ភ្នំពេញៈ ក្រសួងបរិស្ថាន និងអង្គការ WWF កម្ពុជាសម្រេចផ្អាកការជួបជុំប្រារព្ធទិវា ១ ម៉ោង សម្រាប់ភពផែនដីតាមទីសាធារណៈដែលគ្រោងធ្វើនៅថ្ងៃទី ២៨ ខែមីនា ខាងមុខនេះ ប៉ុន្តែបានបង្វែរមកប្រារព្ធទិវានេះតាមរយៈអនឡាញគេហទំព័រហ្វេសប៊ុករបស់ក្រសួង និងអង្គការព្រមទាំងដៃគូប្រព័ន្ធផ្សព្វផ្សាយវិញ ដើម្បីបញ្ចៀសការឆ្លងរាលដាលនៃជំងឺកូវីដ ១៩។
លោក នេត្រ ភក្ត្រា រដ្ឋលេខាធិកា និងជាអ្នកនាំពាក្យក្រសួងបរិស្ថានថ្លែងប្រាប់ភ្នំពេញប៉ុស្ដិ៍កាលពីម្សិលមិញថា ការប្រារព្ធទិវា ១ ម៉ោងសម្រាប់ភពផែនដីក្នុងឆ្នាំនេះ គឺមិនមានការរៀបចំធ្វើនៅតាមទីសាធារណៈដូចឆ្នាំមុនៗទេប៉ុន្តែត្រូវបង្វែរទៅប្រារព្ធពិធីតាមរយៈអនឡាញវិញ។
លោកថ្លែងថា៖ «យើងធ្វើតាមរយៈអនឡាញលើបណ្ដាញទំនាក់ទំនងសង្គម ដោយសារតែបញ្ហានៃការរាតត្បាតជំងឺឆ្លងកូវីដ១៩ គឺយើងមិនអាចរៀបចំការជួបជុំណាមួយបានទេ។ ដូច្នេះការធ្វើយុទ្ធនាការ ១ ម៉ោងសម្រាប់ភពផែនដីគឺត្រូវធ្វើដដែល ប៉ុន្ដែធ្វើតាមអនឡាញដោយមិនមានការជួបជុំដើម្បីមានសុវត្ថិភាពចំពោះការប្រារព្ធទិវានេះ»។
យ៉ាងណាក្ដីលោក ភក្ត្រា បានបញ្ជាក់ថាទិវាមួយនេះមានសារៈសំខាន់ណាស់ ព្រោះជាការបណ្ដុះស្មារតីឱ្យពលរដ្ឋស្រឡាញ់ភពផែនដីតាមរយៈការដាំដើមឈើ ការបញ្ឈប់ការបំផ្លាញធនធានធម្មជាតិ ការសន្សំសំចៃ ការប្រើប្រាស់ថាមពលអគ្គិសនី ការប្រើប្រាស់សម្ភារដែលអាចសន្សំសំចៃថាមពលអគ្គិសនី និងការបញ្ឈប់ការប្រើប្រាស់ប្លាស្ទិកជាដើម។
លោកបានបន្តថា ទោះបីការប្រារព្ធទិវា ១ ម៉ោង សម្រាប់ភពផែនដីឆ្នាំនេះមិនបានធ្វើឡើងដូចរាល់ឆ្នាំក្ដី ក៏ប៉ុន្ដែក្រសួងបរិស្ថានអំពាវនាវដល់ពលរដ្ឋឲ្យចូលរួមអនុវត្ដប្រារព្ធទិវានេះនៅតាមគេហដ្ឋានរៀងខ្លួនតាមរយៈការបិទចរន្តអគ្គិសនីរយៈពេល ១ ម៉ោង ចាប់ពីម៉ោង ៨ កន្លះដល់ម៉ោង ៩ កន្លះយប់ដើម្បីចូលក្នុងទិវានេះ។
លោក ភក្ត្រា បានបន្ថែមថា៖ «ទិវានេះគឺជាការចូលរួមបណ្ដុះស្មារតីរបស់ប្រជាពលរដ្ឋឱ្យស្រឡាញ់ភពផែនដី ចូលរួមការពារភពផែនដី កុំបំពុលបរិស្ថានតាមរយៈសំណល់ប្លាស្ទិក និងចូលរួមកាត់បន្ថយការបំពុលបរិស្ថានអាកាសធាតុ។ ដូច្នេះការងារទាំងនេះក្រសួងបរិស្ថាន និងអង្គការដៃគូនឹងបន្តធ្វើយុទ្ធនាការនេះតាមរយៈអនឡាញ និងតាមបណ្ដាញសង្គមផ្សេងៗទៀត»។
លោក ទេព អស្នារិទ្ធ ប្រធានកិច្ចការសាធារណៈនៃអង្គការ WWF កម្ពុជាបានឱ្យដឹងកាលពីម្សិលមិញដែរថា ទិវា ១ ម៉ោង សម្រាប់ភពផែនដីជាព្រឹត្តិការណ៍ សង្គមបរិស្ថានមួយដែលត្រូវបានប្រារព្ធធ្វើជារៀងរាល់ឆ្នាំដោយមានមនុស្សរាប់លាននាក់នៅជុំវិញពិភពលោកចូលរួមក្នុងនោះក៏មានពលរដ្ឋកម្ពុជានៅគ្រប់ស្រទាប់ក្នុងសង្គមផងដែរ។
លោកបន្តថា៖ «ទិវានេះវាគឺជាឱកាសមួយដែលសាមញ្ញជនទាំងអស់ប្រារព្ធ និងអបអរនូវក្តីស្រឡាញ់របស់ពួកគេចំពោះបរិស្ថាន និងធម្មជាតិព្រមទាំងប្រារព្ធការប្តេជ្ញាចិត្តរបស់ខ្លួនក្នុងការធ្វើសកម្មភាពដែលនាំឱ្យមានការផ្លាស់ប្តូរជាវិជ្ជមាន។ ទិវា ១ ម៉ោងសម្រាប់ភពផែនដី បង្រួបបង្រួមមនុស្សទាំងអស់ ដើម្បីការពារភពផែនដីរបស់យើង»។
លោក ទេព អស្នារិទ្ធ បានឱ្យដឹងថា ដោយសារតែការប្រារព្ធទិវាឆ្នាំនេះធ្វើតាមរយៈអនឡាញ ដូច្នេះអង្គការ WWF កម្ពុជាបានជ្រើសរើសយកគេហទំព័រហ្វេសប៊ុកផ្លូវការរបស់ខ្លួនជាគោលក្នុងការផ្សព្វផ្សាយសកម្មភាពនានានៃយុទ្ធនាការនេះ និងមានការចូលរួមផ្សព្វផ្សាយ ចែករំលែកដោយក្រសួងបរិស្ថាន និងដៃគូសហការមួយចំនួនទៀតផងដែរ។
លោក សេង ទៀក នាយកអង្គការ WWF ប្រចាំកម្ពុជាបានបញ្ជាក់តាមរយៈវីដេអូឃ្លីបមួយមានរយៈពេលជិត ៤ នាទីថា ទិវា ១ ម៉ោង សម្រាប់ភពផែនដីគឺជាចលនាបរិស្ថានសកលដ៏ធំមួយដែលរៀបចំដំបូងកាលពីឆ្នាំ ២០០៧ នៅទីក្រុងស៊ីដនីប្រទេសអូស្ដ្រាលី។ បន្ទាប់មកមានប្រទេសចំនួន ១៨០ នៅក្នុងពិភពលោកបានរៀបចំប្រារព្ធទិវានេះជារៀងរាល់ឆ្នាំនៅតាមបណ្ដាទីក្រុងចំនួនជាង ៧ ០០០។
លោកបានបញ្ជាក់ថា៖ «ទិវានេះរៀបចំឡើងក្នុងគោលបំណងដើម្បីជំរុញទឹកចិត្ដប្រជាពលរដ្ឋទូទៅ និស្សិត យុវជន សហគ្រាសឯកជន អង្គការសមាគមមិនមែនរដ្ឋាភិបាល និងស្ថាប័នរដ្ឋនានាដើម្បីធ្វើសកម្មភាពអ្វីមួយជាវិជ្ជមានសម្រាប់ភពផែនដី»៕