.jpg)
កម្មករមកពីរោងចក្រ W&D តវ៉ានៅមុខភូមិគ្រឹះលោក ហ៊ុន សែន កាលពីថ្ងៃចន្ទ។ ហេង ជីវ័ន
ភ្នំពេញៈ ជំនួបជាថ្មីរវាងតំណាងភាគីកម្មករ និងតំណាងភាគីក្រុមហ៊ុនរោងចក្រ W&D Cambodia Co; Ltd ក្រោមកិច្ចសម្របសម្រួលពីក្រសួងការងារ កាលពីរសៀលថ្ងៃអង្គារ ពុំទទួលបានដំណោះស្រាយអ្វីឡើយ ដោយសារតែភាគីទាំងសងខាងនៅតែប្រកាន់ជំហររឹង ត្អឹងរៀងៗខ្លួន ខណៈដែលការតវ៉ារបស់កម្មកររាប់រយនាក់ បានអូសបន្លាយអស់រយៈពេលជិត ៣ ខែមកហើយ។
ការជួបចរចាជាថ្មីទៀតនេះ ធ្វើឡើង ១ ថ្ងៃ បន្ទាប់ពីកម្មករប្រមាណ ២០០ នាក់ បានទៅប្រមូលផ្តុំគ្នាតវ៉ា នៅខាងមុខភូមិគ្រឹះលោកនាយករដ្ឋមន្ត្រី ក្បែរវិមានឯករាជ្យ ដើម្បីសុំឲ្យលោក ហ៊ុន សែន ជួយអន្តរាគមន៍ ដោះស្រាយវិវាទដែលបានអូសបន្លាយចាប់តាំងពីចុងខែធ្នូឆ្នាំមុនមកនេះ។
លោក ហែម ហឿន អគ្គលេខាធិការរងគណៈកម្មការដោះស្រាយបញ្ហាកូដកម្ម បាតុកម្ម លើគ្រប់មុខសញ្ញានៃក្រសួងការងារនិងបណ្ដុះបណ្ដាលវិជ្ជាជីវៈដែលជាអ្នកសម្របសម្រួលនៅក្នុងកិច្ចពិភាក្សារកដំណោះស្រាយនោះ បានប្រាប់ភ្នំពេញប៉ុស្តិ៍ថា ភាគីកម្មករ នៅតែបន្តការទាមទារឲ្យភាគី រោងចក្រទទួលយកពួកគេទាំងអស់គ្នាចូលបម្រើការងារវិញដោយគ្មានលក្ខខណ្ឌ។
ប៉ុន្តែភាគីក្រុមហ៊ុនបានព្យាយាមទាញហេតុផលផ្លូវច្បាប់ មកសំអាង ដោយបន្តចោទប្រកាន់ទៅលើកម្មករថា មិនបានគោរពតាមសេចក្ដីបង្គាប់បញ្ជារបស់ក្រុមប្រឹក្សាអាជ្ញាកណ្ដាល និងដីការក្សាការពារ របស់សាលាដំបូងរាជធានីភ្នំពេញ។ មិនតែប៉ុណ្ណោះ ក្រុមហ៊ុនបានអះអាងថា នឹងបន្តអនុវត្តតាមគ្រប់នីតិវិធីតុលាការ។
លោក ហឿន បានបញ្ជាក់ថា៖ «ដោយសារភាពរឹងត្អឹងខ្លាំងពេករបស់ភាគីទាំង ២ ធ្វើឲ្យជំនួបពិភាក្សារកដំណោះស្រាយនេះបញ្ចប់ទៅដោយគ្មានលទ្ធផលអ្វីទាំងអស់។ យើងពិតជាមានការសោកស្ដាយខ្លាំងណាស់។ ទោះជាបែបណា យើងនៅតែបន្តជួយសម្របសម្រួល តាមដែលអាចធ្វើទៅបានដើម្បីបញ្ចប់បញ្ហាវិវាទរវាងភាគីកម្មករ និងរោងចក្រនេះ»។
កញ្ញា សាំង ចាន់រី តំណាងភាគីកម្មករ បានប្រាប់ភ្នំពេញប៉ុស្តិ៍ ក្រោយជំនួបពិភាក្សាដំណោះស្រាយជាមួយតំណាងភាគីក្រុមហ៊ុននោះថា ភាគីរោងចក្រ បានបដិសេធទទួលយកពួកនាងជាតំណាង ដែលកំពុងជាប់បណ្ដឹងក្នុងតុលាការ ឲ្យចូលធ្វើការវិញ។
កញ្ញាចាន់រី បញ្ជាក់ថា៖ «ក្រុមហ៊ុនចោទប្រកាន់ពួកយើងខ្ញុំថា ជាអ្នកញុះញង់កម្មករ ឲ្យធ្វើកូដកម្ម ខណៈពួកយើងខ្ញុំមិនបានធ្វើសោះ។ យើងទាំងអស់គ្នាជាកម្មករ គ្មាននរណាម្នាក់ជាតំណាងនោះទេ ការតវ៉ាទាមទាររបស់យើងកន្លងមកគឺ ចង់ឲ្យក្រុមហ៊ុនទូទាត់ប្រាក់បំណាច់អតីតភាពការងារ ប៉ុន្តែក្រោយពីស្ដាប់ការពន្យល់របស់មន្ត្រីជំនាញរបស់ក្រសួងការងារ និងក្រុមប្រឹក្សាអាជ្ញាកណ្ដាល មកពួកយើងខ្ញុំ មិនចង់ទាមទារវាទៀតនោះទេ គឺពួកខ្ញុំសុំឲ្យតែខាងក្រុមហ៊ុន ទទួលយកពួកយើងចូលធ្វើការវិញដោយគ្មានលក្ខខណ្ឌនិងគ្មានភាពរើសអើងប៉ុណ្ណោះ»។
បើតាម កញ្ញា ចាន់រី នៅពេលនេះ ក្រុមកម្មករប្រមាណជាង ១០០ នាក់ ក្នុងចំណោម ១ ១០៤ នាក់ ដែលត្រូវបានក្រុមហ៊ុនរោងចក្របញ្ឈប់ពីការងារ កាលពីថ្ងៃទី ៤ ខែ មីនា ឆ្នាំ ២០១៩ នោះ កំពុងបន្តការតវ៉ា នៅមុខរោងចក្រ ដើម្បីទាមទារឲ្យភាគីរោងចក្រទទួលយកពួកគេចូលធ្វើការវិញ។
ជុំវិញករណីនេះ លោក តាំងម៉េង មេធាវីការពារក្រុមហ៊ុនរោងចក្រ W&D Cambodia Co; Ltd បានប្រាប់ភ្នំពេញប៉ុស្តិ៍ថា ក្រុមហ៊ុនបានប្រឹងប្រែងព្យាយាម ពន្យល់បកស្រាយដល់កម្មករ ដែលកំពុងធ្វើការតវ៉ាទាំងនោះជាច្រើនលើកមកហើយថា សូមកុំតវ៉ាទាមទារអ្វីដែលប្រាសចាកពីផ្លូវច្បាប់។
លោកបញ្ជាក់ថា៖ «យើងបានរំឭក និងពន្យល់ដល់ពួកគាត់ ឲ្យធ្វើអ្វីទៅតាមច្បាប់ ការទាមទារទាំងឡាយណា ដែលផ្ទុយនឹងច្បាប់ គឺវាមិនបានផលអ្វីនោះទេ ព្រោះក្រុមហ៊ុនយើង គោរព និងអនុវត្ត តាមគោលការណ៍ណែនាំ និងនីតិវិធីច្បាប់ទាំងអស់នៅកម្ពុជា»។
គួរបញ្ជាក់ថា បញ្ហាវិវាទរវាងភាគីកម្មករ និង ភាគីក្រុមហ៊ុនរោងចក្រ W&D Cambodia Co; Ltd បានកើតឡើងកាលពីថ្ងៃទី ២៤ ខែ ធ្នូ ឆ្នាំ ២០១៨ បន្ទាប់ពីភាគីកម្មករ បាននាំគ្នាធ្វើកូដកម្ម តវ៉ាទាមទារឲ្យភាគីក្រុមហ៊ុនរោងចក្រធ្វើការទូទាត់ប្រាក់បំណាច់អតីតភាពការងារ និងប្រាក់អត្ថប្រយោជន៍ផ្សេងៗ ជាកញ្ចប់ ប៉ុន្តែ ភាគីរោងចក្របានបដិសេធ ដោយអះអាងថា ការទាមទារនោះ ផ្ទុយពីខ្លឹមសារណែនាំនៃប្រកាស ៤៤៣ ចុះថ្ងៃទី ២១ ខែ កញ្ញា ឆ្នាំ ២០១៨ ស្ដីពីការទូទាត់ប្រាក់បំណាច់អតីតភាពការងារដែលចេញដោយក្រសួងការងារ និងបណ្ដុះបណ្ដាលវិជ្ជាជីវៈ ដែលតម្រូវឲ្យ ភាគីក្រុមហ៊ុនធ្វើការទូទាត់ប្រាក់រំឭកអតីតភាព ក្នុង ១ ឆ្នាំ ២ ដង គឺក្នុងខែមិថុនា និងខែធ្នូ នៃឆ្នាំនីមួយៗ៕
