ភ្នំពេញៈ រដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន បានថ្លែងតាមរយៈវីដេអូនៃកិច្ចសម្ភាសន៍មួយថាប្រទេសកម្ពុជាអាចបើកសាលារៀនដូចធម្មតាវិញ លុះត្រាតែប្រទេសជិតខាងអាចគ្រប់គ្រងការរីករាលដាលជំងឺកូវីដ១៩បាន បើមិនបាន ១០០ ភាគរយក៏បានពី ៩០-៩៥ ភាគរយដែរ។ នេះបើតាមការផ្សព្វផ្សាយរបស់ក្រសួងកាលពីថ្ងៃទី ៩ ខែឧសភា។
ឆ្លើយតបនឹងសំណួរសួរថាមានអ្នកជំងឺកូវីដ១៩នៅសល់តែ ២ នាក់ ខណៈអ្នកជំងឺ ១២០ នាក់បានព្យាបាលជាសះស្បើយហេតុអ្វីបានជាក្រសួងមិនបើកសាលារៀនឡើងវិញ? លោករដ្ឋមន្ដ្រី ហង់ជួន ណារ៉ុន បានពន្យល់ថា គោលដៅដែលក្រសួងអប់រំ គិតគូរមាន ២ សំខាន់គឺទី ១ សុវត្ថិភាពរបស់សិស្ស និងទី ២ គឺការបន្តការសិក្សារបស់សិស្ស។ ប៉ុន្ដែតម្រូវការទាំងអស់នេះទាល់តែមានតម្រូវការទី ១ គឺតម្រូវការរស់រានមានជីវិតសិនទើបអាចឈានទៅសម្រេចបានតម្រូវការផ្សេងទៀត។ ដូច្នេះពេលខ្លះអាចជ្រើសរើសតម្រូវការបានតែ ១ ទេប៉ុណ្ណោះ។
លោករដ្ឋមន្ដ្រីថ្លែងថា៖ «បើយើងបើកសាលារៀនវិញហើយប្រឈមនឹងគ្រោះថ្នាក់ឆ្លងជំងឺកូវីដ១៩ ព្រោះតែព្រំដែនប្រទេសយើងនៅបើកចំហនៅឡើយ លំហូរមនុស្សនៅបើកចំហនៅឡើយ។ ដូច្នេះប្រសិនបើស្ថានភាពនៅតាមប្រទេសជិតខាងនៅមិនទាន់មានភាពល្អប្រសើរក៏យើងមិនអាចធានាបាន ១០០ ភាគរយទេ។ ដូចជានៅប្រទេស សិង្ហបុរី ម៉ាឡេស៊ី គឺនៅប្រឈមនៅឡើយ។ ដូច្នេះទាល់តែយើងធានាថា ប្រទេសជិតខាងរបស់យើងក្នុងតំបន់អាចគ្រប់គ្រងការរីករាលដាលជំងឺកូវីដ១៩ នេះបានដែរ ទើបយើងអាចប្រកាសបានថា យើងមានសុវត្ថិភាព»។
លោកបន្តថា៖ «ប៉ុន្ដែមិនអាចថា សុវត្ថិភាព ១០០ ភាគរយទេ គឺអាច ៩០-៩៥ ភាគរយបានហើយយើងអាចបើកសាលារៀនវិញបាន។ ដូច្នេះខ្ញុំយល់ឃើញថា បញ្ហានេះគឺជាបញ្ហា ១ ដែលសំខាន់ ដែលយើងត្រូវគិតគូរទាំងអស់គ្នាថា តើយើងមានតម្រូវការអ្វីខ្លះ ហើយគួរបើកសាលារៀនទាំងប្រថុយប្រថាន ឬយ៉ាងណា?...»។
លោករដ្ឋមន្ដ្រីបញ្ជាក់ថា សូម្បីតែក្រសួងសុខាភិបាលក៏បានចេញសេចក្ដីថ្លែងការណ៍ឲ្យពលរដ្ឋប្រុងប្រយ័ត្នជានិច្ចដើម្បីទប់ទល់នឹងរលកទី ២ នៃជំងឺកូវីដ ១៩ នេះ ព្រោះប្រវត្ដិជំងឺឆ្លងបែបនេះមានដូចជា ជំងឺផ្ដាសាយនៅអេស្ប៉េញគឺការចម្លងនូវរលកទី ២ ធ្វើឲ្យមានអ្នកស្លាប់ច្រើនជាងរលកទី ១ ទៅទៀត។
លោករដ្ឋមន្ដ្រីបានរំឭកថា ដើម្បីដោះស្រាយបញ្ហាប្រឈមចំពោះការអប់រំ ក្រសួងអប់រំបានរៀបចំឲ្យមានការសិក្សាពីចម្ងាយ និងប្រព័ន្ធអប់រំតាមបែបឌីជីថល គឺការរៀន និងបង្រៀនតាម Youtube, Facebook កម្មវិធី E-Learning និងការបង្កើតការបង្រៀនតាមទូរទស្សន៍ថែមទៀត។
លោកបានបញ្ជាក់ថា៖ «មិនមែនយើងមិនគិតអំពីការសិក្សារបស់សិស្សទេ គឺយើងគិតដោយផ្ដល់ការអប់រំពីចម្ងាយដល់សិស្ស។ សិស្សអាចស្វ័យសិក្សារៀនតាមប្រព័ន្ធអេឡិចត្រូនិក។ យើងបានប្រែក្លាយវិបត្ដិនេះឲ្យក្លាយទៅជាឱកាសដើម្បីពង្រឹងការអប់រំតាមរយៈការប្រើប្រាស់បច្ចេកវិទ្យាឌីជីថល។ ការអប់រំបែបនេះ ប្រសិនបើសភាពការណ៍ធម្មតាមានការលំបាកអនុវត្ដ។ ប៉ុន្ដែក្នុងកាលៈទេសៈនេះគឺយើងអនុវត្ដទៅបានល្អហើយ ជាការអប់រំតាមបែបថ្មីមួយដែលសិស្សទាំងអស់ត្រូវខិតខំប្រឹងប្រែង»។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាបានបញ្ជាក់បន្ថែមពីម្សិលមិញថា មាតាបិតា អាណាព្យាបាលសិស្សបានគាំទ្រសេវាសិក្សាពីចម្ងាយ។
ប៉ុន្តែលោកមិនបានបង្ហាញចំនួនសិស្សនៅជនបទ ដែលមិនទទួលបានការអប់រំនោះទេ។
លោកថា៖ «ជាទូទៅ មាតាបិតា សិស្សានុសិស្ស និងគ្រប់ភាគីពាក់ព័ន្ធមានការស្វាគមន៍...ជាពិសេសការផ្សាយតាមរយៈទូរទស្សន៍ (ទទក២) ដែលអាចបន្តឲ្យមានការរៀន និងបង្រៀននៅទីក្រុង និងជនបទទូទាំង ២៥ ខេត្ត-រាជធានីក្នុងឱកាសចូលរួមទប់ស្កាត់ការរីករាលដាលជំងឺកូវីដ១៩។ គ្រួសារដែលមិនទាន់មានទូរទស្សន៍អាចរៀនតាមទូរទស្សន៍ជាមួយអ្នកជិតខាងមិនឲ្យលើសពី ១០ នាក់ដោយត្រូវរក្សាគម្លាតសុវត្ថិភាព និងអនុវត្តគោលការណ៍វេជ្ជសាស្ត្រតាមការណែនាំពីក្រសួងសុខាភិបាល»។
អង្គការសម្ព័ន្ធសិទ្ធិកុមារ (ស.ស.ក) ដែលមានសមាជិកទាំងជាតិ និងអន្តរជាតិចំនួន ៥៨ មានបេសកកម្មតស៊ូមតិដើម្បីសិទ្ធិកុមារនៅកម្ពុជា និងធានាឲ្យមានការគាំទ្រអនុសញ្ញាស្ដីពីសិទ្ធិកុមារបានចេញសេចក្ដីថ្លែងការណ៍រួម ១ កាលពីថ្ងៃទី ៨ ឧសភាដោយបានវាយតម្លៃខ្ពស់ចំពោះរដ្ឋាភិបាលកម្ពុជាក្នុងការការពារការរាតត្បាតជំងឺកូវីដ១៩។
ស.ស.ក បានលើកឡើងថាក្រសួងអប់រំកម្ពុជាបានចាប់ផ្ដើមវិស្សមកាលតូច មុនកំណត់ និងបានបង្កើតជម្រើសសិក្សាពីចម្ងាយតាមប្រព័ន្ធអេឡិចត្រូនិក។
ស.ស.ក បញ្ជាក់ថា៖ «យើងខ្ញុំសូមបង្ហាញការគាំទ្រពេញទំហឹង ចំពោះវិធានការទាំងនេះ។ ទន្ទឹមនឹងនោះយើងខ្ញុំបានពិគ្រោះយោបល់ជាមួយកុមារប្រមាណ ៥៣៩ នាក់ និងឪពុកម្ដាយ អាណាព្យាបាលប្រមាណ ៣៧២ នាក់ ដោយបារម្ភផងដែរ ចំពោះកុមារដែលជាក្រុមងាយរងគ្រោះក្នុងដំណាក់កាលនៃការរីករាលដាល និងបន្ទាប់ពីវិបត្ដិនេះ»។
ប៉ុន្តែ ស.ស.ក បារម្ភថា ខណៈអាណាព្យាបាលសិស្សកំពុងជួបវិបត្ដិហិរញ្ញវត្ថុ និងការបាត់បង់ការងារ សាលាឯកជនខ្លះនៅតែតម្រូវឲ្យបង់ពេញថ្លៃ ទោះបីជាប្ដូរមកសិក្សាតាមប្រព័ន្ធអេឡិចត្រូនិកក្ដី។ កុមារខ្លះប្រឈមនឹងការសិក្សាតាមប្រព័ន្ធអេឡិចត្រូនិកដោយសារគ្រូមិនបានបង្ហាញច្បាស់ និងអាណាព្យាបាលមិនមានពេលគ្រប់គ្រាន់សម្រាប់បង្ហាត់បង្ហាញ ឬមិនអាចប្រើប្រាស់បច្ចេកវិទ្យាបាន ជាដើម៕