The Phnom Penh Post Search

Search form




Logo of Phnom Penh Post newspaper Phnom Penh Post - ការដ្ឋាន​សំណង់​ធ្លាក់​ដែក​ស្លាប់​ស្រ្តី​ម្នាក់​ដំណើរ​ការ​ឡើង​វិញ

ការដ្ឋាន​សំណង់​ធ្លាក់​ដែក​ស្លាប់​ស្រ្តី​ម្នាក់​ដំណើរ​ការ​ឡើង​វិញ

ការដ្ឋាន​សំណង់​អគារ​ធ្លាក់​ដែក​ស្លាប់​អ្នក​ដំណើរ​បើក​ដំណើរ​ការ​ឡើង​វិញ។
ការដ្ឋាន​សំណង់​អគារ​ធ្លាក់​ដែក​ស្លាប់​អ្នក​ដំណើរ​បើក​ដំណើរ​ការ​ឡើង​វិញ។ ផា លីណា

ការដ្ឋាន​សំណង់​ធ្លាក់​ដែក​ស្លាប់​ស្រ្តី​ម្នាក់​ដំណើរ​ការ​ឡើង​វិញ

ភ្នំពេញៈ ការដ្ឋាន​សាង​សង់​អគារ​ធ្លាក់​ដែក​ស្លាប់​ស្ត្រី​ម្នាក់​នៅ​ពហុ​កីឡដ្ឋាន​ជាតិ​អូឡាំពិក​បាន​ចាប់​ផ្តើម​ឡើង​វិញ​ម្សិល​មិញ​ពី​ក្នុង​គម្រោង​អភិវឌ្ឍន៍​ធំ​នៅ​រាជធានី​ភ្នំពេញ​បន្ទាប់​ពី​កើត​ហេតុ​ប្រមាណ​ជា ១ ខែ។

គ្រោះ​ថ្នាក់​កាល​ពី​ថ្ងៃ ទី២ ខែ​វិចិ្ឆកា ដែល​បាន​សម្លាប់​អ្នក​ស្រី ពុធ វណ្ណី ដែល​កំពុង​ធ្វើ​ដំណើរ​ទៅ​ទិញ​របស់​ត្រៀម​សម្រាប់ រៀប​មង្គលការ​កូន​ប្រុស​បាន​ធ្វើ​ឲ្យ​រដ្ឋាភិបាល​ធ្វើការ​ស៊ើប​អង្កេត​និង​បង្គាប់​ឲ្យ​ផ្អាក​ជា​បណ្តោះ​អាសន្ន​ការដ្ឋាន​អគារ​មួយ​នៃ​សំណង់​អគារ​ទាំង ៤ របស់​គម្រោង ដែល​អ្នក​ឃ្លាំ​មើល​សិទិ្ធ​មនុស្ស​បាន​រិះគន់​ថា មិន​បាន​ធ្វើ​ការ​ផ្លាស់​ប្តូរ​លើ​បទដ្ឋាន​សុវត្ថិភាព​នៃ​ការ​សាង​សង់​ក្នុង ប្រទេស​កម្ពុជា ឡើយ។

លោក មឿន តុលា អ្នក​សម្រប​សម្រួល​កម្មវិធី​ការងារ​នៅ​មជ្ឈមណ្ឌល​អប់រំ​ច្បាប់​សម្រាប់​សហគមន៍​បាន​ថ្លែង​ថា៖ «យើង​មាន​បទ​ប្បញ្ញតិ្ត​ស្តី​ពី​សុវត្ថិភាព​នៅ​កន្លែង​សាង​សង់ ប៉ុន្តែ​តើ​បទ​ប្បញ្ញតិ្ត​អាច​មាន​ប្រសិទ្ធភាព​ដោយ​របៀប​ណា​បើ​គ្មាន​ការ​អនុវត្ត​នោះ?»។

«[ការ​ត្រួត​ពិនិត្យ] ពុំ​កើត​ឡើង​ទេ..ហើយ​ខ្ញុំ​មិន​គិត​ថា នឹង​ផ្លាស់​ប្តូរ​ដែរ។ គ្មាន​គណនេយ្យ​ភាព​ទេ»។

បន្ទាប់​ពី​ហេតុ​ការណ៍​នោះ មនុស្ស ៧ នាក់​ត្រូវ​បាន​ចាប់​ខ្លួន ហើយ​កម្មករ ៥ នាក់​ត្រូវ​បាន​ចោទ​ប្រកាន់​ពី​បទ​មនុស្ស​ឃាត​ដោយ​អចេតនា ចំណែក​ឯ​មេការ​ក្រុម​ហ៊ុន​ចំនួន ២ នាក់​ត្រូវ​បាន​ដោះ​លែង ដោយ​សារ​តែ​ពួក​គេ​មិន​មាន​វត្តមាន​នៅ​ការដ្ឋាន​នៅ​ពេល​កើត​ហេតុ។

គ្មាន​ការ​ពិន័យ​លើ​ក្រុម​ហ៊ុន Oversea Cambodia Investment Corporation របស់​លោក​ឧកញ៉ា ពុង ឃាវសែ និង​ក្រុម​ហ៊ុន Cana Sino Corporation ដែល​ជា​ក្រុម​ហ៊ុន​ម៉ៅការ​ការដ្ឋាន​នេះ​ទេ។

លោក កើត សារ៉េត អនុ​រដ្ឋ​លេខាធិការ​នៅ​ក្រសួង​រៀបចំ​ដែនដី​នគរូបនីយកម្ម និង​សំណង់ ដែល​កន្លង​មក​បាន​ថ្លែង​ថា ឧប្បត្តិ​ហេតុ​នេះ​បាន​បង្ហាញ​ពី​ការ​ធ្វេស​ប្រហែស​ដោយ​ថ្នាក់​គ្រប់​គ្រង​នោះ បាន​ថ្លែង​ថា៖ «គ្មាន​ច្បាប់​ប្រាប់​ឲ្យ​យើង​ពិន័យ​ពួក​គេ​ទេ។ យើង​បាន​បញ្ចប់​ការ​ស៊ើប​អង្កេត​លើ​ករណី​នេះ​ហើយ។ យើង​បាន​បង្គាប់​ឲ្យ​ពួក​គេ​បង្កើត​ប្រព័ន្ធ​សុវត្ថិភាព ហើយ​ធានា​ថា គ្រប់​យ៉ាង​ដំណើរ​ការ​ផ្អែក​លើ​បទដ្ឋាន។ អគារ​មួយ​ដែល​បាន​ផ្អាក​នោះ​គឺ​មាន​សភាព​ល្អ​ទេ បន្ទាប់​ពី​ឧប្បតិ្ត​ហេតុ​នោះ»។

លោក ទូច សំណាង អ្នក​គ្រប់​គ្រង​គម្រោង​ឲ្យ​ក្រុម​ហ៊ុន OCIC បាន​ឲ្យ​ដឹង​ថា អនុសាសន៍​សុវត្ថិភាព​ទាំង​នេះ រួម​បញ្ចូល​ទាំង​ការ​បន្លាស់​ទី​ម៉ាស៊ីន​ឲ្យ​ឆ្ងាយ​ពី​ផ្លូវ​និង​បន្ថែម​សំណាញ់​ការពារ​សុវត្ថិភាព។

លោក សំណាង បាន​បដិសេធ​ធ្វើ​អត្ថាធិប្បាយ​ស្តីពី​ថា​តើ​ហេតុ​អ្វី​អ្នក​គ្រប់​គ្រង​មិន​នៅ​ការដ្ឋាន​នៅ​ពេល​កើត​ហេតុ? ប៉ុន្តែ​បាន​បង្វែរ​កំហុស​ថា ចេញ​ពី​មេការ​របស់​លោក។

លោក​ថ្លែង​ថា៖ «គម្រោង​នេះ​គឺជា​ផ្នែក​មួយ​របស់ OCIC ប៉ុន្តែ អ្នក​ម៉ៅ​ការ​បន្ត​ជា​អ្នក​ទទួល​ខុស​ត្រូវ​លើ​ការដ្ឋាន​សាង​សង់​នេះ​ទាំង​មូល»។

អ្នក​តំណាង​របស់​ក្រុម​ហ៊ុន Cana Sino បាន​បដិសេធ​ធ្វើ​ការ​អត្ថាធិប្បាយ​ជុំវិញ​ហេតុ​ការណ៍​និង​ការ​ទទួល​ខុស​ត្រូវ​កាល​ពី​ម្សិល​មិញ៕

អត្ថបទគួរចាប់អារម្មណ៍