.jpg)
ទិដ្ឋភាពនៃការកាប់ព្រៃយកដីនៅខេត្តក្រចេះកាលពីឆ្នាំ ២០១៦ កន្លងទៅ។ រូបថតៈ VANNRITH RONG
ភ្នំពេញៈ ការបង្ក្រាបបទល្មើសទាក់ទងនឹងវិស័យកសិកម្មទាំងមូលមានការកើនឡើង ២១៣ ករណី ស្មើនឹង ៤ ភាគរយក្នុងឆ្នាំ ២០១៧ ធៀបទៅនឹងរយៈពេលដូចគ្នាកាលពីឆ្នាំ ២០១៦ តែដោយឡែកចំពោះការបង្ក្រាបបទល្មើសទាក់ទងនឹងព្រៃឈើ និងសត្វព្រៃបានថយចុះ ខណៈសង្គមស៊ីវិលសង្កេតឃើញថា បទល្មើសទាំងនេះនៅតែបន្តកើតមានច្រើន។
នៅក្នុងឆ្នាំ ២០១៧ កន្លងមកក្រសួងកសិកម្មបានបង្ក្រាបបទល្មើសសរុបចំនួន ៥៣៥៣ ករណីដែលក្នុងនោះរួមមានបទល្មើសជលផលបានចំនួន ៣៩២៥ ករណី និងព្រៃឈើ សត្វព្រៃ និងការកាប់ទន្ទ្រានយកដីចំនួន ១៤២៨ ករណី។ វត្ថុតាងដែលត្រូវរឹបអូស និងប្រមូលពីបទល្មើសជលផល ៣៧២៣ ករណីត្រូវបានបំផ្លាញចោល, ពិន័យអន្តរកាលចំនួន ១១៦ ករណី និងបញ្ជូនទៅតុលាការចំនួន ៨៦ ករណី ។ នេះបើតាមរបាយការណ៍ប្រចាំឆ្នាំរបស់ក្រសួងកសិកម្មដែលបានធ្វើពិធីសរុបកាលពីរសៀលថ្ងៃពុធ ក្រោមអធិបតីភាពរបស់លោកនាយករដ្ឋមន្ត្រី ហ៊ុន សែន។
ចំនួននៃការបង្ក្រាបនេះមានការកើនឡើង ២១៣ ករណីដែលស្មើនឹង ៤,១៤ ភាគរយ បើធៀបនឹងឆ្នាំ ២០១៦ ដែលមានសរុបចំនួន ៥១៤០ ករណី។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានរបាយការណ៍ថា ការទប់ស្កាត់ និងបានបង្ក្រាបបទល្មើសព្រៃឈើ សត្វព្រៃ និងការកាប់រានដីព្រៃទាំង ១៤២៨ ករណីនោះ រដ្ឋបាលព្រៃឈើបានសហការយ៉ាងជិតស្និទ្ធជាមួយគណៈកម្មការជាតិ និងរដ្ឋបាលថ្នាក់ក្រោមជាតិ។ ក្នុងឆ្នាំ ២០១៦ មានការបង្ក្រាបបានចំនួន ១៤៩០ ករណី ហើយធៀបនឹងឆ្នាំ ២០១៧ នេះថយចុះ ៦២ ករណីដែលស្មើនឹង ៤,១៦ ភាគរយ។ ក្នុងនោះសំណុំរឿងបទល្មើសព្រៃឈើត្រូវពិន័យអន្តរកាលមានចំនួន ៦៥០ ករណីបញ្ជូនទៅតុលាការចំនួន ៧៧៨ ករណី។
លោករដ្ឋមន្ត្រីបានលើកឡើងថា រដ្ឋបាលថ្នាក់ក្រោមជាតិបាននិងកំពុងបង្ការទប់ស្កាត់ក្នុងការចូលរួមបង្ក្រាបបទល្មើសនានា ព្រមទាំងបានចូលរួមអនុវត្ត «យ៉ាងសកម្ម» ជាមួយគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ សំដៅទប់ស្កាត់ និងបង្ក្រាបសកម្មភាព «អនាធិបតេយ្យ» កាប់ឈើ ការនាំចេញឈើខុសច្បាប់ និងបទល្មើសនានានៅភាគឦសាននៃប្រទេសផងដែរ។
លោករដ្ឋមន្ត្រីបានវាយតម្លៃថាសមិទ្ធផលប្រចាំឆ្នាំរបស់ក្រសួងមាន «ភាពល្អប្រសើរ»។ ទោះយ៉ាងណាលោកបានគូសបញ្ជាក់នៅចំពោះប្រមុខរដ្ឋាភិបាលថា៖ «កិច្ចសហការពីសំណាក់អាជ្ញាធរដែនដី និងសមត្ថកិច្ចពាក់ព័ន្ធមិនទាន់បានរលូននៅឡើយទេ ក្នុងការទប់ស្កាត់បទល្មើសព្រៃឈើ និងជលផល ការនាំចេញជ័រ និងឈើកៅស៊ូមិនទាន់កែច្នៃ ការនាំចូលសត្វ និងសម្ភារកសិកម្មខុសច្បាប់រួមទាំងការត្រួតពិនិត្យ និងគុណភាពអនាម័យនៅតាមតំបន់តាមច្រកព្រំដែននៅមានកម្រិត»។
ក្នុងឱកាសនោះលោកនាយករដ្ឋមន្ត្រី ហ៊ុន សែន បានណែនាំដល់ក្រសួងកសិកម្មឲ្យបន្តសហការជាមួយនឹងស្ថាប័នពាក់ព័ន្ធក្នុងការទប់ស្កាត់បទល្មើស និងបោះបង្គោលកំណត់ព្រំដីព្រៃលិចទឹកឲ្យបានឆាប់រហ័ស ដើម្បីទប់ស្កាត់ និងកាត់បន្ថយឲ្យបានជាអតិបរមានូវការរំលោភបំពានលើដីព្រៃលិចទឹក និងដីព្រៃឈើជាដើម។
លោកនាយករដ្ឋមន្ត្រីមានប្រសាសន៍ថា៖ «ត្រូវបន្តប្រើប្រាស់កម្លាំងសរុបចុះស្រាវជ្រាវរុករក និងបង្ក្រាបបទល្មើសជលផល និងការកាប់រានឈូសឆាយដីព្រៃលិចទឹកយកធ្វើជាកម្មសិទ្ធិតាមគ្រប់រូបភាព»។ ប្រមុខរដ្ឋាភិបាលក៏បានដាស់តឿនដល់អាជ្ញាធរខេត្តត្រូវចូលរួមសហការគ្នា ដើម្បីស្រាវជ្រាវទប់ស្កាត់ និងបង្ក្រាបបទល្មើសព្រៃឈើ និងជលផលឲ្យមានប្រសិទ្ធភាព។
លោក ប៉ែន ប៊ុណ្ណារ៍ មន្ត្រីស៊ើបអង្កេតជាន់ខ្ពស់ផ្នែកដីធ្លីរបស់អង្គការអាដហុកបានយល់ឃើញថាចំនួននៃការបង្ក្រាបមានការកើនឡើងនេះគឺបង្ហាញថា បទល្មើសនៅតែមានច្រើនដដែល ដែលវាស្របទៅនឹងស្ថានភាពជាក់ស្តែងនៃបទល្មើសដែលកំពុងតែកើតមាន។
លើសពីនោះទៀតលោកបានកត់សម្គាល់ឃើញថា ការបង្ក្រាបទាំងនោះគឺធ្វើបានតែបទល្មើសតូចតាចដែលដឹកតាមម៉ូតូ និងគោយន្តប៉ុណ្ណោះ។ ប៉ុន្តែបទល្មើសដែលដឹកតាមរថយន្តធំៗរបស់អ្នកមានលុយ អំណាច ក្រុមឧកញ៉ា និងក្រុមមន្ត្រីគ្រាក់ៗគឺកម្រនឹងបង្ក្រាបបានណាស់ បើទោះបីជាមានសារព័ត៌មានបានចុះផ្សាយយ៉ាងច្បាស់យ៉ាងណាក៏ដោយ។
លោកបានបញ្ជាក់ថា៖ «ការមិនបង្ក្រាបវាជះគំរូអាក្រក់ និងបង្ហាញថាឧកញ៉ា និងមន្ត្រីធំៗមិនខ្លាចច្បាប់ទេ និងធ្វើឲ្យមន្ត្រីតូចតាចមួយចំនួនរកស៊ីអាហ្នឹងដែរ។ បទល្មើសមិនអស់ទេ គឺវានៅច្រើនជាងហ្នឹងទៀត។ បើធៀបការកាប់ខ្ទេចខ្ទី ទៅនឹងចំនួននៃការបង្ក្រាបនេះឃើញថាវាមិនមានជោគជ័យលើការបង្ក្រាបទេ»។
កន្លងមកលោក ប៊ុណ្ណារ៍ និងសហគមន៍បានដាក់បណ្តឹងបរិហារចំនួន ១១ ទៅតុលាការប្រឆាំងទៅនឹងក្រុមឧកញ៉ា មន្ត្រីអាជ្ញាធរ និងអ្នកមានលុយ និងអំណាចមួយចំនួនពីការរំលោភទន្ទ្រានយកដីរដ្ឋ និងធនធានធម្មជាតិដទៃទៀត។ ជាលទ្ធភាពតុលាការបាននិងកំពុងដំណើរការលើបណ្តឹងទាំងនោះជាបន្តបន្ទាប់៕
