ភ្នំពេញៈ ការស្រាវជ្រាវមួយបានបង្ហាញថាការផ្សព្វផ្សាយលក់ផលិតផលជំនួសទឹកដោះម្តាយ និងម្សៅទឹកដោះគោផ្សំមិនស្របច្បាប់មានលក្ខណៈធ្ងន់ធ្ងរនៅកម្ពុជាដែលនាំឲ្យអត្រាបំបៅកូនដោយទឹកដោះម្តាយបន្តធ្លាក់ចុះចំណែកមហាជនបែរជាកើនការភាន់ច្រឡំអំពីអត្ថប្រយោជន៍នៃផលិតផលជំនួសទឹកដោះម្តាយទាំងនោះវិញ។
របាយការណ៍រួមចេញផ្សាយកាលពីថ្ងៃទី ១៧ ខែសីហា ឆ្នាំ ២០១៥ ដោយអង្គការទស្សនៈពិភពលោក Wold Vision និងអង្គការ Hellen Keller International បានឲ្យដឹងថាការស្រាវជ្រាវនេះគឺផ្អែកលើផលិតផលជំនួសទឹកដោះម្តាយ ១១០ មុខខុសៗគ្នាដែលត្រូវបានដាក់តាំងលក់នៅតាមខេត្តចំនួន ៦ នៅកម្ពុជាហើយ ៥៨ ភាគរយនៃទីតាំងលក់ផលិតផលទាំងនោះបាននិងកំពុងផ្សព្វផ្សាយលើកម្ពស់ការប្រើប្រាស់ដោយរំលោភបំពានច្បាប់រដ្ឋ។
តាមរយៈរបាយការណ៍រួមនេះរូបភាពនៃការផ្សព្វផ្សាយលក់មិនស្របច្បាប់ចំនួន៧ ត្រូវបានរកឃើញក្នុងនោះមានការដាក់លក់ផលិតផលជំនួសទឹកដោះម្តាយ និងម្សៅទឹកដោះគោផ្សំដោយការបញ្ចុះតម្លៃពិសេសការដាក់បង្ហាញ ឬតុបតែងតាំងផលិតផលលេចធ្លោ ការចែកខិត្តប័ណ្ណផ្សព្វផ្សាយផលិតផលការផ្តល់ជាកាដូបន្ថែម ការផ្តល់ផលិតផលគំរូសាកល្បង,ការប្រើប្រាស់បុគ្គលិកដើរផ្សព្វផ្សាយ, និងការប្រមូលសម្បកផលិតផលប្តូរយករង្វាន់ជាដើម។
កញ្ញា សួង សុខសោភា ប្រធានជាន់ខ្ពស់នៃយុទ្ធនាការលើកកម្ពស់សុខភាពមាតា និងទារកនៃអង្គការទស្សនៈពិភពលោកបានថ្លែងថាការស្រាវជ្រាវនេះបានបង្ហាញនូវការភ្ញាក់ផ្អើលដែលការផ្សព្វផ្សាយលក់ផលិតផលជំនួសទឹកដោះម្តាយ និងម្សៅទឹកដោះគោផ្សំត្រូវបានគេរកឃើញក្នុងរូបភាពរំលោភបំពានលើអនុក្រឹត្យលេខ ១៣៣ និងប្រកាសរួមអន្តរក្រសួងលេខ ០៦។
កញ្ញាថា៖ «៥៨ ភាគរយនៃទីតាំងលក់ ៦៦ កន្លែងនៃសំណាកមិនបានឆ្លើយតបនឹងលក្ខខណ្ឌរដ្ឋតម្រូវចំណែកឯវិធីក្នុងការឃោសនាគឺមិនស្របតាមច្បាប់។ ច្បាប់របស់យើងគឺជំរុញឲ្យលើកកម្ពស់ការបំបៅកូនដោយទឹកដោះម្តាយព្រោះវាមានសារជាតិពិសេសជួយឲ្យកុមារមានរាងកាយរឹងមាំមិនឆាប់ឆ្លងជំងឺ»។
កម្ពុជាបានអនុម័តលើអនុក្រឹត្យលេខ ១៣៣ ស្តីពីការផ្សព្វផ្សាយលក់ផលិតផលសម្រាប់ចិញ្ចឹមទារក និងកុមារនៅឆ្នាំ ២០០៥ ដោយទទួលស្គាល់ការបំបៅកូនដោយទឹកដោះម្តាយគឺជាជម្រើសដ៏ល្អបំផុតសម្រាប់សុខភាពកុមារអាយុក្រោម ២ ឆ្នាំ។ គោលបំណងនៃច្បាប់នេះគឺដើម្បីធានាថាក្រុមហ៊ុនផលិតនឹងមិនប្រើប្រាស់ព័ត៌មាននៃការផ្សព្វផ្សាយលក់មិនសមស្រប និងក្លែងបន្លំ ឬប្រើស្លាកសញ្ញាដែលអាចភាន់ច្រឡំដល់ឪពុកម្តាយ ឬអ្នកថែទាំកុមារ។
កញ្ញា សួង សុខសោភា បានបន្ថែមថា «ផលប៉ះពាល់ភ្លាមៗនៃការប្រើប្រាស់ផលិតផលជំនួសទឹកដោះម្តាយគឺកុមារ ឬទារកអាចនឹងមានជំងឺរាករូស និងឈឺច្រើនហើយកាន់តែធ្ងន់ធ្ងរនោះគឺអាចប្រឈមនឹងជំងឺទឹកនោមផ្អែម ឬលើសឈាមទៅថ្ងៃអនាគតដោយសារការប្រើផលិតផលដែលមិនបានផលិតតាមស្តង់ដារពិតប្រាកដ»។
ការអង្កេតប្រជាសាស្ត្រ និងសុខភាពកម្ពុជាឆ្នាំ ២០១៤ បានបង្ហាញថារយៈពេល ៥ ឆ្នាំចុងក្រោយនេះកម្ពុជាបានធ្លាក់ចុះនូវអត្រាបំបៅកូនដោយទឹកដោះម្តាយតែមួយគត់ពី ៧៣,៥ ភាគរយនៅឆ្នាំ ២០១០ មកត្រឹម ៦៥ ភាគរយនៅឆ្នាំ ២០១៤។ដោយឡែកការបំបៅកូនដោយដបសិប្បនិម្មិតចាប់ពីកុមារកើតដល់អាយុ ៥ ខែបានកើនឡើងពី ១៣,៦ ភាគរយរហូតដល់ ១៩,៨ ភាគរយក្នុងរយៈពេលដូចគ្នា។
លោកស្រី ប្រាក់ សោភ័ណនារី នាយិការងមជ្ឈមណ្ឌលគាំពារមាតា និងទារកបានឲ្យដឹងថាផ្អែកតាមលទ្ធផលនៃរបាយការណ៍នេះក្រសួងសុខាភិបាល និងភាគីពាក់ព័ន្ធទទួលនឹងក្លាយជាមូលដ្ឋានក្នុងការត្រួតពិនិត្យរបស់សមត្ថកិច្ចដើម្បីពង្រឹងនូវការផ្សព្វផ្សាយផលិតផលជំនួសទឹកដោះម្តាយ និងទប់ស្កាត់ការនាំចូលផលិតផលខូចគុណភាពផងដែរ។
លោកស្រីថា៖ «ក្រសួងសុខាភិបាលបានបង្កើតនូវគណៈកម្មការត្រួតពិនិត្យខ្លឹមសារនៃការអនុវត្តអនុក្រឹត្យ ១៣៣ នោះដែលកន្លងមកបានអនុវត្តតួនាទីតាមដានការផ្សព្វផ្សាយផលិតផលចិញ្ចឹមទារក និងកុមារដោយបានទប់ស្កាត់នូវលំហូរចូលជាច្រើននៃផលិតផលខូចគុណភាពលើកស្ទួយការបំបៅកូនដោយទឹកដោះម្តាយ»។
បើតាមលោកស្រី ប្រាក់ សោភ័ណនារី ក្នុងករណីដែលក្រុមហ៊ុន ឬទីតាំងលក់ផលិតផលជំនួសទឹកដោះម្តាយត្រូវបានរកឃើញផ្សព្វផ្សាយផលិតផលរបស់ខ្លួនបំពានច្បាប់នោះក្រសួងសុខាភិបាលនឹងកោះហៅទៅព្រមានដោយធ្វើកិច្ចសន្យាហាមឃាត់នូវសកម្មភាពទាំងនោះប៉ុន្តែបើរកឃើញជាលើកទី ២ នោះគឺក្រសួងនឹងបញ្ឈប់ផ្តល់អាជ្ញាប័ណ្ណក្នុងការធ្វើអាជីវកម្មនេះ។
តាមរយៈអនុសាសន៍របស់អង្គការសុខភាពពិភពលោកម្តាយៗគប្បីបំបៅកូនតូចរបស់ពួកគេដោយទឹកដោះម្តាយតែមួយមុខគត់រហូតដល់អាយុ ៦ ខែ និងបន្តបំបៅព្រមទាំងផ្តល់អាហារបន្ថែមឲ្យបានត្រឹមត្រូវរហូតដល់កុមារអាយុ ២៤ ខែ ( ២ ឆ្នាំ ) ឬលើសពីនេះ៕
