ភ្នំពេញ៖ ក្នុងរយៈពេល ៤ ខែឆ្នាំនេះ សមត្ថកិច្ចនៃអគ្គស្នងការដ្ឋាននគរបាលជាតិបង្ក្រាបបទល្មើសគ្រឿងញៀនបាន ២ ៣៨៧ ករណី, ឃាត់ខ្លួនមនុស្ស ៥ ៣២៣ នាក់ និងរឹបអូសថ្នាំញៀនបានជាង ៦០០ គីឡូក្រាម ប៉ុន្តែចំនួននេះមានការថយចុះប្រមាណជាង ១០% បើធៀបនឹងរយៈពេលដូចគ្នាកាលពីឆ្នាំ ២០២០។
យោងតាមរបាយការណ៍របស់មន្ទីរប្រឆាំងគ្រឿងញៀននៃក្រសួងមហាផ្ទៃដែល ភ្នំពេញ ប៉ុស្តិ៍ ទទួលបាននៅថ្ងៃទី ៧ ខែឧសភា ឆ្នាំនេះ បានឲ្យដឹងថា សម្រាប់ ៤ ខែ ដើមឆ្នាំ ២០២០ សមត្ថកិច្ចបង្ក្រាបបទល្មើសគ្រឿងញៀនបានចំនួន ៣ ៥៧២ ករណី, ឃាត់ខ្លួនមនុស្សចំនួន ៧ ០៤១ នាក់ និងរឹបអូសគ្រឿងញៀនចំនួន ៣៣០ គីឡូក្រាម។
ចំណែក ៤ ខែឆ្នាំនេះ សមត្ថកិច្ចបង្ក្រាបបាន ២ ៣៨៧ ករណី ឃាត់ខ្លួនមនុស្ស ៥ ៣២៣ នាក់ និងរឹបអូសថ្នាំញៀនបានជាង ៦០០ គីឡូ ដែលមានការថយចុះប្រមាណជាង ១០ ភាគរយ ក្នុងរយៈពេលដូចគ្នាកាលពីឆ្នាំមុន។
លោក អ៊ិន សុង នាយករងមន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិបានថ្លែងនៅថ្ងៃនេះថា ការបង្រ្កាបគ្រឿងញៀនរបស់មន្ត្រីអនុវត្តច្បាប់មិនមានការផ្អាកសកម្មភាពនោះទេ បើទោះជាកម្ពុជាកំពុងជួបបញ្ហាប្រឈមនឹងជំងឺកូវីដ ១៩ ក៏ដោយ។ ផ្ទុយទៅវិញមន្ត្រីអនុវត្តច្បាប់តែងតែចុះទៅបង្រ្កាបជានិច្ចឱ្យតែមានបទល្មើសគ្រឿងញៀនកើតឡើង។
លោក អ៊ិន សុង បានបញ្ជាក់ថា៖ «សមត្ថកិច្ចរបស់យើងតែងតែបន្តស៊ើបអង្កេតស្រាវជ្រាវតាមដាន បង្ក្រាបបទល្មើសដោយមិនមានការសម្រាកថ្ងៃណាមួយឡើយ»។
លោកបានបញ្ជាក់ថា មូលហេតុដែលបណ្ដាលឱ្យមានការធ្លាក់ចុះនៃបទល្មើសគ្រឿងញៀនទាំងនេះ គឺដោយសារមានការបិទខ្ទប់នៅតាមបណ្ដាខេត្តក្រុងជាពិសេសនៅក្នុងខែមេសាកន្លងទៅ គឺមានការថយចុះជាច្រើន ៕