The Phnom Penh Post Search

Search form




Logo of Phnom Penh Post newspaper Phnom Penh Post - ការ​ប្រើ​ទឹក​ស្អាត​នៅ​ជនបទ​កើន​ ៥៣%

ការ​ប្រើ​ទឹក​ស្អាត​នៅ​ជនបទ​កើន​ ៥៣%

Content image - Phnom Penh Post
អ្នក​បន្ទាយមានជ័យ​ដង​ទឹក​បាត​រណ្តៅ​ទៅ​​ប្រើ​​​​ពី​ឆ្នាំ​ ២០១៦។ ហុង មិនា

ការ​ប្រើ​ទឹក​ស្អាត​នៅ​ជនបទ​កើន​ ៥៣%

ភ្នំពេញៈ នៅក្នុង​ឆ្នាំ ២០១៦ ស្ថានភាព​ប្រើប្រាស់​ទឹកស្អាត​របស់​ប្រជាពលរដ្ឋ​នៅ​ជនបទ​មាន​ការ​កើនឡើង ៥៣ ភាគរយ ខណៈ​ស្ថានភាព​អនាម័យ​ជនបទ​សម្រេច​បាន ៥៦ ភាគរយ​ដែល​នេះ​នឹង​អាច​ឈាន​ទៅ​រក​ការ​សម្រេច​តាម​គោលដៅ​ក្នុង​ឆ្នាំ​ ២០២៥​ ឲ្យ​ប្រជាពលរដ្ឋ​ជនបទ ១០០% មាន​ទឹកស្អាត​ប្រើប្រាស់​ និង​មាន​អនាម័យ​ស្អាត។​ នេះ​បើ​តាម​របាយការណ៍​ប្រចាំ​ឆ្នាំ​របស់​ក្រសួង​អភិវឌ្ឍន៍​ជនបទ​ដែល​ចេញ​កាលពី​ម្សិលមិញ។

របាយការណ៍​ដែល​ត្រូវ​បាន​ចែកចាយ​នៅក្នុង​អង្គ​សន្និបាត​របស់​ក្រសួង​អភិវឌ្ឍន៍​ជនបទ​កាលពី​ម្សិលមិញ​បាន​ឲ្យ​ដឹង​​​ថា​គិត​មក​ត្រឹម​ឆ្នាំ​ ២០១៦​ សូចនាករ​ទឹកស្អាត​មាន​ការ​កើនឡើង​ដល់ ​៥៣%​ នៃ​ប្រជាពលរដ្ឋ​ជនបទ និង​សូចនាករ​វិស័យ​អនាម័យ​ជនបទ​សម្រេច​បាន ៥៦ % នៃ​ផែនការ​ ១០០%​។

ចំនួន​នេះ​មាន​ការ​កើនឡើង​បើ​ប្រៀបធៀប​នឹង​ឆ្នាំ​ ២០១៥ ដែល​មាន​​អត្រា​គ្រប​ដណ្តប់​អនាម័យ​ជនបទ​សម្រេច​បាន ៤៦,2 % និង​អត្រា​ប្រើប្រាស់​ទឹកស្អាត​មាន​ ៥២%។

លោក អ៊ុក រ៉ាប៊ុន រដ្ឋមន្រ្តី​ក្រសួង​អភិវឌ្ឍន៍​ជនបទ​ថ្លែង​ថា​នេះ​គឺ​ជោគជ័យ​សម្រាប់​រាជរដ្ឋាភិបាល​ដោយ​មាន​ការ​ចូលរួម​ពី​ភាគី​ពាក់ព័ន្ធ​។​

លោក​បន្ត​​ថា​៖«ឆ្នាំ​ ២០២៥ ​ប្រជាពលរដ្ឋ​នៅ​ជនបទ​គ្រប់​រូប​ត្រូវ​មាន​ការ​ផ្គត់ផ្គង់​ទឹកស្អាត និង​អនាម័យ​គ្រប់គ្រាន់​ និង​រស់នៅ​ក្នុង​បរិស្ថាន​ដែល​មាន​អនាម័យ​ប្រកប​ដោយ​និរន្តរភាព​។​ ក្រសួង​បាន​ជំរុញ​ឲ្យ​មាន​ការ​ចូលរួម​ពី​វិស័យ​ឯកជន​ក្នុង​ការ​ផ្តល់​សេវា​ផ្គត់ផ្គង់​ទឹកស្អាត និង​អនាម័យ​ជនបទ»​។

លោក​វេជ្ជបណ្ឌិត​ ម៉ៅ សារ៉ាយ ប្រធាន​នាយកដ្ឋាន​ផ្គត់ផ្គង់​ទឹក​ជនបទ​បាន​ឲ្យ​ដឹង​ថា​ក្រសួង​អភិវឌ្ឍន៍​ជនបទ​បាន​សាងសង់​ និង​ជួសជុល​អណ្តូង​ទឹក​ស្រះ​ទឹក​បាន​ចំនួន ១៥៨២​ កន្លែង​ និង​បាន​សាងសង់​បង្គន់​ចាក់​ទឹក​តាម​ផ្ទះ​ឯកជន​បាន​ ១០៩ ​បង្គន់​ និង​ផ្តល់​ចាន​បង្គន់​តាម​ផ្ទះ​បាន​ចំនួន ១៦២៩ គ្រួសារ​។

លោក​ថា៖ «ត្រូវ​បង្កើន​ការ​ផលិត​ទឹកស្អាត​ដាក់​ដប​សម្រាប់​ហូប​មាន​តម្លៃ​សមរម្យ​ដែល​គ្រួសារ​ក្រីក្រ​អាច​ទិញ​បាន និង​ត្រូវ​ជីក​ស្រះទឹក​សហគមន៍​​ឲ្យ​បាន​ច្រើន​បន្ថែម​ទៀត៕

អត្ថបទគួរចាប់អារម្មណ៍