ភ្នំពេញៈ គិតត្រឹមឆ្នាំ ២០១៩ បេឡាជាតិរបបសន្តិសុខសង្គម (បសស) បានចុះបញ្ជីសហគ្រាសជាង ១ ម៉ឺនស្ថាប័ន ដែលទាក់ទងនឹងការថែទាំសុខភាពដែលមានសមាជិកជាង ១ លាន ៧ សែននាក់ បានប្រើប្រាស់របបសន្តិសុខសង្គមផ្នែកហានិភ័យការងារ និងផ្នែកថែទាំសុខភាព ប៉ុន្តែលោក អ៊ិត សំហេង រដ្ឋមន្ត្រីក្រសួងការងារកំពុងជំរុញបន្ថែមទៀតនូវរបបសន្តិសុខសង្គមផ្នែកសោធនឲ្យទទួលបានជោគជ័យនៅក្នុងឆ្នាំ ២០២០ នេះ។
លោក អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជានាយកបេឡាជាតិរបបសន្តិសុខសង្គមបានថ្លែងនៅក្នុងសន្និបាតបូកសរុបលទ្ធផលការងារឆ្នាំ ២០១៩ និងទិសដៅការងារឆ្នាំ ២០២០ របស់ (បសស) នៅសណ្ឋាគារតារាអ៊ែរផតរាជធានី-ភ្នំពេញកាលពីម្សិលមិញថានៅក្នុងឆ្នាំ ២០១៩ កន្លងមកនេះ (បសស) បានចុះបញ្ជី ២ ១៦៣ សហគ្រាស ដោយមានសមាជិកចំនួន ៨០ ៧៨៥ នាក់ ទាំងផ្នែកហានិភ័យការងារ និងផ្នែកថែទាំសុខភាព។
លោកបន្តថា ប៉ុន្តែបើគិតពីឆ្នាំ ២០០៨ ដល់ឆ្នាំ ២០១៩ សហគ្រាសដែលបានចុះបញ្ជីក្នុងផ្នែកថែទាំសុខភាពមានចំនួន ១១០៧៨ ដែលមានសមាជិកចំនួនជាង ១ លាន ៧ សែននាក់ ។
លោក អ៊ុក សមវិទ្យា បានអះអាងថា៖ «ដើម្បីពង្រីងការងារខាងលើឲ្យមានប្រសិទ្ធភាពខ្ពស់ (បសស) បានផ្តោតជាសំខាន់ផងដែរទៅលើការរៀបចំគោលនយោបាយ និងលិខិតបទដ្ឋានគតិយុត្តតាមរយៈក្រុមប្រឹក្សាភិបាលនៃ (បសស) ដែលបានប្រជុំពិនិត្យពិភាក្សា និងអនុម័ត និងការចងក្រងបណ្តុះបណ្តាលធនធានមនុស្ស ការអភិវឌ្ឍប្រព័ន្ធព័ត៌មានវិទ្យាយ៉ាងខ្ជាប់ខ្ជួន»។
បើតាមលោក អ៊ុក សមវិទ្យា (បសស) បានចុះកិច្ចព្រមព្រៀងជាមួយមូលដ្ឋានសុខាភិបាលផ្នែកថែទាំសុខភាពចំនួន ១៣ ៣៩៣ និងផ្នែកហានិភ័យការងារចំនួន ២៣៣ មូលដ្ឋានដើម្បីធ្វើការផ្តល់សេវាជូនដល់សមាជិករបស់ (បសស) ដែលភាគច្រើនជាកម្មករ កម្មការិនីនៅតាមរោងចក្រទូទាំងប្រទេស។
លោកអ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈបានថ្លែងក្នុងឱកាសនោះថា របបសន្តិសុខសង្គមដែលអនុវត្តតាមប្រព័ន្ធគ្រប់គ្រងធានារ៉ាប់រងសង្គមនៅកម្ពុជា បើប្រៀបធៀបនៅបណ្តាប្រទេសអាស៊ានគឺនៅតែមានកម្រិតទាបជាងបណ្តាប្រទេសផ្សេងៗនៅក្នុងតំបន់។ លោកបន្តថា កត្តានេះក៏ជាឱកាសមួយអាចទាក់ទាញការវិនិយោគសម្រាប់កម្ពុជាដែរ។
ទោះជាយ៉ាងណា លោក អ៊ិត សំហេង នៅតែចង់ឃើញវិស័យគ្រប់គ្រងធានារ៉ាប់រងសង្គមនៅកម្ពុជាមានភាពរីកចម្រើនបន្ថែមទៀត ជាពិសេសក្នុងឆ្នាំ ២០២០ នេះគឺធ្វើយ៉ាងណាដំណើរការនូវរបបសន្តិសុខសង្គមផ្នែកសោធនដែលទើបតែប្រកាសឲ្យប្រើក្នុងពេលថ្មីៗនេះសម្រាប់ប្រជាពលរដ្ឋខ្មែរ ។
លោកបញ្ជាក់ថា៖ «ជំរុញការដាក់ឱ្យដំណើរការផ្នែកប្រាក់សោធនដោយត្រូវដាក់ឱ្យដំណើរការរបបប្រាក់សោធនក្នុងឆ្នាំ ២០២០ នេះ។ ជំរុញដល់និយោជក ម្ចាស់សហគ្រាស ធ្វើការចុះបញ្ជិកា និងបង់ភាគទានផ្តល់នូវតាវកាលិកជូនដល់សមាជិកឱ្យទាន់ពេលវេលា និងប្រកបដោយប្រសិទ្ធភាពខ្ពស់ ធ្វើការផ្សព្វផ្សាយគោលការណ៍អនុវត្តថ្មីៗដល់និយោជក និងកម្មករនិយោជិតឱ្យបានទូលំទូលាយ និងគ្រប់រូបភាព»។
យោងតាមច្បាប់ស្តីពីរបបសន្តិសុខសង្គមដែលបានប្រកាសឱ្យប្រើកាលពីខែវិច្ឆិកា ឆ្នាំ ២០១៩ (បសស) ត្រូវគ្របដណ្តប់ ៤ ផ្នែករួមមាន ផ្នែកប្រាក់សោធន ផ្នែកថែទាំសុខភាព ផ្នែកហានិភ័យការងារ និងផ្នែកនិកម្មភាពការងារ សម្រាប់បុគ្គលស្ថិតក្នុងវិស័យសាធារណៈ និងបុគ្គលដែលស្ថិតក្រោមច្បាប់ស្តីពីការងាររួមទាំងបុគ្គលិកផ្លូវអាកាសនាវាសមុទ្រ និងអ្នកបម្រើក្នុងផ្ទះ ព្រមទាំងបុគ្គលស្វ័យនិយោជន៍។
លោកស្រី យ៉ាង សុភ័ណ្ឌ ប្រធានសហភាពសហជីពកម្ពុជាបានលើកឡើងថា (បសស) ពិតជាបានដើរតួនាទីសំខាន់ក្នុងការជួយដល់កម្មករ កម្មការិនី។ ប៉ុន្តែលោកស្រីនៅតែចង់ឃើញ (បសស) អនុវត្តសកម្មភាពមួយចំនួនបន្ថែមទៀត ដែលទាក់ទងនឹងការលំបាករបស់កម្មករ-កម្មការិនី។
លោកស្រីបញ្ជាក់ថា៖ «តាមពិតផ្អែកទៅលើការងារ (បសស) យើងឃើញថា គាត់បានធ្វើការងាររបស់គាត់មួយចំនួនជូនកម្មករ កម្មការិនីរបស់យើងមានភាពល្អប្រសើរដែរ។ ប៉ុន្តែកន្លែងខ្លះនៅមានបញ្ហាដែលកម្មករបានជួបប្រទះ ជាពិសេសនោះគឺបញ្ហាទទួលសេវានៅតាមមន្ទីរពេទ្យដែលគាត់នៅមានកម្រិតនៅឡើយដែលយើងចង់ឲ្យមានការកែប្រែឲ្យប្រសើរជាងនេះ»។
យោងតាមរបាយការណ៍ (បសស) ឆ្នាំ ២០១៩ របបសន្តិសុខសង្គមផ្នែកហានិភ័យការងារទទួលបានភាគទានចំនួន ១២៥,៩៧ ប៊ីលានរៀល។ ចំណែកផ្នែកថែទាំសុខភាពទទួលបានភាគទានចំនួនប្រមាណ ៤០៧,៤៨ ប៊ីលានរៀល៕
វីដេអូ៖