The Phnom Penh Post Search

Search form

Logo of Phnom Penh Post newspaper Phnom Penh Post - ការជួយ​​ពលករ​ខ្មែរ​ពី​ម៉ាឡេស៊ី​ មក​កម្ពុជា​វិញ​ កើន​ជាង ៣ ដង​នៅ​ឆ្នាំ​នេះ

ការជួយ​​ពលករ​ខ្មែរ​ពី​ម៉ាឡេស៊ី​ មក​កម្ពុជា​វិញ​ កើន​ជាង ៣ ដង​នៅ​ឆ្នាំ​នេះ

Content image - Phnom Penh Post
ពលករ​ខ្មែរ​ដែល​ត្រូវ​បាន​ជួយ​សង្គ្រោះ​នៅ​ប្រទេស​ម៉ាឡេស៊ី នៅ​ពេល​ត្រប់​មក​កម្ពុជា​វិញ​កាល​ពី​ឆ្នាំ ២០១៦។

ការជួយ​​ពលករ​ខ្មែរ​ពី​ម៉ាឡេស៊ី​ មក​កម្ពុជា​វិញ​ កើន​ជាង ៣ ដង​នៅ​ឆ្នាំ​នេះ

ភ្នំពេញ៖ ចំនួន​កម្មករ-កម្មការីនី និង​ពលការីនីបម្រើការ​តាម​ផ្ទះ​ដែល​ត្រូវ​បាន​ជួ​យ​សង្គ្រោះ​ពីប្រទេស ​ម៉ាឡេស៊ី​ បាន​កើន​ឡើង​​ជាង​បី​ដង​នៅ​ឆ្នាំ​នេះ ​បន្ទាប់​ពី​រដ្ឋាភិបាល​បាន​ដក​ចេញ​នូវ​ការ​ហាមឃាត់​ការ​បញ្ជូន​ពលករ​កម្ពុជា​ទៅ​ធ្វើ​ការ​នៅ​ទីនោះ។

នៅ​ក្នុងឯកសារ​មួយ​​​ទទួល​កាល​ពី​​សប្តាហ៍​មុន ក្រសួង​ការបរទេស​កម្ពុជា​បាន​រាយការណ៍ ស្ថានទូត​ខ្មែរ​នៅ​ប្រទេស​ម៉ាឡេស៊ី​បាន​ធ្វើ​អន្តរាគមន៍​ ដើម្បី​ជួយ​ប្រជាពលរដ្ឋ​កម្ពុជា​ចំនួន ១៩៨ នាក់ ឲ្យ​បាន​មក​ប្រទេស​កម្ពុជា​វិញ នៅ​ឆ្នាំ ២០១៦ នេះ ខណៈ​ឆ្នាំ​​មុន​មាន​ត្រឹម ៥៥ នាក់ និង​ឆ្នាំ ២០១៤ តែ ៣៤ នាក់​តែ​ប៉ុណ្ណោះ។

កាល​ពី​ខែ​ធ្នូ​ឆ្នាំ​មុន រដ្ឋាភិបាល និង​ប្រទេស​ម៉ាឡេស៊ី បាន​ចុះ​អនុស្សារណៈ​នៃ​ការ​យោគយល់​គ្នា​មួយ ដើម្បី​ដក​ចេញ​នូវការ​ហាម​ឃាត់​ការ​បញ្ជូន​ពលករ​ទៅ​បម្រើ​ការ​តាម​ផ្ទះទៅ​ប្រទេស​ម៉ាឡេស៊ី ដែល​​បាន​បង្កើត​ឡើង​កាល​ពី​​​ឆ្នាំ ២០១១ ជា​ការ​ឆ្លើយ​តប​នឹង​របាយការណ៍​មួយ​ចំនួន​ពី​ការ​រំលោភ​បំពាន ដែល​រួម​មាន​ការ​ឈាន​ទៅ​ដល់​ការ​បាត់​បង់​ជីវិត​ផង​ដែរ។

លោក ជុំ សុន្ទរី អ្នក​នាំពាក្យ​​​ក្រសួង​ការ​បរទេស បាន​ឲ្យ​ដឹង​ថា ភាគច្រើន​នៃ​អ្នក​ដែល​បាន​ជួយ​សង្រ្គោះ​ឲ្យ​ត្រលប់​មក​ប្រទេស​វិញ​ ​នៅ​ឆ្នាំ​នេះ ​គឺ​ជា​ពលការីនី​បម្រើ​ការ​នៅ​តាម​ផ្ទះ ដែល​បាន​ទៅ​ស្វែង​រក​ជំនួយ​ពី​ស្ថានទូត ដោយ​សារ​តែ​ពួក​គេ​​បាន​ជួប​«បញ្ហា​​លំបាក​ក្នុង​ការងារ​របស់​ពួក​គេ»។

លោក​និយាយ​ថា៖ «ពួកគាត់​និយាយថា ការងារ​ពិបាក​ណាស់ ព្រោះ​តែ​លក្ខខណ្ឌ​ការងារ​យ៉ាប​ពេក»។

មន្រ្តី​នាំពាក្យ​ក្រសួងការងារ លោក​ ហេង សួរ មិន​បាន​​ឆ្លើយ​តប​នឹង​សំណើរសុំ​ការ​អត្ថាធិប្បាយ​ពី​ ភ្នំពេញ ​ប៉ុស្តិ៍​ឡើយ ក៏ប៉ុន្តែ​កាល​ពី​ខែ​មិថុនា លោក​បាន​ថ្លែង​ការពារ​អនុស្សារណៈ​នេះ ដោយ​បាន​អះអាងថា នឹង​ធ្វើ​ឲ្យ​ការ​ផ្តល់​ជំនួយ​ទៅ​ឲ្យក្រុម​ពលការីនី​​រងការ​រំលោភ​បំពាន និង​ផ្តល់ធនធាន​ផ្នែក​ច្បាប់​ដល់​ពួក​គាត់។

នៅ​ខែ​មិថុនា​នោះ​ដែល លោក​នាយក​រដ្ឋមន្រ្តី​ ហ៊ុន សែន បាន​ជំរុញ​ឲ្យ​រដ្ឋមន្រ្តី​ម៉ាឡេស៊ី លោក Najib Razak ឲ្យ​ទទួល​ពលករ​​បន្ថែម​ទៀត​ពី​ប្រទេស​កម្ពុជា។

សម្រាប់​លោក មឿន តុលា នាយក​ប្រតិបត្តិ​មជ្ឈមណ្ឌល​សម្ព័ន្ធភាព​ការងារ និង​សិទ្ធិ​មនុស្ស​ហៅ​កាត់​ថា​ សង់ត្រាល់ ការ​កើន​ឡើង​ខ្លាំងនៃ​ចំនួន ​ពលករ-ពលការីនី​ដែល​ត្រូវ​បាន​សង្គ្រោះ​ពី​ប្រទេស​ម៉ាឡេស៊ីនៅ​ឆ្នាំ​នេះ គឺ​ជា​សញ្ញា​មួយ​ដ៏​ច្បាស់ ដែល​បង្ហាញ​ថា ការ​ហាមឃាត់​នេះ​មិន​គួរ​ត្រូវ​បាន​ដក​ចេញ​នោះ​ឡើយ។

លោក​ថា៖ «ការ​ដែល​ពលការី​នី​ដែលត្រូវ​បាន​សង្គ្រោះ​ពី​ប្រទេស​ម៉ាឡេស៊ី​មាន​ចំនួន​កើន​ឡើង​នេះ កំពុង​តែ​បង្ហាញ​ថា បញ្ហា​រំលោភ​បំពានលើ​ពលការីនី​បម្រើការ​តាម​ផ្ទះ​នៅ​តែកើត​មាន​ឡើង»។

លោក​បាន​ជំរុញ​រដ្ឋាភិបាល​មិន​ត្រឹម​តែ​ឲ្យ​ដោះស្រាយ​បញ្ហា​ជួយ​សង្គ្រោះជន​រងគ្រោះ​ប៉ុណ្ណោះទេ គឺ​ថែម​ទាំង​ត្រូវ​ការ​ពារ​ការ​រំលោភ​បំពាន​នេះ​មិន​ឲ្យ​កើត​ឡើង​ពី​ដើម​ទៅ។

លោក មឿន តុលា ថ្លែងថា ពលការីនី​បម្រើ​ការ​តាម​ផ្ទះ ដែល​លោក​ធ្លាប់​​បាន​និយាយ​ជាមួយ​ បាន​រាយការណ៍​ពី​ការ​រំលោភ​បំពានជា​ច្រើនរួម​មាន​ការ​បង្ខំ​ឲ្យ​ធ្វើ​ការ ២០ ម៉ោង ក្នុង​មួយ​ថ្ងៃ ការ​បង្អត់​អាហារ ការ​ជេរ​ប្រមាថ និង​ការ​ប្រើ​អំពើ​ហិង្សា​លើ​រូប​រាង​កាយ។

លោក​និយាយ៖ «ការ​រំលោភ​សេពសន្ទវៈ​នៅ​តែ​កើត​មាន ការ​ធ្វើ​ទារុណកម្ម​នៅ​តែ​កើត​មាន ហើយ​ពួក​គាត់​មិន​ត្រូវ​បាន​អនុញ្ញាត​​ឲ្យ​ធ្វើ​ការ​ទំនាក់ទំនង​ជាមួយ​នឹង​ក្រុម​គ្រួសារ​នោះ​ឡើយ»។

លោក​បន្ថែម​ថា អនុស្សារណៈ​នៃ​ការ​យោគយល់​គ្នា​នេះ​មាន​លក្ខណៈ​ទន់​ខ្សោយ និង​ខ្វះ​តម្លាភាព។

ក្រសួង​ការងារ​បាន​បដិសេធ​ មិន​ផ្តល់​សេចក្តី​ថត​ចម្លង​នៃ​កិច្ច​ព្រមព្រៀង​នេះ​មក​ឲ្យ​ភ្នំពេញ​ប៉ុស្តិ៍​​ឡើយ។

ពលរដ្ឋ​​កម្ពុជា​ដែល​បាន ធ្វើ​មាតុភូមិ​និវត្តន៍​​ពី​បរទេស​នៅ​ក្នុង​ឆ្នាំ​នេះ​មានសរុប ៥២៤ នាក់ ដែល​ក្នុង​នោះ ៥៩ នាក់​មក​ពី​ប្រទេស​​ចិន ដែល​ភាគច្រើនជា​ស្រ្តី​ដែល​ត្រូវ​បាន ជួញ​ដូរ​ឲ្យ​ទៅ​រៀបការ​ជាមួយ​​​បុរសជនជាតិ​ចិន។

ក្នុងចំណោម​នោះ​ដែរ មាន​ម្នាក់​បាន ធ្វើ​មាតុភូមិ​និវត្ត​ពី​ប្រទេស​អារ៉ាប៊ី​ សាអូឌីត ដែលជា​​ច្រកផ្លូវ​ដ៏​ចម្រូង​ចម្រាស​សម្រាប់​ពលការី​បម្រើ​ការ​តាម​ផ្ទះ​ចំណាក​​ស្រុក​ត្រូវ​បាន​បើក​ កាល​ពី​ខែ​កុម្ភៈ​ឆ្នាំ​នេះ៕ TN

អត្ថបទគួរចាប់អារម្មណ៍