយបញ្ចប់កិច្ចពិភាក្សាលើកទី ៤ របស់ក្រុមប្រឹក្សាជាតិប្រាក់ឈ្នួលអប្បបរមាកាលពីចុងសប្តាហ៍មុន ក្រសួងការងារ និងបណ្តុះបណ្តាលវិជ្ជាជីវៈ លើកឡើងក្នុងសេចក្តីប្រកាសព័ត៌មានថា ភាគីនីមួយៗបានបន្តប្រជុំពិភាក្សាយ៉ាងផុសផុល និងបានបង្ហាញនូវគោលជំហររបស់ខ្លួន។ ក្នុងនោះភាគីកម្មករនិយោជិតបានបន្ថយពីតួលេខ ១៩៩ ដុល្លារមកត្រឹម ១៩៧ ដុល្លារ ខណៈភាគីនិយោជកបានដំឡើងតួលេខពី ១៨៤ ដុល្លារទៅ ១៨៤,៥ ដុល្លារ។
លោក ហេង សួរ អ្នកនាំពាក្យក្រសួងការងារប្រាប់ពីម្សិលមិញថា ការប្រជុំនៅថ្ងៃពុធខាងមុខនេះនឹងធ្វើឲ្យភាគីទាំង ២ កាន់តែខិតទៅជិតគ្នា។ ព្រោះថាការគណនាគឺយោងទៅតាមលក្ខណៈវិនិច្ឆ័យទាំង ៧ ដូច្នេះបានជាភាគីទាំង ២ ត្រូវបន្តចរចាគ្នាថែមទៀត។
លោកថា៖ «បរិយាកាសចរចាគឺមានភាពចាស់ទុំ និងយោគយល់គ្នាច្រើន។ អរគុណអង្គការ ILO ដែលជួយបំប៉នសមត្ថភាពភាគីពាក់ព័ន្ធ ជាពិសេសភាគីសហជីពឲ្យយល់ពីគោលការណ៍សេដ្ឋកិច្ច និងលក្ខណវិនិច្ឆ័យនៃការកំណត់ប្រាក់ឈ្នួល»។
លោក ណាង សុធី អនុប្រធានក្រុមប្រឹក្សាជាតិប្រាក់ឈ្នួលអប្បបរមាតំណាងអង្គការវិជ្ជាជីវៈរបស់និយោជកថ្លែងថា៖ «ការឡើង ១ ដុល្លារ ឬឡើង ៥ កាក់នេះមិនមែនជារឿងមួយងាយស្រួលទេ ព្រោះការងារកាត់ដេរជារឿងមួយគិត ជាកាក់ ជាសេន។ អ៊ីចឹងហើយបានជំហរនិយោជកយើងតែងតែប្រកាន់ជំហរមួយហ្មត់ចត់ក្នុងការពិភាក្សា។ ចុងបញ្ចប់បើគ្មានការឯកភាពគ្នាទេ យើងនឹងឈរលើការបោះឆ្នោតតាមបែបប្រជាធិបតេយ្យមួយ»។
លោក សោម អូន អនុប្រធានក្រុមប្រឹក្សាជាតិប្រាក់ឈ្នួលអប្បបរមាតំណាងអង្គការវិជ្ជាជីវៈរបស់កម្មករនិយោជិតថ្លែងថា៖ «អ្វីៗទាំងអស់យើងបានគិតអស់ហើយការប្រៀបធៀបជាមួយប្រទេសក្នុងតំបន់ និងបញ្ហាផ្សេងៗ។ ប៉ុន្តែអ្វីដែលសំខាន់គឺយើងត្រូវធ្វើយ៉ាងម៉េចឲ្យបងប្អូនកម្មករយើងហ្នឹងមានជីវភាពប្រសើរថែមទៀតដែរ។ បើសិនជាកម្មករយើងមានប្រាក់ខែគួរសមទៅ គាត់ក៏មានទឹកចិត្តធ្វើការល្អដែរដែលអាចពាក់ព័ន្ធនឹងការផលិត និងបញ្ហាផ្សេងៗ។ ម្យ៉ាងទៀតបើមានប្រាក់ខែស្មើនឹងប្រទេសដទៃ ក៏នឹងធ្វើឲ្យកម្មកររបស់យើង លែងធ្វើចំណាកស្រុកដែរ»។
លោកបន្ថែមថា៖ «យ៉ាងណា យើងនឹងទាមទារឲ្យមានការដំឡើងនេះឲ្យអស់ពីលទ្ធភាពក្នុងការទប់ស្កាត់កុំឲ្យកម្មករយើងបន្តធ្វើចំណាកស្រុក»។
ប្រាក់ឈ្នួលអប្បបរមាកម្មករឆ្នាំនេះ ១៨២ ដុល្លារក្នុង ១ ខែ។ តាមអង្គការ ILO ប្រទេសប្រកួតប្រជែងដ៏សំខាន់របស់ប្រទេសកម្ពុជាខាងការផលិតស្បែកជើងនៅអាស៊ីអាគ្នេយ៍គឺមានប្រទេសវៀតណាម និងឥណ្ឌូនេស៊ី។ នៅវៀតណាមពី ១៨០ និង ១៧១ ដុល្លារនៅតាមតំបន់។ ប្រទេសឥណ្ឌូនេស៊ីមានចំនួនពី ១៩៣ ដុល្លារ និង ២៧១ ដុល្លារ។
លោក ទុន សុភ័ណ អ្នកសម្របសម្រួលនៃអង្គការ ILO ប្រចាំកម្ពុជា និយាយថាការកំណត់ពីតួលេខរបស់ភាគីទាំង ២ គឺសំអាងទៅលើហេតុផលរៀងៗខ្លួន។ ប៉ុន្តែបើយោងតាមការគណនាផ្នែកបច្ចេកទេសដែលអង្គការ ILO បានចូលរួមកន្លងមក ប្រាក់ឈ្នួលអប្បបរមាឆ្នាំខាងមុខនេះអាចឡើងចន្លោះពី ៤ ទៅ ជិត ៥ ភាគរយនៃប្រាក់ឈ្នួលឆ្នាំមុន។
លោកថា៖ «យើងនៅតែប្រើរូបមន្តដដែលតើតាំងពីឆ្នាំ ២០១៤ ដែលភាគីទាំងអស់ហ្នឹងសុទ្ធតែបានយល់ដឹងអស់ហើយសម្រាប់រូបមន្តនេះ។ អ៊ីចឹងវានៅលើថាគាត់ចង់ប្រើតួលេខហ្នឹងប៉ុន្មាន? អាហ្នឹងនៅលើភាគីនិយោជក និងកម្មករនិយោជិតយើងដែលចង់ដាក់ឡើងប៉ុន្មានភាគរយ»៕
