The Phnom Penh Post Search

Search form




Logo of Phnom Penh Post newspaper Phnom Penh Post - ការ​ផ្ដល់​សំណង​ពី​ការ​អភិវឌ្ឍ​ទំនប់​វារី​អគ្គិសនី​​ មាន​ភាព​ខុស​គ្នា​ខ្លាំង

ការ​ផ្ដល់​សំណង​ពី​ការ​អភិវឌ្ឍ​ទំនប់​វារី​អគ្គិសនី​​ មាន​ភាព​ខុស​គ្នា​ខ្លាំង

ទំនប់​វារី​អគ្គិសនី​សេសាន​ក្រោម​២​ក្នុង​ខេត្ត​ស្ទឹងត្រែង​ដែល​កំពុង​បន្ត​សាងសង់។
ទំនប់​វារី​អគ្គិសនី​សេសាន​ក្រោម​២​ក្នុង​ខេត្ត​ស្ទឹងត្រែង​ដែល​កំពុង​បន្ត​សាងសង់។ ហេង ជីវ័ន

ការ​ផ្ដល់​សំណង​ពី​ការ​អភិវឌ្ឍ​ទំនប់​វារី​អគ្គិសនី​​ មាន​ភាព​ខុស​គ្នា​ខ្លាំង

ភ្នំពេញៈ តាម​លទ្ធផល​នៃ​ការ​អង្កេត​អង្គការ​មួយ​បាន​រកឃើញ​ថា​ការ​អភិវឌ្ឍ​ទំនប់​សេសាន​ក្រោម ២ សំណង​នៃ​ការ​ចាកចេញ​ដែល​ទាមទារ​ដោយ​សហគមន៍ និង​សំណង​ដែល​ស្នើ​ឡើង​ដោយ​ក្រុមហ៊ុន និង​រាជរដ្ឋាភិបាល​មាន​លក្ខណៈ​ខុស​គ្នា​ខ្លាំង​ហើយ​ជាង​ ៩៣ ​ភាគរយ​នៃ​អ្នក​ភូមិ​ដែល​បាន​ធ្វើ​អង្កេត​នៅ​តែ​ទទូច​ឲ្យ​លុប​ចោល​ការ​សាងសង់​ទំនប់​នេះ។

ការ​រកឃើញ​នេះ​ធ្វើ​ឡើង​ក្នុង​របាយការណ៍​អង្កេត​គោលនយោបាយ​សំណង​ និង​តម្លៃ​ទ្រព្យ​តាម​ទីផ្សារ​គម្រោង​អភិវឌ្ឍន៍​ទំនប់​វារី​អគ្គិសនី​សេសាន​ក្រោម ២ កម្រាស់ ៥៧ ទំព័រ ចេញ​ផ្សាយ​កាលពី​ម្សិលមិញ​ដោយ​វេទិកា​នៃ​អង្គការ​មិនមែន​រដ្ឋាភិបាល​ស្តីពី​កម្ពុជា​ (NGO Forum) ផ្អែក​តាម​ការ​សិក្សា​ស្រាវជ្រាវ និង​ការ​សម្ភាស​ស្ទាបស្ទង់​មតិ​ចំណោម​ប្រជា​សហគមន៍​ ៣៧៨ ​នាក់​ដែល​ត្រូវ​បាន​ជ្រើសរើស​ដោយ​ចោះៗ​ក្នុង​ភូមិ​ជម្រើស ៩ ដែល​រង​ផលប៉ះពាល់​ធ្ងន់ធ្ងរ ឬ​ដោយ​ផ្ទាល់​ពី​ការ​សាងសង់​ទំនប់​នេះ។

តាម​របាយការណ៍​នៃ​ការ​វិភាគ​ប្រជាពលរដ្ឋ​ដែល​បាន​អង្កេត និង​ប្រជាជន​ទូទៅ​នៅ​តំបន់​សេសាន​ក្រោម ២ មិនមែន​ក្រ​ទេ​ស្ថានភាព​សេដ្ឋកិច្ច​ពួកគេ​មាន​កម្រិត​មធ្យម​ហើយ​អ្នក​ខ្លះ​គឺ​ខ្ពស់។ គេហដ្ឋាន​ខ្លះ​ធ្វើ​ពី​បេតុង​ហើយ​ទំហំ​ដី​ជា​មធ្យម​ក្នុង​មួយ​គ្រួសារ​គឺ​ប្រហែល ៥ ​ហិកតា។ ការ​ចិញ្ចឹម​សត្វ​គោ ក្របី និង​ជ្រូក ត្រូវ​បាន​ធ្វើ​នៅ​គ្រប់​ផ្ទះ​ជា​មធ្យម ១០ ​ក្បាល​ក្នុង​មួយ​គ្រួសារ។

តាម​ការ​អង្កេត​នេះ​បាន​រកឃើញ​ថា​ សំណង​គប្បី​មាន​ចំនួន​ជា​មធ្យម ១០៨ ១២៦ ដុល្លារ​សហរដ្ឋ​អាមេរិក​សម្រាប់​គ្រួសារ​នីមួយៗ​បូករួម​នឹង​ថ្លៃ​ចំណាយ​សម្រាប់​ពិធី​តាំង​លំនៅ​ថ្មី ថ្លៃ​ចំណាយ​លើ​ការ​បាត់បង់​ឱកាស​សេដ្ឋកិច្ច​ ដី​ព្រៃ​បញ្ចុះ​សព និង​ដីព្រៃ​អារក្ស​អ្នកតា​នៅក្នុង​សហគមន៍​នីមួយៗ។

របាយការណ៍​ដដែល​នេះ​បាន​ឲ្យ​ដឹង​ថា​ប្រហែល ៩៣ ភាគរយ​នៃ​អ្នក​ឆ្លើយតប​ដែល​បាន​អង្កេត​បាន​ទាមទារ​ឲ្យ​លុប​ចោល​ការ​សាងសង់​ទំនប់​វារី​អគ្គិសនី​សេសាន​ក្រោម ២ ធៀប​នឹង​ត្រឹម​តែ​ ៧,១ ភាគរយ​ដែល​បាន​យល់​ព្រម​ទទួល​យក​សំណង​សមរម្យ និង​យុត្តិធម៌។ សំណង​ជា​ប្រាក់​ស្នើ​សុំ​ជា​មធ្យម​ពី ១៧ ២៥០ ដុល្លារ​អាមេរិក​បូក​នឹង ៦៥ ភាគរយ​ទាមទារ​ដី​កសិកម្ម​ពី ២ ដល់​ ៥ ហិកតា​ក្នុង​មួយ​គ្រួសារ។ លើស​ពី​នេះ ៣៥ ភាគរយ​ពួកគេ​បាន​ទាមទារ​ដី​កសិកម្ម​ទំហំ​ពី ៦ ដល់​ ១០ ហិកតា​ដែល​បញ្ជាក់​ថា​ពលរដ្ឋ​ស្ទើរ​តែ​ទាំងអស់​បាន​ស្នើ​ការ​លុប​ចោល។

លោក​បណ្ឌិត កែម ឡី អ្នក​ស្រាវជ្រាវ​របាយការណ៍​នេះ​បាន​ឲ្យ​ដឹង​ថា​តាម​ការ​សិក្សា​នេះ​សំណង​ជាក់​ស្តែង​ដែល​សង​ដោយ​ក្រុមហ៊ុន​មាន​តម្លៃ​ទាប​ជាង​តម្លៃ​គណនា​ជាក់ស្តែង​ខ្លាំង និង​តិច​ជាង​តម្លៃ​គណនា​ទីផ្សារ។

លោក​ថា៖ «ពិសេស​ត្រង់​ថា​គាត់​មាន​ប្រពៃណី ទំនៀម​ទម្លាប់​ដូនតា​ កន្លែង​បន់ស្រន់​គាត់​មិន​ចង់​ចេញ​ទេ​ទោះ​ឲ្យ ១០ ទៅ ២០ ម៉ឺន​ដុល្លារ​តែ​ដោយសារ​តម្រូវ​ការ​របស់​រដ្ឋាភិបាល...ក៏​មាន​ប្រជាជន​ច្រើន​ទៀត​ដែល​រដ្ឋាភិបាល​នឹង​ប្រឈម​ព្រោះ​អត់​ចង់​ចេញ​ទេ។ បើ​យើង​គណនា​ជា​មធ្យម​ម្នាក់ៗ​មិន​ក្រ​ទេ​ខ្លះ​មាន​ផ្ទះ​ពីរ​ទៀត។ ប៉ុន្តែ​ក្នុង​នោះ​ក៏​មាន​គម្លាត​អ្នក​ក្រ និង​អ្នក​មាន​បើ​យើង​ឲ្យ​ដូច​គ្នា​គឺ​អយុត្តិធម៌​សម្រាប់​អ្នក​មាន»។

ក្រោយ​បទបង្ហាញ​នេះ​អភិបាល​រង​ខេត្ត​ស្ទឹងត្រែង​លោក ដួង ពៅ ក៏​បាន​រិះគន់​ភ្លាម​ទៅ​លើ​ការ​លើក​ឡើង​ក្នុង​របាយការណ៍​នេះ​ថា​ជា​ការ​កេង​ចំណេញ​មិន​ឆ្លុះ​បញ្ចាំង​ពី​ការ​ពិត និង​ជា​ការ​ស្រាវជ្រាវ​មិន​ឯករាជ្យ​មិន​មាន​កិច្ច​សហការ​ពី​អាជ្ញាធរ​មូលដ្ឋាន។

លោក​ថា៖ «នេះ​គ្រាន់តែ​ជា​ជ្រុង​មួយ​នៃ​ការ​រកឃើញ​ខ្ញុំ​មិន​ទទួល​បាន​ទេ​ហើយ​ការ​រក​ឃើញ​នេះ​បង្ក​នូវ​ការ​ភាន់ច្រឡំ​ដល់​គោលនយោបាយ​របស់​រដ្ឋាភិបាល​ខ្ញុំ​អត់​កាន់​ជើង​ក្រុមហ៊ុន​ទេ​ព្រោះ​ខ្ញុំ​នៅ​ជាមួយ​ពលរដ្ឋ​ខ្ញុំ​មិន​ស៊ី​ឈ្នួល​ឲ្យ​ក្រុមហ៊ុន​ចិន​ទេ»។

បើ​តាម​លោក ដួង ពៅ សំណង ផែនការ​របស់​រាជរដ្ឋាភិបាល​ជា​សំណង​នៃ​ការ​ចាកចេញ​អ្នក​ភូមិ​ផ្លាស់​លំនៅ​នឹង​ត្រូវ​បាន​ផ្តល់​ជូន​ផ្ទះ​មួយ​ខ្នង​ទំហំ​ ៨០ ម៉ែត្រការ៉េ ដី​ភូមិ​ទំហំ ១ ០០០ ម៉ែត្រការ៉េ​សម្រាប់​សង់​លំនៅឋាន​ថ្មី និង​ដី ៥ ​ហិកតា​សម្រាប់​គ្រួសារ​នីមួយៗ​ដាំ​ដំណាំ​ចំណែក​ភាគី​ក្រុមហ៊ុន​ក៏​បាន​ធានា​ជួយ​ឧបត្ថម្ភ​អង្ករ​ដល់​ពលរដ្ឋ​ម្នាក់ ២០ ​គីឡូក្រាម​ក្នុង​ ១ ​ខែ​សម្រាប់​រយៈពេល​ ១ ឆ្នាំ។ បច្ចុប្បន្ន​ទំនប់​នេះ​បាន​សាងសង់​រួច​ប្រមាណ​ ៤០ ​ភាគរយ។

ផ្ទុយ​ពី​ការ​លើក​ឡើង​រកឃើញ​ក្នុង​របាយការណ៍ ​រដ្ឋលេខាធិការ​ក្រសួង​រ៉ែ និង​ថាមពល​លោក អ៊ិត ប្រាំង បាន​ឲ្យ​ដឹង​តាម​សម្រង់​ស្ថិត​នៃ​ក្រុម​ការងារ​រដ្ឋាភិបាល​ថា​ប្រជាពលរដ្ឋ​ជិត​ ៦៥ ​ភាគរយ​ដែល​បាន​ទទួល​យក​សំណង​គឺ​មិន​បាន​ស្នើសុំ​ឲ្យ​លុប​ចោល​ការ​សង់​ទំនប់​នេះ​ឡើយ។

លោក​ថា៖ «អ្នកខ្លះ​គ្រាន់​តែ​ស្នើ​បន្ទាប​ទំនប់​បន្តិច​ខ្ញុំ​ទទួល​ថា​មាន​អ្នក​មិន​ចង់​ឲ្យ​ធ្វើ​តែ​ក៏​មាន​អ្នក​មិន​ប្រឆាំង​ដែរ។ ខ្ញុំ​កត់សម្គាល់​ឃើញ​ថា​លោក​បណ្ឌិត​ស្រាវជ្រាវ​ប្រើ​អារម្មណ៍​លាយ​ឡំ​ក្នុង​ការ​ស្រាវជ្រាវ​ដោយ​មិន​មាន​មូលដ្ឋាន​ទេ​ខ្ញុំ​គិត​ថា​មិន​គួរ​ផ្សព្វផ្សាយ​របាយការណ៍​នេះ​លុះ​ណា​តែ​មាន​ឯករាជ្យ​ពេញលេញ​សិន​ក្នុង​នាម​រដ្ឋាភិបាល​មិន​អាច​ទទួល​យក​បាន​ទេ»។

ទោះបី​ជា​មាន​ការ​ឆ្លើយតប​យ៉ាង​នេះ​ក្តី​លោក កែម ឡី មាន​សុទិដ្ឋិនិយម​ចំពោះ​របាយការណ៍​ថ្មី​ដែល​លោក​បាន​ស្រាវជ្រាវ​នេះ​ថា​មាន​ភាព​លម្អៀង​ប្រមាណ​តែ ៥ ​ភាគរយ​ប៉ុណ្ណោះ។

តំណាង​ពលរដ្ឋ​លោកស្រី លីបិ បាន​ឲ្យ​ដឹង​ថា​ប្រជាសហគមន៍​រង​ផលប៉ះពាល់​នៅ​តែ​ស្នើ​ឲ្យ​រដ្ឋាភិបាល​ថ្លឹងថ្លែង​វាយ​តម្លៃ​អចលនទ្រព្យ និង​ការ​ផ្លាស់ប្តូរ​ឲ្យ​បាន​សមរម្យ​បើ​នៅ​តែ​បន្ត​គម្រោង​នេះ។

លោក​ថា៖ «ជីវភាព​ជាក់ស្តែង​អ្នក​ផ្លាស់ប្តូរ​ថ្មីៗ​មួយ​ចំនួន​បាន​បាត់បង់​ចំណូល​ប្រចាំ​ថ្ងៃ​ ដី​ចម្ការ​ កន្លែង​ថ្មី​គ្មាន​ជីជាតិ...សូម​រដ្ឋាភិបាល​ផ្តល់​ឱកាស​ឲ្យ​ពលរដ្ឋ​អាច​និយាយ​ជាមួយ​ក្រុមហ៊ុន​ដើម្បី​ទាមទារ​សំណង​សមរម្យ»។

ទំនប់​វារី​អគ្គិសនី​សេសាន​ក្រោម ២ គឺជា​គម្រោង​អភិវឌ្ឍន៍​ដ៏​ធំ​ជាង​គេ​ដំបូង​បង្អស់​នៅ​កម្ពុជា​ស្ថិត​នៅ​តាម​ដង​ទន្លេ​សេសាន ខេត្ត​ស្ទឹងត្រែង​ដែល​គ្រោង​ចំណាយ​អស់​ប្រមាណ ៨០០ លាន​ដុល្លារ​សហរដ្ឋអាមេរិក។ នៅពេល​សាងសង់​រួចរាល់​ទំនប់​នេះ​នឹង​មាន​កម្ពស់​ប្រហែល​ ៧៥ ​ម៉ែត្រ និង​មាន​ប្រវែង​ ៨ ​គីឡូម៉ែត្រ​ដែល​បង្កើត​អាង​ស្តុក​ទឹក​ទំហំ​ ៣៣ ៥៦០ ហិកតា​ជាមួយ​នឹង​អានុភាព​ផលិត​អគ្គិសនី ៤០០ មេហ្គាវ៉ាត់៕

អត្ថបទគួរចាប់អារម្មណ៍