ពោធិ៍សាត់ៈ បន្ទាប់ពីមានការផ្លាស់ប្ដូរតួនាទី និងភារកិច្ចគ្រូបង្រៀន ៣ នាក់ នៃវិទ្យាល័យហ៊ុនសែនឈើតុំស្ងាត់ៗនាពេលថ្មីៗនេះបានបង្កឲ្យសិស្សានុសិស្សមួយចំនួនធ្វើពហិការមិនចូលរៀនបំប៉ន និងបាននាំគ្នាបង្ហោះសារតាមបណ្ដាញសង្គមរិះគន់ថា ជាការផ្ដើមគំនិតពីគណៈកម្មការគ្រប់គ្រងសាលាឃុបឃិតគ្នាប្ដឹង ប៉ុន្តែត្រូវបានច្រានចោលថា ជារឿងមិនពិត។
កាលពីថ្ងៃទី ១៧ ខែ ធ្នូ ឆ្នាំ ២០១៩ លោក ម៉ៅ សៅភារិទ្ធិ គ្រូបង្រៀនមុខវិជ្ជារូបវិទ្យា, លោក ខុន ភ័ក្ត្រា គ្រូបង្រៀនមុខវិជ្ជាអក្សរសាស្ត្រខ្មែរ និងលោក មឿន មី គ្រូបង្រៀនមុខវិជ្ជាគណិតវិទ្យានៃវិទ្យាល័យហ៊ុនសែនឈើតុំដែលស្ថិតនៅក្នុងឃុំឈើតុំ ស្រុកក្រគរ ខេត្តពោធិ៍សាត់បានទទួលលិខិតឧទ្ទេសនាមការងារថ្មីផ្សេងៗគ្នាពីមន្ទីរអប់រំ យុវជន និងកីឡាខេត្តពោធិ៍សាត់។
ក្នុងលិខិតនោះបានតម្រូវឲ្យពួកគាត់ត្រូវទៅបង្ហាញខ្លួននៅអង្គភាពថ្មីនៅថ្ងៃទី ២០ ខែ ធ្នូ ឆ្នាំ ២០១៩ ប៉ុន្តែមិនបានបញ្ជាក់អំពីមូលហេតុនៃការផ្លាស់ប្ដូរតួនាទី និងភារកិច្ចរបស់ពួកគាត់នោះទេ។
លោក ម៉ៅ សៅភារិទ្ធិ បានប្រាប់ភ្នំពេញប៉ុស្តិ៍កាលថ្ងៃចន្ទថា៖ «រហូតមកទល់ពេលនេះ យើងខ្ញុំទាំង ៣ នាក់ នៅមិនទាន់ដឹងពីមូលហេតុជាក់ច្បាស់អំពីការផ្លាស់ប្ដូរតួនាទី និងភារកិច្ចនេះនៅឡើយទេ។ ប៉ុន្តែនៅព្រឹកថ្ងៃចន្ទយើងខ្ញុំបាននាំគ្នាទៅបង្ហាញខ្លួននៅក្នុងអង្គភាពថ្មីរៀងៗខ្លួនហើយ ដើម្បីចៀសវាងកំហុសរដ្ឋបាល»។
លោក សៅភារិទ្ធិ បានបន្តថា គាត់ត្រូវបានផ្លាស់ប្ដូរទៅបម្រើការងារនៅការិយាល័យមធ្យមសិក្សានៃមន្ទីរអប់រំ យុវជន និងកីឡាខេត្តពោធិ៍សាត់ ខណៈលោក ខុន ភ័ក្ត្រា ត្រូវបានផ្លាស់ប្ដូរទៅបម្រើការងារនៅគរុកោសល្យវិក្រឹតការខេត្តពោធិ៍សាត់។ ចំណែក លោក មឿន មី ត្រូវបានផ្លាស់ប្ដូរទៅបម្រើការងារនៅការិយាល័យអប់រំស្រុកក្រគរ ទទួលបន្ទុកផ្នែកយុវជន។
ក្រោយពីបង្ហាញខ្លួននៅការិយាល័យអប់រំស្រុកក្រគរកាលពីថ្ងៃចន្ទ លោក មឿន មី បានប្រាប់ភ្នំពេញប៉ុស្តិ៍ថា តាមរយៈការផ្ដល់ព័ត៌មានពីសិស្សានុសិស្ស និងអាណាព្យាបាលសិស្សមួយចំនួន ករណីផ្លាស់ប្ដូរតួនាទីភារកិច្ចរបស់ពួកគាត់ទាំង ៣ គឺផ្ដើមចេញពីសិស្សភាគច្រើននៅក្នុងសាលានេះមិនព្រមចូលរៀនបំប៉នតាមគោលការណ៍សាលាដែលតម្រូវឲ្យរៀនបន្ថែម ១២ ម៉ោងក្នុង ១ សប្ដាហ៍ លើមុខវិជ្ជាចំនួន ៥ មុខរួមមានគណិតវិទ្យា រូបវិទ្យា គីមី អក្សរសាស្ត្រខ្មែរ និងភាសាអង់គ្លេស និងតម្រូវឲ្យសិស្សបង់ថ្លៃរៀនបំប៉ននេះក្នុងម្នាក់ៗ ៣៦ ០០០ រៀលក្នុង ១ ខែ។
លោក មី បានបញ្ជាក់ថា៖ «បើតាមការអះអាងពីសិស្ស និងមាតាបិតាសិស្សមួយចំនួនគណៈកម្មការគ្រប់គ្រងសាលា និងគ្រូបង្រៀនមួយចំនួនដែលសិស្សមិនចូលចិត្តរៀនគួរជាមួយបានឃុបឃិតគ្នាជាមួយតំណាងសហគមន៍មាតាបិតាសិស្សមួយចំនួនទៀតប្ដឹងយើងខ្ញុំទៅកាន់រដ្ឋបាលសាលាខេត្តពោធិ៍សាត់ដោយចោទប្រកាន់ថាយើងខ្ញុំទាំង ៣ នាក់ជាអ្នកនៅពីក្រោយខ្នងការបំផុសបំផុលសិស្សមិនឲ្យចូលរៀនបំប៉នតាមគោលការណ៍ណែនាំរបស់ក្រសួងអប់រំ»។
លោកបានបន្ថែមថា៖ «បើយ៉ាងដូច្នោះមែន វាជារឿងអយុត្តិធម៌ណាស់សម្រាប់យើងខ្ញុំទាំង ៣ នាក់ ព្រោះយើងខ្ញុំមិនពាក់ព័ន្ធអ្វីទាល់តែសោះចំពោះការសម្រេចចិត្តរបស់ពួកគេ»។
កាលពីថ្ងៃចន្ទនៅលើប្រព័ន្ធបណ្ដាញសង្គមសិស្សានុសិស្ស និងអាណាព្យាបាលមួយចំនួនបានបញ្ចេញមតិចោទប្រកាន់អ្នកស្រី អ៊ុល ចន្នី នាយិកាវិទ្យាល័យ ហ៊ុន សែន ឈើតុំ និងលោក ឆេង ចាន់រឿន នាយករងវិទ្យាល័យនេះ រួមទាំងបុគ្គលិកសិក្សាមួយចំនួនទៀតថាជាអ្នកនៅពីក្រោយការអុជអាលឲ្យមានការផ្លាស់ប្ដូរតួនាទី និងភារកិច្ចរបស់គ្រូបង្រៀនទាំង ៣ នេះ និងបានគំរាមថានឹងប្ដឹងទៅសមត្ថកិច្ចនគរបាល ២០០ នាក់ឲ្យចូលមកចាប់សិស្សណាដែលបន្តភាពចលាចលមិនចូលរៀនបំប៉ន។
ហ្វេសប៊ុកឈ្មោះ ចាំង គឹមហាន បានសរសេរថា៖ «គាត់ថាបើគ្រូទាំង ៣ ត្រូវបានដកចេញហើយ បើសិស្សនៅតែបន្តចលាចលក្នុងសាលាគាត់នឹងនាំសមត្ថកិច្ច ២០០ នាក់ មកចាប់ពួកខ្ញុំ»។
ក៏ប៉ុន្តែលោក ឆេង ចាន់រឿន បានប្រាប់ភ្នំពេញប៉ុស្តិ៍កាលពីថ្ងៃចន្ទដោយច្រានចោលចំពោះមតិរិះគន់ និងចោទប្រកាន់ពីក្រុមសិស្ស និងមាតាបិតាសិស្សទាំងនោះហើយថា ករណីផ្លាស់ប្ដូរតួនាទី និងភារកិច្ចនោះមិនពាក់ព័ន្ធគាត់ និងនាយិកានោះទេ ប៉ុន្តែវាជាសំណើរបស់តំណាងសហគមន៍ ដែលមិនពេញចិត្តចំពោះវិធីសាស្ត្របង្រៀនរបស់ពួកគាត់។
លោកថ្លែងថា៖ «យើងខ្ញុំមិនបានប្ដឹង ឬផ្លាស់ប្ដូរតួនាទីរបស់ពួកគាត់នោះទេតែយើងខ្ញុំបានរងនូវការរិះគន់ និងចោទប្រកាន់ដោយអយុត្តិធម៌ផងដែរ ពីតំណាងសហគមន៍មាតាបិតាសិស្សចំពោះករណីនេះ។ មាតាបិតាសិស្សភាគច្រើនគាត់បានប្ដឹងទៅឯកឧត្តមអភិបាលខេត្តដោយទាមទារផ្លាស់លោកគ្រូទាំង ៣ ទៅកន្លែងផ្សេង ប៉ុន្តែដោយមូលហេតុអ្វីផ្សេងនោះយើងខ្ញុំមិនដឹងទេ»។
លោកបានបន្តថា៖ «អ្វីដែលខ្ញុំបានដឹងនោះគឺពួកគាត់ទាំង ៣ ត្រូវបានផ្លាស់ប្ដូរទៅកាន់តួនាទីខ្ពស់ជាងមុន»។
យ៉ាងណាក៏ដោយអាណាព្យាបាលសិស្សម្នាក់គឺលោក សឿន ចាន់នី បានប្រាប់ភ្នំពេញប៉ុស្តិ៍ថា លោកគ្រូទាំង ៣ នាក់នោះបានលួចបញ្ចូលសារនយោបាយរបស់គណបក្សសម្ព័ន្ធដើម្បីប្រជាធិបតេយ្យមួយចំនួនដល់កូនៗរបស់ពួកគាត់ និងធ្លាប់បានដឹកនាំកូនៗរបស់ពួកគាត់ឲ្យទៅចូលរួមលើកស្លាកសញ្ញាគណបក្សនោះជាដើម។
លោកបានថ្លែងថា៖ «ខ្ញុំមិនដឹងថាគាត់មានកំហុសអ្វីនោះទេ ប៉ុន្តែវាមានរឿងច្រើនករណីដូចជា រឿងបញ្ចូលសារនយោបាយរបស់គណបក្សជួងនេះជាដើម ខ្ញុំមិនចង់ឲ្យកូនៗខ្ញុំស្វែងយល់ពីសារនយោបាយរបស់បក្សនេះនោះទេ»៕