អ្នកជំនាញបាញ់ថ្នាំសម្លាប់មេរោគនៅមន្ទីរពេទ្យកាល់ម៉ែតពីថ្ងៃ ១ មីនា។ ហុង មិនា
ភ្នំពេញៈ លោកនាយករដ្ឋមន្ត្រី ហ៊ុន សែន ដែលជាប្រធានស្ថាបនិកកិត្តិយសនៃក្រុមប្រឹក្សាវប្បធម៌អាស៊ីបានផ្ញើលិខិតអបអរសាទរកិច្ចប្រជុំក្រុមប្រឹក្សាវប្បធម៌អាស៊ី ACC លើកទី២ កាលពីថ្ងៃទី ១៩ ខែមីនា ឆ្នាំ ២០២១ ដោយលោកលើកឡើងថា ការប្រយុទ្ធប្រឆាំងនឹងជំងឺរាតត្បាតសកល ទាមទារឱ្យមានសាមគ្គីភាព និងភាពជាដៃគូអន្តរជាតិ។
ក្រុមប្រឹក្សាវប្បធម៌អាស៊ី (ACC) និងសន្និសីទអន្តរជាតិនៃបណ្ដាគណបក្សនយោបាយនៅអាស៊ី (ICAPP) បានរៀបចំកិច្ចប្រជុំក្រុមប្រឹក្សាវប្បធម៌អាស៊ីលើកទី២ តាមប្រព័ន្ធអ៊ីនធឺណិតក្រោមប្រធានបទស្តីពី «ការលើកកម្ពស់វប្បធម៌ និងនវានុវត្តន៍សម្រាប់វិបុលភាពរួមក្នុងអំឡុងពេល និងក្រោយកូវីដ ១៩»។
លោក ហ៊ុន សែន បានលើកឡើងតាមរយៈសារលិខិតថា៖ «ខ្ញុំសូមថ្លែងអំណរគុណ ចំពោះគណៈប្រតិភូទាំងអស់សម្រាប់ការចូលរួមកិច្ចប្រជុំលើកទី២ របស់ក្រុមប្រឹក្សាវប្បធម៌អាស៊ី (ACC) ហើយការជ្រើសរើសយកប្រធានបទនេះ គឺពិតជាប្រធានបទដ៏ល្អ និងមានទំនាក់ទំនងខ្លាំងណាស់ ជាមួយស្ថានភាពបច្ចុប្បន្នរបស់ពិភពលោក»។
អស់រយៈពេល ២ ឆ្នាំហើយដែល ACC ត្រូវបានបង្កើត និងប្រកាសនៅខេត្តសៀមរាបក្នុងគោលបំណងលើកកម្ពស់ការតភ្ជាប់រវាងវប្បធម៌ និងសន្តិភាព ការអភិវឌ្ឍប្រកបដោយចីរភាព ទំនាក់ទំនងរវាងមនុស្សជាតិ និងនវានុវត្តន៍។
លោកនាយករដ្ឋមន្ត្រីបញ្ជាក់ថា៖ «ការប្តេជ្ញាចិត្តផ្នែកនយោបាយរបស់ពួកយើងគឺច្បាស់លាស់ យើងធ្វើការរួមគ្នាដើម្បីជំរុញកិច្ចសន្ទនា និងកិច្ចសហប្រតិបត្តិការជាអន្តរជាតិលើការអភិវឌ្ឍ និងនវានុវត្តន៍ដោយមានវប្បធម៌ជាចលករ ដើម្បីសម្រេចឱ្យបានគោលដៅអភិវឌ្ឍន៍ប្រកបដោយចីរភាព»។
លោកថា ការផ្សារភ្ជាប់រវាងមនុស្ស ចំណេះដឹង និងសកម្មភាពសុទ្ធតែជាយុទ្ធសាស្ត្រអន្តរាគមន៍សំខាន់ដើម្បីនាំមកនូវលទ្ធផលជាក់ស្តែងជូនប្រជាជន។ ផ្សារភ្ជាប់ជាមួយគ្នានេះ កិច្ចសហប្រតិបត្តិការអភិវឌ្ឍន៍ដោយយកប្រជាជនជាស្នូលគឺជាវិធីសាស្ត្រសំខាន់។
លោក ហ៊ុន សែន បានថ្លែងថា៖ «យើងមានគោលបំណងរួមក្នុងការគាំទ្រ ACC ឱ្យក្លាយជាស្ថាប័នមួយដ៏សំខាន់នៅអាស៊ីក្នុងការលើកកម្ពស់សន្តិភាពបរិយាប័ន្ន ចីរភាព និងភាពធន់របស់សង្គម។ ការប្រយុទ្ធប្រឆាំងនឹងជំងឺរាតត្បាតសកលទាមទារឱ្យមានសាមគ្គីភាព និងភាពជាដៃគូអន្តរជាតិ។ គ្មានប្រទេស ឬសង្គមណាមួយមានសុវត្ថិភាពទេ បើយើងទាំងអស់គ្នាមិនមានសុវត្ថិភាពនោះ»។
កិច្ចប្រជុំនេះបានប្រារព្ធធ្វើឡើង ក្រោមអធិបតីភាពរបស់លោក ចូហ្សេ ដឺវេណេស្សា (Hon. Jose de Venecia) ប្រធានស្ថាបនិកអង្គការ ICAPP និងជាសហប្រធានស្ថាបនិក ACC និងលោកស្រី ឃួន សុដារី អនុប្រធានទី ២ នៃរដ្ឋសភា និងជាអនុប្រធាន ICAPP ថែមទាំងក៏ជាប្រធានក្រុមប្រឹក្សាវប្បធម៌អាស៊ី ដោយមានការចូលរួមពីគណៈប្រតិភូជាន់ខ្ពស់នៅក្នុងទ្វីបអាស៊ី និងតំណាងគណបក្ស នយោបាយសំខាន់ៗក្នុងក្របខ័ណ្ឌ ICAPP រួមជាមួយអ្នកសង្កេតការណ៍មកពីការិយាល័យអង្គការសហប្រជាជាតិ សម្រាប់សេវាគម្រោង (UNOPS) វិទ្យាស្ថានចក្ខុវិស័យអាស៊ី (AVI) និងស្ថាប័នដទៃទៀតផងដែរ។
យោងតាមសេចក្តីប្រកាសព័ត៌មានពីលទ្ធផលលើកិច្ចប្រជុំក្រុមប្រឹក្សាវប្បធម៌លើកទី ២ នេះ សេចក្តីថ្លែងការណ៍ទីក្រុងភ្នំពេញត្រូវបានអនុម័តដោយផ្តោតលើចំណុចសំខាន់ ៣ គឺ ការប្តេជ្ញារបស់ក្រុមប្រឹក្សាវប្បធម៌អាស៊ីក្នុងការកៀរគរធនធានដើម្បីបង្កើនភាពសម្បូរបែបនៃវប្បធម៌ធ្វើជាចលករ ដើម្បីកសាងសេដ្ឋកិច្ចឡើងវិញឱ្យកាន់តែរឹងមាំ ក្រោយការរីករាលដាលនៃជំងឺកូវីដ ១៩។
ចំណុចទី២ គឺការទទួលស្គាល់នូវភាពចាំបាច់ដើម្បីជំរុញការវិនិយោគបន្ថែមទៀតទៅលើការច្នៃប្រឌិត និងការអភិវឌ្ឍដែលជំរុញដោយវប្បធម៌រួមទាំងកិច្ចសហការអន្តរជាតិដើម្បីជំរុញវិស័យច្នៃប្រឌិតវប្បធម៌ដើម្បីភាពរុងរឿងរួមគ្នា។
ចំណែកចំណុចទី៣ គឺកិច្ចសហប្រតិបត្តិការក្នុងការប្រារព្ធព្រឹត្តិការណ៍វប្បធម៌ជាសាធារណៈតាមរយៈប្រព័ន្ធអ៊ីនធឺណិត ឬការជួបគ្នាដោយផ្ទាល់ដោយផ្តោតលើគំនិតផ្តួចផ្តើមវប្បធម៌ រួមមានការរត់ម៉ារ៉ាតុងវប្បធម៌ គំនិតផ្តួចផ្តើមផ្លូវមួយខ្សែក្រវាត់មួយ គម្រោងផ្លូវសូត្ររបស់អង្គការយូណេស្កូ និងគម្រោងដទៃទៀតក្នុងចំណោមប្រទេសជាសមាជិក ដើម្បីលើកកម្ពស់សន្តិភាពយូរអង្វែង ភាពសុខដុម និងកិច្ចសហប្រតិបត្តិការអន្តរជាតិ៕
.jpg)
