សៀមរាបៈ មន្ត្រីនៃអាជ្ញាធរជាតិអប្សរារំពឹងថា ការជួសជុលស្ពានហាលខាងលិចប្រាសាទអង្គរវត្តដំណាក់កាលទី ២ ដែលបានចាប់ផ្តើមធ្វើការជួសជុលតាំងពីឆ្នាំ ២០១៦ មកនោះអាចនឹងបញ្ចប់ក្នុងឆ្នាំ ២០២២ មុនការគ្រោងទុក។
លោក អន សុភាព ជាប្រធានគ្រប់គ្រងគម្រោងជួសជុលស្ពាននេះបានប្រាប់ភ្នំពេញប៉ុស្តិ៍នៅថ្ងៃទី ១០ ខែសីហា ថា តាមគម្រោងគឺត្រូវបញ្ចប់កាន់តែឆាប់កាន់តែល្អ ប៉ុន្តែដោយសារបញ្ហាបច្ចេកទេសខ្លះធ្វើឱ្យមានការស្ទះយឺតយ៉ាវក្នុងដំណើរការងារនេះ។
លោកថ្លែងថា៖ «នៅក្នុងឆ្នាំនេះ យើងរៀបចំកម្រាលស្ពាន ដូចនេះគម្រោងនៃការបញ្ចប់ការជួសជុលនេះគឺយ៉ាងយូរបំផុតអាចក្នុងឆ្នាំ ២០២២ យើងនឹងបញ្ចប់ទាំងស្រុង ដែលគម្រោងនេះបញ្ចប់មុនពេលកំណត់ដែលយើងបានចុះអនុស្សរណៈនៃការយោគយល់គ្នាជាមួយនឹងប្រទេសជប៉ុន គឺបញ្ចប់នៅក្នុងខែ ៦ ឆ្នាំ ២០២៤ ឯណោះ»។
លោកបញ្ជាក់ថា នៅក្នុង MoU រវាងជប៉ុន និងអាជ្ញាធរជាតិអប្សរាបានធ្វើការពន្យារពេលម្តងរួចហើយដោយសារមានបញ្ហាបច្ចេកទេសដែលក្រុមការងារត្រូវការជជែកគ្នាទើបធ្វើឱ្យមានការយឺតយ៉ាវក្នុងការជួសជុលនេះរហូតស៊ីពេលប្រមាណជា ២ ឆ្នាំ ប៉ុន្តែបន្ទាប់ពីនេះប្រសិនបើមិនមានឧបសគ្គកើតឡើងទេនោះការជួសជុលស្ពាននេះនឹងចប់ក្នុងរយៈពេល ២ ឆ្នាំទៀត។
លោក សុភាព ថ្លែងថា៖ «មកដល់ពេលនេះយើងសម្រេចដងស្ពានបានប្រមាណជា ៦០ ភាគរយទៅ ៧០ ភាគរយដែលមានប្រវែងជាង ៩០ ម៉ែត្រ ប៉ុន្តែសម្រាប់កណ្តាលស្ពាន (កំពង់ទឹក) គឺយើងមិនទាន់បានធ្វើអ្វីទាំងអស់»។
ស្ពានហាលនេះត្រូវបានជួសជុល ២ ដងហើយ ដែលលើកទី ១ ត្រូវបានជួសជុលពីឆ្នាំ ១៩៩៦ ដល់ឆ្នាំ ២០០៧ និងលើកទី ២ នេះនៅឆ្នាំ ២០១៦ ដែលគ្រោងនឹងបញ្ចប់នៅឆ្នាំ ២០២០ នេះ ប៉ុន្តែដោយសារមានបញ្ហាបច្ចេកទេសធ្វើឱ្យមានការអូសបន្លាយរហូតអាចនឹងដល់ឆ្នាំ ២០២២។
បើតាមលោក អន សុភាព ការជួសជុលស្ពាននេះគឺដោយសារអាជ្ញាធរគិតដល់សុវត្ថិភាពរបស់ភ្ញៀវទេសចរ និងដើម្បីលើកកម្ពស់តម្លៃនៃប្រាសាទអង្គរវត្តខ្មែរ។ ដូចនេះនៅពេលដែលស្ពានហាលនេះត្រូវបានបញ្ចប់ការជួសជុល និងដាក់ឱ្យដំណើរការឡើងវិញនោះតម្លៃនៃប្រាសាទអង្គរនឹងកាន់តែល្បីខ្ទរខ្ទារ ហើយសុវត្ថិភាពរបស់ភ្ញៀវក៏ត្រូវបានធានាសម្រាប់ការឆ្លងកាត់ស្ពាននេះ។
លោក ឡុង កុសល អ្នកនាំពាក្យនៃអាជ្ញាធរជាតិអប្សរាក៏បានប្រាប់ភ្នំពេញ-ប៉ុស្តិ៍នៅថ្ងៃ ១០ ខែសីហាដែរថា នៅពេលដែលស្ពានហាលនេះត្រូវបានជួសជុលរួចរាល់ជាស្ថាពរហើយ អាជ្ញាធរនឹងដោះចេញនូវស្ពានបណ្តែតទឹកដែលបានដាក់ឱ្យភ្ញៀវទេសចរឆ្លងកាត់ជំនួសស្ពានហាលនេះចេញ។
លោកថ្លែងថា៖ «ស្ពានបណ្តែតទឹកនេះដាក់សម្រាប់ប្រើប្រាស់ក្នុងអំឡុងពេលដែលស្ពានហាលត្រូវបានបិទធ្វើការជួសជុលតែប៉ុណ្ណោះ។ ដូចនេះនៅពេលស្ពានហាលនេះបើកដំណើរការឡើងវិញ យើងនឹងរុះស្ពានបណ្តែតទឹកចេញ»។
បើតាមរបាយការណ៍អាជ្ញាធរជាតិអប្សរា ការជួសជុលស្ពានលើកនេះគឺមានការខុសប្លែកពីការជួសជុលនៅសម័យបារាំង និងការជួសជុលក្នុងដំណាក់កាលទី ១ ដោយក្រុមអ្នកជំនាញផ្នែកអភិរក្សរបស់អាយស៊ីស៊ី-អង្គរ បានតម្រូវមិនឱ្យមានការរុះរើជញ្ជាំងស្ពានថ្មបាយក្រៀមនេះឡើយដោយត្រូវរក្សាស្លាកស្នាមនៃការជួសជុលនៅក្រោយសម័យអង្គរទុកជាប្រវត្តិសាស្ត្រ ថ្វីដ្បិតតែរចនាសម្ព័ន្ធសំណង់ស្ពាននេះមានការខូចខាតខ្លាំងក៏ដោយ។
នេះជាចំណុចពិសេសមួយដែលលំបាកបំផុតសម្រាប់ការជួសជុល ដែលទាមទារឱ្យក្រុមអ្នកជំនាញរកគ្រប់វិធីសាស្ត្រ គ្រប់បច្ចេកទេសដើម្បីទប់ពង្រឹងរចនាសម្ព័ន្ធសំណង់ប្រកបដោយគុណភាពខ្ពស់ ហើយមិនប៉ះពាល់ដល់សំណង់ស្ពានចាស់ ដែលទ្រុឌទ្រោមខូចខាតដោយសារអាយុកាលនៃវត្ថុធាតុដើម ការត្រាំក្នុងទឹកជាប្រចាំ៕