.jpg)
លោកវរសេនីយ៍ត្រី ឡុង ដារ៉ាវិឆ័យ ជានាយរងការិយាល័យអន្តរាគមន៍ និងតម្រួតបទបញ្ជា ដែលត្រូវបាននគរបាលក្នុងកងអន្តរាគមន៍ពិសេសចំនួន ៨៥ នាក់ ជំទាស់នឹងការតែងតាំងមេបញ្ជាការថ្មីសម្រាប់ពួកគេ។ រូបថត ហ្វេសប៊ុក
ភ្នំពេញៈ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ លោក ស ថេត បញ្ជាក់ ពីម្សិលមិញថា លិខិត ១ ច្បាប់ដែលផ្ដិតមេដៃដោយក្រុមនគរបាលក្នុងកងអន្តរាគមន៍ពិសេសចំនួន ៨៥ នាក់ ដែលជំទាស់នឹងការតែងតាំងមេបញ្ជាការថ្មីសម្រាប់ពួកគេគឺត្រូវបានដោះស្រាយរួចហើយ។
លោក ស ថេត ប្រាប់ភ្នំពេញប៉ុស្ដិ៍ថា ដំណោះស្រាយនោះគឺធ្វើយ៉ាងណា ដើម្បីឱ្យនគរបាលទាំង ៨៥ នាក់ សប្បាយចិត្តឡើងវិញ ក្រោយពីពួកគេនាំគ្នាផ្ដិតមេដៃដោយសារមិនពេញចិត្ត ចំពោះការតែងតាំងមន្ត្រីឈ្មោះ ឡុង ដារ៉ាវិឆ័យ ជាមេបញ្ជាការថ្មីនៃកងអន្តរាគមន៍ពិសេសជំនួសឱ្យមេបញ្ជាការចាស់ឈ្មោះ ព្រំ ចាន់ណា។ ប៉ុន្តែលោក ស ថេត បញ្ជាក់ថា លោក ឡុង ដារ៉ាវិឆ័យ គឺគ្រាន់តែឱ្យធ្វើជាមេបញ្ជាការបណ្ដោះអាសន្នប៉ុណ្ណោះ។
លោកថា តាមពិតអ្នកដែលត្រូវបានតែងតាំងជាមេបញ្ជាការកងអន្តរាគមន៍ពិសេសពិតប្រាកដគឺជាមន្ត្រីផ្សេងម្នាក់ ប៉ុន្តែលោកបដិសេធប្រាប់អំពីអត្តសញ្ញាណនៃមន្ត្រីនោះ។
លោកបញ្ជាក់ថា៖ «បងប្អូនគាត់មិនសប្បាយចិត្ត យើងក៏បានស្រាវជ្រាវដែរ។ យើងគ្រាន់តែរៀបចំឱ្យមានអ្នកទទួលខុសត្រូវបណ្ដោះអាសន្នទេ ហើយបណ្ដោះអាសន្នគឺជាមនុស្សតែ ១ ដូចនឹងមនុស្សចាស់ដដែល។ វិធានការដោះស្រាយយ៉ាងម៉េចដើម្បីឱ្យគាត់សប្បាយចិត្ត។ ផ្ដិតមេដៃហ្នឹងមានន័យថា គាត់មិនពេញចិត្ត។ តែងតាំងអ្នកថ្មីប្រាប់អត់បានទេ»។
ឯកសារ ១ ច្បាប់ចុះថ្ងៃទី ២៧ ខែ មិថុនា ឆ្នាំ ២០២០ ដែលផ្ដិតមេដៃដោយមន្ត្រីនគរបាលនៃស្នងការដ្ឋានរាជធានីភ្នំពេញចំនួន ៨៥ នាក់ ហើយដែលទើបបែកធ្លាយប៉ុន្មានថ្ងៃនេះបញ្ជាក់ថា ពួកគេខកចិត្តយ៉ាងខ្លាំងបន្ទាប់ពីដឹងដំណឹងថា លោកវរសេនីយ៍ត្រី ឡុង ដារ៉ាវិឆ័យ ជានាយរងការិយាល័យអន្តរាគមន៍ និងតម្រួតបទបញ្ជាត្រូវតែងតាំងជាមេបញ្ជាការថ្មីជំនួសឱ្យលោក ព្រំ ចាន់ណា ជាស្នងការរង និងជាមេបញ្ជាការកងអន្តរាគមន៍ពិសេសចាស់តាមលិខិតបង្គាប់មួយចុះថ្ងៃទី ២៨ ខែមិថុនា ឆ្នាំ ២០២០។
មន្ត្រីនគរបាលទាំងនេះរៀបរាប់ប្រាប់លោក ស ថេត នៅក្នុងលិខិតនោះថា លោក ព្រំ ចាន់ណា និងលោក ឡុង ដារ៉ាវិឆ័យ គឺជាឪពុកកូនធម៌នឹងគ្នា ហើយជាមនុស្សមានអត្តចរិតប្រហាក់ប្រហែលគ្នា។ លោក ព្រំ ចាន់ណា គឺជាមេបញ្ជាការមិនមានព្រហ្មវិហារធម៌ក្នុងនាមជាមេដឹកនាំ ចូលចិត្តជេរប្រទេចដោយពាក្យសម្ដីអសុរោះ និងកិបកេងប្រាក់ឧបត្ថម្ភរបស់មន្ត្រីក្រោមឱវាទ។ លោក ចាន់ណា ជាមេដឹកនាំមិនខ្វល់ខ្វាយពីទុក្ខលំបាកមន្ត្រីក្រោមឱវាទជាបុគ្គលលេងល្បែង បៀ និងចាក់កន្ទុយលេខរាល់ថ្ងៃ។
ពាក្យបណ្ដឹងបន្តថា លោក ព្រំ ចាន់ណា ក៏បានយកប្រាក់ជាប្រចាំខែចំពោះមន្ត្រីនគរបាលណា ដែលមិនបានមកបម្រើការនៅអង្គភាព ហើយលោកតែងយករថយន្តម៉ាកម៉ាស់ស្ដាពាក់ស្លាកលេខនគរបាលរបស់អង្គភាពទៅជិះសម្រាប់បម្រើផលប្រយោជន៍ផ្ទាល់ខ្លួន និងជិះទៅលេងល្បែងស្ទើររៀងរាល់ថ្ងៃ។
មន្ត្រីនគរបាលទាំងនោះថា៖ «យើងខ្ញុំមិនពេញចិត្តយ៉ាងខ្លាំងចំពោះមេបញ្ជាការរូបនេះ។ ប៉ុន្តែដោយមិនចង់មានបញ្ហាចំពោះខ្លួន សុខចិត្តនាំគ្នាទ្រាំអត់ធ្មត់បម្រើការងារទាំងឈឺចាប់។ នៅពេលថ្មីៗនេះឮដំណឹងថា ថ្នាក់ដឹកនាំមានការផ្លាស់ប្ដូរមេបញ្ជាការចាស់លោក ព្រំ ចាន់ណា។ យើងខ្ញុំពិតជាមានសេចក្ដីសោមនស្សរីករាយយ៉ាងខ្លាំង ព្រោះថានឹងទទួលបានមេបញ្ជាការថ្មីដែល មានព្រហ្មវិហារធម៌ មានភាពជាអ្នកដឹកនាំ ស្រឡាញ់ និងយល់សុខទុក្ខមន្ត្រីក្រោមឱវាទ ប៉ុន្តែការសង្ឃឹមរបស់យើងខ្ញុំបែរជាមានការខកចិត្តយ៉ាងខ្លាំង»។
ប៉ុន្តែលោក ស ថេត បដិសេធធ្វើអត្ថាធិប្បាយជុំវិញការចោទប្រកាន់របស់ក្រុមមន្ត្រីនគរបាលទាំងនេះទៅលើលោក ព្រំ ចាន់ណា និងលោក ឡុង ដារ៉ាវិឆ័យ ហើយក៏មិនបញ្ជាក់អំពីវិធានការចំពោះមន្ត្រីទាំង ២ នេះដែរ។
ចំណែកលោក ឆាយ គឹមខឿន អគ្គស្នងការរង និងជាមន្ត្រីនាំពាក្យអគ្គស្នងការនគរបាលជាតិមិនបានដឹងរឿងនេះទេ ដោយលោកអះអាងថា ពាក្យបណ្ដឹងនោះបានដាក់ទៅស្នងការនគរបាលរាជធានីភ្នំពេញ និងជំរុញឱ្យទៅសួរស្នងការនេះវិញ។
លោក ប៉ា ចាន់រឿន នាយកប្រតិបត្តិវិទ្យាស្ថានប្រជាធិបតេយ្យ កម្ពុជាជំរុញឲ្យមានក្រុមស៊ើបអង្កេតឯករាជ្យ ដើម្បីស្រាវជ្រាវអំពីអ្វីដែលក្រុមមន្ត្រីនៅកងអន្តរាគមន៍ពិសេសនៃស្នងការដ្ឋាននគរបាលរាជធានីភ្នំពេញបានលើកអំពីភាពមិនប្រក្រតីចំពោះការតែងតាំងមេបញ្ជាការថ្មីនេះ។
លោកថ្លែងថា៖ «ការតែងតាំង ឬការដំឡើងឋានន្តរស័ក្ដិដល់មន្ត្រីសមត្ថកិច្ច គួរតែធ្វើឡើងដោយហ្មត់ចត់ទៅតាមក្បួនច្បាប់ដែលបានកំណត់ដើម្បីជ្រើសរើសបុគ្គល ដែលមានចំណេះជំនាញ បទពិសោធ រួមទាំងមានសីលធម៌ខ្ពស់ ដើម្បីធានាបាននូវការអនុវត្តការដឹកនាំការងារមានប្រសិទ្ធភាព និងមានសីលធម៌ដើម្បីជាប្រយោជន៍សម្រាប់អង្គភាព និងសម្រាប់សង្គមជាតិទាំងមូល»៕
