ភ្នំពេញៈ លោក សម រង្ស៊ី អតីតមេដឹកនាំគណបក្សប្រឆាំងបានប្រកាសបង្កើតចលនាថ្មីមួយប្រឆាំងនឹងការបង្ក្រាបនយោបាយរបស់រដ្ឋាភិបាល ខណៈសេចក្តីសម្រេចនេះទំនងនឹងធ្វើឲ្យមានការបែកបាក់ផ្ទៃក្នុងរវាងក្រុមផ្សេងគ្នាក្នុងគណបក្សសង្គ្រោះជាតិ។
គណបក្សសង្គ្រោះជាតិត្រូវបានរំលាយដោយតុលាការកំពូលពាក់ព័ន្ធនឹងករណីចោទប្រកាន់ថាប៉ុនប៉ងផ្តួលរំលំរដ្ឋាភិបាល ខណៈការចោទប្រកាន់នេះត្រូវបានថ្កោលទោសដោយសហគមន៍អន្តរជាតិថា ជាលេសប្រឌិតឡើងដើម្បីកម្ចាត់គូប្រកួតប្រជែងនយោបាយនៅក្នុងការបោះឆ្នោតជាតិនាពេលខាងមុខ។
លោក កឹម សុខា ប្រធានគណបក្សនេះក៏ត្រូវបានចាប់ដាក់ពន្ធនាគារផងដែរពីបទក្បត់ជាតិ។
ជាការឆ្លើយតប អតីតមេដឹកនាំជាន់ខ្ពស់ជាច្រើនរបស់គណបក្សសង្គ្រោះជាតិ បានរត់គេចចេញពីប្រទេសហើយបានអំពាវនាវឲ្យសហគមន៍អន្តរជាតិគាំទ្រ ប៉ុន្តែមិនធ្វើការប្រមូលផ្តុំតវ៉ាដោយភ័យខ្លាចការបង្ក្រាបដោយហិង្សាពីរដ្ឋាភិបាល។
នាសប្តាហ៍កន្លងមកនេះលោក សម រង្ស៊ី និងអតីតមេដឹកនាំគណបក្សសង្គ្រោះជាតិដទៃទៀតបានប្រកាសបង្កើតចលនាសង្គ្រោះជាតិដែលទំនងជាឆ្ពោះទៅរកការអំពាវនាវឲ្យមានការតវ៉ា។
ឯកសារដែលចុះហត្ថលេខាដោយលោក សម រង្ស៊ី និងអតីតមេដឹកនាំគណបក្សសង្គ្រោះជាតិរួមមាន លោក អេង ឆៃអ៊ាង និងលោកស្រី មូរ សុខហួរ និងតំណាងរាស្ត្រដទៃៗទៀតបានលើកឡើងថា៖ «យើងដែលជាអ្នកចុះហត្ថលេខាខាងក្រោមនេះ... ជឿថាស្ថានភាពបច្ចុប្បន្ននៅក្នុងប្រទេសកម្ពុជាគឺមិនអាចគាំទ្របាន»។
លោក សម រង្ស៊ី ថ្លែងនៅក្នុងសុន្ទរកថាមួយពីរដ្ឋធានីវ៉ាស៊ីនតោនឌីស៊ីថា៖ «វាជាចលនាបត់បែនមួយ រីករាលដាលខ្លាំងឡើង។ គ្មាននរណាម្នាក់អាចរំលាយវាបាន»។
លោកបន្ថែមថា៖ «នៅពេលយើងជាគណបក្ស យើងមិនអាចអំពាវនាវឲ្យប្រជាពលរដ្ឋធ្វើការតវ៉ា ឬធ្វើបាតុកម្មបាន...ប្រសិនបើនរណាម្នាក់អំពាវនាវដូចនោះ នោះពួកគេនឹងរករឿងយើងយ៉ាងអាក្រក់...ការអំពាវនាវអ៊ីចឹងក្រោមស្លាកគណបក្សសង្គ្រោះជាតិគឺជាអ្វីដែលយើងមិនអាចធ្វើបាន ប៉ុន្តែក្នុងនាមជាចលនាមួយយើងអាចធ្វើបាន»។
គណបក្សសង្គ្រោះជាតិត្រូវបានបង្កើតឡើងតាមរយៈការរួមបញ្ចូលគ្នារវាងគណបក្ស សម រង្ស៊ី របស់លោក សម រង្ស៊ី និងគណបក្សសិទ្ធិមនុស្សរបស់លោក កឹម សុខា ដែលជាសម្ព័ន្ធមួយដែលត្រូវបានមើលឃើញថាងាយប្រេះឆា។
អតីតមន្ត្រីគណបក្សសិទ្ធិមនុស្សជាច្រើនបានសម្ដែងអារម្មណ៍មិនពេញចិត្ត ចំពោះការបង្កើតចលនានេះដោយមើលឃើញថាវាជាការធ្វើឲ្យខូចដល់កិច្ចខិតខំប្រឹងប្រែងរបស់គណបក្សសង្គ្រោះជាតិ និងធ្វើឲ្យលោក កឹម សុខា ស្ថិតនៅក្នុងភាពគ្រោះថ្នាក់។
លោក ហ៊ីង សុខសាន អតីតអគ្គលេខាធិការគណបក្សសិទ្ធិមនុស្សបានហៅចលនាថ្មីនេះថា «គួរឲ្យអស់សំណើច» នៅក្នុងការបង្ហោះនៅលើហ្វេសប៊ុករបស់លោក។
លោកប្រាប់ភ្នំពេញ-ប៉ុស្តិ៍ថា៖ «ខ្ញុំមិនចាប់អារម្មណ៍ចំពោះចលនានេះទេដោយសារខ្ញុំចង់ធ្វើការតស៊ូនយោបាយ តែក្រោមឆត្ររបស់គណបក្សសង្គ្រោះជាតិ»។
លោក សម រង្ស៊ី ក្រោយមកបានបង្ហោះសេចក្តីថ្លែងការណ៍មួយទៀតសម្រាប់ការបំភ្លឺ ប៉ុន្តែហាក់បីដូចជាផ្តាច់ចលនានេះចេញឆ្ងាយពីគណបក្សសង្គ្រោះជាតិ ខណៈក៏បានភ្ជាប់ទំនាក់ទំនងជិតស្និទ្ធរវាងចលនានេះ និងបក្សសង្គ្រោះជាតិផងដែរ។
សេចក្តីថ្លែងការណ៍នេះបញ្ជាក់ថា៖ «ចលនាសង្គ្រោះជាតិនឹងផ្តល់ភាពកក់ក្ដៅ និងក្តីសង្ឃឹមម្តងទៀតទៅដល់សកម្មជនគណបក្សសង្គ្រោះជាតិ និងអ្នកគាំទ្រ»។
ការបង្ហោះនេះក៏បានអះអាងផងដែរថាសមាជិកសង្គមស៊ីវិលអាចចូលរួមចលនានេះបានដោយសារវាមិនមែនជាគណបក្សនយោបាយ។
សេចក្តីថ្លែងការណ៍បន្តទៀតថា នៅពេលគោលដៅរបស់ខ្លួនបានសម្រេចចលនានេះនឹងរំលាយ «ខ្លួនឯង» ហើយសមាហរណកម្មទៅជាគណបក្សសង្គ្រោះជាតិ។
លោក យ៉ែម បុញ្ញាឫទ្ធិ អតីតតំណាងរាស្ត្រគណបក្សសង្គ្រោះជាតិមកពីគណបក្សសិទ្ធិមនុស្សបានថ្កោលទោសសេចក្តីសម្រេចបង្កើតចលនានេះ។
លោកបានថ្លែងពីប្រទេសបារាំងអមទៅដោយកូនស្រី លោក កឹម សុខា កញ្ញា កឹម មនោវិទ្យា ថា៖ «បុគ្គលណាក៏ដោយមានសិទ្ធិបង្កើតសមាគមអង្គការក្រៅរដ្ឋាភិបាល ឬចលនា»។
ប៉ុន្តែលោក បុញ្ញាឫទ្ធិ បារម្ភខ្លាចថាលោក សុខា និងមន្ត្រីគណបក្សសង្គ្រោះជាតិដទៃៗទៀតដែលកំពុងស្ថិតនៅក្នុងប្រទេសកម្ពុជានៅឡើយ អាចនឹងទទួលរងការដាក់ទោសទណ្ឌចំពោះសកម្មភាពរបស់ចលនានេះ។ «យើងមិនទាន់សួរ [លោក កឹម សុខា] ។ នៅក្នុងចលនាសង្គ្រោះជាតិមានឈ្មោះលោក កឹម សុខា ប៉ុន្តែលោកមិនដឹង។ ប្រសិនបើពួកគេធ្វើសកម្មភាពដែលបង្កឲ្យមានបញ្ហា លោក កឹម សុខា នឹងត្រូវទទួលខុសត្រូវ»។
អ្នកនាំពាក្យគណបក្សកាន់អំណាចលោក សុខ ឥសាន បានថ្លែងថាវាជាអង្គការ «ខុសច្បាប់» ដែលបង្កើតឡើងដោយ «ពួកឧទ្ទាម» និងដឹកនាំដោយទណ្ឌិត។
លោក ឥសាន ក៏បានបង្ហាញផងដែរអំពីភាពទំនងជាបែកបាក់គ្នារវាងក្រុមអ្នកគាំទ្រលោក សម រង្ស៊ី និងលោក កឹម សុខា។ «បើទោះបីជាពួកគេជាគណបក្សសង្គ្រោះជាតិពួកគេស្ថិតនៅក្នុងក្រុម ២ មួយទឹក និងមួយទៀតប្រេងបើសូម្បីនៅពេលពួកគេព្យាយាមដាក់នៅក្នុងដបតែមួយ ពួកគេនៅតែដាច់ចេញពីគ្នា»។
អ្នកវិភាគនយោបាយលោក មាស នី ថ្លែងថាចលនានេះអាចជាលក្ខណៈចិត្តសាស្ត្រក្នុងគោលបំណងធានាដល់អ្នកគាំទ្រ។ លោកបន្ថែមថា៖ «ក្រុមអ្នកគាំទ្រគណបក្សសង្គ្រោះជាតិនៅថ្នាក់មូលដ្ឋានបានហៅស្ថានភាពបែបនេះថា ដូចការរស់នៅគ្មានមេ»។ លោកបន្ថែមថា៖ «យ៉ាងហោចណាស់ពួកគេនឹងដឹងថាមេដឹកនាំរបស់ពួកគេមិនដេក»។
ទោះយ៉ាងណាលោក នី មានមន្ទិលសង្ស័យថាតើការតវ៉ាអាចនឹងកើតឡើងបានឬអត់នៅក្នុងបរិយាកាសបច្ចុប្បន្ន ហើយមិនមានមេដឹកនាំនៅមូលដ្ឋាននៅក្នុងប្រទេសកម្ពុជា។
លោក សម រង្ស៊ី និងលោកស្រី មូរ សុខហួរ មិនបានឆ្លើយតបនឹងសំណើសុំអត្ថាធិប្បាយកាលពីម្សិលមិញទេ៕ PS
រាយការណ៍បន្ថែមដោយ ឆាយ ចាន់នីដា